MAKE wangibuta watsi: “Ubangelwa yini kutsi ungawahloniphi emadloti akini? Awati yini kutsi uphila ngenca yawo? Kungani ungawabongi? Ungawalahla njani emasiko lesawanikwa bobabemkhulu? Usho kutsi lentfo lesiyentako lakhaya ibulima?” Nakacedza kusho loku Make wakhala.

Etinyangeni letimbalwa letendlulile BoFakazi BaJehova bebacele kuchubela make sifundvo seliBhayibheli. Bekangafuni kufundza nabo, kodvwa kute kungabonakali loko watsi abafundze nami. Ngamangala nasekangitfukutselele ngobe bengihlale ngimlalela. Kodvwa kuloku angizange ngimlalele ngobe bengifuna kujabulisa Jehova. Bekungasiko melula kodvwa Jehova wangipha emandla.

Ekhaya besingemaBuddha njengobe kuyinkholo yebantfu labanyenti eJapan. Ngemuva kwetinyanga letimbili ngifundza naBoFakazi BaJehova, ngabona kutsi loko lokushiwo liBhayibheli kuliciniso. Nangiva kutsi nginaBabe losezulwini ngatimisela kumati kahle. Nangisacala kufundza bengivame kucocela Make lengikufundzile. Ngacala kuya esifundvweni ngemaSontfo. Njengobe bengichubeka ngifundza, ngatjela Make kutsi sengifuna kuyekela kugubha imikhosi yemaBuddha. Akazange ajabule. Watsi: “Kulihlazo kutsi lakhaya sibe nemntfwana longawahloniphi emadloti.” Watsi angiyekele kufundza liBhayibheli kanye nekuya esifundvweni. Bengingacabangi kutsi make angasho intfo lenjalo. Bengicala kumbona anje.

Babe wavumelana naMake. Bengimati Efesu 6 lotsi Jehova ufuna ngibalalele batali bami. Bengifuna kutsi ekhaya sibe nekuthula ngako ngacabanga kutsi nangibalalela nabo batangilalela ngekuhamba kwesikhatsi. Ngaleso sikhatsi bengitadishela luhlolo futsi ngancuma kutsi ngilalele batali bami tinyanga letintsatfu. Ngetsembisa Jehova kutsi ngitawubuyela esifundvweni nakuphela letinyanga letintsatfu.

Sincumo lengasitsatsa besingakahlakaniphi. Ngikusho loko nganati tizatfu letimbili. Sekucala, bengicabanga kutsi ngemuva kwetinyanga letintsatfu bengitawube solo nginaso sifiso sekukhonta Jehova. Kodvwa buhlobo bami naJehova balimala. Sesibili, boMake naBabe bachubeke betama kungiyekelisa kukhonta Jehova.

Ebandleni ngangihlangene naBoFakazi labanyenti labebaphikiswa tihlobo. Bangitjela kutsi  Jehova utangicinisa. (Matewu 10:34-37) Bangichazela kutsi nangabe ngichubeka ngetsembekile kuJehova mhlawumbe umndeni wakitsi bewungafundza ngaye. Bengifuna kwetsembela kuJehova ngako ngacala kuthantaza kakhulu.

Ekhaya bebangiphikisa ngetindlela letinyenti. Make wangincenga kutsi ngiyekele kufundza naBoFakazi futsi wetama kubonisana nami. Etikhatsini letinyenti bengingamphendvuli. Nangabe bekwenteka ngimphendvule bekusuka lutfuli ngobe sobabili besifuna kubonakale kutsi siyati. Nyalo sengiyabona kutsi kube ngayihlonipha indlela Make labetiva ngayo kanye nenkholo yakhe, simo besitawuba ncono. Batali bami banginiketa imisebenti leminyenti kute nje ngihlale ekhaya. Ngalamanye emalanga bebatsi nabahamba bakhiye endlini bangangishiyeli nekudla.

Banyenti bantfu Make labacela kutsi bakhulume nami. Wakhuluma nathishela wami kodvwa lelisu lakhe alizange liphumelele. Waphindze wangiyisa kumphatsi wakhe emsebentini kutsi angincenge ngiyekele kuba nguFakazi ngobe tonkhe tinkholo tiyafana. Bekashayela letinye tihlobo tetfu akhala aticele kutsi timsite. Loko kwangivisa buhlungu kakhulu. Bazalwane labadzala bangikhumbuta kutsi nangabe Make akhuluma ngami kuletinye tihlobo, bekufana nekutsi uyatishumayela.

Batali bami bebafuna kutsi ngiye enyuvesi kute ngitewutfola umsebenti lokahle. Simo besishubile ekhaya ngako besingeke sikhone kuyikhuluma kahle lendzaba, ngako ngababhalela tincwadzi letinyenti ngibachazela ngemigomo yami. Babe watfukutsela wagana lunwabu futsi watsi: “Nawucabanga kutsi kulula kutfola umsebenti ngicela nje kusasa lokulokusako  ube uwutfolile, nangabe ungawutfoli uhambe lakhaya.” Ngathantaza kuJehova ngamcela kutsi angisite. Ngelilanga lelilandzelako ngisensimini, bodzadze lababili banginiketa umsebenti wekufundzisa bantfwana babo. Babe akazange ajabule ngaloko, ngako wangidvuba. Make watsi bekutawuba ncono kube ngisigebengu kunekuba nguFakazi waJehova.

