Kungani Kufanele Sihloniphe Bantfu Labakhulile?

NGASELUSENTSENI lwelwandle lwase-California, U.S.A., kunalesinye sihlahla lesikhulu kunato tonkhe emhlabeni lesitsebulwa kakhulu. Satiwa ngekutsi yi-Lone Cypress. Kubikwa kutsi lesihlahla sineminyaka lengetulu kwa-250 budzala. Satiwa kakhulu ngekubeketela kwaso etimeni letimatima kakhulu, futsi sinakekelwa ngetindlela letehlukahlukene. Sibonelo saloku kutsi siboshwe ngetindophi tensimbi futsi situngeletwe ngematje.

I-Lone Cypress isikhumbuta ngemaKhristu lakhulile lesiphila nawo, labeketela ngendlela lemangalisako. Lenye indlela lakwenta ngako loku kumemetela tindzaba letinhle. Umphrofethi Joweli wabiketela kutsi “emakhehla” atawushumayela umlayeto weliBhayibheli. (Joweli 2:28-32; Imisebenti 2:16-21) Ase ucabange ngema-awa lamanyenti labo lasebakhulile labawasebentisela kufundzisa labanye ‘ngeliVangeli lembuso.’ (Matewu 24:14) Labanye balaba labakhulile labamemetela ngeMbuso babeketelele kushushiswa kanye nalobunye bumatima iminyaka leminyenti. Nangabe sihlahla lesincane se-cypress naso sibeketela futsi siboshwa ngetindophi tensimbi situngeletwa nangematje, kutsiwani-ke ngalabo labakhulile lesiphila nabo? Nabo kufanele banakwe futsi baphatfwe ngenhlonipho.

Naku Nkulunkulu Jehova lakusho ngalesikhatsi ayala bantfu bakhe basendvulo: “Niyawutitfoba embikwalasebakhulile, nibahloniphe.” (Levithikhusi 19:32) Etincekwini taJehova talamuhla, sitfola tibonelo letinhle tebantfu labanekukholwa ‘labaphilela Nkulunkulu’ iminyaka leminyenti. (Mikha 6:8) Njengobe bachubeka basebentisa timiso temibhalo, timvu tabo tiba ‘ngumchele walabalungile.’—Taga 16:31.

Umphostoli Pawula wayala Thimothi lobekasemusha: “Ungayikhahli indvodza lendzala.” Ngako-ke Thimothi kwakudzingeke ayiphatse ‘njengeyise’ futsi ‘labasikati labadzala abaphatse njengabonina.’ (1 Thimothi 5:1, 2) Ecinisweni, Thimothi bekufanele ‘atitfobe’ embikwalabo lasebakhulile. Kuyacaca kutsi Jehova ulindzele kutsi indlela yetfu yekukhuluma ibonise inhlonipho.

 Incwadzi yaRoma 12:10 itsi: “Nijakiselane ngekuhloniphana.” Labadzala emabandleni nabo bababonisa inhlonipho labo lasebakhulile labangemaKhristu. Kodvwa sonkhe kufanele sijakiselane ekuhloniphaneni.

Emalunga emndeni nawo anemtfwalo lokhetsekile wekunakekela batali babo nalabo labagugile. Kulendzaba ye-Lone Cypress, bantfu bafune tindlela letehlukahlukene tekusigcina siphila lesihlahla, nalamuhla bachubeka benta njalo. Natsi lamuhla kufanele sifune tindlela letenta kutsi batali betfu lasebakhulile kanye nalabo labagugile bachubeke bahlonishwa. Sibonelo saloku kutsi kuba silaleli lesihle kutawusenta singafuni kwenta tintfo ngendlela tsine lesifuna ngayo futsi singayicabangeli imiva yalabanye.—Taga. 23:22; 1 Thimothi 5:4.

Labo lasebakhulile lesiphila nabo baligugu kuJehova futsi angeke aze abashiye. (Tihlabelelo 71:18) Nkulunkulu weliciniso uyabacinisa kute bakwati kuchubeka bamkhonta ngekwetsembeka. Shengatsi natsi singachubeka sisekela futsi sihlonipha lasebakhulile.

[Titfombe ekhasini 13]

Njengobe i-Lone Cypress idzinga kunakekelwa, lasebakhulile badzinga kuphatfwa ngenhlonipho

[Emavi laveta Umtfombo walentfo]

American Spirit Images/age fotostock