1, 2. (a) Yini lolindzele kuyibona ePharadisi? (Buka sitfombe lesisekucaleni kwalesihloko.) (b) Yini letasijabulisa kakhulu emhlabeni lomusha?

SIKUBUKE ngalabovu “kuphila lokuphakadze.” Umphostoli Pawula wakuchaza ngekutsi “kuphila lokungukonakona.” (Fundza 1 Thimothi 6:12, 19.) Kulabanyenti, loku kutawusho kuphila phakadze ePharadisi emhlabeni. Akucabangeki kutsi kutawuba njani kuvuka ekuseni utive uphilile, ujabulile futsi wenetisekile. (Isaya 35:5, 6) Cabanga nje kutsi kutawuba mnandzi kangakanani kucitsa sikhatsi nemndeni wakho kanye nebangani bakho, kuhlanganise nalabo labatawube bavusiwe. (Johane 5:28, 29; Imisebenti 24:15) Utawuba nesikhatsi sekufundza emakhono lamasha futsi utfutfuke etintfweni lotsandza kutenta. Nasi sibonelo: Ungafundza lokunyenti ngesayensi. Nobe ungafundza kusebentisa tinsimbi tekudlala umculo nobe kutidwebela ipulani yendlu yakho.

² Nanobe sibuke phambili kuletintfo letinhle, kukhonta Jehova kutasiniketa injabulo lenkhulu. Cabanga nje kutsi kutawuba njani kuphila ngesikhatsi bonkhe bantfu sebatsatsa  libito laJehova njengalelingcwele futsi bamemukela njengeMbusi wabo. (Matewu 6:9, 10) Kutasijabulisa kubona umhlaba ugcwaliswe bantfu labete sono njengobe loko bekuyinjongo yaNkulunkulu. Njengobe kancane kancane sitawuya sibabete sono, ake ucabange kutsi kutawuba melula kangakanani kukhulisa bungani betfu naJehova.—Tihlabelelo 73:28; Jakobe 4:8.

3. Yini nyalo lokufanele sitilungiselele yona?

³ Siyetsemba kutsi Jehova utatenta tonkhe letintfo letinhle, ngobe “kuNkulunkulu tonkhe tintfo tingenteka.” (Matewu 19:25, 26) Nyalo sikhatsi sekutsi ‘sibambisise’ kuphila lokuphakadze nasifuna kuphila emhlabeni lomusha. Siyati kutsi kuphela kusondzela ngekushesha, ngako kufanele siphile ngendlela lekhombisa kutsi kungefika nobe kunini. Nyalo kufanele sente konkhe lokusemandleni etfu, kute sitilungiselele kuphila emhlabeni lomusha. Ase sibone kutsi singakwenta njani loko.

4. Singakulungiselela njani nyalo kuphila emhlabeni lomusha? Shano sibonelo.

⁴ Singatilungiselela njani nyalo kute siphile emhlabeni lomusha? Ase sitsi besilungiselela kuyohlala kulelinye live, besingenta tintfo letitsite kute silungele imphilo yakhona. Nasi sibonelo: Besingacala kufundza lulwimi lwakhona nemasiko akuleyo ndzawo. Besingeva nekudla kwakhona kutsi kunjani. Ngendlela lefanako, singatilungiselela nyalo kuphila emhlabeni lomusha ngekutsi sente konkhe lesingakwenta kute siphile shengatsi sesivele sikhona khona. Ase sihlole letinye tindlela lesingakwenta ngato loku.

5, 6. Kulalela ticondziso letivela enhlanganweni yaJehova kutasilungiselela njani kutsi siphile emhlabeni lomusha?

⁵ Kulelive, Sathane ufuna bantfu bacabange kutsi bangenta nobe yini labayifunako. Labanyenti bacabanga kutsi kubalulekile kutibusa nekutsi kute sidzingo sekulalela Nkulunkulu. Ube yini umphumela waloko? Ube kuhlupheka lokunyenti kanye nekungajabuli. (Jeremiya 10:23) Kodvwa Jehova unguMbusi lonelutsandvo. Cabanga nje kutsi kutawujabulisa kanjani emhlabeni lomusha lapho bonkhe bantfu sebamlalela!

