LiBhayibheli Liyakugucula Kuphila

YINI leyenta li-Rasta lahhula siyendle salo futsi lalwisana nekubandlulula belungu? Yini leyabangela indvodza leyayikweleka imali yebantfu labebashushumbisa tidzakamiva kutsi igucule kuphila kwayo? Ase ufundze loko lokulandziswa ngulabantfu lababili.

“Ngehlula Lubandlululo Lenganginalo Ngebelungu.”—HAFENI NGHAMA

IMINYAKA: 34

LIVE LATALELWA KULO: ZAMBIA

UMLANDVO WAKHE: ABELI-RASTA

KUPHILA KWAMI: Ngatalelwa enkambu yebakhoseli eZambia. Make wami abebaleke eNamibia ngalesikhatsi kunemphi futsi waba lilunga le-South West Africa People’s Organization (SWAPO). Lenhlangano yayimelene nembuso waseNingizimu Afrika lowawubusa iNamibia ngaleso sikhatsi.

Iminyaka lengu-15 yekuphila kwami, ngahlala etinkanjini letinyenti tebakhoseli. Labasebasha kuletinkambu te-SWAPO bebafundziswe kutsi bawuchubekisele embili umzabalazo wenkhululeko. Tembusave tasifundzisa kwenyanya belungu.

Nangineminyaka lengu-11 budzala, ngafuna kuba ngumKhristu esontfweni linye lelalisenkambu, lelalifaka ekhatsi emaRoma Katolika, emaLuthela, emaSheshi kanye nemakholwa alamanye emasontfo. Umfundisi lengakhuluma naye ngalendzaba wala kutsi ngikwente loko. Kusukela ngaleso sikhatsi, angizange ngiphindze ngikukholwe kutsi Nkulunkulu ukhona. Kwatsi nangineminyaka lengu-15 budzala, lutsandvo lwami ngemculo wema-Rasta nesifiso sami sekucedza kuhlushwa kwebantfu labamnyama, kwangenta ngaba li-Rasta. Ngayekela tinwele tami takhula taba siyendle, ngabhema insangu, ngayekela nekudla inyama futsi ngacala kulwela inkhululeko yebantfu labamnyama. Nobe kunjalo, angikuyekelanga kutiphatsa kabi nekubukela imidlalo lekhombisa budlova. Ngachubeka ngisebentisa lulwimi lolubi.

INDLELA LIBHAYIBHELI LELAYIGUCULA NGAYO IMPHILO YAMI: Ngemnyaka wanga-1995, nangineminyaka lengu-20 budzala, ngacala kucabangisisa kabanti ngaloko lebengifuna kukwenta ngekuphila kwami. Ngangifundza tonkhe tincwadzi tema-Rasta. Letinye tato tatisekelwe eBhayibhelini, kodvwa loko letatikusho kwakungasho lutfo kimi. Ngako-ke, ngakhetsa kutifundzela liBhayibheli.

Ngekuhamba kwesikhatsi, umngani wami loli-Rasta wangipha incwadzi lesekelwe eBhayibhelini leshicilelwe boFakazi BaJehova. Ngayifundza lencwadzi ngisebentisa liBhayibheli. Ngemuva kwesikhatsi, ngahlangana naboFakazi BaJehova ngachubeka nesifundvo seliBhayibheli nabo.

 Ngemuva kwemetamo lemikhulu, ngayekela kubhema nekunatsa kakhulu tjwala. (2 Khorinte 7:1) Ngayilungisa indlela lengangibukeka ngayo, ngahhula nalesiyendle setinwele, ngayekela kubuka titfombe letikhombisa kungcola, imidlalo lenebudlova, ngayekela ngisho nenkhulumo lengcolile. (Efesu 5:3, 4) Ekugcineni, ngayekela nekubandlulula belungu. (Imisebenti 10:34, 35) Kwenta letingcucuko kwakufaka ekhatsi kuyekela kulalela tingoma letikhutsata kuhlukana ngebuhlanga kanye nekuyekela kutihlanganisa nebangani lababi, labebangangenta kutsi ngibuyele endleleni lembi lengangiphila ngayo.

