Tfola Kulondzeka Emkhatsini Webantfu BaNkulunkulu

‘Ngiyawukubonga ebandleni lelikhulu.’—HLA. 35:18.

1-3. (a) Yini lengenta lamanye emaKhristu kutsi angene enkingeni ngakamoya? (b) Bantfu baNkulunkulu bangasitfola kuphi sivikelo?

 NGALESIKHATSI Joe nemfati wakhe baseholidini, bebabhukusha emantini lanetinhlanti letinemibala kanye nebukhulu lobehlukahlukene. Njengobe bachubeka babhukusha futsi bajabulela kubona tintfo letinhle letisemantini, bafika endzaweni lapho sekushona khona kakhulu. Umfati waJoe watsi, “Yini shengatsi sesibhukushe libanga lelidze?” Joe waphendvula watsi: “Ungakhatsateki, ngiyati mine kutsi ngentani.” Ngemuva kwaloko Joe watibuta amangele kutsi ‘setishone kuphi letinhlanti?’ Ngekwetfuka lokukhulu wasibona sizatfu saloko. Batsi nabaphuma endzaweni lapho kwakushona khona, kwachamuka inhlanti lenkhulu leyacondza ngco! kuJoe. Wacala kwetfuka, kodvwa lenhlanti yatsi naseyisedvute naye sigaba lesicishe sibe linyatselo, yase iyajika ingakamenti lutfo.

² NemKhristu angatitfola sekakhangwa kubukeka kwalesimiso saSathane—etintfweni letinjengekutijabulisa, umsebenti, kanye netintfo lanato—angakanaki atitfole sekangene engotini. Joe longulomdzala welibandla utsi: “Loko lokwenteka kimi kwangenta ngacabanga ngebantfu lengicitsa sikhatsi lesinyenti nabo. Kufanele sibhukushe lapho kuphephe khona futsi nalapho kunenjabulo khona—ebandleni lebuKhristu.” Ungabhukushi lapho kushona khona, lapho utawutitfola sewungasakwati kwenta tintfo takamoya futsi sewusengotini. Nakungenteka utitfole sewulapho buyela emuva ngekushesha endzaweni lephephile, ngobe nawungephuta ungatitfola sewusengotini yekufa ngakamoya.

³ Live lesiphila kulo lamuhla liyindzawo leyingoti kakhulu kumaKhristu. (2 Thim. 3:1-5) Sathane uyati kutsi sikhatsi lesimsalele sincane kakhulu, ngako-ke, wenta konkhe lokusemandleni akhe kute adukise bonkhe bantfu labanganaki. (1 Phet. 5:8; Semb. 12:12, 17) Nobe kunjalo, emaKhristu anaso sivikelo. Jehova usiphe indzawo lengasivikela tsine kanye nebuhlobo betfu naye—libandla lebuKhristu.

4, 5. Bantfu labanyenti bativa njani ngelikusasa labo, futsi ngani?

⁴ Bantfu lesiphila nabo abasiniki kulondzeka lokwenele—kungaba senyameni nobe nasemiveni yetfu. Bantfu labanyenti batsi kungalondzeki kubangelwa bugebengu, budlova, kudula kwemphilo kanye nendzawo lesiphila kuyo. Sonkhe siyaguga futsi sinemphilo leciciyelako. Ngisho nalabo labasebenta kahle, labanetindlu takanokusho, tinjinga kanye nalabo labanemphilo lenhle nabo bangatibuta kutsi kutawuphela nini konkhe loku.

⁵ Bantfu labanyenti behlulekile kutfola kulondzeka emiveni yabo. Kuyadzabukisa kwati kutsi labanyenti bebanelitsemba lekutfola kuthula kanye nekwenetiseka emshadweni kanye nasemindenini, kodvwa loko akwenteki. Bantfu labakholwako abanakwa ngakamoya futsi nabo abayitsandzi indlela labaphatfwa ngayo. Linyenti labo litiva ngaleyo ndlela ngalesikhatsi baholi balo balifundzisa tintfo letingekho eBhayibhelini. Labanye babona kuncono kutsi bakholelwe kuloko lokushiwo iSayensi nakuloko bantfu  lababatjela kona. Akumangalisi kutsi bantfu baze bative bangakalondzeki futsi bangafuni ngisho nekucabanga ngelikusasa.

