1. Bantfu labanyenti bativa njani ngetintfo labanato?

BANTFU labanyenti ababuboni bumcoka bentfo labanayo kuze kube ngulapho seyibalahlekele. Kwake kwenteka yini loko kuwe? Kunemkhuba lovamile wekutsi umuntfu angabongi ngetintfo lakhule anato. Nasi sibonelo: Umuntfu lokhulele emndenini lonjingile angatitsatsa melula tintfo letinyenti lanato. Kuvamile ngebantfu labasha labasengakatati kahle tintfo letimcoka kutsi behluleke kubona tintfo letiligugu kubo.

2, 3. (a) Yini emaKhristu lasemasha lokufanele ayibalekele? (b) Yini lengasisita kutsi sibonge ngaloko lesinako?

² Yini lemcoka kuwe nangabe ungumuntfu losemusha loseminyakeni yekutfomba, nobe longetudlwana kweminyaka lengu-20? Kubantfu labanyenti umcebo uyintfo lemcoka, lokufaka ekhatsi kuhola imali leshisiwe, kuba nelikhaya lelihle, nobe kuba netintfo takamuva tebucwephesha. Nobe kunjalo, nakunguleti kuphela tintfo letimcoka kitsi, kunentfo lebaluleke kakhulu leshodako, lokubuhlobo betfu naNkulunkulu. Kuyadzabukisa kutsi tigidzi tebantfu lamuhla atiyenti imetamo yekubufuna. Nine labasebasha lenikhuliswe batali labangemaKhristu kufanele nicaphele kutsi ningakukhohlwa kubaluleka kwetintfo letiligugu letimayelana naNkulunkulu lenititfole  njengelifa. (Mat. 5:3) Kungakhombisi kubonga kungaba nemiphumela lebuhlungu lengakulimata kuphila kwakho konkhe.

³ Kodvwa ungakuvimba loko kutsi kungenteki. Yini lengakusita kutsi utitsatse njengaletiligugu letimfundziso taJehova lotitfole njengelifa? Ase sicabange ngaletinye tibonelo letiseBhayibhelini letingasisita sibone kutsi kungani kukuhlakanipha kulilondvolota lelifa letfu leliligugu. Letibonelo lesitawukhuluma ngato ngeke tisite labasebasha kuphela kodvwa titawusita nawo onkhe emaKhristu kutsi akulondvolote loko lonako.

4. Umbhalo wa-1 Samuweli 8:1-5 usitjelani ngemadvodzana aSamuweli?

⁴ EBhayibhelini sifundza ngebantfu labatfola lifa leliligugu kepha labehluleka kukhombisa kubonga ngalo. Nguloko lokwenteka emndenini wemphrofethi Samuweli, lowakhonta Jehova kusukela asesemncane nalowatakhela ligama lelihle naNkulunkulu. (1 Sam. 12:1-5) Samuweli wabekela emadvodzana akhe, boJoweli na-Abiya sibonelo lesihle, futsi bekutawuba kuhle kutsi basilingise. Nobe kunjalo, abazange bamlingise, ngako baba bantfu lababi. LiBhayibheli lisitjela kutsi ngekungafanani neyise, ‘bawugwegwisa umtsetfo.’—Fundza 1 Samuweli 8:1-5.

5, 6. Tintfo tawahambela njani emadvodzana aJosaya nemtukulu wakhe?

⁵ Kwenteka lokufanako nasemadvodzaneni eNkhosi Josaya. Josaya wabeka sibonelo lesihle kakhulu ekukhonteni Jehova. Ngesikhatsi kutfolakala incwadzi yeMtsetfo waNkulunkulu futsi afundzelwa yona, wenta konkhe lokusemandleni akhe kuze ente lobekushiwo nguJehova. Wasebenta kamatima kute akucedze nya kukhonta tithico kanye nekusebentisa imimoya kulelo live, futsi wakhutsata nebantfu kutsi balalele Jehova. (2 Khos. 22:8; 23:2, 3, 12-15, 24, 25) Emadvodzana akhe abenelifa leliligugu sibili! Ngekuhamba kwesikhatsi, emadvodzana akhe lamatsatfu nemtukulu wakhe baba ngemakhosi, kepha kute ngisho munye kubo lowakhombisa kubonga ngaloko labefundziswe kona.

