1-3. Ngutiphi tinsayeya bantfu labashadene lababhekana nato? (Buka sitfombe lesisekucaleni kwalesihloko.)

LENYE indvodza lesekuphele iminyaka lengu-38 ishadile futsi ijabula emshadweni wayo itsi: “Nangabe wenta konkhe lokusemandleni akho futsi ukhombisa kutsi uyafuna umshado wakho uphumelele, Jehova utakubusisa.” Ngako-ke, bantfu labashadene bangakhona kujabula ndzawonye futsi basekelane etikhatsini letimatima.—Taga 18:22.

² Nobe kunjalo, kuyintfo levamile kutsi bantfu labashadene babe “nelusizi enyameni.” (1 Khor. 7:28) Kungani kunjalo? Kungobe kucatulula tinkinga letiba khona malanga onkhe kungabangela kucindzeteleka emshadweni. Kulimatana imiva, kungacondzani, nekungakhulumisani kahle lokubangelwa kuba nesono, kungaba yinsayeya ngisho nasemshadweni lojabulako. (Jak. 3:2, 5, 8) Bantfu labanyenti labashadene benta imisebenti yekutiphilisa lekhandlako babe bakhulisa bantfwana. Kukhatsateka nekudzinwa kwenta kube lukhuni ngalabanye labashadene kutsi babe nesikhatsi sekucinisa umshado wabo. Lutsandvo lwabo nekuhloniphana kungase kuphatanyiswe tinkinga temali, tinkinga temphilo nobe lobunye bumatima. Ngetulu kwaloko, umshado lobewubonakala ucinile ungase uphatanyiswe ‘yimisebenti  yenyama,’ lefaka ekhatsi kutiphatsa lokubi ngekwelicansi, kutiphatsa lokubi kwekweyisa, inzondo, kucabana, umona, intfukutselo lengalawuleki, nemibango.—Gal. 5:19-21.

³ Lokubi kakhulu kutsi ‘kulamalanga ekugcina,’ bantfu banebugovu futsi abamhloniphi Nkulunkulu, lokusimo sengcondvo lesingaba yingoti emshadweni. (2 Thim. 3:1-4) Ngetulu kwaloko, bantfu labashadile kufanele bamelane nesitsa lesitimisele kubahlasela. Umphostoli Phetro usecwayisa atsi: “Sitsa senu Develi, sihambahamba njengelibhubesi lelibhodlako, lelifuna lotsite lelingamshwabadzela.”—1 Phet. 5:8; Semb. 12:12.

4. Yini ledzingekako kute umshado ucine futsi ujabulise?

⁴ Lenye indvodza yaseJapan itsi: “Bengicindzeteleke kakhulu ngenca yetinkinga temali. Ngesizatfu sekutsi angizange ngimcacisele kahle umfati wami, naye wacindzeteleka kakhulu. Ngetulu kwaloko, nyalo usandza kuba netinkinga letinyenti temphilo. Ngaletinye tikhatsi lokucindzeteleka bekubangela kutsi singevani.” Letinye tinkinga emshadweni ngeke tibalekelwe, kepha tingancotjwa. Ngekusitwa nguJehova, bantfu labashadene bangaba nemshado locinile futsi lojabulisako. (Fundza Tihlabelelo 127:1.) Asesicoce ngetindlela letisihlanu tekwakha umshado locinile futsi lophumelelako. Ngemuva kwaloko sitawucoca ngekutsi lutsandvo lubaluleke ngani emshadweni.

5, 6. Yini bantfu labashadene labangayenta kute Jehova abe yincenye yemshado wabo?

⁵ Kwetsembeka nekutitfoba kuLoyo lowasungula umshado kusisekelo semshado locinile. (Fundza Umshumayeli 4:12.) Bantfu labashadene bangenta Jehova abe yincenye yemshado wabo ngekulandzela ticondziso takhe telutsandvo. Nalikhuluma ngebantfu baNkulunkulu basendvulo, liBhayibheli litsi: “Nome nijikela ngesekudla nome ngesancele, tindlebe tenu tiyakuva livi emvakwenu litsi: ‘Nansi indlela, hambani ngayo.’” (Isa. 30:20, 21) Lamuhla, bantfu labashadene ‘bangeva’ livi laJehova ngekutsi bafundze liBhayibheli ndzawonye. (Hla. 1:1-3) Bangacinisa umshado wabo ngekuba neKukhonta Kwemndeni lokujabulisako nalokucinisa buhlobo babo naNkulunkulu. Kuthantaza ndzawonye malanga onkhe kubalulekile kute bakhe umshado longakhona kumelana nekuhlasela kwalelive laSathane.