6, 7. (a) Ngumuphi umehluko lokhona emkhatsini walabo labakhonta Nkulunkulu nalabo labangamkhonti? (b) Sitawufundza ngani?

⁶ Kunemehluko lomkhulu emkhatsini walabo labangemaKhristu nalabo labangasiwo. Nanobe sibantfu baJehova, sinetinkinga letifanana naleto bomakhelwane betfu labanato, kodvwa indlela lesenta ngayo tintfo yehlukile. (Fundza Isaya 65:13, 14; Malakhi 3:18.) Kungani kunjalo? Kungobe eBhayibhelini sitfola tinchazelo letenetisako letimayelana nebumatima lesibhekene nabo, futsi siyati kutsi yini lokufanele siyente kute sikwati kuphila nabo. Umphumela uba kutsi sibese asisakhatsateki ngelikusasa. Kukhonta Jehova kusivikela etinkhulumeni letingakasekelwa eBhayibhelini, ekutiphatseni kabi ngekwemacansi kanye nemiphumela yako. Emalunga elibandla lebuKhristu atfola kulondzeka kanye nekuthula lokungatfolwa ngunobe ngubani.—Isa. 48:17, 18; Fil. 4:6, 7.

⁷ Kunetibonelo letingasisita sibone umehluko lokhona emkhatsini wekulondzeka lokujatjulelwa ngulabo labakhonta Jehova naloko lokutfolwa ngulabo labangamkhonti. Letibonelo titasisita kutsi sihlolisise indlela lesitisebentisa ngayo teluleko taNkulunkulu letilungiselelwe kuvikela tsine.—Isa. 30:21.

“Tinyawo Tami Tacishe Taphambuka”

8. Yini lokudzingeka tikhonti taJehova tiyente ngaso sonkhe sikhatsi?

⁸ Kusukela endvulo, labo labakhetsa kukhonta Jehova bebenta konkhe lokusemandleni kute bangatimbandzakanyi nalabo labangamkhonti. Ecinisweni, Jehova wakubeka ebaleni kutsi kutawuba nebutsa emkhatsini webantfu bakhe nalabo labalandzela Sathane. (Gen. 3:15) Ngesizatfu sekutsi babambelela etimisweni taNkulunkulu, bantfu baNkulunkulu benta tintfo ngendlela lehlukile kunebantfu balelive lelibuswa nguSathane. (Joh. 17:15, 16; 1 Joh. 2:15-17) Akusiyo intfo lelula kwenta ngendlela bantfu baJehova labenta ngayo. Ecinisweni, labanye bantfu baJehova bayakungabata kutsi  kukuhlakanipha kangakanani kuphila imphilo yekutidzela.

9. Chaza bumatima umbhali weTihlabelelo 73 lahlangabetana nabo.

⁹ Lomunye wetinceku taJehova lobekatibuta kutsi kahle kahle wente sincumo lesihle yini, kwakungumbhali weTihlabelelo 73, lobekangulomunye wetihlobo ta-Asafa. Lomhlabeli abetibuta kutsi kubangelwa yini kutsi lababi bachume, bajabule futsi baphumelele kodvwa labanye labalwela kukhonta Nkulunkulu bahlangabetane nebumatima.—Fundza Tihlabelelo 73:1-13.

