Ngatalelwa eMoundsville lidolobha lelithulile lelingaseMfuleni i-Ohio enyakatfo ye-West Virginia, e-U.S.A. Ekhaya kitsi ngiwesibili kubantfwana labane, labatsatfu babo bafana futsi besihlala sijabulile ekhaya. Batali bami bebasebenta kamatima, babantfu labetsembekile futsi bebabatsandza bantfu. Besingakanjingi ekhaya kodvwa besingesweli. Njengobe baboFakazi BaJehova, batali bami bebenta konkhe lokusemandleni abo kuze basifundzise timiso teliBhayibheli ngalesikhatsi sisebancane.

Ngesikhatsi ngiseminyakeni yekutfomba, inhlitiyo yami beseyivele icale kukhwesha kuloko bengifundziswe kona. Ngacala kungabata kutsi kuphila ngetimiso teliBhayibheli kungangenta ngibe nemphilo lekahle naleyenetisako. Ngatitjela kutsi kutentela matsandza ngiyo kuphela intfo lengangiletsela injabulo sibili. Kungakapheli sikhatsi lesidze, ngayekela kuya emihlanganweni yelibandla. Bantfwabakitsi lababili bangilandzela kulomkhuba lomubi wekuvukela. Batali betfu betama konkhe lokusemandleni abo kusisita kodvwa asibalalelanga.

Bengingati kutsi loko lebengicabanga kutsi kuyinkhululeko sibili lebengiyifuna bekutangenta sigcili. Ngalelinye lilanga ngibuya esikolweni, umngani wami wanginika sitiki seligwayi. Ngasitsatsa ngasibhema. Kusukela ngalelolanga ngacala kwenta imikhuba leminyenti lelimata umtimba. Ngekuhamba kwesikhatsi ngadla tidzakamiva, ngadzakwa tjwala futsi bengingatiphatsi kahle. Eminyakeni leyalandzela ngangititika ngetidzakamiva futsi ngaba sigcili saletinyenti tato. Lokwangenta ngangena nakakhulu ekudleni tidzakamiva kutsi ngase ngicale kutitsengisa kuze ngikhone kuphila imphilo lebengiyiphila.

Nanobe ngenta konkhe lokusemandleni kutsi ngingawulaleli nembeza wami, bewuhlale ungikhumbuta kutsi imphilo lengiyiphilako ayikalungi. Ngesikhatsi lesifanako bengicabanga kutsi kuphila kwami sekuvele konakele futsi bese kungeke kungisite kwetama kushintja. Bengihlangana nebantfu labanyenti emaphathini nasemakhonsathini kepha bengivame kutiva nginesitunge futsi ngicindzetelekile. Ngaletinye tikhatsi bengike ngihlale ngicabange indlela batali bami labahlonipheke nalabakahle ngayo bese ngiyatibuta kutsi ngayishiya njani imikhuba lemihle labangifundzisa yona.

Naloku besengililahlile litsemba lekutsi ngiyoke ngishintje ngibe ngumuntfu lokahle, labanye bebasenalo. Ngemnyaka wa-2000, batali bami bangicela kutsi ngiye emhlanganweni lomkhulu waboFakazi BaJehova. Ngatihudvula ngaya kuwo. Kulomhlangano, ngamangala nangibona bantfwabakitsi lababili nabo labakushiya lesakufundziswa batali betfu.

Kulomhlangano, ngakhumbula kutsi ngake ngafika kulendzawo ngite ekhonsathini ngemnyaka lophelile. Umehluko lengawubona wangitsintsa inhlitiyo. Nangikulekhonsathi emnyakeni lophelile, lendzawo beyingcolile igcwele tibi nentfutfu yeligwayi. Bantfu labanyenti lebebakhona kuyo bebangenadzaba nalomunye umuntfu futsi bekudlalwa umculo lowephula umoya. Umehluko lobewukhona kulomhlangano kutsi bekugcwele bantfu labajabulile, labangemukela ngemusa ngisho nome besekuyiminyaka ngabagcina. Lendzawo beyihlobile futsi lebekushiwo kulomhlangano bekuniketa litsemba ngelikusasa. Kubona indlela imitsetfo yeliBhayibheli lesebenta ngayo kubantfu kwangenta ngatibuta kutsi ngayishiyelani.—Isaya 48:17, 18.

Ngekushesha ngemuva kwalomhlangano, ngancuma kuphindze ngitihlanganise nalamanye emaKhristu. Bantfwabakitsi kwabatsintsa labakubona kulomhlangano, nabo bancuma kuyiyekela imikhuba lemibi. Sobatsatfu savuma kuchutjelwa sifundvo seliBhayibheli.

Livesi lelangitsintsa kakhulu nguJakobe 4:8 lotsi: “Sondzelani kuNkulunkulu, naye utawusondzela kini.” Ngabona kutsi nangifuna kusondzela kuNkulunkulu, kufanele ngishintje kuphila kwami. Lolunye lushintjo lengalwenta kuyekela kubhema ligwayi, kudla tidzakamiva nekudzakwa tjwala.—2 Khorinte 7:1.

Ngabashiya bonkhe bangani bami lebengenta nabo lemikhuba, ngatfola labanye bangani kubantfu labakhonta Jehova. Lomunye webazalwane longulomdzala lonakekela libandla lowatadisha nami liBhayibheli wangisita kakhulu. Bakavame kungishayela lucingo aphindze angivakashele atongihlola kutsi nginjani. Nanyalo solo ungumngani wami lomkhulu.

Entfwasahlobo yanga-2001 ngakhombisa kutinikela kwami kuNkulunkulu ngekubhajatiswa kanye nebantfwabakitsi lababili. Batali betfu nemnaketfu lomncane lobekatsembekile bajabula kakhulu ngalesikhatsi sonkhe ekhaya kitsi sesimunye ekukhonteni Jehova.

Bengicabanga kutsi timiso teliBhayibheli kumatima kutigcina kodvwa nyalo sengiyabona kutsi tisivikelo. LiBhayibheli langisita ngakuyekela kudla tidzakamiva nekutitsengisa futsi ngaba ngumuntfu lokahle.

Nyalo ngiyajabula ngekuba yincenye yebuzalwane bemhlaba wonkhe baboFakazi BaJehova. Bona batsandzana mbamba futsi bakhonta Nkulunkulu ngebunye. (Johane 13:34, 35) Ngisitakele kakhulu ngekuba ngulomunye waboFakazi futsi kubo ngitfole sibusiso lesikhulu lesingumkami Adrianne lengimtsandzako futsi lengimatisa kakhulu. Kuyasijabulisa kukhonta uMdali wetfu sisobabili.

Kunekutsi ngibe matasa ngemphilo letawuzuzisa tsine kuphela, nyalo ngilivolintiya lasikhatsi sonkhe lelifundzisa bantfu indlela nabo labangasitakala ngayo ngekusebentisa liVi laNkulunkulu. Kwenta loko kungijabulise kakhulu. Ngingalisho ligcwale umlomo kutsi liBhayibheli likuguculile kuphila kwami. Sengiyitfolile inkhululeko sibili.