1, 2. (a) Yini lokufanele yentiwe bantfu baNkulunkulu endzabeni yekutiphatsa? (b) Ngumiphi imibuto letawuphendvulwa ngulesihloko?

JEHOVA waphefumulela umphostoli Phetro kutsi ahlobanise kuba ngcwele lokugcizelelwa encwadzini yaLevithikhusi nesidzingo sekuba ngcwele ekutiphatseni kwetfu njengobe singemaKhristu. (Fundza 1 Phetro 1:14-16.) ‘Loyo Longcwele,’ Jehova, ulindzele kutsi labo labagcotjiwe ‘naletinye timvu’ bente konkhe lokusemandleni kute babe ngcwele kuko konkhe kutiphatsa kwabo—hhayi nje ekutiphatseni lokutsite.—Joh. 10:16.

² Kuhlola kabanti tifundvo letibalulekile letitfolakala kuLevithikhusi kutasizuzisa kakhulu, futsi kusebentisa loko lesikufundzako kutasisita sikhombise kutsi singcwele kuko konkhe kutiphatsa kwetfu. Sitawucoca ngalemibuto lelandzelako: Kufanele sikutsatse njani kwephula timiso taNkulunkulu? Incwadzi yaLevithikhusi isifundzisani mayelana nekusekela bukhosi baJehova? Yini lesingayifundza endzabeni yekunikela imihlatjelo?

3, 4. (a) Kungani emaKhristu akubalekela kwephula imitsetfo netimiso letiseBhayibhelini? (b) Kungani kungakafaneli siphindzisele nobe sibambe emagcubu?

³ Nangabe sifuna kujabulisa Jehova, kufanele sibambelele ngalokucinile emitsetfweni nasetimisweni takhe, singabi nesimo sengcondvo lesingakalungi lesingasenta sitephule. Nanobe  singekho ngaphansi kweMtsetfo waMosi, loko lobekufunwa nguloMtsetfo kusiniketa kucondza endzabeni yekutsi ngukuphi lokwemukelekako nalokungemukeleki emehlweni aNkulunkulu. Sibonelo saloku kutsi ema-Israyeli aniketwa lomyalo lotsi: “Ungatibuyiseleli nome ube nemagcubu nebantfwana bebantfu bakini, kodvwa uyawutsandza makhelwane wakho njengobe utitsandza wena. NginguSimakadze.”—Lev. 19:18.

⁴ Jehova ufuna kutsi sikubalekele kutiphindziselela futsi singawabambi emagcubu. (Rom. 12:19) Nasingayilaleli imitsetfo netimiso taNkulunkulu, Develi utawujabula futsi kungenteka sihlambalate Jehova. Ngisho nobe lotsite asiphetse kabi ngemabomu, asingavumi kuba titja letigcina intfukutselo. Nkulunkulu usinikete lilungelo lekuba ‘titja telubumba’ letiphetse umcebo wemsebenti wekushumayela. (2 Khor. 4:1, 7) Intfukutselo leyonakalisako ayihlali kuletitja telubumba!

5. Yini lesingayifundza endzabeni ya-Aroni neyekufa kwemadvodzana akhe? (Buka sitfombe lesisekucaleni kwalesihloko.)

⁵ Lokuhlangenwe nako lokubuhlungu kakhulu lokwenteka emndenini wa-Aroni kubhalwe kuLevithikhusi 10:1-11. Kufanele kutsi lomndeni wamangala kakhulu ngesikhatsi umlilo lovela ezulwini ushisa emadvodzana a-Aroni, boNadabi na-Abihu, ethendeni lekukhontela. Kukholwa kwa-Aroni nemndeni wakhe kwavivinywa kakhulu ngekutsi bekufanele bangatilileli tihlobo tabo lebetifile. Uyakhombisa yini kutsi ungcwele endzabeni yekungatihlanganisi nemalunga emndeni nobe labanye labayekelisiwe kuba BoFakazi?—Fundza 1 Khorinte 5:11.

6, 7. (a) Nangabe sifuna kwenta sincumo sekutsi sitawuya yini emshadweni lotawube usesontfweni, ngumaphi emaphuzu labalulekile lokufanele siwacabangele? (Fundza umbhalo longentansi.) (b) Nguyiphi indlela lesingabonisana ngayo netihlobo tetfu letingasibo BoFakazi endleleni lesiwutsatsa ngayo umshado losesontfweni?