10. Kungani kubalulekile kuwe loko umhlabeli lakhuluma ngako?

¹⁰ Kwake kwenteka yini watibuta imibuto lefanana nalena leyabutwa ngulomhlabeli? Nangabe kunjalo, kute sizatfu sekutsi utive shengatsi wente sono nobe ucabange kutsi uphelelwa kukholwa. Ecinisweni, tikhonti taJehova letinyenti, letifaka ekhatsi naleto latisebentisa kute kubhalwe liBhayibheli, nato take tacabanga ngalendzaba. (Job 21:7-13; Hla. 37:1; Jer. 12:1; Hab. 1:1-4, 13) Bonkhe bantfu labanesifiso sekukhonta Jehova kufanele bacabangisise ngemphendvulo yanangu umbuto: Kukhonta Nkulunkulu nekumlalela kuyintfo lenhle yini? Loku kufaka ekhatsi indzaba Sathane layiphakamisa ensimini yase-Edeni. Ingumgogodla kulendzaba yekutsi ngubani umbusi wendzawo yonkhe. (Gen. 3:4, 5) Sitawube senta kahle nangabe sonkhe sicabangisisa ngalendzaba leyaphakanyiswa ngulomhlabeli. Kufanele yini sibe nemona ngebantfu lababi lababonakala batiphilela imphilo lentofontofo? Kufanele yini sikushiye phansi kukhonta Jehova futsi silingise bona? Nguloko kanye Sathane lafuna kutsi sikwente.

11, 12. (a) Umhlabeli wakuncoba njani kungabata, futsi loko kusifundzisani? (b) Yini wena lekwente wafinyelela esiphetfweni lesifanana naleso umhlabeli lafinyelela kuso?

¹¹ Yini leyasita lomhlabeli wakhona kususa lokungabata abenako? Nanobe avuma kutsi wacishe waphambuka ekwenteni lokulungile, umbono wakhe washintja ngalesikhatsi ‘angena endlini lengcwele yaNkulunkulu.’ Kwakungalesikhatsi atihlanganisa nebantfu baNkulunkulu labavutsiwe emoyeni labebamkhonta ethempelini futsi labebakwenta kube kwekucala ngca! ekuphileni kwabo kukhonta Nkulunkulu. Kwakhanya bha! kutsi lomhlabeli abengafuni kubhekana nemphumela lomubi lowatfolwa ngulabo lababi. Wabona kutsi indlela labenta ngayo ngaloko labakukhetsile ekuphileni ‘kubabeke endzaweni leshelelako.’ Bonkhe labo labashiya Jehova, umhlabeli watsi kubo nakanjani siphetfo sabo kuyawuba ‘tinhlupheko letesabekako,’ kodvwa Jehova utawubavikela labo labamkhontako. (Fundza Tihlabelelo 73:16-19, 27, 28.) Asingabati kutsi emaciniso aloku sewuvele uwabonile. Kuphila ngendlela lofuna ngayo futsi udzicele phansi imiyalo yaNkulunkulu, kungabonakala kukuhle, kodvwa imiphumela lebuhlungu lebangelwa kwenta njalo angeke siyibalekele.—Gal. 6:7-9.

¹² Yini lenye lesiyifundzako kuloko lahlangabetana nako lomhlabeli? Watfola kulondzeka kanye nekuhlakanipha emkhatsini webantfu baNkulunkulu. Wacala kucabangisisa kahle ngalesikhatsi aya endzaweni yekukhonta Jehova. Ngendlela lefananako, natsi lamuhla singatfola teluleko letihlakaniphile futsi sijabulele kudla lokumnandzi kwakamoya emihlanganweni yelibandla. Loku ngiko kanye lokwenta Jehova atjele tikhonti takhe kutsi tihlanganyele imihlangano yebuKhristu. Kulemihlangano kulapho titfola khona sikhutsato futsi telulekwa ngekutsi tente tintfo ngekuhlakanipha.—Isa. 32:1, 2; Heb. 10:24, 25.

Bakhetse Ngekuhlakanipha Labo Lotihlanganisa Nabo

13-15. (a) Ngusiphi sehlakalo Dina lahlangana naso, futsi loko kusifundzisani? (b) Kungani kutihlanganisa nemaKhristu kusivikelo?

