Awuvumi yini kutsi nangabe bantfu banenkhohlakalo, nahulumende lowakhiwa ngibo ngeke uhlale ungabi nayo? Nangabe kunjalo, kusho kutsi hulumende lote inkhohlakalo ungaba khona kuphela nangabe ungeke wakhiwe bantfu. LiBhayibheli liyakhuluma ngahulumende lonjalo​—uMbuso waNkulunkulu, lokunguhulumende Jesu lafundzisa balandzeli bakhe kutsi bawuthantazele.​—Matewu 6:9, 10.

UMbuso waNkulunkulu unguhulumende mbamba lobusa usezulwini. Utawutsatsa sikhundla sabo bonkhe bohulumende bebantfu. (Tihlabelelo 2:8, 9; Sembulo 16:14; 19:19-21) Kucedvwa kwenkhohlakalo yabohulumende kungulesinye setibusiso letitawuletfwa nguloMbuso. Asewunake nankha emaphuzu lasitfupha lamayelana naloMbuso lacinisekisa loku.

INKINGA: Bohulumende bebantfu basekelwa takhamuti talelo live ngetimali, ngalokuvamile lemali itfolakala ngemitselo. Lemali ilinga letinye tisebenti tahulumende kutsi tebe, kantsi letinye taletisebenti tidizelwa bantfu labafuna kwehliselwa umtselo nobe kwehliselwa letinye timali lokufanele tibhadalwe kuhulumende. Loku kuba nemphumela lomubi kakhulu, ngobe hulumende ubese ukhuphula imitselo kuze avale letikhebesi letivelile, futsi loku kuphindze kwenyuse lizinga lenkhohlakalo. Esimeni lesinjalo, bantfu labetsembekile ngibo labatsintseka kakhulu.

LIKHAMBI: Ligunya leMbuso waNkulunkulu livela kuJehova, a Nkulunkulu Somandla. (Sembulo 11:15) LoMbuso  awudzingi kutsi ukweleke imitselo kuze wente imisebenti yawo. Esikhundleni saloko, ‘bukhulu bemandla’ aNkulunkulu kanye nekuphana kwakhe ngesandla lesivulekile kutawukwenta kutsi loMbuso ukhone kutinakekela kahle tonkhe tidzingo talabo labangephansi kwawo.​—Isaya 40:26; Tihlabelelo 145:16.

INKINGA: Ngekusho kwaSusan Rose-Ackerman, lokukhulunywe ngaye esihlokweni sekucala, imetamo yekucedza inkhohlakalo “kufanele icale kulabaphetse.” Bohulumende balahlekelwa kwetsenjwa nangabe betama kucedza inkhohlakalo emaphoyiseni nobe etisebentini letibuke kuphuma nekungena kwetimphahla eveni, kodvwa babe bayivumela kutsi ichubeke etisebentini letisetikhundleni letisetulu. Ngaphandle kwaloko, ngisho nembusi lowetsembekile naye unesono latalwa naso. LiBhayibheli litsi: “Kute nome munye umuntfu lolungile emhlabeni lowenta lokuhle kuphela, kubete lakonako.”​—Umshumayeli 7:20.

LIKHAMBI: Ngalokwehlukile kubantfu labanesono, Jesu Khristu lokhetfwe nguNkulunkulu kutsi abe nguMbusi waloMbuso ngeke kwenteke alingelwe kutsi ente lokubi. Jesu wakukhombisa loku ngekutsi angavumi kudizelwa ngayo “yonkhe imibuso yemhlaba kanye nebuhle bayo,” lobekuyintfo lenkhulu kunato tonkhe lokwake kwadizwa ngato. Jesu wetsenjiswa kutsi abetawutfola lemibuso ngekutsi ente sento sinye sekukhonta Develi, umbusi walelive. (Matthew 4:8-10; John 14:30) Ngisho nangesikhatsi Jesu ahlushwa nasatawufa, abetimisele kuchubeka acotfo ngobe akavumanga kunatsa liwayini lelalibhicwe nalokubabako lebelitawunciphisa buhlungu kodvwa limente angasakhoni kulawula imiva yakhe. (Matewu 27:34) Nyalo njengobe Nkulunkulu asamvusele ekuphileni kwasezulwini, Jesu sewukhombisile kutsi ukufanela kahle kubusa kuloMbuso.​—Filiphi 2:8-11.

