Indvodza Yenhlitiyo YaSimakadze

YINI lefika engcondvweni yakho nawucabanga ngaDavide? Ucabanga ngekuncoba kwakhe Goliyathi, sichwaga lesingumFilisti? Sikhatsi lapho abebalekela khona iNkhosi Sawula? Sono lasenta naBhatisheba kanye nemiphumela lebuhlungu layitfola? Nobe ucabanga ngetingoma takhe letabhalwa encwadzini yeTihlabelelo?

Ekuphileni kwakhe, Davide waniketwa imisebenti lekhetsekile, waphumelela, futsi wahlangabetana netinkinga. Nanobe kunjalo, lokutsandzeka kakhulu kwendlula konkhe loku ngaDavide, nguloko umphrofethi Samuweli lakusho ngaye—kutsi abeyindvodza “yenhlitiyo yaSimakadze.”—1 Samuweli 13:14.

Emavi aSamuweli agcwaliseka ngesikhatsi Davide asesemncane. Wena angeke sewutsandze yini kuchazwa njengemuntfu wenhlitiyo yaSimakadze? Kuloko lokwenteka ekuphileni kwaDavide, ikakhulukati ngesikhatsi asesemncane, yini lengakusita kutsi ube ngumuntfu wenhlitiyo yaSimakadze? Asesibone.

Umndeni Kanye Nemsebenti

Jese, longubabe waDavide aphindze abe ngumtukulu waRuthe naBowazi, kungenteka abesikhonti saJehova lesikhutsele. Ngesikhatsi Davide kanye nebanakabo labasikhombisa nabodzadze wakhe lababili basebancane, Jese wabafundzisa uMtsetfo waMosi. Kuletinye tetingoma takhe, Davide utibita ngekutsi yindvodzana “yencekukati” yaJehova. (Tihlabelelo 86:16) Loku kwente kutsi labanye bantfu  bacabange kutsi make waDavide, longakashiwo eBhayibhelini, naye waba nesandla ebuhlotjeni baDavide naNkulunkulu. Lesinye sati sitsi: “Kungenteka make wakhe wamcocela ngendlela Nkulunkulu lasebentelana ngayo nebantfu bakhe endvulo,” kuhlanganise nendzaba yaRuthe naBowazi.

Nasitjelwa kwekucala ngaDavide, sitjelwa ngaye angumfana lowelusa timvu tababe wakhe. Kungenteka lomsebenti wawudzinga kutsi acitse lilanga lonkhe kanye nebusuku bakhona ayedvwana emadlelweni. Asewucabange ngalesimo.

Umndeni wakuboDavide wawuhlala eBhetlehema, lidolobha lelincane lelisemagcumeni akaJuda. Umhlaba wakulendzawo wawukhicita kudla lokunyenti. Tindzawo letingakaphakami kakhulu tatigcwele emasimu etitselo, emahlatsi emncumo, kanye netivini. Ngesikhatsi saDavide, tindzawo letiphakeme letingakalinywa tativame kusetjentiswa njengemadlelo. Bucadlwana, kwakunelihlane lakaJuda.

Umsebenti waDavide wawungaba yingoti ngaletinye tikhatsi. Kukulamagcuma lapho Davide abukana buso nebuso nelibhubesi kanye nelibhele lebeselitsetse imvu emhlambini. a Ngesibindzi, watisukela, watilandzela, wafike watibulala futsi wakhipha letimvu emlonyeni wato. (1 Samuweli 17:34-36) Kungenteka kutsi kungalesikhatsi lesi lapho Davide atfutfuka khona ekusebentiseni sidubulelo. Dvutane nelidolobha lakubo kwakunemnyele wakaBhenjamini. Tingwazi takuleso sive tatingadubulela litje linembe “ngisho nelunwele lunye, tingalugeji.” NaDavide abenjalo.—Tikhulu 20:14-16; 1 Samuweli 17:49.

