Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Kufanele yini emaKhristu ashise sidvumbu semuntfu?

Kutsi umuntfu lofile uyashiswa nobe akashiswa, leso sincumo semuntfu ngamunye. Nanobe liBhayibheli lingakhulumi ngalokucondzile ngalendzaba, kuyaphawuleka kutsi sidvumbu seNkhosi Sawula nesendvodzana yakhe Jonathani tashiswa tase tiyangcwatjwa. (1 Sam. 31:2, 8-13)—6/15, likhasi 7.

Ngutiphi tinsayeya umuntfu langahlangabetana nato nakatfutsela kulelinye live kuze akhonte lapho kunesidzingo lesikhulu khona?

Tinsayeya letintsatfu nguleti: (1) kwetayela indlela lensha yekuphila, (2) kukhumbula ekhaya, kanye (3) nekufuna kwemukeleka kubazalwane bendzawo. Labanyenti labakhone kuhlangabetana naletinsayeya batfole tibusiso letinyenti.—7/15, emakhasi 4-5.

Yini leyenta lamapheshana lamasha abe lithulusi lelihle futsi kube melula kuwasebentisa?

Onkhe lamapheshana abhalwe ngendlela lefanako. Lipheshana ngalinye lisikhutsata kutsi sifundze umBhalo bese sibuta umnikati welikhaya umbuto. Nome ngabe uphendvula atsini, singamvulela likhasi lelingekhatsi futsi simkhombise loko lokushiwo liBhayibheli. Singaphindze simkhombise umbuto lesitawucoca ngawo nasibuya.—8/15, emakhasi 13-14.

Yini batali labangemaKhristu labangayenta kute beluse bantfwana babo?

Kubalulekile kubalalela bantfwana kuze ubati. Yetama kubondla ngekubafundzisa ngaNkulunkulu. Bacondzise ngelutsandvo, njengalapho badzinga lusito lwekuncoba kungabata kukholwa kwabo.—9/15, emakhasi 18-21.

Ngusiphi sivumelwane lesiseBhayibhelini lesenta kutsi labanye babuse naKhristu?

Ngemuva kweliPhasika lekugcina anebaphostoli bakhe, Jesu wenta sivumelwane nebafundzi bakhe labetsembekile, lesibitwa ngekutsi sivumelwane seMbuso. (Luk. 22:28-30) Sabacinisekisa kutsi bebatawubusa naJesu ezulwini.—10/15, emakhasi 16-17.

Bobani ‘bantfu labebabitwa ngelibito laNkulunkulu’ Jakobe lakhuluma ngabo njengobe kushiwo kuMisebenti 15:14?

Bekungemakholwa langemaJuda nalawo langesiwo emaJuda lakhetfwa nguNkulunkulu kutsi abe sive lesikhetsiwe kuze ‘kuyo yonkhe indzawo amemetele buhle’ baLoyo lowawabita. (1 Phet. 2:9, 10)—11/15, emakhasi 24-25.