UMuvi Wemithandazo Ukuvumelelani Kuhlupheka?

NGISHO nobe bangase bathandaze, labanye bantfu bayangabata kutsi Nkulunkulu ukhona. Yini lebenta bangabate? Mhlawumbe kungobe babona kunehlupheka lokunyenti lamhlabeni. Wake watibuta yini kutsi Nkulunkulu ukuvumelelani kuhlupheka?

Njengobe bantfu banesono futsi bahlupheka nyalo, nguNkulunkulu yini lobangela loko? Besingeke simhloniphe Nkulunkulu lobangela bantfu kuhlupheka. Ase ucabange nganaku: Nawuhamba celeni kwemoto lensha uyibuka utfole kutsi luhlangotsi lwayo lumoncokile, bewungaphetsa yini ngekutsi yindlela bakhi bayo labayakhe ngayo? Bewungeke uphetse kanjalo. Bewungaphetsa ngekutsi bakhi bayo bayakhe kahle kodvwa kukhona lotsite nobe lokutsite lokuyimoncotile.

Ngendlela lefanako, kufanele siphetse ngekutsini nasijabulela kubuka indlela lemangalisako indalo lehleleke ngayo bese sibona ludlame nenkhohlakalo lokubhokile emhlabeni? LiBhayibheli lifundzisa kutsi Nkulunkulu wadala bantfu bekucala bete sono kodvwa ngekuhamba kwesikhatsi batibangela bona kuhlupheka. (Dutheronomi 32:4, 5) Tindzaba letimnandzi kutsi Nkulunkulu wetsembise kuwulungisa lomonakalo kuze abuyisele bantfu labalalelako ekuphileni lokute sono. Nakatawulungisa, yini indzaba atsatse sikhatsi lesidze kangaka?

Lokwenta Kutsi Atsatse Sikhatsi Lesidze Kangaka

Sizatfu sitfolakala emphendvulweni yembuto lotsi ngubani lokufanele abuse bantfu. Jehova akakase ahlose kutsi bantfu batibuse. Bekufanele kube nguye uMbusi wabo. LiBhayibheli litsi: “Akusiko kwemuntfu kutsi aticondzisele yena tinyatselo takhe.” (Jeremiya 10:23) Kuyadzabukisa  kutsi bantfu bekucala bakhetsa kuvukela kubusa kwaNkulunkulu. Kwephula umtsetfo kwabenta baba toni. (1 Johane 3:4) Umphumela waba kulahlekelwa simo sekubabete sono futsi batibangela bona nentalo yabo kuhlupheka.

Sekuphele tinkhulungwane teminyaka Jehova avumele kutsi bantfu batibuse kodvwa umlandvo uveta kutsi bantfu bete likhono lekutibusa. Umlandvo uveta nekutsi bonkhe bohulumende bebantfu ngibo lababangela kuhlupheka. Kute namunye hulumende lokhone kucedza imphi, bucala, kungalungi nobe tifo.

Nkulunkulu Utayilungisa Njani Lenkinga?

LiBhayibheli letsembisa kutsi Nkulunkulu utawuletsa live lelisha lelinekulunga. (2 Phetro 3:13) Bantfu labatawuvunyelwa kutsi bahlale kulo, ngulabakhetsa kusebentisa inkhululeko yabo yekutikhetsela ngekutsi batsandze labanye bantfu naNkulunkulu.—Dutheronomi 30:15, 16, 19, 20.

LiBhayibheli liphindze litsi “ngelilanga lekwehlulelwa” lelisondzela ngekushesha, Nkulunkulu utawucedza kuhlupheka nebantfu labakubangelako. (2 Phetro 3:7) Ngemuva kwaloko, Jesu Khristu uMbusi lobekwe nguNkulunkulu, utawubusa bantfu labalalelako. (Danyela 7:13, 14) Yini letawufezwa kubusa kwaJesu? LiBhayibheli litsi: “Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:11.

NjengeNkhosi yasezulwini, Jesu utawucedza kuhlupheka lokufaka ekhatsi kugula, kuguga nekufa, lokungumphumela wekutsi bantfu bavukela Jehova “umtfombo wekuphila.” (Tihlabelelo 36:9) Jesu utawelapha bonkhe bantfu  labemukela kubusa kwakhe lokunelutsandvo. Ngephansi kwekubusa kwakhe, letetsembiso teliBhayibheli titawugcwaliseka:

◼ “Kute . . . loyakutsi: ‘Ngiyagula’ netono talabo labahlala khona tiyawutsetselelwa.”—Isaya 33:24.

◼ “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:4.

Kuyasidvudvuta kwati kutsi masinyane nje Nkulunkulu utawufeza setsembiso sakhe sekucedza konkhe kuhlupheka. Kwanyalo, singaciniseka kutsi uyayiva imithandazo yetfu ngisho nobe akuvumele kwesikhashana kuhlupheka.

Nkulunkulu ukhona, angakuva ngisho nekukhala kwakho ngebuhlungu nelusizi. Uyakulangatelela kukubona ujabulela kuphila ngesikhatsi lapho konkhe kungabata lonako nebuhlungu sekuphelile.