Sikhatsi Lesasetjentiswa Kahle

Esikhatsini lesinyenti, kwelusa kwakungumsebenti lonekuthula nalodzinga ucitse sikhatsi lesinyenti uwedvwana. Nanobe kunjalo,  Davide akazange abe nesitunge kulomsebenti. Kunaloko, leso sikhatsi lasicitsa ayedvwa elusile samniketa ematfuba lamanyenti ekuzindla. Kubonakala shengatsi lokunye Davide lakufaka etingomeni takhe kwakutintfo labecabanga ngato ngesikhatsi asesengumfana. Akusiko yini ngesikhatsi ayedvwana lapho azindla khona ngekutsi tsine bantfu singakanani nasicatsaniswa nendalo yonkhe, kanye nangetimangaliso temazulu—lilanga, inyeti, kanye netinkhanyeti, “umsebenti wetandla [taJehova]”? Akusiko yini ngesikhatsi asemadlelweni lapho azindla khona ngemhlaba lokhicitako, tinkhomo, tinyoni, kanye “netilwane tesiganga”?—Tihlabelelo 8:3-9; 19:1-6.

Akungabateki kutsi umsebenti waDavide wekwelusa wamenta wativela bubele baJehova kubantfu bakhe labetsembekile. Davide wahlabela: “Simakadze ngumelusi wami, ngeke ngeswele lutfo. Ungilalisa emadlelweni laluhlata, angiholele nasemantini ekuphumula. Nome ngihamba esigodzini lesinelitfunti lekufa, angesabi lutfo lolubi, ngobe wena unami; intfonga yakho neludvondvolo lwakho kuyangivikela.”—Tihlabelelo 23:1, 2, 4.

Kungenteka uyatibuta kutsi loku kusho kutsini kuwe. Imphendvulo ikutsi lenye yetintfo letenta Davide wasondzelana naJehova futsi wabitwa ngekutsi ‘yindvodza yenhlitiyo yakhe’ kutsi abezindla ajule ngemisebenti yaJehova kanye nangebuhlobo bakhe naye. Kungashiwo lokufananako yini nangawe?

Uke wativa yini ufuna kudvumisa uMdali ngemuva kwekubuka lenye yetintfo latidalile? Uke wayiva yini inhlitiyo yakho igcwala lutsandvo ngaJehova ngemuva kwekubona timfanelo takhe endleleni lasebentelana ngayo nebantfu? Kute ukhone kutiva ngalendlela, kufanele ube nesikhatsi sekuzindla uwedvwana ngeliVi laNkulunkulu nangendalo yakhe, futsi uthandaze kuye. Kuzindla lokunjalo kutawukusita kutsi umati kahle Jehova, futsi umtsandze. Sonkhe, ngisho sibadzala nobe sibancane singaba nalo lelilungelo. Kungenteka-ke kutsi Davide bekasedvute naJehova kusukela asesengumfana. Sati ngani?

Kugcotjwa KwaDavide

Ngesikhatsi iNkhosi Sawula ingasakufanelekeli kuhola bantfu baNkulunkulu, Jehova watsi kuSamuweli: “Utamkhalela kuze kube ngunini Sawula, ngobe sengimalile kutsi abe yinkhosi yema-Israyeli? Gcwalisa luphondvo lwakho ngemafutsa, ungenele indlela yakho. Ngikutfuma endlini yakaJese waseBhetlehema, ngobe ngitikhetsele lomunye wemadvodzana akhe kutsi abe yinkhosi.”—1 Samuweli 16:1.

Watsi nakefika eBhetlehema, umphrofethi waNkulunkulu watjela Jese kutsi akabite emadvodzana akhe. Kodvwa-ke nguyiphi Samuweli labetakuyigcoba njengenkhosi? Watsi nakabona Eliyabe, Samuweli watsi: “Nguye lona.” Kodvwa Jehova watsi kuye: “Ungabheki kubukeka  nebudze bakhe, ngobe yena ngimalile. Simakadze akabuki tona tintfo letinakwa ngumuntfu. Umuntfu ubuka lingaphandle lemuntfu, kodvwa Simakadze ubuka inhlitiyo.” Ngendlela lefananako, Jehova wamala Abinadabi, Shama, kanye nalabanye banakabo labane. Ekugcineni, Samuweli wabuta Jese watsi: “Ngulawa kuphela yini emadvodzana akho?” Jese wamphendvula watsi: “Kusasele lencane kunawo onkhe, kodvwa yeluse timvu.”—1 Samuweli 16:7, 11.