Ngalesinye sikhatsi bengingati kutsi Jehova uyajabula yini ngalokutsi angibalaleli batali bami. Ngathantaza kuJehova futsi ngazindla ngaloko liBhayibheli lelikushoko ngelutsandvo lwakhe. Loko kwangikhutsata futsi kwangenta ngabona kutsi batali bami bebangiphikisa ngobe bakhatsatekile ngami. Jehova wangisita ngashintja indlela lebengicabanga ngayo futsi ngati loko bekufanele ngikwente. Kwangisita kuya kakhulu ensimini futsi kwangenta ngakutsandza kushumayela. Ngangifuna kuba lihlahlandlela.

Ngesikhatsi labanye bodzadze beva kutsi ngifuna kuba lihlahlandlela, bangitjela kutsi kufanele ngime kancane simo size sibe kahle ekhaya. Ngathantaza kuJehova ngicela kutsi angiphe kuhlakanipha, ngacabanga ngetintfo lebetingenta ngifune kuba lihlahlandlela futsi ngacoca nebazalwane nabodzadze labanalokuhlanganwe nako. Ngabese ngiyancuma kutsi ngifuna kujabulisa Jehova. Ngabona kutsi ngisho nobe ngingema kancane ngaphambi kwekucala kuba lihlahlandlela, batali bami bebangachubeka nekungiphikisa.

Ngacala kuba lihlahlandlela nangifundza libanga lekugcina esikolweni lesiphakeme. Ngemuva kwekuba lihlahlandlela sikhashana ngabese sengifuna kuyokhonta lakunesidzingo lesikhulu khona sebamemeteli. Kodvwa batali bami bebangafuni ngihambe ekhaya. Ngako kwadzingeka ngihlale ngize ngibe neminyaka lengu-20 budzala. Ngacela ehhovisini leligatja kutsi lingabele dvutane netihlobo tami lebetise ningizimu yeJapan khona Make angatewukhatsateka kakhulu.

Ngesikhatsi ngishumayela endzaweni lenesidzingo lesikhulu sebamemeteli, ngajabula nangibona bantfu lebengibafundzela liBhayibheli babhajatiswa. Ngafundza siNgisi kute ngikhone kushumayela bantfu labanyenti. Ebandleni lebengikulo bekunemahlahlandlela lakhetsekile lamabili futsi kubona indlela labekakhutsele ngayo nendlela labekasita ngayo labanye, kwangenta ngafuna kuba lihlahlandlela lelikhetsekile. Ngaleso sikhatsi Make wagula kakhulu tikhatsi letimbili futsi nakagula bengiya ekhaya ngiyomsita. Loku kwammangalisa kakhulu, ngako wacala kungiphatsa kahle.

Ngemuva kweminyaka lesikhombisa, Atsushi, longulelinye lalamahlahlandlela lakhetsekile lengikhulume ngawo ekucaleni, wangibhalela incwadzi. Bekafuna kushada ngako wangibuta kutsi ngiyafuna yini kushada naye. Bengingakaze sengikucabange kutsandzana na-Atsushi futsi nje bengingacabangi nekutsi bekangahle angitsandze. Ngemuva kwenyanga ngavuma kutsi sitsandzane futsi imigomo yetfu beyifanana. Besifuna kuchubeka sitisebenti tasikhatsi sonkhe, besikulungele kwenta nobe ngabe ngusiphi sabelo lebesiniketwa sona. Sagcine sishadile. Batali bami naletinye tihlobo tami teta emshadweni wetfu futsi loko kwangijabulisa kakhulu.

Ngekushesha ngemuva kwaloko, ngesikhatsi singemahlahlandlela lavamile, Atsushi wabelwa kutsi abe ngumbambeli wembonisi wesigodzi. Ngekuhamba kwesikhatsi sabelwa kutsi sibe ngemahlahlandlela lakhetsekile, ngemuva  kwaloko sabelwa kutsi sihambele emabandla. Nasesiwahambele onkhe emabandla lebesabelwe wona, basishayela lucingo ehhovisini leligatja. Basibuta kutsi singakhona yini kuyohambela emabandla laseNepal.

Bengikhatsatekile ngekutsi batali bami batawutsini nabeva kutsi ngiya khashane kangaka. Ngatsi nangibashayela ngibatisa ngalendzaba, Babe wavele watsi: “Uya endzaweni lenhle kabi.” Babe abesandza kucoca nemngani wakhe ngeNepal waze wamniketa nencwadzi lebeyikhuluma ngayo. Bekanesifiso lesikhulu sekuvakashela lelive.

Bekumnandzi eNepal nebantfu bakhona banemusa. Ngekuhamba kwesikhatsi, sabelwa kutsi sihambele ne-Bangladesh. I-Bangladesh beyisedvute neNepal kodvwa beyehluke kakhulu. Tinyenti tintfo lebesitijabulela nasishumayela. Ngemuva kweminyaka lesihlanu sabuyela eJapan, futsi nyalo sihambela emabandla akhona.

Tinyenti tintfo lengatifundza ngaJehova nasisahambela emabandla laseJapan, eNepal naseBangladesh. Bantfu kulamave lamatsatfu banemasiko langafani futsi nendlela yabo yekuphila yehlukile. Umuntfu ngamunye wehlukile. Ngiyibonile indlela Jehova lamnakekela ngayo umuntfu ngamunye, amemukele, amsite futsi ambusise.

Tinyenti tintfo lengingambonga ngato Jehova. Wangisita kutsi ngimati, ngente umsebenti wakhe futsi ungiphe indvodza lenhle lemtsandzako. Nkulunkulu ungisite ngenta tincumo letikahle futsi manje nginebuhlobo lobuhle naye kanye nemndeni wami. Ngiyambonga Jehova kutsi mine naMake sesibangani labakhulu. Ngijabula kakhulu ngekutsi ngaba nekuthula naNkulunkulu kanye namake.