Kutfobeka kusho kungatetfwali nobe kungatigcabhi. Umuntfu lotfobekile akatiboni ancono kunalabanye. Nobe ngabe ngumuphi umuntfu lonesono lotfobekile, uyakhumbula kutsi uyawenta emaphutsa.

Kuba nesikhundla akuzange kwente Mosi atigcabhe. Etikhatsini letinyenti nangabe umuntfu anikwa sikhundla, kutsi utfobekile nobe akatfobeki kusheshe kubonakale. Umbhali Robert G. Ingersoll, lowaphila eminyakeni lesemkhatsini wa-1801 na-1900 watsi: “Bantfu labanyenti bayakhona kubeketelela bumatima kodvwa nangabe ufuna kubona kutsi umuntfu unjani, mnike sikhundla.” Mosi usibonelo lesihle kakhulu sekutfobeka. Usibonelo ngayiphi indlela?

Mosi waniketwa sikhundla lesikhulu ngobe Jehova wamtfuma kutsi ahole ema-Israyeli. Sikhundla laniketwa sona asizange simente akhukhumale. Cabanga ngesibonelo sendlela lakhombisa ngayo kutfobeka nakabutwa umbuto lolukhuni lomayelana nemalungelo ekutfola lifa. (Numeri 27:1-11) Lombuto wawumatima ngobe sincumo lebesitawutsatfwa lapho besitawuba yinchubo lesemtsetfweni lebeyitawusetjentiswa titukulwane letilandzelako.

Mosi abetayisebenta njani lendzaba? Bekungenteka yini acabange kutsi njengobe abengumholi wema-Israyeli, bekumfanela kwenta sincumo kulendzaba? Mosi abetawusebentisa likhono lakhe lemvelo yini, budzala bakhe kulomsebenti nobe lwati lebekanalo ngendlela yaNkulunkulu yekucabanga?

Mhlawumbe umuntfu lotigcabhako bekangenta njalo. Mosi yena akentanga njalo. LiBhayibheli lisho naku lokulandzelako: “Mosi wayitsatsa lendzaba yawo wayimikisa kuSimakadze.” (Numeri 27:5) Ase ucabange nje ngaloko! Ngisho nangemuva kweminyaka lengu-40 ahola sive sema-Israyeli, Mosi akazange afune kusebenta lendzaba ngembono wakhe kodvwa wetsembela kuJehova. Kulendzaba, kuyasikhanyela kutsi Mosi bekatfobekile.

Mosi akazange acabange kutsi nguye kuphela lokufanele abe nesikhundla. Wajabula ngalesikhatsi Jehova aniketa nalamanye ema-Israyeli umsebenti wekuphrofetha njengaye. (Numeri 11:24-29) Ngesikhatsi babetala wakhe ambonisa kutsi akanikete nalabanye imisebenti lebekayenta, Mosi wakwenta loko ngekutfobeka. (Eksodusi 18:13-24) Ngisho nobe bekasolo acinile emtimbeni, nasatawufa Mosi wacela Jehova kutsi akhombe umholi lebekatawutsatsa sikhundla sakhe. Ngesikhatsi Jehova akhetsa Joshuwa, Mosi wakwemukela ngenhlitiyo lemhlophe loko waphindze wayisekela lendvodza lebeyiseyinsha wakhutsata nesive kutsi sititfobe ekuholeni kwaJoshuwa nabaya eVeni Lesetsembiso. (Numeri 27:15-18; Dutheronomi 31:3-6; 34:7) Mosi wakutsatsa njengemsebenti lokhetsekile kuhola ema-Israyeli ekukhonteni Nkulunkulu kodvwa akazange atsatse sikhundla sakhe njengalesibaluleke kwendlula inhlalakahle yalabanye.

Asifisi kuvumela sikhundla lesinikwe sona, ligunya nobe likhono lemvelo lesinalo kutsi lisente sitetfwale. Khumbula kutsi kuze Jehova asisebentise, ngaso sonkhe sikhatsi kutfobeka kwetfu ngiko lokubalulekile kwendlula emakhono etfu. (1 Samuweli 15:17) Nangabe sitfobekile, sitakwenta konkhe lokusemandleni kuze sisebentise seluleko lesinengcondvo seliBhayibheli lesitsi: “Tsemba Simakadze ngayo yonkhe inhlitiyo yakho, ungeyami ekwatini kwakho.”—Taga 3:5, 6.

Sibonelo saMosi siphindze sisifundzise kutsi akukafaneli sitsatse sigaba lesikuso nobe sikhundla njengalesibaluleke kakhulu.

Siyasitakala yini nasilingisa Mosi ngekutfobeka? Asingabati kutsi siyasitakala. Nasenta imetamo yekutsi sitfobeke, loko kwenta siphilisane kahle nebantfu lesinabo futsi kwenta sitsandzeke kubo. Lokubaluleke nakakhulu kutsi sitenta sitsandzeke kuNkulunkulu Jehova naye lotfobekile. (Tihlabelelo 18:35) “Nkulunkulu umelana nalabatigcabhako, kodvwa labatfobekile ubapha umusa.” (1 Phetro 5:5) Sinesizatfu lesivakalako sekulingisa Mosi ngekutfobeka.