1, 2. Yini leyenta liBhayibheli licatsanise likhono letfu lekukhuluma nemlilo?

NGA-1871, kwesuka umlilo emahlatsini aseWisconsin, eMelika. Ngekushesha lokukhulu tihlahla letitigidzigidzi letimbili tasha tangcongca. Kwafa bantfu labangetulu kwa-1 200. Kute lomunye umlilo lowabulala bantfu labanyenti kangaka eMelika. Kubonakala shengatsi lomlilo wesuswa tinhlase lebetisuka etitimeleni letendlula kulelohlatsi. Loko kusikhumbuta ngelivesi leliseBhayibhelini lelitsi: “Asewubuke nje kutsi mncane kangakanani umlilo lodzingekako kute kulunyekwe lihlatsi lelikhulu!” (Jakobe 3:5) Yini leyenta umbhali weliBhayibheli Jakobe washo lamavi?

² Nakachaza utsi: “Nelulwimi lungumlilo.” (Jakobe 3:6) ‘Lulwimi’ lusho likhono letfu lekukhuluma. Njengemlilo, loko lesikushoko kungabanga umonakalo lomkhulu. Lesikushoko kuyabatsintsa labanye. LiBhayibheli lize lisitjele kutsi lulwimi lunemandla ekuphila newekufa. (Taga 18:21) Loko kusho kutsi kufanele sibindze yini ngobe sesaba kutsi sitawukhuluma kabi? Cha. Ngeke sitsi ngobe sesaba kusha bese asisawusebentisi umlilo. Esikhundleni saloko, kufanele sigadze  indlela lesiwusebentisa ngayo. Nasi sibonelo: Umlilo uyasisita kute sipheke, sotse siphindze sikhanyise. Ngendlela lefanako, nasiyigadza indlela lesikhuluma ngayo, sitawudvumisa Jehova futsi sisite nalabanye.—Tihlabelelo 19:14.

3. Ngutiphi tintfo letintsatfu letitasisita kutsi sikhutsate labanye nasikhuluma?

³ Jehova wasiniketa likhono lekutjela labanye loko lesikucabangako nendlela lesitiva ngayo. Singabatjela ngekukhuluma ngemlomo nome ngelulwimi lwetandla. Singasisebentisa njani lesipho lesimangalisako kute sikhutsate labanye? (Fundza Jakobe 3:9, 10.) Kudzingeka sisati sikhatsi sekukhuluma, sikwati nalokufanele sikukhulume nekutsi sitakukhuluma njani.

4. Kunini lapho kufanele sibindze khona?

⁴ Ngaletinye tikhatsi kukahle kubindza. LiBhayibheli litsi ‘kunesikhatsi sekubindza.’ (Umshumayeli 3:7) Nasi sibonelo: Siyabindza nangabe labanye bantfu bakhuluma kute sikhombise kutsi siyabahlonipha. (Jobe 6:24) Asitikhulumi timfihlo talabanye. (Taga 20:19) Nangabe umuntfu asikwatisa, sitawube senta ngekuhlakanipha nasingamphendvuli futsi singatfukutseli.—Tihlabelelo 4:4.

5. Singamkhombisa njani Jehova kutsi siyambonga ngekusenta sikhone kukhuluma?

⁵ Kodvwa tikhona netikhatsi lapho kukahle khona kukhuluma. (Umshumayeli 3:7) Kunesikhatsi sekudvumisa Jehova, sekukhutsata labanye bantfu, sekuveta indlela lesitiva ngayo nesekutjela labanye ngaloko lesikudzingako. (Tihlabelelo 51:15) Nasisebentisa likhono letfu lekukhuluma ngalendlela, sisuke sikhombisa Jehova kutsi siyambonga ngalesipho lasiphe sona. Nangabe umngani wetfu asipha sipho, sifisa kusisebentisa ngendlela lekahle kakhulu.