INKINGA: Emave lamanyenti aba nelukhetfo ngetikhatsi letitsite, lokuyintfo bantfu labacabanga kutsi ibasita kutsi basuse tisebenti tahulumende letinenkhohlakalo. Kodvwa-ke liciniso likutsi nakusakhankaswa nobe sekukhetfwa, iba khona inkhohlakalo, ngisho nasemaveni lokutsiwa atfutfukile. Ngetimali letisetjentiselwa kukhankasa kanye naleminye imisebenti lehambisana nako, bantfu labanjingile bangabangela bantfu labasetikhundleni ngaleso sikhatsi kutsi bente tintfo ngendlela lefunwa ngibo, futsi loku bangachubeka bakwenta nakulabo labatawulandzela kuleto tikhundla.

John Paul Stevens, lobekalijaji leNkantolo Lephakeme yaseMelika wabhala kutsi loku lokwentiwa ngulabantfu labanjingile “akwenti nje kuphela kutsi Hulumende ente tintfo letingekho emtsetfweni nekutsi ente imisebenti lengekho ezingeni lelikahle, kodvwa kuphindze kwente nekutsi bantfu bangasametsembi loyo hulumende.” Akumangalisi-ke kutsi bantfu labanyenti emhlabeni banembono wekutsi emaphathi etepolitiki ngiwo lanenkhohlakalo lenkhulu kakhulu.

LIKHAMBI: EMbusweni waNkulunkulu kute litfuba lenkhohlakalo lebangelwa kukhankasa nobe lukhetfo, ngobe wona awushintji, futsi uyawuhlala ukhona.  (Danyela 7:13, 14) Njengobe uMbusi wawo akhetfwa nguNkulunkulu, loMbuso awukhetfwa bantfu futsi ngeke baze bawususe. Lokungashintji kwawo kwenta kutsi tintfo letentiwa nguloMbuso tihlale tibazuzisa bantfu labangephansi kwawo.

INKINGA: Ungase ucabange kutsi kubeka imitsetfo lemisha kungenta tintfo tibe ncono. Kodvwa-ke tati titfole kutsi esikhatsini lesinyenti kwengetwa kwemitsetfo kumane kuvule ematfuba lamanyenti enkhohlakalo. Ngetulu kwaloko, imitsetfo lesuke ihloselwe kutsi inciphise inkhohlakalo kuvame kubita kakhulu kuyenta kutsi isebente, kodvwa kuncane lekufezako.

LIKHAMBI: Imitsetfo lebekwa nguMbuso waNkulunkulu isezingeni lelisetulu kakhulu nayicatsaniswa neyabohulumende bebantfu. Nasi sibonelo: Kunekutsi akhiphe luhla loludze lwetintfo lokufanele tentiwe naleto lokungakafaneli tentiwe, Jesu wamane wakhuluma ngemtsetfo lobitwa ngekutsi nguMtsetfo Weligolide. Watsi: “Tonkhe tintfo lenifuna bantfu batente kini, nani tenteni kubo.” (Matewu 7:12) Intfo lebaluleke kakhulu kutsi imitsetfo yeMbuso waNkulunkulu ikhuluma kakhulu ngetento kanye nangaloko lokuholela kuto. Jesu watsi: “Kufanele utsandze makhelwane wakho njengobe utitsandza wena.” (Matewu 22:39) Nkulunkulu lokwati kufundza loko lokusenhlitiyweni angakhona kuciniseka kutsi lemitsetfo iyalandzelwa yini.​—1 Samuweli 16:7.