¹³ Indvodzakati yaJakobe lenguDina yangena elubishini ngesizatfu sekutsi yatihlanganisa nebantfu labangamkhonti Jehova. Kulandzisa lokusencwadzini yaGenesisi kusitjela kutsi abenemkhuba wekutihlanganisa nemantfombatana  aseKhenani endzaweni lapho umndeni wakubo bowuhlala khona. Bantfu baseKhenani bebanelidvumela lekutiphatsa kabi futsi bebangafani nebantfu baJehova. Ngalokwehlukile, bosomlandvo labavubukulako batfole kutsi loko lokwakwentiwa baseKhenani kwenta kutsi yonkhe indzawo yakhona igcwale kuphinga, kutiphatsa lokubi, kukhonta bulili kanye nebudlova. (Eks. 23:23; Lev. 18:2-25; Dut. 18:9-12) Cabanga nje kutsi wawuyawuba yini umphumela nangabe Dina atihlanganisa nebantfu labanjena!

¹⁴ Indvodza yakuleyo ndzawo libito layo lokunguShekhemu lebeyatiwa ngekutsi ‘ibaluleke kakhulu ekhaya kubo,’ yambona Dina ‘yamtsatsa yamdlwengula, yamhlazisa.’ (Gen. 34:1, 2, 19) Yamehlela inhlekelele! Ucabanga kutsi Dina wake wacabanga yini kutsi utawungena kulolubishi lolunjena? Abemane nje afuna kwakha bungani nebantfu labasha bakuleyo ndzawo, labekababuka njengalabo labatilungele. Lokudzabukisako kutsi Dina wagcina akhohlisiwe.

¹⁵ Lendzaba yaDina isifundzisani? Isifundzisa kutsi singalokotsi sitihlanganise nebantfu labangesiwo emaKhristu sicabange kutsi kwenta kanjalo angeke kube nemiphumela lebuhlungu. UmBhalo ukubeka ngembaba kutsi “bangani lababi bonakalisa similo lesihle.” (1 Khor. 15:33) Kulolunye luhlangotsi, kutihlanganisa nemaKhristu, latiphetse kahle futsi latsandza Jehova kusivikelo. Bantfu labanjalo batakukhutsata kutsi wente tintfo ngekuhlakanipha.—Taga 13:20.

“Senagezwa”

16. Yini umphostoli Pawula layisho ngalamanye emaKhristu asebandleni laseKhorinte?

¹⁶ Libandla lebuKhristu selisite bantfu labanyenti kutsi bahlobe, batikhuculule emikhubeni lemibi. Ngesikhatsi umphostoli Pawula abhalela libandla laseKhorinte kwekucala ngca! wabonga wagangadza ngetingucuko labebatentile kute kuphila kwabo kuhambisane nemtsetfo waNkulunkulu. Labanye kulabazalwane, bebake baba tingwadla, bakhonta titfombe, baba tiphingi, titabane, ngemasela, tidzakwa benta naleminye imikhuba basengakabi ngemaKhristu. Pawula wase utsi kubo: “Kodvwa-ke nyalo senagezwa.”—Fundza 1 Khorinte 6:9-11.

17. Kuphila ngetimiso teliBhayibheli kukushintje njani kuphila kwebantfu labanyenti?

¹⁷ Bantfu labangakholwa basuke bashoda ngetimiso letibhadlile tekubacondzisa. Labo bantfu batihambela ngeyabo indlela nobe bayayishiya indlela yekutiphatsa kahle, lokufanana ncamashi naloko lobekwentiwe ngulabanye ebandleni laseKhorinte basengakabi ngemaKhristu. (Ef. 4:14) Lwati lolushaya emhlolweni ngeliVi laNkulunkulu nangetinhloso takhe, linemandla ekushintja imphilo yalabasebentisa imiBhalo. (Khol. 3:5-10; Heb. 4:12) Bantfu labanyenti lamuhla labangemaKhristu bayavuma kutsi bebatiphatsa madlakadlaka ngembikwekutsi babe ngemaKhristu. Leyomphilo yekuphila matsandza beyingabenelisi futsi ingabajabulisi. Kwatsi hhamu! kubo kuphela ngalesikhatsi bacala kuba mdzibimunye nebantfu labakhonta Nkulunkulu futsi baphila ngetimiso teliBhayibheli.

