1. Siphila kusiphi sikhatsi?

SIPHILA ‘etikhatsini letibucayi lokumatima kubhekana nato.’ Kusukela nga-1914, nakucala ‘emalanga ekugcina,’ timo tekuphila emhlabeni taba timbi. (2 Thimothi 3:1-5) Siyaciniseka kutsi titawuchubeka tiba timbi kakhulu ngobe siphrofetho seliBhayibheli sitsi “bantfu lababi nebakhohlisi batawudlanga ngebubi.”—2 Thimothi 3:13.

2. Bantfu labanyenti batijabulisa ngani? (Buka sitfombe lesisekucaleni kwalesihloko.)

² Bantfu labanyenti batijabulisa ngekubukela budlova, kutiphatsa lokubi, imilingo nebudimoni. Labanye bayatenta letintfo. Sibonelo saloku kutsi i-Internet, tinhlelo te-TV, ema-movie, tincwadzi nabomagazini kwenta budlova nekutiphatsa lokubi kubonakale kutintfo letemukelekako. Kutiphatsa lobekuvamise kubamangalisa bantfu nyalo sekuyemukeleka, kangangekutsi kuletinye tindzawo sekusemtsetfweni. Kodvwa loko akusho kutsi Jehova uyakwemukela kutiphatsa lokunjalo.—Fundza Roma 1:28-32.

3. Yini bantfu labanyenti labayicabangako ngalabo labaphila ngetimiso taNkulunkulu?

 ³ Ngelikhulu lekucala, bantfu bebabukela budlova nekutiphatsa lokubi kute batijabulise. Kodvwa bafundzi baJesu bebangakwenti loko ngobe bebaphila ngetimiso taNkulunkulu. Loko ‘kwabamangalisa’ bantfu labanye. Waba yini umphumela? Bantfu bahlekisa ngemaKhristu futsi bawaphatsa kabi. (1 Phetro 4:4) Nalamuhla, bantfu labanyenti bacabanga kutsi labo labaphila ngetimiso taNkulunkulu abaphili kahle engcondvweni. Ecinisweni, liBhayibheli lisitjela kutsi labo labalandzela sibonelo saKhristu Jesu “nabo batawuphatfwa kabi.”—2 Thimothi 3:12.

4. Kungani kungasikuhle kutsandza lelive?

⁴ Nasifuna kwenta intsandvo yaNkulunkulu, akukafaneli silitsandze “live nobe tintfo letikulo.” (Fundza 1 Johane 2:15, 16.) Njengobe Sathane ‘angunkulunkulu walelive,’ nguye lolibusako. Usebentisa tinkholo, bohulumende, emabhizinisi lamakhulu nebetindzaba kute adukise bantfu. (2 Khorinte 4:4; 1 Johane 5:19) Asifuni kudukiswa ngulelive, ngako kufanele sikubalekele kuba nebudlelwane nalo. LiBhayibheli lisecwayisa ngalokucacile nalitsi: “Ningadukiswa. Kutihlanganisa nebantfu lababi kona imikhuba lemihle.”—1 Khorinte 15:33.

5, 6. Bobani lokungasikahle kutsi sakhe bungani nabo, futsi ngani?

⁵ Kute sichubeke sinebudlelwane lobuhle naJehova, siyakubalekela kwakha bungani nemuntfu lowenta tintfo letimbi. Loku kufaka ekhatsi nebantfu labatsi bakhonta Jehova kodvwa babe bangamlaleli. Nangabe bantfu labanjalo benta sono lesikhulu futsi bangaphendvuki, siyabuncamula bungani betfu nabo.—Roma 16:17, 18.

⁶ Ngalokuvamile bantfu labanyenti bafuna kujabulisa bangani babo futsi bemukeleke kubo. Ngako nasakha bungani nebantfu labangamlaleli Nkulunkulu, singase silingeke kutsi sente njengabo. Sibonelo saloku kutsi nangabe sakha bungani nebantfu labatiphatsa kabi ngekwelicansi, natsi singase sibalingise. Nguloko lokwentekile kulabanye bazalwane nabodzadzewetfu, futsi labo labangakaphendvuki bayekelisiwe kuba BoFakazi. (1 Khorinte 5:11-13) Nabangaphendvuki, simo sabo singafanana naleso lesichazwa nguPhetro.—Fundza 2 Phetro 2:20-22.