INKINGA: Bugovu kanye nekuticabangela ngito tintfo letibangela inkhohlakalo. Tisebenti tahulumende kanye netakhamuti tivame kuba nebugovu futsi titicabangele tona. Kulendzaba yekuwa kwesitolo lesikhulu eSeoul lokukhulunywe ngayo esihlokweni sekucala, tisebenti tahulumende tavuma kudizelwa tinkapani letakhako lebetati kutsi kudiza bekutawutishiphela kunekutsi tisebentise tintfo tekwakha letisezingeni lelifanele futsi tilandzele imitsetfo yekwakha.

Ngako-ke, kuze kucedvwe inkhohlakalo, bantfu kufanele bafundziswe indlela yekulwisana netinhloso letisekujuleni kwenhlitiyo letinjengebugovu kanye nekuticabangela. Nanobe kunjalo, bohulumende bebantfu bete sifiso sekuniketa bantfu imfundvo lenjalo futsi bete nelikhono lekukwenta loko.

 LIKHAMBI: UMbuso waNkulunkulu uyincoba layicala khona inkhohlakalo ngekufundzisa bantfu indlela yekulwisana netinhloso letimbi letiyibangelako. b Lemfundvo ibasita kutsi ‘bentiwe babe basha emandleni abo ekucabanga.’ (Efesu 4:23) Bafundza kutsi kufanele bayekele bugovu kanye nekuticabangela, esikhundleni saloko benetiseke futsi bacabangele labanye.​—Filiphi 2:4; 1 Thimothi 6:6.

INKINGA: Ngisho nobe baphila ngephansi kwetimo letikahle eveni futsi batfola imfundvo lesezingeni lelisetulu yendlela yekutiphatsa, labanye bantfu bavele bakhetse kungetsembeki nekukhohlakala. Tati tiyavuma kutsi loku ngiko lokwenta kutsi bohulumende bebantfu behluleke kucedza inkhohlakalo. Kuphela kwentfo labanelitsemba lekuyenta kwehlisa lizinga lenkhohlakalo kanye nemonakalo lewubangelako.

LIKHAMBI: Sivumelwane saMhlabuhlangene sekulwa nenkhohlakalo sitsi kuze kuliwe nenkhohlakalo, bohulumende kufanele bakhutsate bantfu kutsi “babe cotfo, betsembeke futsi batimisele.” Nanobe loku kuyintfo lenhle, uMbuso waNkulunkulu wona awugcini nje ngekukhutsata bantfu labangephansi kwawo kutsi bavete buntfu lobunjalo, kodvwa ulindzele kutsi vele babe njalo. LiBhayibheli litsi “bantfu lababukhali” kanye nalabo “labacala emanga” ngeke balidle lifa leMbuso waNkulunkulu.​—1 Khorinte 6:9-11; Sembulo 21:8.

Bantfu bangakhona kulandzela letimiso tekutiphatsa letisezingeni leliphakeme, njengobe kwenta emaKhristu ekucala. Nasi sibonelo: Ngesikhatsi umfundzi lokutsiwa nguSimoni etama kudizela baphostoli kuze atfole umoya longcwele, labaphostoli bala futsi batsi kuye: “Phendvuka kulobubi bakho.” Simoni watsi nakabona ingoti yalesifiso sakhe lesibi, wacela labaphostoli kutsi bamthantazele kuze asincobe.​—Imisebenti 8:18-24.

Ngisho nobe unabuphi buve, nawe unalo litfuba lekuba ngephansi kweMbuso waNkulunkulu. (Imisebenti 10:34, 35) Luhlelo lwemfundvo leniketwa nguloMbuso lolutfolakala emhlabeni wonkhe, lutakusita ubone kutsi ungakwenta kanjani loku. BoFakazi BaJehova batakujabulela kukukhombisa kutsi basichuba njani sifundvo seliBhayibheli sasekhaya, lesingatsatsa ngisho nemizuzu lelishumi kuphela ngeliviki. Kuletinye tetintfo longatifundza, utawufundza ‘ngetindzaba letimnandzi teMbuso waNkulunkulu,’ kanye nendlela loMbuso lotawucedza ngayo inkhohlakalo yabohulumende. (Lukha 4:43) Sikukhutsata kutsi utsintsane naBoFakazi labasendzaweni yangakini nobe ungene ku-Web site yetfu letsi jw.org.