Bonkhe Bantfu Labalungile Bayaya Yini Ezulwini?

NGEBUSUKU bangembi kwekubulawa kwakhe, nangemuva kwesidlo sakhe sekugcina akanye nebaphostoli bakhe, Jesu wabetsembisa kubanika umvuzo wekuhlala ezulwini. Watsi: “Ekhaya laBabe kunetindlu letinyenti; ngisaya kunilungisela indzawo. Ngabe anginitjeli loko kube akunjalo.” (Johane 14:2) Kungani Jesu atsi utawubanika indzawo ezulwini? Nabafika khona batawenta msebenti muni?

Jesu abenemsebenti lotsite labefuna bafundzi bakhe bawente. Ngalobo busuku, watsi: “Nine senibeketele kanye nami kuko konkhe kulingwa kwami; njengobe Babe anginikile ligunya lekubusa, nami-ke ngitaninika lona.” (Lukha 22:28, 29) Nkulunkulu abetsembise Jesu kutsi utawuba yiNkhosi letawenetisa tidzingo tebantfu bonkhe—njengahulumende loncono kakhulu. Jesu utawusindzisa bantfu ekuhluphekeni aphindze apitjite nalabo lababacindzetelako. Nanobe Jesu atawuba neligunya ‘emhlabeni wonkhe,’ kodvwa sihlalo sakhe sona sitawuba sezulwini.—Tihlabelelo 72:4, 8; Danyela 7:13, 14.

Nobe kunjalo, Jesu angeke abuse yedvwa. Kunaloko, wetsembisa baphostoli bakhe indzawo ezulwini. Bekungibo bekucala kukhetfwa kutsi “bayawubusa etikwemhlaba wonkhe.”—Sembulo 5:10.

Bangakhi labaya ezulwini? Njenganobe ngumuphi hulumende, labo lababusa eMbusweni waNkulunkulu losezulwini bambalwa nabacatsaniswa nebantfu lababuswa nguwo. Kulabo labatawubusa naye, Jesu watsi: “Ningesabi, mhlambi lomncane, ngobe uYihlo utfokotela kona kutsi aninike umbuso.” (Lukha 12:32) ‘Lomhlambi lomncane’ uyawukwakha linani lebantfu labangu-144 000. (Sembulo 14:1) Lelinani lincane kakhulu nasilicatsanisa netigidzi letitawujabulela imphilo lengapheli emhlabeni njengetikhonti letetsembekile teMbuso.—Sembulo 21:4.

Ngako akusibo bonkhe bantfu labalungile labaya ezulwini. Naku umphostoli Phetro lakusho ngeNkhosi Davide: “NaDavide lucobo lwakhe akenyukelanga ezulwini.” (Imisebenti 2:34) Johane uMbhabhatisi naye abeyindvodza lelungile, kodvwa Jesu watsi angeke abuse njengenkhosi ezulwini. Jesu watsi: “Ngicinisile, ngitsi kini: Kubo bonkhe labake baba khona emhlabeni kute lowake waba mkhulu kunaJohane uMbhabhatisi; kepha lomncane embusweni welizulu mkhulu kunaye.”—Matewu 11:11.

Utawutfola Yini Umvuzo Webantfu Labalungile?

Yini lokudzingeka umuntfu ayente kute atfole umvuzo wekuphila phakadze emhlabeni? Jesu watsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” (Johane 3:16) Lutsandvo Nkulunkulu lanalo ngebantfu lwamholela kutsi ente kuphila lokuphakadze kutfolwe ngibo bonkhe, kodvwa ngulabo ‘lababonisa kukholwa’ kuphela labatawutfola lomvuzo.

Kukholwa kufanele kusekelwe elwatini lolunembile. (Johane 17:3) Ungakhombisa kutsi ungumuntfu lolungile ngekufundza lokunyenti ngenjongo yaJehova ngemuntfu nemuntfu. Vumela kukholwa ngaloko lokufundzako kuhambisane nemisebenti. Ciniseka ngekutsi lelitfuba lekutfola kuphila lokungapheli nembala likuvulekele.

 [Libhokisi ekhasini 7]

Litsini LiBhayibheli?

Umbuto:

Kwentekani kubantfu labalungile nabafa?

Imphendvulo:

“Kodvwa labafile abati lutfo.”—UMSHUMAYELI 9:5.

Umbuto:

Nguliphi litsemba bantfu labalungile labanalo ngelikusasa?

Imphendvulo:

‘Sikhatsi siyeta lapho bonkhe bantfu labasemathuneni bayawuliva livi lakhe [Jesu] baphume.’—JOHANE 5:28, 29.

Umbuto:

Linyenti lebantfu labalungile liyawuphila kuphi?

Imphendvulo:

“Labalungile bayawudla lifa lemhlaba, bahlale kulo kuze kube phakadze.”—TIHLABELELO 37:29.