⁶ Gerhard waseJalimane utsi: “Nakwenteka injabulo yetfu iphatanyiswe bumatima lobutsite nobe kungacondzani kahle, seluleko lesiseVini laNkulunkulu siyasisita kutsi sibeketele futsi sitsetselelane. Loku kubaluleke kakhulu kute umshado uphumelele.” Nangabe bantfu labashadene batikhandla kute Nkulunkulu ahlale ayincenye yemshado wabo ngekutsi bente imisebenti yebuKhristu ndzawonye, bayasondzelana naNkulunkulu futsi babe nemshado locinile.

7. Emadvodza kufanele abusebentise njani bunhloko bawo?

⁷ Indlela indvodza lebusebentisa ngayo bunhloko bayo ingasita ekwakheni umshado locinile nalojabulisako. LiBhayibheli litsi: “Inhloko yawo onkhe emadvodza nguKhristu; inhloko yemfati yindvodza.” (1 Khor. 11:3) Lamavi aveta kutsi emadvodza kufanele asebentise bunhloko bawo ngendlela Khristu labusebentisa ngayo. Jesu abengabaphatsi kabi bantfu nobe abacindzetele, kodvwa abehlale anelutsandvo, umusa, kucabangela, umoya  lomuhle nenhlitiyo letfobekile.—Mat. 11:28-30.

8. Indvodza ingenta njani kute umfati wayo ayitsandze futsi ayihloniphe?

⁸ Kute sidzingo sekutsi emadvodza langemaKhristu ahlale akhumbuta bafati bawo kutsi kufanele bawahloniphe. Esikhundleni saloko, ‘ayachubeka ahlala nabo ngekubati.’ ‘Ayabahlonipha njengesitja lesibutsakatsaka kakhudlwana, umuntfu lomsikati.’ (1 Phet. 3:7) Ngisho nobe anebafati bawo nobe analabanye bantfu, emadvodza akhombisa ngemavi lanenhlonipho nangetento telutsandvo kutsi bafati bawo baligugu kuwo. (Taga 31:28) Nangabe indvodza isebentisa bunhloko ngelutsandvo, umfati wayo utayitsandza aphindze ayihloniphe, futsi Nkulunkulu utawubusisa umshado wabo.

9. Umfati angakhombisa njani kutsi uyatitfoba?

⁹ Lutsandvo ngaJehova lolusekelwe etimisweni futsi lolute bugovu, lusisita kutsi sititfobe kuye. (1 Phet. 5:6) Lenye indlela lebalulekile umfati lotitfobako lakhombisa ngayo kutsi uhlonipha ligunya laJehova, kutsi abambisane nendvodza yakhe futsi ayisekele. LiBhayibheli litsi: “Bafati, tfobelani emadvodza enu ngobe loku kuhle eNkhosini.” (Khol. 3:18) Ecinisweni, akusito tonkhe tincumo letitsatfwa yindvodza letitamjabulisa umfati. Nobe kunjalo, nangabe tincumo tayo tingashayisani nemitsetfo yaNkulunkulu, umfati lotitfobako uyatimisela kutilalela.—1 Phet. 3:1.

10. Kungani kubalulekile kutitfoba ngelutsandvo?

¹⁰ Umfati unendzima lebalulekile yekuba ‘ngumngani’ wendvodza yakhe. (Mal. 2:14, NW.) Uyayisita nayenta tincumo temndeni ngekutsi avete imibono nemiva yakhe ngenhlonipho nangekutitfoba. Indvodza lehlakaniphile iyakulalelisisa loko lokushiwo ngumfati wayo. (Taga 31:10-31) Kutitfoba ngelutsandvo kutfutfukisa injabulo, kuthula nebunye ekhaya, futsi kwenta bantfu labashadene benetiseke ngekwati kutsi bajabulisa Nkulunkulu.—Ef. 5:22.