7. Bobani lesingakha nabo bungani?

⁷ Nanobe sifuna kuba nemusa kubo bonkhe bantfu, akusikuhle kwakha bungani nebantfu labangamlaleli Nkulunkulu. Kungaba ngulokungakalungi ngaFakazi WaJehova longakashadi kutsi akhetse kuhlala nemuntfu longamhloniphi Jehova futsi longaphili ngetimiso  takhe. Ngendlela lefanako, kungaba ngulokungakalungi ngaFakazi WaJehova kutsi atsandzane nemuntfu longasiyo inceku yaJehova leyetsembekile futsi lengakabhajatiswa. Kubaluleke kakhulu kutsi semukelwe nguNkulunkulu kunekutsi semukelwe bantfu labangamtsandzi. Kuhle kutsi sakhe bungani kuphela nalabo labenta intsandvo yaNkulunkulu. Jesu watsi: “Nobe ngubani lowenta intsandvo yaNkulunkulu nguye longumnaketfu, dzadzewetfu kanye namake.”—Makho 3:35.

8. Kwakha bungani nebantfu lababi kwaba namiphi imiphumela esiveni saka-Israyeli?

⁸ Kwakha bungani nebantfu lababi kuphumela enhlekeleleni. Cabanga ngaloko lokwenteka kuma-Israyeli. Ngaphambi kwekutsi efike eVeni Lesetsembiso, Jehova wawecwayisa ngebantfu lebebaphila kulelo live. Watsi: “Ningabakhotsameli bonkulunkulu babo, ningabakhonti, ningayenti nemikhuba yabo yekukhonta. Bonkulunkulu babo nibobabhidlita kanye netinsika tabo tematje. Nanikhonta mine [Jehova] longuNkulunkulu wenu.” (Eksodusi 23:24, 25) Kodvwa ema-Israyeli lamanyenti awazange atilalele ticondziso taNkulunkulu futsi awazange etsembeke kuye. (Tihlabelelo 106:35-39) Waba yini umphumela? Ngekuhamba kwesikhatsi Jehova wasilahla lesive wase ukhetsa libandla lebuKhristu kutsi libe bantfu bakhe.—Matewu 23:38; Imisebenti 2:1-4.

9. Kungani kungaba yingoti loko lokushiwo betindzaba?

⁹ Lokunyenti lokushiwo betindzaba, tinhlelo te-TV, ema-website kanye netincwadzi kungabulimata buhlobo betfu naJehova. Letintfo atikentelwa kutsi tisite umKhristu abe nekukholwa kuJehova nasetetsembisweni takhe. Esikhundleni saloko, tikhutsata bantfu kutsi betsembele kulelive lelibi laSathane. Ngako kudzingeka sicaphelisise kutsi singabukeli, sifundze nobe silalele tintfo letingasenta sibe ‘netifiso talelive.’—Thithusi 2:12.

10. Yini letawenteka emtfonjeni wetindzaba walelive?

¹⁰ Ngekushesha, live laSathane kanye nemtfombo walo lomubi wetindzaba kutawubhujiswa. LiBhayibheli litsi: “Live liyendlula kanye nesifiso salo, kodvwa loyo lowenta intsandvo yaNkulunkulu uhlala kuze kube phakadze.” (1 Johane 2:17) Ngendlela lefanako, umhlabeli wahlabela watsi: “Benti balokubi batawushabalaliswa.” Wengeta watsi: “Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.” Kute kube ngunini? “Labalungile bayawudla lifa lemhlaba, bahlale [kuwo] kuze kube phakadze.”—Tihlabelelo 37:9, 11, 29.

