TINDLELA TEKWENTA UMNDENI UJABULE
Nawunemntfwana Lokhubatekile
CARLO utsi: a “Indvodzana yetfu Angelo ine-Down syndrome. Kugula kwayo kusishiya sidziniwe emtimbeni, engcondvweni futsi kuyasikhatsata. Cabanga nje ngekutsi angakanani emandla ladzingekako kuze unakekele umntfwana longakakhubateki. Kunakekela umntfwana lokhubatekile kudzinga emandla lamanyenti kwendlula lawo. Ngaletinye tikhatsi kubanga tinkinga emshadweni wetfu.”
MIA utsi: “Kudzinga kuphikelela nesineke kufundzisa Angelo ngisho nentfo lemelula. Nangidziniwe ngisheshe ngiyicasukele indvodza yami, Carlo. Ngaletinye tikhatsi asivumelani ngetintfo bese sigcina sesitsetsisana.”
Usalikhumbula yini lilanga lokwatalwa ngalo umntfwanakho? Asingabati kutsi bewulangatelela kumbamba ngetakho tandla. KuboCarlo na-Mia injabulo yabo beyihambisana nekukhatsateka njengoba batjelwa kutsi umntfwanabo uyagula futsi ukhubatekile.
Unemntfwana lokhubatekile yini? Nakunjalo, kungenteka uyatibuta kutsi utawukhona yini kukubeketelela loko. Nakunjalo, ungadvumali. Labanye batali babhekene naleso simo ngemphumelelo. Ase ucabange ngetinsayeya letintsatfu lokungenteka ubhekane nato nekutsi inhlakanipho letfolakala eBhayibhelini ingakusita kanjani kuto.
INSAYEYA YEKUCALA: BUMATIMA BEKWEMU-KELA KUTSI UMUNTFWANAKHO UKHUBATEKILE.
Batali labanyenti bayadvumala nabeva kutsi umntfwanabo uyagula. Juliana waseMexico longumtali, utsi: “Ngesikhatsi bodokotela bangitjela kutsi indvodzana yetfu Santiago, inesifo i-cerebral palsy, angizange ngikukholwe loko. Ngahlangana inhloko.” Labanye bangase bative njengaVillana longumtali waseTaliyane lowatsi: “Ngancuma kutsi ngibe nemntfwana nanobe loko kuyingoti kubomake labangangami. Nyalo, indvodzana yami nayihlangabetana netinkinga letihlobene nesifo lenaso, ngiyatisola.”
Nangabe ulwisana nekucindzetelwa yimiva yekudvumala nobe kutisola, akukukhanyele kutsi leyo yintfo levamile. Kugula akusiyo incenye yenjongo yaNkulunkulu yasekucaleni. (Genesisi 1:27, 28) Nkulunkulu akazange adale batali banelikhono lekutsi bayemukele lula intfo labangazange badalelwe yona. Kuyintfo levamile kutsi umuntfu eve buhlungu, ikakhulukati nangabe umtali atfola kutsi umntfwanakhe ukhubatekile. Kutakutsatsa sikhatsi kutsi usemukele lesimo lobhekene naso.
Kutsiwani nangabe uva shengatsi wafaka sandla ekukhubatekeni kwemntfwanakho? Khumbula kutsi kute lowati kahle kutsi lufuto luhamba libanga lelingakanani naletinye tintfo letitsintsa imphilo yemntfwanakho. Ngakulolunye luhlangotsi, ungase utikhandze usola loshade naye. Wubalekele umcabango lonjalo. Ungabhekana kancono nalesimo nangabe ubambisana naloshade naye futsi utinike sikhatsi sekunakekela umntfwanenu.—Umshumayeli 4:9, 10.
LONGAKWENTA: Fundza ngesimo semntfwanakho. LiBhayibheli litsi: “Umuti wakhiwa ngekuhlakanipha, usimiswe ngekucondza.”—Taga 24:3.
Ungafundza kabanti kubetemphilo kanye nasetincwadzini letikhuluma ngekugula kwemntfwanakho. Ungase uhlobanise kufundza ngesimo semntfwanakho nekufundza lolunye lulwimi. Nawusacala, kutawuba lukhuni kodvwa ungalufundza.