Ngatsi nje sengente tonkhe leto tingucuko, ngafuna lihholo leMbuso laboFakazi BaJehova futsi nganginesifiso sekuba ngulomunye wabo. Bacala sifundvo seliBhayibheli nami. Ngatsi nasengikhetse kubhajatiswa ngibe ngulomunye waboFakazi BaJehova, basekhaya bangajabuli. Make wami wangitjela kutsi ngingakhetsa nobe ngabe nguliphi lelinye lisontfo “lemaKhristu,” ngephandle kwaboFakazi BaJehova. Lesinye sihlobo sami lesasisisebenti lesibalulekile embusweni, besiloku singinyembenya ngesizatfu sekutsi ngikhetse kutihlanganisa naboFakazi.

Nobe kunjalo, kufundza ngendlela Jesu lasebentelana ngayo nebantfu kanye nekusebentisa seluleko sakhe, kwangisita ngakhona kubeketelela kuphikiswa nekuhlekwa. Nangicatsanisa loko lokwakufundziswa boFakazi naloko lokuseBhayibhelini, ngavele ngabona kutsi ngiyitfolile inkholo yeliciniso. Sibonelo saloku kutsi balandzela umyalo weliBhayibheli wekushumayela. (Matewu 28:19, 20; Imisebenti 15:14) Abatimbandzakanyi nepolitiki.—Tihlabelelo 146:3, 4; Johane 15:17, 18.

INDLELA LENGIZUZE NGAYO: Kufundza kuphila ngetimiso teliBhayibheli kungisite ngetindlela letibonakalako. Sibonelo saloku kutsi kuyekela kubhema insangu kungente ngakwati konga imali lenyenti inyanga nenyanga. Akusenteki kutsi ngibhudze emini ngibona tintfo letingekho, futsi imphilo yami engcondvweni nasenyameni seyincono kakhulu.

Nyalo imphilo yami icondzile futsi inenjongo njengobe kusukela ngisesemusha ngangifise kutsi ibe njalo. Lokubaluleke kakhulu kutsi ngikwatile kusondzela kuNkulunkulu.—Jakobe 4:8.

“Ngafundza Kulawula Intfukutselo Yami.”—MARTINO PEDRETTI

IMINYAKA: 43

LIVE LATALELWA KULO: AUSTRALIA

UMLANDVO: ABETSENGISA TINDZAKAMIVA

KUPHILA KWAMI: Ngalesikhatsi ngisakhula umndeni wakitsi bewutfutsa njalo. Ngahlala emadolobheni lamancane nasedolobheni lelikhulu, ngahlala sikhashana nasemishini yebantfu bemdzabu leyayisemaphandleni ase-Australia. Ngisasikhumbula kahle sikhatsi lesimnandzi lengaba naso nabomzala kanye nabomalume, sidvweba tinhlanti, sitingela futsi sibata naletinye tintfo letitsite.

Babe abengumdlali wesibhakela futsi nami wacala kungifundzisa  kudlala sibhakela ngisemncane. Ngako-ke, ngacala kuba nebudlova futsi ngilwa nebantfu njalo. Ngatsi sengilibhobhodlelana, ngacitsa sikhatsi lesinyenti nginatsa tjwala. Mine nebangani bami besisukela bantfu kute nje sitewulwa nabo. Sasisebentisa imikhwa kanye netindvuku tekudlala i-baseball kute silwe nesicumbi sebantfu labangu-20 nobe ngetulu.

Ngangitfola imali ngekutsi ngitsengise tidzakamiva kanye netimphahla letebiwe bantfu labasebenta emikhunjini. Ngangiphindze ngikweleke imali yebantfu labashushumbisa tidzakamiva, ngisebentisa sibhamu. Umgomo wami wawukutsi ngibe ngumbulali lowatiwako. Sicubulo sami sasikubulala bantfu nobe bona babulale mine.