6. Kubaluleke ngani kukhetsa sikhatsi lesikahle sekukhuluma?

⁶ Kubaluleke ngani kukhetsa sikhatsi lesikahle sekukhuluma? Taga 25:11 titsi: “Livi lelikhulunywe ngesikhatsi lesifanele lifanana nemahhabhula egolide labekwe etindishini tesiliva.” Emahhabhula eligolide mahle, kodvwa angaba mahle kakhulu nawabekwe esitjeni selisiliva. Ngendlela lefanako, kungenteka sifuna kutjela umuntfu lotsite tindzaba letimnandzi. Kodvwa nasikhetsa sikhatsi lesikahle sekukhuluma naye, singamsita kakhulu loyo muntfu. Singakwenta kanjani loko?

7, 8. Bazalwane betfu baseJapan bamlingisa njani Jesu?

⁷ Nangabe sikhulume kungakabi sikhatsi lesikahle, ngeke bantfu bakucondze nome bakwemukele lesikushoko. (Fundza Taga 15:23.) Nasi sibonelo: NgaMarch 2011, kutamatama kwemhlaba kanye ne-tsunami kwagadla emphumalanga yeJapan kwabhidlita emadolobha lamanyenti. Kwafa bantfu labangetulu kwa-15 000. BoFakazi BaJehova labanyenti nabo bafelwa tihlobo nebangani, nome kunjalo, basebentisa liBhayibheli kute basite labo lebebasesimeni lesifana nesabo. Bebati kutsi linyenti lalabantfu abalati lokuyaphi liBhayibheli ngobe bangema-Buddha. Ngako, kunekutsi babatjele ngaleso sikhatsi ngekuvuswa kwalabafile, labazalwane babadvudvuta futsi babachazela ngekutsi kungani tintfo letimbi tehlela bantfu labalungile.

⁸ Labazalwane balingisa Jesu. Bekasati  sikhatsi sekubindza nesekukhuluma. (Johane 18:33-37; 19:8-11) Jesu walindza kwate kwaba sikhatsi lesikahle kute afundzise bafundzi bakhe. (Johane 16:12) Nebazalwane baseJapan balindza kwadzimate kwefika sikhatsi lesikahle kute bacocele bantfu ngeluvuko. Ngemuva kweminyaka lemibili nehhafu yentekile le-tsunami, babaniketa lipheshana lelitsi Vele Bangaphindze Baphile Yini Bantfu Labafile? Labanyenti balitsatsa lelipheshana futsi kwabadvudvuta loko labakufundza kulo. Natsi kufanele sicabange ngemasiko netinkholelo tebantfu labasensimini yetfu kuze sisati sikhatsi lesikahle sekukhuluma nabo.

9. Ngukutiphi letinye timo lapho kufanele simele khona sikhatsi lesikahle sekukhuluma?

⁹ Ngutiphi letinye timo lakufanele khona simele sikhatsi lesikahle sekukhuluma? Kungenteka umuntfu asho intfo letasicansula. Kukuhlakanipha kungamphendvuli ngaleso sikhatsi, kunaloko, sitibute kutsi: ‘Vele bekacondze kungikhuba yini? Kufanele yini vele ngikhulume naye ngaloku lakushito?’ Kungaba kuhlakanipha kutithulela. Kodvwa kuhle kwehlisa umoya kucala nangabe kufanele nikhulume. (Fundza Taga 15:28.) Ngalesinye sikhatsi kungenteka sifuna kukhutsata emalunga emindeni yetfu langasibo BoFakazi kutsi afundze ngaJehova. Kufanele sibeketele, sicabangisise ngalesifuna kukusho futsi sikhulume ngesikhatsi langafisa kusilalela ngaso.

10. (a) Kubaluleke ngani kucabangisisa ngaloko lesifuna kukukhuluma? (b) Nguyiphi indlela yekukhuluma lokufanele siyigweme?

¹⁰ Lesikushoko kungabajabulisa nome kubaphatse kabi labanye. (Fundza Taga 12:18.) Linyenti lebantfu kulelive laSathane lisebentisa emavi lahlabako lafana ‘nemicibisholo’ nome ‘inkemba’ kute bavise labanye buhlungu. (Tihlabelelo 64:3) Bantfu labanyenti bafundza lendlela yekukhuluma kuma-movie nasetinhlelweni te-TV. EmaKhristu akukafaneli akhulume emagama lahlabako nalangakacatjangwa, ngisho nome atekula nje. Kutekula kukahle futsi kwenta lesikushoko kuhlekise. Kodvwa ngeke sikhulume ngekuhhalatisa kute sihlaze nome setfuke lomunye ngobe nje sifuna kutsi labanye bahleke. LiBhayibheli liyala emaKhristu kutsi angayisebentisi ‘inkhulumo lehlabako.’ Liphindze litsi: “Akungaphumi ligama lelibolile emlonyeni wenu, kodvwa akuphume loko lokulungele kwakha kuye ngesidzingo, kuze kuniketwe lokulusito kulabo labalalele.”—Efesu 4:29, 31.

