NKULUNKULU SOMANDLA uye waphatsisa letinye tidalwa temoya imisebenti letsite. Sibonelo saloku kutsi unikete Jesu Khristu ligunya lekubusa lomhlaba, futsi ubeke netingilosi letetsembekile kutsi tisite ekucondziseni umsebenti wekumemetela tindzaba letinhle. (Sembulo 14:6) Nanobe kunjalo, umthandazo wehlukile. Akazange awuphatsise nanobe ngubani umsebenti wekulalela imithandazo. Imithandazo yetfu kufanele icondziswe kuNkulunkulu kuphela.

Jehova ‘unguMuvi wemithandazo.’ (Tihlabelelo 65:2) Uyayilalela futsi ayiphendvule imithandazo yetfu. Naku umphostoli Johane lakubhalela tinceku taJehova mayelana nemthandazo: “Nasicela lutfo kuNkulunkulu ngekwentsandvo yakhe, uyasiva. Njengobe sati kutsi uyasiva kunobe yini lesiyicelako, siyati nekutsi sesikunikiwe loko lesikucela kuye.”—1 Johane 5:14, 15.

Tingilosi letetsembekile atifuni kutsi setame kuchumana nato nobe sithandaze kuto. Tiyalucondza luhlelo lwaNkulunkulu lwemthandazo, tibambisana nalo, futsi ngaletinye tikhatsi lutitsintsa ngalokucondzile. Ngayiphi indlela? Ngesikhatsi umphrofethi Danyela athandaza kuJehova mayelana nekubhujiswa  kweliJerusalema, Nkulunkulu waphendvula umthandazo wakhe ngekutfumela ingilosi Gabriyeli iphetse umlayeto lokhutsatako.—Danyela 9:3, 20-22.

Ikhona Yini Imilayeto Levela Kubantfu Labafile?

Kufanele yini setame kukhuluma nebantfu labafile? Kunetindzaba letinyenti letivame kusitjela ngetintfo bantfu lokungenteka kutsi baticoce nemimoya yalabafile. Nasi sibonelo: Lomunye make wase-Ireland wavakashelwa ngumuntfu lonemimoya lowamtjela kutsi ngebusuku lobengcile ukhulume naFred, loyindvodza yalomake. Nanobe kunjalo, Fred abesenemaviki lambalwa ashonile. Lomuntfu lonemimoya wamtjela loko lobekushiwo ngu-“Fred,” lokutindzaba lomake labecabanga kutsi tatiwa nguye kuphela. Bekungaba melula ngalomake kucabanga kutsi Fred uyaphila endzaweni yemoya, nekutsi wetama kuchumana naye asebentisa lomuntfu langamati. Kuphetsa ngalendlela kuphikisana naloko liBhayibheli lelikushoko ngebantfu labafile.—Fundza libhokisi lelingentansi.

Tindzaba letinjena tingachazwa njani? Njengasendzabeni yaFred, lenye indlela yekudukisa lesetjentiswa ngemadimoni, kwenta kubonakale shengatsi umuntfu lofile uyaphila,. Iyini injongo yako? Kudukisa bantfu kuloko lokufundziswa liBhayibheli kanye nekwenta kukholwa nekwetsembela kwabo kuJehova kube butsakatsaka. Kuyacaca-ke kutsi Sathane nemadimoni badukisa bantfu ‘ngawo onkhe emandla, netibonakaliso, netimangaliso letingemanga, nayo yonkhe inkhohliso yekwedukisa lababhubhako.’—2 Thesalonika 2:9, 10.

Siyaciniseka kutsi bakhona bantfu labanemimoya  kanye nalabo labatihlanganisa nabo labakholelwa kutsi bachumana nebantfu labafile. Ecinisweni, nabachumana nabo basuke bakhuluma nemimoya lemelene naJehova. Ngalokufananako, kunalabo labakholelwa kutsi bakhonta Nkulunkulu, kodvwa labasuke batikhohlisa. Umphostoli Pawula waphefumulelwa kutsi abhale nasi secwayiso lesinemandla: “Loko lokuhlatjwe ngemahedeni [betive] akuhlabela emadimoni, akakuhlabeli Nkulunkulu.”—1 Khorinte 10:20, 21.