INDLELA LIBHAYIBHELI LELAYIGUCULA NGAYO IMPHILO YAMI: Ngalesikhatsi ngisakhula ngake ngeva ngaboFakazi BaJehova. Nasengineminyaka letsi ayendlule ku-20 budzala, ngikhumbula ngibuta make kutsi uyati yini lapho ngingabatfola khona. Ngemuva kwemalanga lamabili, lomunye waboFakazi libito lakhe lokungu-Dixon wefika ekhaya. Satsi nje sesikhulume sikhashana, wangimema kutsi ngite emhlanganweni waboFakazi BaJehova. Ngaya kulomhlangano, futsi nyalo sengineminyaka lengu-20 solo ngiya kuyo. Yonkhe imibuto lenganginayo, boFakazi bakwati kuyiphendvula basebentisa liBhayibheli.

Ngakujabulela kakhulu kwati kutsi Jehova unesitsakatelo kumuntfu nemuntfu kuhlanganise ngisho nalobo labangakholwa. (2 Phetro 3:9) Ngatfola kutsi unguBabe lonelutsandvo lotanginakekela ngisho nalapho kute umuntfu longanginakekela. Ngaphindze ngakhululeka ngalesikhatsi ngifundza kutsi utangicolela tono tami nangabe ngigucule indlela lengiphila ngayo. Emavesi eliBhayibheli laku-Efesu 4:22-24 angisita kakhulu. Angikhutsata kutsi ‘ngikhumule buntfu lobudzala’ futsi ‘ngembatse buntfu lobusha lobadalwa bafuta Nkulunkulu ngekulunga.’

Kwangitsatsa sikhatsi kutsi ngigucule indlela yami yekuphila. Kwakuphela liviki lonkhe ngingakatitsintsi tidzakamiva, kodvwa ngemphelasontfo nanginebangani bami, ngangitisebentisa ngobe bebangicindzetela kutsi ngente njalo. Ngabona kutsi kufanele ngibabalekele nangabe ngifuna kugucula indlela lengiphila ngayo. Ngako-ke, ngabona kuncono kutsi ngitfutsele kulenye indzawo. Labanye bangani bami bacela kuhamba nami, ngavuma. Endleleni bacala kubhema insangu nami batsi angiyibheme. Ngabatjela kutsi sengiyayiyekela lemikhuba lemibi, ngemuva kwaloko sehlukana emnceleni babuyela emuva. Ngekuhamba kwesikhatsi, ngeva kutsi babambe libhange inkundzi baphetse sibhamu.

INDLELA LENGIZUZE NGAYO: Ngatsi nje sengehlukene nebangani bami, ngakutfola kulula kwenta lushintjo lolwaludzingeka ekuphileni kwami. Ngemnyaka wanga-1989 ngabhajatiswa ngaba ngulomunye waboFakazi. Kwatsi nje sengibhajatisiwe, sisi wami lomncane, make wami kanye nababe bonkhe bangilandzela sakhonta Jehova.

Sekuphele iminyaka lengu-17 ngishadile, futsi nginebantfwana labatsatfu. Sengiyakwati kulawula intfukutfelo yami, ngisho nobe lotsite angicansula. Ngifundze kutsandza bantfu bato tonkhe ‘tive, tinhlanga letehlukahlukene kanye netilwimi.’ (Sembulo 7:9) Ngiyabona kutsi emavi aJesu aliciniso kimi. Ngobe yena watsi: “Nanime emavini ami, nibafundzi bami sibili; niyawulati liciniso, neliciniso liyawunikhulula.”—Johane 8:31, 32.

[Emavi lacashuniwe lasekhasini 9]

Kwenta lushintjo kufaka ekhatsi kuyekela kulalela tingoma letikhutsata kubandlululana ngebuhlanga

[Emavi lacashuniwe lasekhasini 10]

Mine nebangani bami besisukela bantfu kute nje sitewulwa nabo. Sasisebentisa imikhwa kanye netindvuku tekudlala i-baseball kute silwe nesicumbi sebantfu labangu-20 nobe ngetulu