⁶ Singase singahlangabetani neluvivinyo lolumatima njengalolo lwa-Aroni nemndeni wakhe. Kodvwa kutsiwani nangabe simenywe emshadweni wesihlobo lesingasiye Fakazi lotawube usesontfweni futsi sicelwa kutsi sente lokutsite kuwo? Awukho umBhalo locondzile losivimbela kutsi singayi. Kodvwa tikhona yini timiso teliBhayibheli letingasisita kutsi sitsatse sincumo kulendzaba? *

⁷ Kutimisela kwetfu kutsi sibe ngcwele kuJehova kulesimo lesisandza kusisho, kungase kutidide tihlobo tetfu letingasibo BoFakazi. (1 Phet. 4:3, 4) Kuliciniso kutsi siyakubalekela kuticansula, kodvwa ngalokuvamile kuhle kakhulu kukhuluma nato ngemusa nangendlela lecondzile. Mhlawumbe loko ungakwenta kusesele sikhatsi lesidze kutsi kufike loyo mcimbi. Singatibonga sisho nekutsi sijabula kakhulu ngekutsi tisimemile kutsi sibe khona kulomshado. Ngemuva kwaloko singachaza kutsi ngenca yetinkholelo tetfu, kuhlanganyela kwetfu kulomcimbi kungase kuphatamise injabulo yato kulelilanga lelikhetsekile futsi kungaba lihlazo kuto nakulabo labete kulomshado. Lena ngulenye indlela lesingakubalekela ngayo kulahla tinkholelo tetfu nekukholwa kwetfu.

8. Incwadzi yaLevithikhusi ibugcamisa njani bukhosi baJehova?

⁸ Incwadzi yaLevithikhusi igcamisa bukhosi baJehova. Tikhatsi letingetulu kwa-30, imitsetfo letfolakala kuLevithikhusi ichazwa njengaleyo levela kuJehova. Mosi wakuvuma loko futsi wenta njengobe Jehova abemyalile. (Lev. 8:4, 5) Ngendlela lefanako, natsi kufanele sihlale senta loko iNkhosi yetfu Jehova lefuna sikwente. Nasenta njalo, siyati kutsi sisekelwa yinhlangano yaNkulunkulu. Kodvwa kukholwa kwetfu kungase kuvivinywe nasisodvwa, njengobe kwenteka nakuJesu ngesikhatsi alingwa nakasehlane. (Luk. 4:1-13) Nangabe sisekela bukhosi  baNkulunkulu futsi simetsemba, kute longasenta sephule timiso takhe futsi sincotjwe kwesaba.—Taga 29:25.

9. Kungani tonkhe tive tibatondza bantfu baNkulunkulu?

⁹ Njengobe sibalandzeli baKhristu futsi siBoFakazi BaJehova, siphatfwa kabi etiveni letinyenti kuwo wonkhe umhlaba. Loko kuyintfo lelindzelekile njengobe naJesu atjela bafundzi bakhe watsi: “Bantfu bayawunihlupha, banibulale, futsi niyawutondvwa tive tonkhe ngenca yelibito lami.” (Mat. 24:9) Kodvwa nasibhekene naleso simo siyabeketela emsebentini wekushumayela ngeMbuso futsi sichubeke sikhombisa kutsi singcwele kuJehova. Nanobe setsembekile, sihlantekile futsi sitakhamuti letiwulalelako umtsetfo, kungani sitondvwa kangaka? (Rom. 13:1-7) Kungobe sente Jehova waba yiNkhosi yetfu lenguMbusi! Sinikela umsebenti longcwele ‘kuye yedvwa’ futsi ngeke siyephule imitsetfo netimiso takhe letilungile.—Mat. 4:10.