Njengobe sati kutsi singathandaza kuLongetulu Kwako Konkhe, lositsandzako nalosikhatsalelako, kungani kufanele sifune kuthandaza kulomunye umuntfu? Ngetulu kwaloko, liBhayibheli liyasicinisekisa: “Emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.”—2 Tikhronike 16:9.

[Emavi lahambisana nesitfombe ekhasini 9]

Njengobe sati kutsi singathandaza kuLongetulu Kwako Konkhe, lositsandzako nalosikhatsalelako, kungani kufanele sifune kuthandaza kulomunye umuntfu?

[Libhokisi/Sitfombe ekhasini 8, 9]

Emaciniso Kanye Nemanga

LICINISO: SATHANE UKHONA MBAMBA

‘Sathane utigucula abe yingilosi yekukhanya.’—2 Khorinte 11:14.

“Zitsani, nilindze. Sitsa senu, Sathane, siyajangaza emkhatsini wenu njengelibhubesi lelibhodlako, sitfungatsa lesingahle simmite.”—1 Phetro 5:8.

“Umuntfu lowonako waSathane, ngobe Sathane wona kusukela ekucaleni.”—1 Johane 3:8.

“Ngako-ke tfobelani Nkulunkulu, kodvwa nimelane naSathane, uyawunibalekela.”—Jakobe 4:7.

“Sathane . . . abevele angumbulali webantfu kusukela ekucaleni, akemi ecinisweni, ngobe liciniso kute kuye. Nakakhuluma emanga, ukhuluma intfo yakhe, ngobe ungumcambimanga neyise wawo onkhe emanga.”—Johane 8:44.

EMANGA: BANTFU NABAFA BENDLULELA ENDZAWENI YEMOYA

“Uyawusebenta kamatima, ukujulukele kudla kwakho, udzimate ubuyele emhlabatsini, ngobe vele watsatfwa kuwo; njengobe ulutfuli, uyawubuyela elutfulini.”—Genesisi 3:19.

“Labaphilako bayati kutsi batakufa, kodvwa labafile abati lutfo.”—Umshumayeli 9:5.

“Wonkhe umsebenti losetandleni takho wente ngemandla akho onkhe, ngobe ethuneni lapho uya khona, kute kusebenta, nekucabanga, nelwati kanye nekuhlakanipha.”—Umshumayeli 9:10.

‘Nakuphuma umoya, umuntfu ubuyela emhlabatsini, tinhloso netifiso takhe tiphele ngalelo langa.’—Tihlabelelo 146:4, NW.

LICINISO: TINGILOSI LETETSEMBEKILE TIYASIKHATSALELA

“Ingilosi yaSimakadze yakha umtsangala lotungeleta labo labamesabako, ibakhulule, iphindze ibavikele.”—Tihlabelelo 34:7; 91:11.

“Tiyini tona tingilosi? Tingimimoya yekusebentela Nkulunkulu, letfunyelwe kutawusita labo labayawudla lifa lensindziso.”—Hebheru 1:14.

“Ngase ngibona lenye ingilosi indiza emkhatsini esibhakabhakeni, iphetse liVangeli lelingunaphakadze lekushunyayelwa kulabo labahlala emhlabeni, etiveni tonkhe, nasemindenini yonkhe, nasetilimini tonkhe, nakubantfu bonkhe. Yakhuluma ngelivi lelikhulu yatsi: ‘Yesabani Nkulunkulu, nimnike ludvumo.’”—Sembulo 14:6, 7.

EMANGA: JESU UYALINGANA NANKULUNKULU

“Ngitsandza kutsi nati kutsi, inhloko yawo onkhe emadvodza nguKhristu, nenhloko yemfati yindvodza, nenhloko yaKhristu nguNkulunkulu.”—1 Khorinte 11:3.

“Nangabe tonkhe tintfo setitfotjiselwe ngephansi kwakhe, lapho-ke nayo iNdvodzana yemuntfu iyakutitfoba ngephansi kwalowo lowatfobisa tonkhe tintfo ngephansi kwayo, kuze Nkulunkulu abe nguko konkhe kuko konkhe.”—1 Khorinte 15:28.

“Ngicinisile, ngicinisile, ngitsi kini: INdvodzana ingeke itentele lutfo ngekwayo, kuphela yenta loko lebona uYise akwenta.”—Johane 5:19.