⁶ Emhlabeni lomusha, sitawujabulela kulandzela ticondziso lesitatitfola ngenhlangano yaJehova kute tisisite ekwenteni umhlaba ube lipharadisi lelihle futsi tisisite kute sifundzise labo labatawube bavusiwe. Utawuba munyenti umsebenti Jehova latasinika wona. Kodvwa sitawenta njani nangabe labo labaholako basicela kutsi sente intfo lesingayitsandzi? Sitawubalalela yini? Sitawukwenta konkhe yini lokusemandleni etfu kute sibalalele futsi sijabule ngemsebenti wetfu? Kute sitilungiselele kuphila lokuphakadze emhlabeni lomusha, kufanele silalele ticondziso letivela enhlanganweni yaJehova nyalo.

7, 8. (a) Kungani kufanele sibambisane nalabo labaholako? (b) Ngutiphi tingucuko lamanye emaKhristu lahlangabetene nato? (c) Yini lesingaciniseka ngayo ngemhlaba lomusha?

⁷ Nangabe sifuna kukulungela kuphila emhlabeni lomusha, kufanele senetiseke futsi sibambisane nehlangano yaJehova kanye nalabanye. Kufanele senetiseke futsi sibambisane nalabanye. Nasi sibonelo: Nangabe sinikwa umsebenti lomusha, kufanele siwente ngekubambisana, sente konkhe lokusemandleni etfu kute sijabule futsi senetiseke. Nasisebenta  ngekubambisana nalabo labasiholako nyalo, singenta lokufanako emhlabeni lomusha. (Fundza Hebheru 13:17.) Ngesikhatsi ema-Israyeli efika eVeni Lesetsembiso, anikwa tindzawo lebekufanele ahlale kuto. (Numeri 26:52-56; Joshuwa 14:1, 2) Asati kutsi ngamunye wetfu utawunikwa yiphi indzawo kute ahlale kuyo emhlabeni lomusha. Ngako nangabe sitawube sifundze kusebenta ngekubambisana, sitawujabulela kwenta intsandvo yaJehova nobe ngukuphi lapho sitawuhlala khona.

⁸ Cabanga nje kutsi kutawuba lilungelo lelingakanani kuphila emhlabeni lomusha waNkulunkulu ngephansi kweMbuso wakhe. Ngaleso sizatfu, siyajabula ngekubambisana nenhlangano yaJehova nyalo futsi sente nobe yini lokutsiwa asiyente. Nanobe kunjalo, tabelo lesinikwa tona ngalesinye sikhatsi tingashintja. Nasi sibonelo: Lamanye emalunga emndeni waseBethel eMelika abelwe kutsi aye ensimini. Ngenca yekukhula nobe letinye timo, labanye babonisi labajikeletako babelwe kutsi bayoba ngemahlahlandlela lakhetsekile. Bayajabula etabelweni tabo letinsha futsi Jehova uyababusisa. Sitawujabula futsi Jehova utasibusisa nangabe sithantazela lusito lwakhe, sente konkhe lesingakwenta kute simkhonte futsi sifundze kwenetiseka nganobe ngumuphi umsebenti lesinikwa wona. (Fundza Taga 10:22.) Yini lotawuyenta emhlabeni lomusha nangabe utsandza kuhlala kulenye indzawo kodvwa inhlangano yaJehova ikucele kutsi uhlale kulenye? Ngaleso sikhatsi, ngeke kube nendzaba kutsi sihlala kuphi nobe sentani. Sitawujatjuliswa nje kutsi siphila emhlabeni lomusha.—Nehemiya 8:10.

9, 10. (a) Kungani kungase kudzingeke sibeketele emhlabeni lomusha? (b) Singakukhombisa njani kubeketela nyalo?

