“NGONENI? Nkulunkulu uyivumeleleni intfo lenje kutsi yenteke kimi?” Sidnei waseBrazil bekaneminyaka lengu-24 ngesikhatsi atibuta lombuto. Watfola ingoti ngesikhatsi adlala umdlalo wema-waterslide futsi wakhubateka kusukela lapho.

Kuhlupheka lokubangwa kutfola ingoti, kugula, kufelwa sihlobo, tehlakalo temvelo kanye netimphi kungenta bantfu batfukutselele Nkulunkulu. Kutfukutselela Nkulunkulu akucali lamuhla. Jobe lokukhulunywa ngaye eBhayibhelini naye wehlelwa tinhlekelele letinyenti. Bekangati kutsi tinkinga takhe tibangwa ngubani, ngako watfukutselela Nkulunkulu watsi: “Ngikhala kuwe, Nkulunkulu wami! Kodvwa wena awungiphendvuli. Ngiyasukuma ngime ngetinyawo, kodvwa wena umane ungibuke nje. Sewujike waba nelulaka kimi, ngemandla esandla sakho uyangihlasela.”​—Jobe 30:20, 21.

Jobe bekangayati imbangela yetinkinga takhe nekutsi kubangelwa yini tivelele yena. LiBhayibheli liyasichazela kutsi kubangelwa yini kuhlupheka nekutsi singenta njani nangabe sinetinkinga.

Nalikhuluma ngaNkulunkulu liBhayibheli litsi: “Imisebenti yakhe iphelele; yebo, netindlela takhe tonkhe tilungile. Nkulunkulu lowetsembekile longakwenti lokubi, ucotfo akakhetsi muntfu.” (Dutheronomi 32:4) Pho Nkulunkulu “lowetsembekile” longakwenti lokubi angababangela njani batfu tinhlupheko?

Naku lokushiwo liBhayibheli: “Nangabe umuntfu alingwa, angabosho kutsi: ‘Ngilingwa nguNkulunkulu.’ Ngobe Nkulunkulu ngeke alingwe ngalokubi kantsi naye akalingi muntfu.” (Jakobe 1:13) LiBhayibheli liyasitjela kutsi Nkulunkulu nakadala bantfu bekahlose kutsi baphile kahle. Ngesikhatsi adala bantfu bekucala, bo-Adamu na-Eva, wabakhela likhaya lelihle lebelinato tonkhe tintfo lebebatidzinga futsi wabaniketa nemsebenti lobewubajabulisa. Nkulunkulu watsi kubo: “Talanani, nandze, nigcwalise umhlaba, niwuncobe.” Tintfo betibahambela kahle bo-Adamu na-Eva bekute lebebangamsola ngako Nkulunkulu.​—Genesisi 1:28.

Kodvwa lamuhla kuphila sekumatima. Kusukela kona bo-Adamu na-Eva kuphila akusajabulisi. Aliciniso emavi latsi: “Indalo yonkhe ichubeka ilila kanye kanye futsi isetinhlungwini kanye kanye kuze kube ngunyalo.” (Roma 8:22) Konakalaphi?

Kuze sicondze kutsi kuhlupheka kwabangelwa yini, kufanele sati loko lokwenteka ensimini yase-Edeni. Sathane wayenga Adamu na-Eva kutsi bangalaleli umyalo waNkulukulu wekungadli “sitselo sesihlahla sekwati lokulungile nalokungakalungi.” Sathane watsi ku-Eva angeke bafe nabadla lesitselo, lokusho kutsi Sathane abetsi Nkulunkulu unemanga. Sathane waphindze wasola Nkulunkulu ngekutsi ugodlela bantfu lilungelo lekutikhetsela. (Genesisi 2:17; 3:1-6) Bekufana nekutsi Sathane utsi bantfu bangatiphilela ngaphandle kwekubuswa nguNkulunkulu. Loku kusenta kutsi sitibute, nguNkulunkulu yini vele lokufanele asibuse?

