YINI indvodza lengayenta kuze umfati wayo ajabule? Bantfu labanyenti bakhuliswe bati kutsi umsebenti loyinhloko wendvodza kwenta umndeni wayo kutsi ube nemali leyenele. Nanobe kunjalo, labanye bafati labanjingile bativa bangatsandvwa futsi bangakhululeki. Nakakhuluma ngendvodza lashada nayo, lomunye umfati waseSpain lokutsiwa nguRosa utsi: “Kubantfu labangephandle abebonakala ayindvodza lekahle, kodvwa nakasekhaya bekanelulaka.” Joy waseNigeria utsi: “Nangingavumelani nayo, indvodza yami beyivele itsi: ‘Kufanele ukwente konkhe lengikushoko ngobe ngiyindvodza yakho.’”

Indvodza ingayifeza njani indzima yayo ngendlela lenelutsandvo? Yini lengentiwa yindvodza kuze likhaya layo libe nenjabulo, futsi libe ‘yindzawo yekuphumula’ kumfati wayo?​—Ruthe 1:9, NW.

Nanobe indvodza nemfati bafana emehlweni aNkulunkulu, liBhayibheli litsi ngamunye wabo unendzima yakhe ekhaya. Incwadzi yebaseRoma 7:2 iveta kutsi umfati loshadile ungephansi ‘kwemtsetfo wendvodza yakhe.’ Njengobe tinhlangano letinyenti tibeka umuntfu lotsite kutsi acondzise imisebenti yato, naNkulunkulu ubeke indvodza kutsi ibe yinhloko yemfati wayo. (1 Khorinte 11:3) Emadvodza kufanele ahambe embili ekucondziseni tintfo emakhaya awo.

Madvodza, kufanele nilisebentise njani ligunya lenilinikwe nguNkulunkulu? LiBhayibheli litsi: “Chubekani nitsandza bafati benu njengobe nje naKhristu alitsandza libandla.” (Efesu 5:25) Nanobe Jesu Khristu angazange asashade, sibonelo sakhe singakusita kutsi ube yindvodza lekahle. Asesibone kutsi singakusita njani.

Jesu bekabadvudvuta futsi abasita labanye. Naku Jesu lakwetsembisa bonkhe labebacindzetelekile futsi besindvwa tinkinga: “Kotani kimi, . . . ngitaniphumuta.” (Matewu 11:28, 29) Jesu abevame kubaphilisa futsi abasite kutsi basondzele edvute naJehova. Kungako-ke bantfu labanyenti bebamtsandza futsi baciniseka kutsi utabasita.

Indlela emadvodza langamlingisa ngayo Jesu. Funa tindlela tekusita umfati wakho emisebentini layentako. Labanye bafati bativa ngendlela Rosa labetiva ngayo, washo emavi labuhlungu  watsi: “Bekungakehluki nekutsi ngisisebenti nje endvodzeni yami.” Ngalokwehlukile kuloko, Kweku, loyindvodza lenemshado lojabulisako utsi: “Ngivame kumbuta umfati wami kutsi ngingamsita njani. Ngesizatfu sekutsi ngiyamtsandza, kuvama kuba ngimi lotsatsa sinyatselo kucala kuze ngimsite ngemisebenti yasendlini.”

Jesu abecabangela futsi aneluvelo. Kwase kuphele iminyaka lengu-12 lomunye umfati ahlushwa sifo lesibuhlungu. Nakeva ngemandla aJesu ekuphilisa, “abesolo atsi: ‘Nangingamane nje ngitsintse tingubo takhe tangetulu, ngitawuphila.’” Abecinisile! Waya kuJesu, wafike watsintsa umphetfo wengubo yakhe, futsi waphila ngaso leso sikhatsi. Ngisho nobe labanye bantfu lebebalapho kungenteka batsatsa ngekutsi lomfati wente intfo lokungakafaneli ayente, Jesu wabona kutsi abedzinga lusito. a Ngemusa watsi kuye: “Ndvodzakati, . . . sewuphilile ekuguleni kwakho.” Ngetulu kwekutsi angamhlazi  nobe angamtsetsisi, Jesu wabona kutsi lomfati abegula. Ngekwenta loko, Jesu wakhombisa kutsi abeluhlobo luni lwendvodza​—abeyindvodza leneluvelo.​—Makho 5:25-34.

Indlela emadvodza langamlingisa ngayo Jesu. Nangabe umfati wakho angativa kahle, mkhombise kakhulu kutsi uyamcabangela futsi umbeketelele. Yetama kubona tintfo ngendlela yena latibona ngayo futsi uyicondze indlela lenta ngayo. Nasi sibonelo: Ricardo utsi: “Nangibona kutsi umfati wami usheshe aphatseke kabi, ngetama kungasho tintfo letitawenta simo sibe sibi kakhulu.”

Jesu abekhulumisana nebalandzeli bakhe. Tinyenti tintfo Jesu labekhuluma ngato nebangani bakhe. Watsi: “Tonkhe tintfo lengitive kuBabe nginitjele tona.” (Johane 15:15) Kuliciniso kutsi ngaletinye tikhatsi Jesu abefuna kuba yedvwa kuze azindle futsi athantaze. Kodvwa etikhatsini letinyenti abebatjela bafundzi bakhe loko lokusekujuleni kwenhlitiyo yakhe. Ngebusuku bangaphambi kwekutsi abulawe njengesigelekece, wavele wabatjela kutsi ‘abecindzeteleke kakhulu.’ (Matewu 26:38) Ngisho nalapho benta tintfo lebetingamjabulisi, Jesu abengayekeli kukhuluma nebangani bakhe.​—Matewu 26:40, 41.

Indlela emadvodza langamlingisa ngayo Jesu. Tjela umfati wakho loko lokucabangako kanye nendlela lotiva ngayo. Umfati angase akhale ngekutsi indvodza yakhe iyakhuluma nayikanye nalabanye bantfu kodvwa ekhaya iyathula. Kodvwa-ke asewunake indlela Ana lativa ngayo nangabe indvodza yakhe imtfululela sifuba, utsi: “Ngivele ngibone kutsi ungitsandza mbamba futsi ngitiva ngisondzelene naye.”

Ungafuni kuvisa umfati wakho buhlungu ngekutsi ungasamkhulumisi. Lomunye umfati utsi: “Nangabe indvodza yami ingikwatele, bekuphela emalanga ingangikhulumisi. Beyingenta ngitive nginelicala futsi ngilahliwe.” Kodvwa-ke Edwin uyetama kulingisa sibonelo saJesu. Utsi: “Nangitfukutsele, angiphendvuli ngaleso sikhatsi, kodvwa ngetama kufuna sikhatsi lesikahle sekukhuluma.”

Joy locashunwe ekucaleni, ubone tingucuko endvodzeni yakhe kusukela yacala kutadisha liBhayibheli naBoFakazi BaJehova. Utsi: “Sewushintjile futsi wetama ngako konkhe lokusemandleni akhe kutsi alingise Jesu, ngekuba nelutsandvo.” Tigidzi tebantfu labashadene tiyazuza emfundvweni yeliBhayibheli lefanako. Uyafuna yini nawe kuzuza kulemfundvo? Ungacela lomunye waBoFakazi BaJehova kutsi akuchubele sifundvo seliBhayibheli mahhala.