11. Kungani kubalulekile kutsetselelana?

¹¹ Kutsetselelana kungulenye yetintfo letibalulekile leticinisa umshado. Umshado uyacina nangabe indvodza nemfati wayo ‘bachubeka babeketelelana futsi batsetselelana ngekukhululeka.’ (Khol. 3:13) Ngakulokunye, umshado uyalimala nangabe laba labashadene babamba emagcubu futsi babalelana emaphutsa abo. Njengobe timfa tingenta kutsi sakhiwo sigcine sidzilikile, kubalisa nekutfukutsela kungakheka etinhlitiyweni tetfu futsi kusente singasakhoni kutsetselela. Ngalokwehlukile kuloko, umshado uyacina nangabe indvodza nemfati wayo batsetselelana, njengobe naJehova abatsetselela.—Mik. 7:18, 19.

12. Lutsandvo lutimbonya njani “tono letinyenti”?

¹² Lutsandvo lweliciniso “lute emagcubu.” Ecinisweni, “lutsandvo lumbonya tono letinyenti.” (1 Khor. 13:4, 5; fundza 1 Phetro 4:8.) Ngalamanye emagama, nangabe sinelutsandvo ngeke sibale kutsi sitawubatsetselela kangakhi labanye bantfu. Ngesikhatsi umphostoli Phetro abuta kutsi kufanele amtsetselele kangakhi umuntfu, Jesu wamphendvula watsi: ‘Tikhatsi letingemashumi lasikhombisa nesikhombisa.’ (Mat. 18:21, 22) Bekasho kutsi kute silinganiso sekutsi umKhristu kufanele abatsetselele kangakhi labanye.—Taga 10:12. *

13. Singawuncoba njani umkhuba wekungatsetseleli?

¹³ Annette utsi: “Nangabe bantfu labashadene bangafuni kutsetselelana, loko kungaphumela ekutseni batfukutselelane baphindze bangetsembani, futsi kwenta njalo kuyingoti emshadweni. Kutsetselelana kuyawucinisa umshado futsi kunenta nisondzelane.” Kuze uncobe umkhuba wekungatsetseleli, yetama kuba ngumuntfu lobongako. Tetayete kumncoma ngalokusuka enhlitiyweni loyo loshade naye. (Khol. 3:15) Nanitsetselelana, nitawuba nekuthula kwengcondvo, nebunye futsi nitfole tibusiso letivela kuNkulunkulu.—Rom. 14:19.

14, 15. Uyini uMtsetfo Weligolide, futsi ubaluleke ngani kubantfu labashadile?

¹⁴ Akungabateki kutsi uyatsandza kuhlonishwa. Uyajabula nangabe lokushoko kulalelwa futsi indlela lotiva ngayo inakwa. Kodvwa uke wamuva yini lotsite atsi: “Ngifuna kumvisa lobuhlungu langivise bona”? Ngisho nobe ngaletinye tikhatsi singaba nesizatfu sekutiva ngaleyondlela, kodvwa liBhayibheli litsi: “Ungasho nekutsi: ‘Ngitamenta loko langenta kona!’” (Taga 24:29) Ecinisweni, Jesu wasifundzisa indlela lekahle yekulungisa tinkinga letimatima. Lomtsetfo watiwa kakhulu kangangekutsi uvamise kubitwa ngekutsi nguMtsetfo Weligolide, futsi utsi: “Njengobe nifuna bantfu bente kini, yentani kanjalo nani kubo.” (Luk. 6:31) Jesu bekasho kutsi kufanele siphatse labanye ngendlela natsi lesingatsandza kuphatfwa ngayo, futsi singaphindziseli lokubi ngalokubi. Ngako-ke nawushadile, kufanele wente loko longatsandza kutsi kwentiwe nakuwe.

¹⁵ Bantfu labashadene bayabucinisa buhlobo babo nangabe bayinaka indlela  lomunye lativa ngayo. Lenye indvodza yaseNingizimu Afrika itsi: “Setamile kusebentisa uMtsetfo Weligolide emshadweni wetfu. Kuliciniso kutsi ngaletinye tikhatsi siyatfukutselelana, kodvwa senta konkhe lokusemandleni etfu kuze siphatsane ngendlela lesingatsandza kuphatfwa ngayo, siphatsane ngenhlonipho.”