Sathane waphindze wasola tisusa tebantfu tekukhonta Nkulunkulu. Wakhuluma kabi ngaJobe watsi: “Awukambiyeli ngelutsango yini Jobe kanye nemndeni wakhe nako konkhe lanako? . . . Kodvwa ase welulele sandla sakho kuko konkhe lanako, ubone kutsi angeke yini akwetfuke.” (Jobe 1:10, 11) Lamavi lashiwo nguSathane kuJobe bekangatsintsi yena kuphela, kodvwa abatsintsa bonkhe bantfu.

Singabona ngani kutsi ngubani lokufanele abuse emkhatsini waNkulunkulu naSathane? Nkulukulu uhlakaniphile, ngako unaso sisombululo salenkinga. (Roma 11:33) Uvumele bantfu kutsi batibuse kwesikhashana, ngako imiphumela letawuba khona  ngiyo letasikhombisa kutsi ngubani lokufanele abuse.

Tinkinga letikhona emhlabeni lamuhla tibufakazi bekutsi bantfu behlulekile kutibusa. Kute ngisho munye hulumende walamhlabeni lokhonile kuletsa kuthula, injabulo nekucedza bugebengu. Kunaloko kubonakala ngatsi siya eweni. Loku kukhombisa kuba liciniso kwemavi laseBhayibhelini latsi: “Akusiko kwemuntfu kutsi aticondzisele yena tinyatselo takhe.” (Jeremiya 10:23) NguMbuso waNkulunkulu kuphela longenta kutsi bantfu baphumelele nalongaletsa kuthula, nenjabulo, ngobe vele nguloko lebekakuhlosile.​—Isaya 45:18.

Nkulunkulu utawugucula kanjani lomhlaba kutsi ube njengobe bekahlosile? Jesu wafundzisa balandzeli bakhe kutsi babothantaza batsi: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Matewu 6:10) Ngesikhatsi lesifanele uMbuso waNkulunkulu utawucedza tonkhe tintfo letibangela kuhlupheka. (Danyela 2:44) Buphuya, tifo kanye nekufa kutawuphela. Nalikhuluma ngalabaphuyile liBhayibheli litsi: Nkulunkulu ‘utamkhulula lombitako, naloweswele, nalomphofu, nalote umsiti.’ (Tihlabelelo 72:12-14) LiBhayibheli litsi: “Kute loyakutsi ngiyagula.” (Isaya 33:24) Nakakhuluma ngalabafiile Jesu watsi: “Sikhatsi siyeta lapho bonkhe labasemathuneni batawuliva livi layo futsi baphume.” (Johane 5:28, 29) Akukujabulisi yini kuva loko?

Ngemuva kweminyaka lengu-17 Sidnei atfole lengoti, watsi: “Angizange ngimsole Jehova ngalengoti lengayitfola, kodvwa ekucaleni bengimtfukutselele. Ngihle ngiva buhlungu ngize ngikhale nangicabanga kutsi sengakhubateka. Kufundza liBhayibheli kungisitile ngabona kutsi lengoti beyingakabangwa nguNkulunkulu. LiBhayibheli litsi: ‘Sikhatsi nematfuba kubehlela bonkhe.’ Kuthantaza kuJehova nekufundza liBhayibheli kungente ngaba nebuhlobo lobuhle naye, kuphindze kwangisita kutsi ngihlale ngijabulile.”​—Umshumayeli 9:11; Tihlabelelo 145:18; 2 Khorinte 4:8, 9, 16.

Kuhlale sikhumbula sizatfu lesente Jehova wavumela kuhlupheka nekutsi utasilungisa kanjani lesimo, kutasisita kutsi singamtfukutseleli Nkulunkulu. Siyati kutsi Nkulunkulu “ubanika umvuzo labo labamfuna ngekutimisela.” Bonkhe bantfu labakholwa kuJehova naseNdvodzaneni yakhe angeke badvumateke.​—Hebheru 11:6; Roma 10:11.