⁹ Ngalesinye sikhatsi, kutawenteka kudzingeke kutsi sibeketele nasesiphila emhlabeni lomusha. Nasi sibonelo: Kungenteka sive kutsi labanye bajabulile ngobe tihlobo tabo kanye nebangani babo bavusiwe. Nobe kunjalo, kungase kudzingeke silindze kute tihlobo tetfu lesititsandzako tivuswe. Nangabe loko kwenteka, sitawujabula yini nalabanye futsi sibeketele? (Roma 12:15) Nasilindza ngekubeketela kutsi Jehova agcwalise tetsembiso takhe nyalo, loko kutasisita kutsi sibeketele emhlabeni lomusha.—Umshumayeli 7:8.

¹⁰ Singatilungiselela kuphila emhlabeni lomusha nangekutsi sibeketele nasitfola lushintjo endleleni lesicondza ngayo emaciniso latsite eliBhayibheli. Siyawafundza yini lamaciniso futsi sibeketele nangabe singawacondzi kahle? Nangabe kunjalo, kutawuba melula kubeketela ngaso sonkhe sikhatsi Jehova nakasinika ticondziso letinsha emhlabeni lomusha.—Taga 4:18; Johane 16:12.

11. Kungani kufanele sifundze kutsetselela labanye nyalo, futsi loko kutasisita njani emhlabeni lomusha?

¹¹ Lenye indlela lesingatilungiselela ngayo kuphila emhlabeni lomusha kutsi  sifundze kutsetselelana. Kutawutsatsa sikhatsi kutsi bonkhe bantfu bagcine sebete sono ngesikhatsi seKubusa KwaKhristu Kweminyaka Leyinkhulungwane. (Imisebenti 24:15) Sitawutsandzana futsi sitsetselelane yini? Nasifundza kutsetselela labanye nyalo futsi sibe nebudlelwane lobuhle nabo, kutawuba melula kukwenta loko emhlabeni lomusha.—Fundza Kholose 3:12-14.

12. Kungani kufanele sikulungiselele nyalo kuphila emhlabeni lomusha?

¹² Emhlabeni lomusha, kungenteka singakutfoli lesikufunako nobe kudzingeke kutsi sikulindze sidzimate sikutfole. Kutawudzingeka kutsi sibonge futsi senetiseke kunobe ngusiphi simo lesingaba kuso. Ecinisweni, kutawudzingeka sibe nebuntfu lobufanako nalobo Jehova lasifundzisa kutsi sibe nabo nyalo. Ngako, nasicala kukhombisa lobuntfu nyalo, sikhombisa kutsi live lelisha liyintfo mbamba kitsi futsi sitilungiselela kuphila lokuphakadze. (Hebheru 2:5; 11:1) Sitawube sikhombisa nekutsi sikufuna mbamba kuphila eveni lapho bonkhe bantfu batawube balalela Jehova.

13. Yini letakuta kucala ekuphileni kwetfu emhlabeni lomusha?

¹³ Sitawube sinako konkhe lesikudzingako kute sijabulele kuphila emhlabeni lomusha. Kodvwa injabulo lenkhulu sitayitfola ngekuba nebudlelwane lobuhle naJehova. (Matewu 5:3) Sitawube simatasatasa emsebentini wakhe, futsi sitakujabulela kumkhonta. (Tihlabelelo 37:4) Ngako nangabe Jehova eta kucala ekuphileni kwetfu nyalo, silungiselela kuphila emhlabeni lomusha.—Fundza Matewu 6:19-21.

14. Ngumiphi imigomo labasebasha labangatibekela yona emsebentini waJehova?

¹⁴ Yini lengasisita kute sikujabulele kakhulu kukhonta Jehova? Lenye indlela kutsi sitibekele imigomo. Nangabe usemusha, cabangisisa ngekusebentisa kuphila kwakho kute ukhonte Jehova. Kungani  ungacwaningi ngetinhlobo letehlukene temsebenti wasikhatsi sonkhe etincwadzini tetfu? Ungatibekela umgomo wekungenela lunye lwaletinhlobo temsebenti wasikhatsi sonkhe. * (Fundza umbhalo longentansi.) Coca nalabanye lesekuphele iminyaka leminyenti bakhonta Jehova emsebentini wasikhatsi sonkhe. Nangabe usebentisa kuphila kwakho ekukhonteni Jehova, utawutfola kuceceshwa lokulusito lolukhulu. Lokuceceshwa kutakusita kute ukhonte Jehova emhlabeni lomusha.