16. Yini lokufanele bantfu labashadene bangayenti kulomunye nalomunye?

¹⁶ Ungakhulumi kulabanye ngebutsakatsaka baloshade naye nobe ngemaphutsa akhe, futsi ungahlekisi ngisho nangawo. Khumbula kutsi umshado awusiwo umncintiswano wekubona kutsi ngubani lonemandla kunalomunye, ngubani lokwati kutsetsa nobe lokwati kusho emavi labuhlungu kakhulu. Kuliciniso kutsi sonkhe siyawenta emaphutsa futsi ngaletinye tikhatsi siyabakhuba labanye. Kodvwa asikho sizatfu lesivumela indvodza nobe umfati kutsi basebentise emavi lahlabako, inkhulumo ledzicela lomunye phansi, bafucane kabuhlungu nobe bashayane.—Fundza Taga 17:27; 31:26.

17. Emadvodza angawusebentisa njani uMtsetfo Weligolide?

¹⁷ Nanobe kulamanye emasiko emadvodza lahlukumeta bafati bawo nobe abashaye atsatfwa njengemadvodza sibili, kodvwa liBhayibheli litsi: “Kuncono kuba ngumuntfu lobeketelako kunekuba silwi. Uncono umuntfu lotibambako kunemncobi nemtfumbi wemadolobha.” (Taga 16:32) Kulingisa Jesu Khristu nekutibamba kudzinga kutimisela lokukhulu. Indvodza lehlukumeta umfati wayo ngemavi nobe ngetento ayisiyo indvodza sibili, futsi itawulahlekelwa buhlobo bayo naJehova. Umhlabeli Davide, lobekayindvodza lenemandla futsi lenesibindzi watsi: “Nanitfukutsele ningoni, cabangisisani nisathulile etinhlitiyweni tenu, nisacambalele emacansini enu.”—Hla. 4:4.

18. Kungani kubalulekile kuhlale ukhombisa lutsandvo?

¹⁸ Fundza 1 Khorinte 13:4-7. Lutsandvo lubaluleke kakhulu emshadweni. “Gcokani luvelo, umusa, kutfobeka, umoya lophansi, nekubeketela. Kodvwa ngetulu kwato tonkhe letintfo, gcokani lutsandvo ngobe lusibopho lesiphelele sebunye.” (Khol. 3:12, 14) Bantfu labashadene kufanele bakhombise lutsandvo ngekungatigodli futsi balingise Khristu, lobekatimisele kutidzela kuze kuzuze labanye. Nangabe umshado usekelwe kulolo tsandvo, utawuhlala ucinile ngisho nobe loshade naye enta tintfo letingakuphatsi kahle, nobe kunetinkinga temphilo, tinkinga temali, nekungevani nebasekhakhakho.

19, 20. (a) Bantfu labashadene bangawakha njani umshado locinile nalojabulisako? (b) Yini lesitawucoca ngayo esihlokweni lesilandzelako?

¹⁹ Kuliciniso kutsi kudzingeka kutinikela ngelutsandvo, kwetsembeka, kanye nemetamo leminyenti kute umshado uphumelele. Esikhundleni sekutsi bantfu labashadene bawushiye umshado wabo nakunetinkinga, kufanele batimisele kuwenta uphumelele—kunekutsi umane nje ube khona. EmaKhristu lashadene latinikele kuJehova futsi latsandzanako, achutjwa lutsandvo lanalo ngaNkulunkulu nangaloyo lashade naye kutsi acatulule tinkinga tawo, ngobe “lutsandvo aluyoke luphele.”—1 Khor. 13:8; Mat. 19:5, 6; Heb. 13:4.

²⁰ Kulukhuni kakhulu kwakha umshado locinile nalojabulisako ‘kuletikhatsi letibucayi’ lesiphila kuto. (2 Thim. 3:1) Kodvwa ngelusito lwaJehova, ungaphumelela. Nanobe kunjalo, bantfu labashadene kufanele bamelane nekuhhohloka kwekutiphatsa lokugcwele emhlabeni wonkhe. Sihloko lesilandzelako sitawucoca ngekutsi bantfu labashadene bangawuvikela njani umshado wabo.