10. Yini leyenteka kulesinye simo ngesikhatsi umzalwane atsatsa luhlangotsi etindzabeni talelive?

¹⁰ Ngetulu kwaloko, ‘asisiyo incenye yelive.’ Ngako-ke, asilutsatsi luhlangotsi etimphini talelive nasetindzabeni tepolitiki. (Fundza Johane 15:18-21; Isaya 2:4.) Labanye labatinikele kuNkulunkulu batsetse luhlangotsi etindzabeni talelive. Labanyenti labente njalo baphendvukile baphindze baba nebuhlobo lobuhle naBabe wetfu wasezulwini lonemusa. (Hla. 51:17) Labambalwa abakaphendvuki. Sibonelo saloku kutsi ngesikhatsi seMphi Yelive Yesibili, tiphatsimandla tatsatsa bazalwane betfu labangu-160 labebaneminyaka lengephansi kwa-45, labebaboshwe ngalokungekho emtsetfweni kuwo onkhe emajele aseHungary tababutsela ndzawonye edolobheni lelitsite. Nabefika lapho, tabatjela kutsi bangenele imphi. Bazalwane labetsembekile bachubeka bacinile futsi bala kungenela imphi, kodvwa labayimfica kubo bayingenela baphindze batemukela timphahla takhona. Ngemuva kweminyaka lemibili, munye walaba labangenela imphi watitfola sekasebutfweni lebelabelwe kuyewubulala BoFakazi labetsembekile. Umnakabo bekasemkhatsini walaBoFakazi! Nanobe kunjalo, lokubulala lobekuhleliwe kwase akusenteki.

11, 12. Indlela Jehova labefuna kwentiwe ngayo iminikelo ka-Israyeli endvulo ibaluleke ngani kumaKhristu lamuhla?

¹¹ Ngekusho kweMtsetfo waMosi, ema-Israyeli bekufanele ente iminikelo letsite. (Lev. 9:1-4, 15-21) Leminikelo bekufanele ibe bete sici ngobe beyimelela umnikelo waJesu lote sono. Ngetulu kwaloko, nakwentiwa umnikelo ngamunye kwakunendlela letsite lobekufanele ilandzelwe. Nasi sibonelo: Cabanga ngaloko lobekufanele kwentiwe ngumake loneluswane lolusandza kutalwa. Levithikhusi 12:6 utsi: “Nangabe sekwendlule lamalanga akhe ekuhlanjululwa nome utele umfana nome intfombatana, kufanele aye kumphristi ekungeneni kwelithende lekuhlangana aletse lizinyane lemvu lelinemnyaka munye libe ngumnikelo wekushiswa, nelivukutfu nome lituba, libe ngumnikelo wesono.” Loko lobekufunwa nguNkulunkulu kwakucacile, kodvwa nekucabangela kwakhe kwelutsandvo kwakubonakala kuloMtsetfo. Nangabe lomake bekangeke akhone kunikela ngemvu, bekavumelekile kutsi anikele ngemavukutfu lamabili nome ematuba lamabili lasemancane. (Lev. 12:8) Nanobe lesikhonti saNkulunkulu besiphuyile, besitsandvwa futsi besibaluleke ngendlela lefanako naloyo lonikele ngetintfo letidulile. Yini lesingayifundza kuloku?

¹² Umphostoli Pawula wakhutsata tikhonti labenato kutsi tinikele “umhlatjelo wekudvumisa” kuNkulunkulu. (Heb. 13:15) Tindzebe tetfu kufanele timemetele kubantfu libito laJehova lelingcwele. Bazalwane nabodzadze labangeva etindlebeni basebentisa lulwimi lwetandla kute badvumise Nkulunkulu. EmaKhristu lavaleleke  etindlini amdvumisa ngekubhala tincwadzi, ngekufakaza ngelucingo, nangekushumayela kulabo labawanakekelako nakulabavakashile. Umnikelo wetfu wekudvumisa, lokukudvumisa kwetfu Jehova ngekwenta libito lakhe latiwe nekushumayela tindzaba letimnandzi, kufanele uhambisane nemphilo yetfu nalesikhona kukwenta. Kufanele sente konkhe lokusemandleni etfu.—Rom. 12:1; 2 Thim. 2:15.