Carlo naMia lokukhulunywe ngabo ekucaleni, bafuna kwati kabanti ngalesifo kubodokotela kanye nasenhlanganweni lenakekela bantfu labagula njengendvodzana yabo. Batsi: “Loko kwasisita kutsi sati tinkinga lebesingatilindzela kanye netintfo letingentiwa ngumuntfu lone-Down syndrome. Sabona kutsi indvodzana yetfu ingatenta tintfo letinyenti nalabanye bantfu labaphilile labakhonako kutenta. Loko kwasidvudvuta kakhulu.”
YETAMA LOKU: Naka kakhulu loko umntfwanakho langakhona kukwenta. Hlela kwenta naye imisebenti leyehlukehlukene yasekhaya. Nakwenteka umntfwanakho aphumelele kwenta lokutsite lokuncane, sheshe umncome uphindze ujabule naye.
INSAYEYA YESIBILI: UTIVA UDZINIWE FUTSI UNGENAMUNTFU LONGAKHULUMA NAYE.
Ungase uve sengatsi kunakekela umntfwanenu logulako kunishiya nidziniwe. Jenney, longumtali waseNew Zealand utsi: “Eminyakeni lembalwa ngemuva kwekutsi kutfolakele kutsi umntfwanetfu unekugula lokubitwa ngekutsi yi-spina bifida, bengidzinwa ngize ngikhale nangabe ngetama kwenta naleminye imisebenti yasekhaya.”
Lenye insayeya kutsi ungase utive ungenamuntfu longakhuluma naye. Ben unendvodzana lephetfwe kugula lokutsiwa yi-muscular dystrophy ne-Asperger’s syndrome. Utsi: “Bantfu labanyenti angeke bacondze kutsi injani imphilo yetfu.” Ungase ufise kukhuluma nalotsite kodvwa linyenti lebangani betfu banebantfwana labaphilile. Ngaleyondlela uyencena kutfulula sifuba sakho kubo.
LONGAKWENTA: Cela lusito. Nangabe ulutfola, lwemukele. Juliana lesike sakhuluma ngaye uyavuma, “ngaletinye tikhatsi sinendvodza yami sitiva sinemahloni ekucela lusito.” Uchubeka atsi: “Sifundzile kutsi siyaludzinga lusito lwalabanye bantfu. Nabasisita labanye, asitiva sinesitunge.” Nakwenteka umngani nobe lilunga lemndeni licela kuhlala nemntfwanakho embutsanweni lotsite nobe emhlanganweni webuKhristu, kwemukele loko. “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.”—Taga 17:17.
Yinakekele imphilo yakho. Njengobe ne-ambulesi kudzingeka yetse phethiloli njalo kuze ichubeke nekulayisha tigulane letiya esibhedlela, nawe kudzingeka udle kahle, ujime futsi utinike sikhatsi sekuphumula kuze ukhone kunaka umntfwanakho. Naku lokushiwo nguJavier lonemntfwana lokhubatekile, utsi: “Indvodzana yami ayikhoni kutihambela, ngako, ngicabanga kutsi kufanele ngidle kahle kuze ngikhone kuyinakekela.”
Yini longayenta kuze ube nesikhatsi sekunakekela imphilo yakho? Labanye batali bayashintjana ekunakekeleni umntfwana. Ngaleyondlela lomunye uyaphumula aphindze anakekele tidzingo takhe. Kudzingeka uncume kutsi ngutiphi tintfo letingakabaluleki kakhulu bese utsatsa leso sikhatsi usisebentisela kutinakekela. Njengobe Mayuri longumtali waseNdiya asho, “ugcina sewujwayele.”
Khuluma nemngani lometsembako. Ngisho nebangani labete bantfwana labakhubatekile, bangakudvudvuta. Thantaza kuNkulunkulu Jehova. Ungakusita yini umthantazo? Yazmin lonebantfwana lababili labanekugula i-cystic fibrosis, utsi: “Kube netikhatsi lapho sitiva sicindzetelekile kangangekutsi ngativa ngatsi ngiyafa.” Uyachubeka atsi: “Ngithantazela kuba ncono nekutfola emandla. Ngemuva kwaloko ngitiva nginemandla ekuchubeka nemphilo.”—Tihlabelelo 145:18.