⁶ Jehoyahazi indvodzana yaJosaya, waba yinkhosi ngemuva kwakhe, kodvwa wenta “lokubi emehlweni aSimakadze.” Wabusa tinyanga letintsatfu nje kuphela, futsi Faro inkhosi yaseGibhithe wamfaka ejele, lapho efike wafela khona. (2 Khos. 23:31-34) Ngemuva kwaloko, Jehoyakimu umnakabo wabusa iminyaka lengu-11. Naye akazange akhombise kubonga ngaloko uyise abemfundzise kona. Ngesizatfu sekutsi Jehoyakimu wenta lokubi, Jeremiya waphrofetha ngaye watsi: “Uyawungcatjwa njengembongolo.” (Jer. 22:17-19) Nalabanye lababusa ngemuva kwaJosaya, lokufaka ekhatsi indvodzana yakhe Sedekiya nemtukulu wakhe Jehoyakhini, nabo benta lokufanako; abazange bakhetse kuhamba etinyatselweni taJosaya letilungile.—2 Khos. 24:8, 9, 18, 19.

7, 8. (a) Solomoni wadlala njani ngelifa lakhe leliligugu? (b) Ngusiphi sifundvo lesingasifundza eBhayibhelini kulabo labadlala ngelifa labo leliligugu?

⁷ Solomoni abeyinkhosi leyafundza lokunyenti kuDavide uyise. Nanobe Solomoni akhulela emndenini lokhonta Nkulunkulu futsi acale wabusa kahle, ngekuhamba kwesikhatsi akazange asatitsatsa njengaletibalulekile tindlela letilungile. ‘Ngesikhatsi Solomoni akhula, emakhosikati akhe abeya ngekuya aphambukisela inhlitiyo yakhe etithicweni tawo; inhlitiyo yakhe yayingakatinikeli ngalokuphelele kuSimakadze longuNkulunkulu wakhe, njengenhlitiyo yeyise Davide.’ (1 Khos. 11:4) Loko kwabangela kutsi Solomoni alahlekelwe ngumusa waJehova.

 ⁸ Kuyadzabukisa kutsi lamadvodza labekakhuliswe kahle futsi anelitfuba lekwenta lokulungile adlala ngalo! Kodvwa akusibo bonkhe labasebasha labadlala ngematfuba lanjalo esikhatsini sekubhalwa kweliBhayibheli, ngisho nalamuhla. Asesihlole letinye tetibonelo letinhle tebantfu labasha letingalingiswa ngemaKhristu lasemasha lamuhla.

9. Emadvodzana aNowa asibeka njani sibonelo lesihle? (Buka sitfombe lesisekucaleni kwalesihloko.)

⁹ Emadvodzana aNowa asibonelo lesihle kakhulu. Uyise wanikwa umyalo wekwakha umkhumbi kute yena nemndeni wakhe bangene kuwo. Akungabateki kutsi emadvodzana aNowa asibona sidzingo sekwenta intsandvo yaJehova. Abambisana neyise. Amsita ekwakheni umkhumbi, ngemuva kwaloko angena kuwo. (Gen. 7:1, 7) Bewuyini umgomo wabo? Genesisi 7:3 utsi bafaka tilwane emkhunjini “khona lungetiwuphela lolo nalolo luhlobo emhlabeni.” Nebantfu nabo basindziswa. Ngenca yekutsi emadvodzana aNowa akubona kubalulekile loko lakufundziswa nguyise, aba nelilungelo lekusindzisa bantfu nelekubuyisela kukhonta kweliciniso emhlabeni lobesewuhlantiwe.—Gen. 8:20; 9:18, 19.

10. EmaHebheru lamane lasemasha lebekaseBhabhulona, akukhombisa njani kubonga ngemaciniso lafundziswa wona?

¹⁰ Emakhulwini eminyaka leyalandzela, emaHebheru lamane lasemasha akhombisa kutsi abetati kahle tintfo letimcoka. BoHananiya, Mishayeli, Azariya naDanyela batfunjelwa eBhabhulona nga-617 B.C.E. Bebangemakhwa, bahlakaniphile futsi bekungaba melula kusheshe balandzele indlela yekuphila levamile yaseBhabhulona. Kodvwa abazange bente njalo. Tento tabo takwenta kwacaca kutsi bebasalikhumbula lifa labo, lelinguloko lebebafundziswe kona. Lamajaha lamane abusiswa kakhulu ngekunamatsela kuloko labefundziswe kona ngaNkulunkulu kusukela asemancane.—Fundza Danyela 1:8, 11-15, 20.

11. Labanye bazuza njani kuloko Jesu lakufundziswa nguJehova?

¹¹ Jesu loyiNdvodzana yaNkulunkulu, abesibonelo lesihamba embili semuntfu lowalijabulela lifa lakhe leliligugu. Wafundza lokunyenti kuYise futsi wakutsatsa njengalokuligugu kakhulu. Loko kubonakala kahle emavini akhe latsi: “Letintfo ngitikhuluma njengobe Babe angifundzisile.” (Joh. 8:28) Abenesifiso sekutsi nalabanye bakutfole loko labekufundzile. Naku lakutjela sicumbi sebantfu: “Nakulamanye emadolobha kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Luk. 4:18, 43) Wasita lebebamlalele kutsi babone sidzingo ‘sekungabi yincenye yalelive’ lelingatitsatsi njengaletibalulekile timfundziso taJehova.—Joh. 15:19.