11. Yini lengasisita kutsi siwakhetse kahle emagama?

¹¹ Jesu wafundzisa kutsi “umlomo ukhuluma loko lokugcwele enhlitiyweni.” (Matewu 12:34) Loko kusho kutsi indlela lesikhuluma ngayo ingaveta indlela lesitiva ngayo. Nangabe sibatsandza bantfu futsi sinendzaba nabo, sitawukhetsa emagama lakahle nasikhuluma. Sitawukhuluma tintfo letakhako naletikhutsatako.

12. Yini lenye lengasisita kutsi sikhetse kahle emagama?

 ¹² Kukhuluma emagama lakahle kudzinga umetamo. Nanobe Solomoni abeyiNkhosi lehlakaniphile, “abecabangisisa aphenyisise” kute abhale lokungiko nalokujabulisako kukufundza. (Umshumayeli 12:9, 10) Yini lengasisita sati loko lokufanele sikusho? Singasitwa kufundza liBhayibheli kanye naletinye tincwadzi tetfu kute sitfole tindlela letincono tekukhuluma. Singatfola tinchazelo temagama lesingaweva kahle. Singafundza nangesibonelo saJesu kute sitfole indlela yekukhuluma lengasita labanye. Abekwati loko lokufanele akusho ngobe Jehova wamfundzisa kutsi ‘ati livi lekucinisa labamadvolo abo asaceka.’ (Isaya 50:4) Kubalulekile kutsi sicabange ngekutsi atabaphatsa njani labanye emagama lesiwakhulumako. (Jakobe 1:19) Singatibuta kutsi: ‘Nangabe ngikhuluma ngalendlela, utayiva yini lentfo lengetama kumtjela yona? Kutamphatsa njani lengikushoko?’

13. Kubaluleke ngani kukhuluma ngendlela lokulula kuyicondza?

¹³ Ka-Israyeli bekusetjentiswa emacilongo kuze kutjelwe sive imilayeto letsite. Ngalesinye sikhatsi belishaywa kute kutjelwe bantfu kutsi bahlangane ndzawonye. Laliphindze lishaywe kuze kutjelwe emasotja kutsi awahlasele. Ase ucabange nje kutsi bekutawentekani kulelibutfo nangabe lelicilongo lingevakali kahle! LiBhayibheli lifanisa kuvakala kwemsindvo welicilongo nemavi lokumelula kuwacondza. Nangabe singaticacisi kahle tintfo lesitishoko, bantfu bangadideka nobe bakholwe intfo lengasilo liciniso. Nanobe sifisa kutsi lesikushoko kucace, kufanele sigadze singakhulumi ngendlela letawubavisa buhlungu labanye nobe ingakhombisi inhlonipho.—Fundza 1 Khorinte 14:8, 9.

14. Ngusiphi sibonelo lesikhombisa kutsi Jesu bekakhuluma ngendlela lemelula kuyicondza?

¹⁴ KuMatewu sehluko 5 kuya kusehluko 7 sifundza ngesibonelo lesihle sendlela Jesu lakhetsa ngayo emagama lamelula. Kulenkhulumo, Jesu akazange etame kujabulisa bantfu ngekusebentisa emagama lalukhuni nobe langakabaluleki. Akazange akhulume tintfo lebetitawuvisa labanye buhlungu. Jesu abefundzisa tintfo letibalulekile lebetinenchazelo lejulile, kodvwa loko lebekakusho bekumelula kukucondza. Nasi sibonelo: Jesu bekafuna kucinisekisa bafundzi bakhe kutsi akukafaneli bakhatsateke ngekutsi batawudlani. Ngako wabachazela kutsi Jehova uhlale atondla tinyoni. Ngemuva kwaloko wababuta watsi: “Nine anikabaluleki yini kwendlula tona?” (Matewu 6:26) Ngalamagama lalula, Jesu wabafundzisa sifundvo lesibalulekile futsi bakhutsateka.