15. Ngumiphi leminye imigomo lesingatibekela yona emsebentini waJehova?

¹⁵ Minyenti imigomo lesingatibekela yona emsebentini waJehova. Nasi sibonelo: Singatibekela umgomo wekufundza likhono lelisha emsebentini wekushumayela. Nobe setame kucondza kancono timiso letiseBhayibhelini futsi sifundze kutsi singatisebentisa njani ekuphileni kwetfu. Singetama nekutfutfukisa indlela lesifundzela ngayo linyenti, tinkhulumo lesitibekako kanye netimphendvulo tetfu nasisesifundvweni. Nali liphuzu: Nawutibekela imigomo emsebentini waJehova, loko kutakusita kutsi ukhutsale futsi utilungiselele kuphila emhlabeni lomusha.

16. Kungani kukhonta Jehova kuyindlela lencono yekuphila?

¹⁶ Silahlekelwa kuphila lokuncono yini nangabe sisebentisa sikhatsi setfu nyalo kute sitilungiselele live lelisha laNkulunkulu? Cha! Kukhonta Jehova kuyindlela lencono kakhulu yekuphila. Asimkhonti ngobe lotsite asiphocelela nobe kute sisindze ekuhluphekeni lokukhulu. Nangabe sinebudlelwane lobuhle naJehova, kuphila kwetfu kuba ncono futsi kujabulise. Nguleyo indlela lasidala kutsi siphile ngayo. Kutsandvwa nguNkulunkulu nekutfola ticondziso takhe ekuphileni  kwetfu, kuncono kakhulu kwendlula nobe yini lenye. (Fundza Tihlabelelo 63:1-3.) Sonkhe singayitfola injabulo ngekukhonta Jehova ngenhlitiyo yetfu yonkhe. Labanye lesebamkhonte iminyaka leminyenti bangasho kutsi lena yindlela lencono kakhulu yekuphila.—Tihlabelelo 1:1-3; Isaya 58:13, 14.

17. Kutawube kubaluleke kangakanani kwenta tintfo lesititsandzako nekutijabulisa ePharadisi?

¹⁷ EPharadisi sitawujabulela kusebentisa lesinye sesikhatsi setfu etintfweni lesititsandzako nasekutijabuliseni. Ngetulu kwako konkhe, nguJehova lowasidala saba nesifiso sekutijabulisa futsi wetsembisa kutsi ‘utawesutsisa tonkhe tifiso talokuphilako.’ (Tihlabelelo 145:16; Umshumayeli 2:24) Siyakudzinga kutijabulisa nekuphumula, kodvwa sikujabulela kakhulu nangabe sibeka kucala buhlobo betfu naJehova. Kutawuba ngendlela lefanako nasemhlabeni lomusha. Ngako, kukuhlakanipha kuchubeka ‘sifuna kucala uMbuso’ futsi sinake tibusiso lesititfola ngekukhonta Jehova.—Matewu 6:33.

18. Singakhombisa njani kutsi sitilungiselela kuphila phakadze ePharadisi?

¹⁸ Emhlabeni lomusha, imphilo itawuba ncono ngendlela lesingeke siyicabange. Shengatsi singakhombisa kutsi siyafuna kuba semhlabeni lomusha ngekutsi sitilungiselele nyalo “kuphila lokungukonakona.” Asitfutfukise buntfu Jehova lasifundzisa kutsi sibe nabo ngekutsi sitishumayele ngenkhutsalo tindzaba letimnandzi. Shengatsi singajabula ngekubeka Jehova kucala ekuphileni kwetfu. Siciniseka kakhulu kutsi Jehova utakwenta konkhe lakwetsembisile emhlabeni lomusha. Ngako-ke, kufanele siphile shengatsi sesikhona khona!