Emphendvulweni yakhe, Jese kwakufanana nekutsi utsi: ‘Angeke kwenteke kutsi Davide nguye lona lomfunako.’ Njengemntfwana lomncane ekhaya, Davide abeniketwe umsebenti wekwelusa timvu. Kodvwa Nkulunkulu abekhetse yena. Jehova ubona loko lokusenhlitiyweni, futsi kuyacaca kutsi nakuDavide kukhona lokuhle lakubona. Ngesikhatsi Jese atfumele kutsi kulandvwe Davide, Jehova watsi kuSamuweli: “‘Sukuma umgcobe, ngobe nguye yena lowo.’ Ngako Samuweli watsatsa luphondvo lwakhe lwemafutsa wamgcoba ebaleni embikwabomnakabo. Kusukela ngalelo langa [umoya] waSimakadze wehlela etikwaDavide ngemandla lamakhulu.”—1 Samuweli 16:12, 13.

Asitjelwa kutsi Davide abeneminyaka lemingakhi nakwenteka loku. Nobe kunjalo, ngemuva kwesikhatsi banakabo labadzala, bo-Eliyabe, Abinadabi, kanye naShama bangena ebutfweni lemphi laSawula. Laba labanye labasihlanu bebasebancane kakhulu kutsi nabo bangangena. Kungenteka kutsi kute kubo labesafikile eminyakeni lengu-20 budzala, lokuminyaka umuntfu lobekufanele abe nayo kute angene ebutfweni lemphi laka-Israyeli. (Numeri 1:3; 1 Samuweli 17:13) Kuyacaca-ke kutsi Davide bekasemncane kakhulu ngesikhatsi Jehova amkhetsa. Nanobe kunjalo, kubonakala shengatsi besavele anekukholwa lokucinile. Kusebaleni kutsi bekanebuhlobo lobuhle naJehova, labakha ngekuzindla ngetintfo latatiko ngaNkulunkulu.

Bantfu labasha lamuhla kufanele bakhutsatwe kutsi bente lokufananako. Batali, niyabakhutsata yini bantfwana benu kutsi bazindle ngetintfo letihlobene nekukhonta Nkulunkulu, njengekutsi bakhombise kubonga ngendalo yaNkulunkulu, futsi bafundze loko liBhayibheli lelikushoko ngeMdali? (Dutheronomi 6:4-9) Bantfu labasha, niyatentela yini loku nobe nimela kutsi nize nitjelwe? Tincwadzi letisekelwe eBhayibhelini, njengabomagazini Sicongosekulindza kanye ne-“Phaphama!” b tentelwe kutsi tinisite.

Likhono Lekudlala Lihabhu

Njengobe tingoma taDavide letinyenti tisitjela lokutsite ngekuphila kwakhe asesengumelusi, nemculo nawo kukhona lositjela kona. Kuyavunywa, lomculo lowawuhambisana naletingoma taDavide awusekho lamuhla. Kodvwa-ke, siyati kutsi umcambi wato abenelikhono lelihle kutemculo. Ecinisweni, sizatfu lesabangela kutsi Davide abitwe yiNkhosi Sawula kutsi abenelikhono ekudlaleni lihabhu.—1 Samuweli 16:18-23. c

Davide walitfola kuphi lelikhono, futsi nini? Kungenteka walitfola ngesikhatsi asemadlelweni eluse timvu. Kunengcondvo kucabanga kutsi ngisho nangesikhatsi asesemncane, Davide bekavele ahlabelela Nkulunkulu. Ngako-ke, Jehova wamkhetsa futsi wamtfuma ngesizatfu sekutsi bekatinikele futsi anebuhlobo lobuhle naye.

Kuphila kwaDavide ngesikhatsi asamdzala, nako kuveta kutsi abenebuhlobo lobuhle naJehova. Kodvwa buntfu bakhe buvetwa kahle emavini labewasho kusukela asesemncane, elusa timvu eBhetlehema. Asewumcabange nje ahlabelela Jehova: “Ngikhumbula emalanga asendvulo. Ngizindla ngemisebenti yakho yonkhe, ngicabange ngato tonkhe tento takho.” (Tihlabelelo 143:5) Lamavi, kuhlanganise naletinye tingoma taDavide, asikhutsato kubo bonkhe labafisa kuba bantfu benhlitiyo yaJehova.

[Imibhalo lengentansi]