11. Usisita njani Nkulunkulu kutsi sihlale setsembekile kuye?

¹¹ Ngalokungafani nelive laSathane, inhlangano yaJehova isisita kutsi siphile ngendlela letasiholela ekuphileni lokuphakadze. Jesu wathantaza kuJehova watsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Jehova usebentisa inhlangano yakhe kute asinike konkhe lesikudzingako  kuze kusisite simati. Nasi sibonelo: Sinabomagazini labanyenti, tincwajana, tincwadzi, ema-video kanye ne-website yetfu, konkhe loku kusisita kutsi sichubeke simkhonta. Inhlangano yakhe iphindze ihlele imihlangano lechutjwa njalo emabandleni langetulu kwa-110 000 emhlabeni wonkhe. Lesikufundza eBhayibhelini nasikulemihlangano lemincane nalemikhulu kucinisa kukholwa kwetfu kuJehova nasetetsembisweni takhe.—Hebheru 10:24, 25.

12. Chaza umyalo loseBhayibhelini lomayelana nekushada ‘eNkhosini kuphela.’

¹² EmaKhristu lafuna kushada kufanele acaphelisise kutsi bobani lakhetsa kwakha nabo bungani. LiVi laNkulunkulu liyasecwayisa litsi: “Ningaboshelwa ejokeni linye nebantfu labangakholwa. Ngobe kulunga kunabudlelwane buni nekungalungi? Kukhanya kunabudlelwane buni nebumnyama?” (2 Khorinte 6:14) LiBhayibheli litjela tinceku taNkulunkulu kutsi tishade ‘eNkhosini kuphela,’ lokusho kushada nemuntfu lotinikele, wabhajatiswa futsi lophila ngetimiso taJehova. (1 Khorinte 7:39) Nawushada nemuntfu lotsandza Jehova, utawuba nemlingani lotakusita uhlale wetsembekile kuNkulunkulu.

13. Ngumuphi umyalo Nkulunkulu lawunika ema-Israyeli mayelana nemshado?

¹³ Jehova uyati kutsi yini lencono kitsi, futsi siyalo sakhe sekushada ‘eNkhosini kuphela’ asisisisha. Nasi sibonelo: Cabanga ngaloko Jehova lakutjela sive sema-Israyeli mayelana netive lebetingamkhonti. Asebentisa Mosi, wawayala watsi: “Ningendziselani nato. Emadvodzakati enu ningavumi kutsi ashade nemadvodzana ato, nemadvodzana enu ningavumi kutsi ashade nemadvodzakati ato, ngobe ayawuhlubukisa lamadvodzana enu angabe asangilandzela, awente akhonte labanye bonkulunkulu, intfukutselo [yaJehova] bese iyanivutsela, inibhubhise ngekushesha.”—Dutheronomi 7:3, 4.

14, 15. Yini leyenteka kuSolomoni ngenca yekungawulaleli umyalo waJehova?

¹⁴ Ngekushesha nje ngemuva kwekutsi Solomoni acale kuba yinkosi yaka-Israyeli, wathantaza wacela kuhlakanipha, futsi Jehova wawuphendvula umthantazo wakhe. Ngako Solomoni wacala kwatiwa njengembusi lohlakaniphile wesive lesiphumelelako. Ecinisweni, indlovukati yaseSheba yajabula kakhulu ngekuhlakanipha kwakhe yaze yatsi kuye: “Kuhlakanipha kwakho nemcebo wakho kungetulu kwaloko lengakuva ngematekelo.” (1 Emakhosi 10:7) Kodvwa sibonelo saSolomoni sisifundzisa ngaloko lokwenteka kumuntfu longayinaki imiyalo yaNkulunkulu futsi ashade nemuntfu  longamkhonti Jehova.—Umshumayeli 4:13.

¹⁵ Ngisho nobe Jehova abembusisile Solomoni, kodvwa wehluleka kulalela umyalo locacile wakhe. “Watsandzana nebafati labanyenti betive” lebebangamkhonti Jehova, futsi wagcine anebafati labangu-700 nemaphovela langu-300. Waba yini umphumela? Ngesikhatsi Solomoni sekakhulile, bafati bakhe ‘bebaya ngekuya baphambukisela inhlitiyo yakhe etithicweni tabo, . . . Solomoni wenta lokubi emehlweni’ aJehova. (1 Emakhosi 11:1-6) Kuba nebudlelwane nebantfu lababi kwamtsikameta, futsi akazange achubeke etsembekile kuJehova. Nangabe loko kwenteka kuSolomoni, kungenteka nakunobe ngubani. Kungako singakucabangi ngisho nekukucabanga kushada nemuntfu longamtsandzi Jehova!