12. (a) Umbhalo wa-2 Thimothi 3:14-17 usebenta njani kubantfu labanyenti labasebasha lamuhla? (b) Ngumiphi imibuto emaKhristu lasemasha lokufanele acabange ngayo?

¹² Kungenteka kutsi nawe ukhuliswe batali labatinikele kuJehova Nkulunkulu, njengalaba lesesicoce ngabo. Nangabe kunjalo, loko lokushiwo yimiBhalo ngaThimothi kungenteka kuyafana nesimo lokuso. (Fundza 2 Thimothi 3:14-17.) Batali bakho ‘bakufundzisa’ ngaNkulunkulu weliciniso nangendlela yekumjabulisa. Kungenteka bacala kukufundzisa kusukela useluswane. Loku kukusite kutsi “uhlakaniphe kuze usindziswe ngekukholwa kuKhristu Jesu” futsi ‘ukufanele kahle’ kwenta umsebenti waNkulunkulu. Umbuto loyinhloko utsi: Utawubonga yini ngaloko lonako? Loko kutawudzinga kutsi utihlole. Cabanga ngemibuto lenjengalena: ‘Ngitiva njani  ngekuba semkhatsini walabanye bofakazi labetsembekile? Ngitiva njani ngekuba semkhatsini webantfu labambalwa labatiwa nguNkulunkulu emhlabeni lamuhla? Ngiyabona yini kutsi kwati liciniso kulilungelo lelikhulu nalelingakavami?’

13, 14. Lamanye emaKhristu lasemasha ahlangabetana nasiphi silingo, kodvwa kungani kungasikuhlakanipha kuwela kuso? Niketa sibonelo.

¹³ Labanye labasebasha labakhuliswe batali labangemaKhristu, abawuboni umehluko lokhona emkhatsini wetimfundziso taNkulunkulu nalelive laSathane lelisebumnyameni. Labanye babo baze balingeka kutsi baphume baye eveni kute babone kutsi liphetseni. Kodvwa ungatijika yini emotweni legijimako kute nje ubone kutsi kubuhlungu futsi kuyingoti kangakanani kushayiswa ngiyo? Bewungeke sewucale wente njalo! Ngendlela lefanako, kute sidzingo sekutsi sikhetse kuhamba “endleleni yekutitika ngekutiphatsa lokubi” kulelive kute nje sive kutsi bungakanani buhlungu lesitabutfola.—1 Phet. 4:4.

¹⁴ Gener lohlala e-Asia wakhulela emndenini wemaKhristu. Wabhajatiswa nakaneminyaka lengu-12 budzala. Ngesikhatsi aseminyakeni yekutfomba, wakhangwa kuphila kwalelive. Utsi: “Bengifuna kuva ‘inkhululeko’ lelive lelinikana yona.” Gener wase ucala kuphila imphilo lemphacambili. Nakaneminyaka lengu-15 budzala, besekaphila njengebangani bakhe lababi. Abenatsa futsi asatfuka njengabo. Imvamisa Gener besekabuya ebusuku ekhaya ngemuva kwekudlala imidlalo yema-video lenebudlova anebangani bakhe. Kodvwa ngekuhamba kwesikhatsi, kwabese kuyamkhanyela kutsi letintfo letikhangako talelive betingamniketi injabulo sibili. Betilite. Naku lakusho ngemuva kwekubuyela ebandleni: “Nanobe busebunyenti bumatima lengisalwisana nabo ekuphileni, kodvwa tibusiso letivela kuJehova tibendlula bonkhe.”

15. Bantfu labasebasha labangakakhuliswa batali labangemaKhristu kufanele bacabangisise ngani?

¹⁵ Kuliciniso kutsi labanye labasebasha labangemalunga elibandla abazange bakhuliswe batali labangemaKhristu. Nangabe ungulomunye wabo, cabanga ngelilungelo lelikhulu lolijabulelako lekwati uMdali nelekumkhonta. Kunetigidzigidzi tebantfu labaphilako emhlabeni. Ngako kusibusiso lesikhulu kuba yincenye yalabo Jehova labadvonsele kuye ngemusa, futsi wabembulela emaciniso eliBhayibheli. (Joh. 6:44, 45) Kubantfu labangu-1  000 emhlabeni, munye kuphela lonelwati lolungulonalona lweliciniso, futsi nawe ungulomunye wabo. Loko akusiniki yini sizatfu sekujabula, ngisho nobe liciniso salifundza ngetindlela letihlukahlukene? (Fundza 1 Khorinte 2:12.) Gener utsi: “Bengingubani nje mine kutsi ngingatiwa nguJehova, uMdali wato tonkhe tintfo?” (Hla. 8:4) Lomunye dzadze lohlala e-Asia watsi: “Bafundzi bajabula kakhulu nabatiwa nguthishela wabo. Kulilungelo lelikhulu kakhulu kwatiwa nguJehova, uMfundzisi Lomkhulu!”