13. Kungani kufanele sikubike loko lesikwentile emsebentini wetfu wekushumayela?

¹³ Iminikelo yetfu yekudvumisa iyiminikelo lesiyentela Nkulunkulu ngekutitsandzela ngobe siyamtsandza. (Mat. 22:37, 38) Kodvwa sicelwe kutsi sikubike loko lesikwente emsebentini wekushumayela. Ngako-ke kufanele sibe nasiphi simo sengcondvo endzabeni yekubika umsebenti wetfu? Umbiko lesiwuletsako inyanga ngenyanga uhlobene nekutinikela kwetfu kuNkulunkulu. (2 Phet. 1:7) Kuliciniso kutsi kute emkhatsini wetfu lokufanele ative aphocelelekile kusebenta ema-awa lamanyenti ensimini kuze akwati kubika lokunyenti kuloko lakwente emsebentini wekushumayela. Kungako ummemeteli weMbuso lohlala ekhaya lalasebakhulile nobe lobutsakatsaka angase abike imizuzu lengu-15 esikhundleni sema-awa. Jehova uyayijabulela leyo mizuzu leyentiwe ngulommemeteli weMbuso njengobe ente konkhe lokusemandleni akhe futsi wakhombisa kutsi uyamtsandza nekutsi uyalijabulela lilungelo lelingakavami lekuba ngulomunye waBoFakazi baKhe. Njengalama-Israyeli timo tawo lebetingawavumeli kutsi anikele ngetintfo letidulile, tinceku taJehova letiligugu futsi letibutsakatsaka nato tingawufaka umbiko. Imibiko lesiyiletsa ngekwehlukahlukana kwetfu iyahlanganiswa yakhe umbiko wemhlaba wonkhe, losita inhlangano kutsi iwuhlele kusenesikhatsi umsebenti wekushumayela ngeMbuso lotawentiwa esikhatsini lesitako. Kudzinga lokungetulu kwemandla etfu yini kubika loko lesikwentile emsebentini wetfu wekushumayela?

14. Chaza kutsi kungani kufanele siyihlole indlela lesitadisha ngayo.

¹⁴ Ngemuva kwekuhlola letifundvo letimbalwa letibalulekile kuLevithikhusi, ungase utsi: ‘Sengicondza kahle kutsi kungani lencwadzi ifakiwe eVini laNkulunkulu leliphefumulelwe.’ (2 Thim. 3:16) Nyalo kungenteka utimisele kakhulu kukhombisa kutsi ungcwele, hhayi ngobe nje Jehova afuna kutsi ube ngcwele kodvwa ngobe kumfanele kutsi umdvumise ngekutimisela. Kungenteka kutsi loko lokufundzile encwadzini yaLevithikhusi kuletihloko letimbili kukhulise sifiso sakho sekuhlolisisa imiBhalo. (Fundza Taga 2:1-5.) Ngemthantazo, hlola indlela lotadisha ngayo. Siyaciniseka kutsi ufuna iminikelo yakho yekudvumisa yemukeleke kuJehova. Tinhlelo te-TV, imidlalo ye-video, tintfo tekutilibatisa nobe temidlalo, tiyakuphatamisa yini ekutfutfukiseni buhlobo bakho naNkulunkulu? Nangabe kunjalo, ungakutfola kuzuzisa kuzindla ngalokunye lokwashiwo ngumphostoli Pawula lokubhalwe encwadzini yemaHebheru.

15, 16. Kungani Pawula akhuluma ngendlela lecondzile nakabhalela emaKhristu langemaHebheru?

¹⁵ Pawula wakhuluma ngendlela lecondzile ngesikhatsi abhalela emaKhristu langemaHebheru. (Fundza Hebheru 5:7,  11-14.) Lomphostoli akazange agege liguma! Wawatjela kutsi ‘besekabe butfuntfu’ ekuveni kwawo. Yini leyenta Pawula wahlala endzabeni? Abekhombisa lutsandvo lwaJehova kanye nekukhatsateka kwakhe ngalamaKhristu labetama kuphila ngelubisi. Kubalulekile kwati timfundziso tebuKhristu letisisekelo. Nobe kunjalo, “kudla lokucinile” kuyadzingeka kute sikhule ebuhlotjeni betfu naNkulunkulu futsi sibe ngemaKhristu lavutsiwe.

¹⁶ Esikhundleni sekutsi atfutfuke adzimate afike ezingeni lekufundzisa labanye, emaHebheru abesadzinga lotsite kutsi awafundzise. Kungani? Kungobe akwala “kudla lokucinile.” Tibute: ‘Nginesimo sengcondvo lesihle yini ngekudla lokucinile? Ngiyakudla yini? Nobe ngiyakuvilaphela yini kuthantaza nekufundza tintfo letijulile letiseBhayibhelini? Nangabe kunjalo, kungenteka yini kutsi inkinga isendleleni lengitadisha ngayo?’ Akukafaneli nje sishumayele kubantfu kuphela kodvwa kufanele sibafundzise futsi sibente babe bafundzi.—Mat. 28:19, 20.