18. Kwentekani kulomunye umuntfu lomusha, futsi loko kufakazelani?

¹⁸ Kulolunye luhlangotsi, labanye bantfu bakhetsa kuwafaka inhlanekela ‘emanti laphephile’ lokulibandla lebuKhristu futsi sebayatisola ngaloko. Lomunye walabo lesimupha libito lelitsi Tanya, uyachaza utsi: “Ngakhuliswa ngeliciniso leBhayibheli” nakaneminyaka lengu-16 budzala, walishiya libandla “wagijimela tinjabulo talelive.” Walutfota lolunamanyovu ngobe wemitsa wase uyasikhokha lesisu. Naku lachubeka akusho: “Iminyaka lemitsatfu lengayicitsa ngisehlatsini, ngingekho ebandleni ingishiye netibati nemiva yekutisola  lengeke iphele. Lokungidlako kutsi ngabulala umntfwana ngisengakambeleki. . . . Ngidvonsa ngendlebe bonkhe bantfu labasha labafuna ‘kucobhota’ imphilo yelive sikhashana kutsi ‘bangacali!’ Kungevakala kumnanjana ekucaleni kodvwa ekugcineni batawutfwala umkhono enhloko. Lelive lisiphatsele lusizi kuphela. Kuliciniso loko. Kwenteka kimi mbamba. Hlala enhlanganweni yaJehova! Ngiyo yodvwa vo! indlela yekutfola injabulo.”

19, 20. Ngusiphi sivikelo lesitfolakala ebandleni lebuKhristu, futsi lisiniketa njani?

¹⁹ Ase ucabange kutsi kungentekani kuwe nawungashiya lendzawo lephephile lelibandla lebuKhristu. Nabakhumbula imphilo yabo lengenangcondvo labayiphila basengakabi ngemaKhristu, labanyenti bawujikijela ngelifasitelo lowomcabango. (Joh. 6:68, 69) Ungakutfola kuvikeleka etinhlungwini nasekudvumaleni lokuyinsakavukela kulelive lelibuswa nguSathane, ngekuba sedvute nemaKhristu. Kuba mdzibimunye nabo njalo emihlanganweni kutawukwenta ucabange ngekuhlakanipha lokutfolakala emtsetfweni waJehova. Loko kutakukhutsata kute uphile ngaleyo ndlela. Unetizatfu letinyenti letenta ‘umbonge Jehova ebandleni lelikhulu,’ njengobe kwenta umhlabeli.—Hla. 35:18.

²⁰ Kuyavunywa, ngatizatfu timbe, onkhe emaKhristu ayahlangana nesimo lesishubile lesenta kube matima kugcina bucotfo. Labanjalo badzinga lotsite abalayele indlela yekuphila lehambisana nemitsetfo yaJehova. Yini umuntfu ngamunye—nelibandla lilonkhe lelingakwenta kusita lamanye emaKhristu ngetikhatsi letibucayi letinjalo? Sihloko lesilandzelako sitawudzingidza kutsi ‘ungabadvudvuta futsi ubakhe’ njani bazalwane bakho.—1 Thes. 5:11.

Ungaphendvula Njani?

• Singafundzani kulokwenteka emphilweni yembhali weTihlabelelo 73?

• Singafundzani kulokwenteka kuDina?

• Kubangelwa yini kutsi libandla lebuKhristu libe yindzawo lesivikelo?

[Imibuto Yesihloko Lesifundvwako]

[Titfombe ekhasini 7]

Bhukusha lapho kuphephe khona; hlala ebandleni lebuKhristu!