16. Ngusiphi sincumo lesihlakaniphile lesingentiwa ngemaKhristu lasemasha lamuhla?

¹⁶ Nawucabanga ngelilungelo lelihle lonalo, kufanele utimisele kutihlanganisa nalabo labambalwa labakusebentise kahle kuphila kwabo. Ngaleyo ndlela, utawuba semkhatsini waletinye tinceku taNkulunkulu letetsembekile. Kukuhlakanipha kwenta njalo kunekutsi ulandzele linyenti lalabasha labangacabangisisi kahle, labahambisana nalelive leliya eweni.—2 Khor. 4:3, 4.

17-19. Yini lengakusita kutsi ube nembono lokahle mayelana nekwehluka eveni?

¹⁷ Loko akusho kutsi ngaso sonkhe sikhatsi kutawuba melula kwehluka kulelive. Kodvwa kwehluka kulo kukuhlakanipha. Nasi sibonelo: Cabanga ngengijimi lesesigabeni sekuya kuma-Olympic. Akungabateki kutsi kufanele yehluke kute ifinyelele kuleso sigaba. Kufanele ingatinaki tintfo letitayicedzela sikhatsi futsi tehlise nelizinga layo lekuticecesha. Ngakulokunye, sifiso sayo sekwehluka kubontsanga sitayiniketa sikhatsi sekuticecesha kuze ifinyelele imigomo yayo.

¹⁸ Umbono lelive lelinawo ngekuphila awukenabi. Kodvwa kwehluka kulelive nekubalekela imikhuba yalo lengaphatamisa buhlobo bakho naNkulunkulu, kungakwenta ‘ubambisise kuphila lokungukonakona.’ (1 Thim. 6:19) Dzadze lesikhulume ngaye ekucaleni utsi: “Nangabe ukumelela loko lokukholelwako, utawujabula kakhulu. Kutawufakazela kutsi unemandla ekumelana nalelive laSathane. Ngetulu kwaloko, kutawuba shengatsi uyambona Jehova Nkulunkulu ajabula kakhulu ngawe. Ngulapho-ke kwehluka kwakho kutakujabulisa khona.”

¹⁹ Kuphila kuba lite nangabe umuntfu anake kuphela loko lakutfolako nyalo. (Shu. 9:2, 10) Nangabe usemusha futsi ucabangisisa ngenjongo yekuphila nangelitfuba lonalo lekuphila phakadze, akusiko yini kuhlakanipha kubalekela ‘kuhamba ngendlela tive letihamba ngayo’ futsi uphile imphilo lenenjongo?—Ef. 4:17; Mal. 3:18.

20, 21. Nangabe senta tincumo letikahle, yini lesitayitfola esikhatsini lesitako, futsi yini lokufanele siyente?

²⁰ Nangabe sikhetsa kahle sitawujabulela kuphila lokwenetisako nyalo, sibe setfubeni lelihle ‘lekudla lifa lemhlaba,’ futsi sitfole kuphila lokuphakadze. Tinyenti kakhulu tibusiso letinhle lesitatitfola futsi ngeke sikhone kuticabanga tonkhe. (Mat. 5:5; 19:29; 25:34) Kuliciniso kutsi akutentakaleli kutsi Nkulunkulu asibusise. Ulindzele kutsi sente lokutsite. (Fundza 1 Johane 5:3,  4.) Kodvwa kubaluleke kakhulu nyalo kutsi simkhonte ngekwetsembeka!

²¹ Nkulunkulu usinike tintfo letinyenti, futsi loko kulilungelo lelikhulu kakhulu! Sinelwati lolungulonalona ngeliVi lakhe futsi siyawacondza emaciniso ngaye nangetinjongo takhe. Siyalijabulela lilungelo lekubitwa ngelibito lakhe nekuba BoFakazi bakhe. Nkulunkulu usetsembisa kutsi ngeke asishiye. (Hla. 118:7) Shengatsi sonkhe, nome sibancane nome sibadzala, singakhombisa kubonga ngekuphila imphilo leveta kutsi sinesifiso lesijulile sekudvumisa Jehova “kuze kube phakadze.”—Rom. 11:33-36; Hla. 33:12.