17, 18. (a) Kungani kufanele sidle kudla lokucinile ngaso sonkhe sikhatsi? (b) Kufanele sibe namuphi umbono ngekunatsa lokudzakanako ngaphambi kwekuya emihlanganweni yebuKhristu?

¹⁷ Kutadisha liBhayibheli kungase kungabi melula kulabanyenti betfu. Kuliciniso kutsi Jehova aketami kukhutsata bantfu bakhe kutsi batadishe ngekubenta bative banemuva welicala. Nobe kunjalo, ngisho nome sekuphele iminyaka leminyenti sitinceku taNkulunkulu letitinikele nobe sisenesikhatsi lesincane, kufanele sichubeke sidla kudla lokucinile. Kwenta njalo kubalulekile nangabe sifuna kuchubeka singcwele.

¹⁸ Kute sibe ngcwele, kufanele siyihlole ngekucophelela imiBhalo futsi sente loko Nkulunkulu lakufunako kitsi. Cabanga ngemadvodzana a-Aroni, boNadabi na-Abihu, lababulawa ngenca yekwenta umnikelo ‘ngemlilo lowawungasingcwele,’ lokungenteka kutsi bawenta badzakiwe. (Lev. 10:1, 2) Naka loko Nkulunkulu lakutjela Aroni. (Fundza Levithikhusi 10:8-11.) Lendzaba isho kutsi akukafaneli yini sinatse lokudzakanako ngaphambi kwekutsi siye emihlanganweni yebuKhristu? Cabanga ngaloku: Asikho ngephansi kweMtsetfo. (Rom. 10:4) Kulamanye emave, lamanye emaKhristu anatsa ngekulinganisela nakadla ngaphambi kwekutsi aye emihlanganweni. NgeliPhasika bekusetjentiswa tindzebe letine teliwayini. Nakasungula umkhosi weSikhumbuto, Jesu watsi baphostoli bakhe abanatse liwayini lebelimelela ingati yakhe. (Mat. 26:27) LiBhayibheli liyakulahla kunatsa kakhulu nekudzakwa. (1 Khor. 6:10; 1 Thim. 3:8) Nembeza wemaKhristu lamanyenti uyawavimbela kutsi anatse lokudzakanako ngaphambi kwekutsi ente nome ngumuphi umsebenti longcwele. Nobe kunjalo, timo tiyehlukahluka emaveni ngemave futsi lokubaluleke kakhulu kutsi emaKhristu ‘ente umehluko emkhatsini walokungcwele nalokungengcwele,’ kute atiphatse ngendlela lengcwele leyenta Nkulunkulu ajabule.

19. (a) Yini lokufanele sihlale siyikhumbula mayelana nekukhonta kwemndeni nesifundvo lesitichubela sona? (b) Yini lotimisele kuyenta kute ukhombise kutsi ungcwele?

¹⁹ Nawumba ujule eVini laNkulunkulu ungatfola tifundvo letinyenti letibalulekile. Sebentisa emathulusi lonawo ekucwaninga kute utfutfukise kukhonta kwakho kwemndeni nesifundvo lotichubela sona. Khulisa lwati lwakho ngaJehova nangetinjongo takhe. Sondzela kakhulu kuye. (Jak. 4:8) Thantaza kuNkulunkulu njengobe umhlabeli ahlabela watsi: “Vula emehlo ami, kuze ngibone timangaliso letisemtsetfweni wakho.” (Hla. 119:18) Ungayephuli imitsetfo kanye netimiso letiseBhayibhelini. Ngekutitsandzela vumelana nemtsetfo lophakeme ‘waLoyo Longcwele,’ Jehova, futsi uhlanganyele ngekutimisela ‘emsebentini longcwele wetindzaba letimnandzi taNkulunkulu.’ (1 Phet. 1:15; Rom. 15:16) Khombisa kutsi ungcwele kulamalanga ekugcina lamatima. Shengatsi sonkhe singaba ngcwele ekutiphatseni kwetfu futsi sisekele bukhosi baNkulunkulu wetfu longcwele, Jehova.