15. Yini leyenta kubaluleke kukhuluma ngendlela lenemusa?

¹⁵ Indlela lesikhuluma ngayo nalabanye ibaluleke ngendlela lefanako naloko lesikushoko. Bantfu bebakutsandza kulalela Jesu ngobe bekakhuluma emavi “lamnandzi” nobe akhulume ngemusa. (Lukha 4:22) Nasikhuluma ngendlela lenemusa, bantfu batawutsandza kusilalela futsi bakwemukele lesikushoko. (Taga 25:15) Kute sikhone kukhuluma nebantfu ngendlela lenemusa, kufanele sibahloniphe futsi sibacabangele. Nguloko kanye Jesu lakwenta. Nasi sibonelo: Ngesikhatsi  abona bantfu betama ngato tonkhe tindlela kumlalela, wakujabulela kuhlala nabo futsi wabafundzisa. (Makho 6:34) Ngisho nangesikhatsi bametfuka, akazange aphindzisele ngekwetfuka.—1 Phetro 2:23.

16, 17. (a) Singamlingisa njani Jesu nasikhuluma nemalunga emndeni kanye nebangani betfu? (Buka sitfombe lesisekucaleni kwalesihloko.) (b) Kwasita ngani kukhuluma ngendlela lenemusa kwamake lotsite?

¹⁶ Nanobe siwatsandza emalunga emndeni wetfu nebangani, ngalesinye sikhatsi singase sikhulume tintfo letingabaphatsi kahle ngobe sesibetayele kakhulu. Singase sicabange kutsi nasikhuluma nabo kufanele sikhulume sinoma kanjani. Kodvwa Jesu akazange akhulume sinoma kanjani nebangani bakhe. Ngesikhatsi labanye babo baphikisana ngekutsi ngubani lomkhulu, wabeluleka ngemusa futsi wasebentisa sibonelo semntfwana lomncane kute abasite bashintje indlela lebebacanga ngayo. (Makho 9:33-37) Labadzala belibandla bangalingisa Jesu ngekutsi beluleke labanye ngemusa.—Galathiya 6:1.

¹⁷ Ngisho nalapho lotsite akhuluma intfo lesitfukutselisako, sitawube senta kahle kakhulu nasimphendvula ngemusa. (Taga 15:1) Nasi sibonelo: Indvodzana leseminyakeni yekutfomba lekhuliswe ngunina ayedvwa, beyenta shengatsi ikhonta Jehova kantsi yenta netintfo letimbi. Dzadze lotsite ebandleni lobekatsi ulilela lomake watsi kuye: “Cha kukwehlulile kufundzisa lomntfwana.” Lomake wacabanga, wase utsi: “Kona akuhambi kahle kwanyalo kodvwa solo ngisamfundzisa. Sesitawubona ngemuva kwe-Amagedoni.” Ngesizatfu sekutsi lomake waba nemoya lophansi futsi waphendvula ngemusa, bachubeka babangani nalodzadze. Lendvodzana yeva ngaloko unina lakusho futsi kwayisita yabona kutsi usayetsemba kutsi isengashintja. Ngako yabashiya bangani lababi, yabhajatiswa futsi ngekuhamba kwesikhatsi yasebenta eBethel. Ngaso sonkhe sikhatsi nasikhuluma nebazalwane betfu, emalunga emndeni, ngisho nalapho sikhuluma nebantfu lesingabati, emavi etfu kufanele ‘abe nemusa, futsi avangwe ngeluswayi.’—Kholose 4:6.

18. Singasilingisa njani sibonelo saJesu nasikhuluma?

¹⁸ Likhono lesinalo lekutjela labanye tintfo lesiticabangako kanye nendlela lesitiva ngayo, lisipho lesihle lesivela kuJehova. Nasilingisa sibonelo saJesu, sitawusati sikhatsi lesikahle sekukhuluma, sitakugadza lesikushoko futsi ngaso sonkhe sikhatsi setame kuba nemusa. Shengatsi singasebentisa lulwimi lwetfu kute sikhutsate labanye futsi sijabulise Jehova.