16. Ngusiphi seluleko seliBhayibheli lesibhekiselwe kulabo labashade nebantfu labangasibo BoFakazi?

¹⁶ Kutsiwani nangabe lotsite aba sikhonti saJehova abe ashade nemuntfu longasiyeFakazi? LiBhayibheli litsi: “Nine bafati titfobeni emadvodzeni enu, kuze kutsi nangabe lamanye kuwo angalilaleli livi, azuzwe ngaphandle kwemavi ngekutiphatsa kwebafati bawo.” (1 Phetro 3:1) Loku kuyasebenta nasendvodzeni lenemfati longamkhonti Jehova. LiVi laNkulunkulu lisho ngalokucacile kutsi kufanele ube yindvodza nobe umfati lokahle futsi usebentise timiso taNkulunkulu  letimayelana nemshado. Ngako-ke, nangabe loshade naye abona kutsi indlela yakho yekuphila seyishintjile, angase akhonte Jehova. Sikubonile loku kwenteka kubantfu labanyenti labashadene.

17, 18. Yini leyasita Nowa kutsi asindze kuZamcolo, futsi yini leyasita emaKhristu angelikhulu lekucala kutsi asindze nakubhujiswa liJerusalema?

¹⁷ Bangani lababi bangakwenta kutsi ungamlaleli Jehova, kantsi bangani labakahle bangakusita kutsi wetsembeke kuye. Nowa usibonelo lesihle kitsi. Waphila ngesikhatsi ‘kukukhulu kona kwemuntfu emhlabeni’ futsi ‘yonkhe imizindlo nemicabango yenhlitiyo yakhe imibi ngaso sonkhe sikhatsi.’ (Genesisi 6:5) Bantfu bebababi kakhulu kangangekutsi Jehova wancuma kubabhubhisa. Kodvwa Nowa bekehlukile. LiBhayibheli litsi “abelungile” futsi “ahamba naNkulunkulu” weliciniso.—Genesisi 6:7-9.

¹⁸ Nowa akazange akhe bungani nebantfu lebebangamtsandzi Jehova. Yena nemndeni wakhe bebamatasatasa ngekwakha umkhumbi, futsi abephindze abe ‘ngumshumayeli wekulunga.’ (2 Phetro 2:5) Nowa nemkakhe, emadvodzana akhe lamatsatfu nabomkawo bebanebudlelwane lobuhle njengemndeni. Bachubeka bamatasatasa benta tintfo lebetijabulisa Nkulunkulu, ngenca yaloko basindza kuZamcolo. Sonkhe lamuhla sisitukulwane sabo, ngako kufanele kusijabulise kutsi Nowa nemndeni wakhe balalela Jehova futsi bangabakhi bungani nebantfu lababi. Ngendlela lefanako, emaKhristu angelikhulu lekucala awazange akhe bungani nebantfu labangamtsandzi Jehova. Alalela Jehova futsi asindza nakubhujiswa liJerusalema nga-70 C.E.—Lukha 21:20-22.

19. Yini letasisita kutsi sihlale setsembekile kuJehova?

¹⁹ NjengaNowa nemndeni wakhe, emaKhristu angelikhulu lekucala kanye natsi, asibakhi bungani nanobe ngubani longamtsandzi Jehova. Kunetigidzi tebazalwane nabodzadzewetfu labetsembekile lesingakha nabo bungani. Batasisita kutsi ‘sicine ekukholweni’ kuletikhatsi letimatima. (1 Khorinte 16:13; Taga 13:20) Cabanga nje kutsi kutawujabulisa kangakanani kusindza nakuphela lelive lelibi nekuphila eveni lelisha laJehova! Ngako kubaluleke kakhulu nyalo kungabakhi bungani nebantfu lababi!