YETAMA LOKU: Hlatiya kudla lokudlako, sikhatsi lojima ngaso nekutsi ulala ngalokwenele yini. Yetama kutfola kutsi yini longayenta kuze ubekele eceleni tintfo letingasimcoka kuze usebentise leso sikhatsi unakekele imphilo yakho. Lushintjashintje luhlelo lwakho uluvumelanise nesimo sakho.
INSAYEYA YESITSATFU: UCITSA SIKHATSI LESINYENTI NEMNTFWANAKHO LOKHUBATEKILE KWENDLULA LAMANYE EMALUNGA EMNDENI WAKHO.
Kugula kwemntfwanakho kungase kutsintse indlela umndeni wakho lodla ngayo, tindzawo lotivakashelako nesikhatsi batali labasicitsako nemntfwana ngamunye. Leso simo singabangela kutsi labanye bantfwana beve shengatsi bona abanakwa. Ngetulu kwaloko, batali bangase batikhandze sebanaka kakhulu umntfwana lokhubatekile futsi bangasanakani bona. Lionel longubabe wase Liberia utsi: “Ngalesinye sikhatsi umkami utsi sekunengi kakhulu lakwentako futsi kunaka indvodzana yetfu sengumtfwalo wakhe yedvwana. Ngitiva sengatsi umkami akangihloniphi futsi ngalesinye sikhatsi angimphendvuli ngemusa.”
LONGAKWENTA: Kute wente bantfwabakho babone kutsi ubanaka bonkhe, hlela tikhatsi tekwenta umsebenti lotsite lotanijabulisa nindzawonye. Jenney lokukhulunywe ngaye ekucaleni utsi: “Ngaletinye tikhatsi sentela indvodzana yetfu intfo lengakavami lokungase kube kutsi siyodla ndzawonye endzaweni yekudlela leyitsandza kakhulu.”
Khombisa bonkhe bantfwabakho kutsi uyabatsandza
Kute uvikele umshado wakho, khulumisanani naloshade naye niphindze nithantaze ndzawonye. Aseem longubabe waseNdiya lonendvodzana lenesifo sekuwa, utsi: “Ngiyavuma kutsi ngaletinye tikhatsi sinemkami sitiva sikhatsele futsi sisangene kodvwa sihlela sikhatsi sekuhlala ndzawonye sikhulume siphindze sithantaze ndzawonye. Lilanga ngalinye ekuseni nabasengakavuki bantfwana sitinika sikhatsi sicoce ngelivesi leliBhayibheli.” Labanye batali bacoca babodvwa nasebatawulala. Kutfululelana kwenu tifuba kanye nekuthantaza, kutawucinisa umshado wenu kulesikhatsi lesimatima. (Taga 15:22) Labanye labashadile batsi: “Letinye tetikhatsi lesitikhumbula kakhulu emphilweni yetfu ngulapho sibhekene nebumatima.”
YETAMA LOKU: Bancome labanye bantfwabakho ngekusekela umntfwanakubo lokhubatekile. Hlala njalo utjela bantfwabakho nemlingani wakho kutsi uyabatsandza futsi uyabatisa.
UNGAPHELELWA LITSEMBA
LiBhayibheli letsembisa kutsi masinyane Nkulunkulu utawucedza kugula nekukhubateka kwebantfwana nebantfu labadzala. (Sembulo 21:3, 4) Ngaleso sikhatsi “kute . . . loyakutsi: ‘Ngiyagula.’” b—Isaya 33:24.
Kwanyalo, ungaphumelela ekukhuliseni umntfwanakho lokhubatekile. Carlo naMia lokukhulunywe ngabo ekucaleni batsi: “Ungadvumali nawubona shengatsi kute lokulungako. Hlale ucabanga ngetintfo letinhle letentiwa ngumntfwanakho ngobe vele tikhona futsi tinyenti.”
a Emabito ashintjiwe.
b Ungafundza kabanti ngesetsembiso seliBhayibheli sekuphila lokute kugula esehlukweni 3 sencwadzi letsi Lifundzisani Mbambambamba LiBhayibheli? leshicilelwa boFakazi BaJehova.
TIBUTE . . .
-
Yini lengiyentako kuze ngihlale ngiphilile emtimbeni, ngilawule imiva yami ngiphindze ngigcine buhlobo bami naJehova bubuhle ngelizinga lengingakhona ngalo?
-
Ngagcina nini kuncoma bantfwabami labangakakhubateki ngekungisita?
