SIHLOKO LESINGUMGOGODLA | BABOBANI BOFAKAZI BAJEHOVA?
Yini Labayikholelwako BoFakazi BaJehova?
BoFakazi BaJehova bakholelwa kutsi: “Yonkhe imiBhalo iphefumulelwe nguNkulunkulu futsi ilusito.” (2 Thimothi 3:16) Sikholelwa kutsi liBhayibheli kuphela lelingasitjela liciniso ngeMdali wetfu kanye nendlela lafuna siphile ngayo.
LiBhayibheli litsi: “Shangatsi bangati kutsi nguwe wedvwa lolibito lakhe linguSimakadze [Jehova NW], nguwe Losetikwako Konkhe, lophakeme abuse umhlaba wonkhe.” (Tihlabelelo 83:18) Ngako-ke sikhonta Jehova kuphela futsi sitimisele kutjela labanye ngeligama lakhe njengoba siBoFakazi bakhe.—Isaya 43:10-12.
Njengobe singemaKhristu sikholelwa kutsi Jesu ‘uyiNdvodzana yaNkulunkulu’ a leyeta emhlabeni futsi yaba nguMesiya. (Johane 1:34, 41; 4:25, 26) Nekutsi wafa futsi wavuselwa ezulwini. (1 Khorinte 15:3, 4) Ngemuva kwaloko waba yiNkosi yeMbuso waNkulunkulu. (Sembulo 11:15) LoMbuso unguhulumende waNkulunkulu futsi ngiwo lotawulungisa lomhlaba ube yindzawo lekahle. (Danyela 2:44) LiBhayibheli litsi: “Labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:11, 29.
“Nabafundza liBhayibheli kuba shengatsi Nkulunkulu ukhuluma nabo. Nabanetinkinga bafundza liBhayibheli bese benta loko lelikushoko kute baticatulule. . . . Kubo liBhayibheli lisasebenta nalamuhla.”—Umfundisi wasekatolika Benjamin Cherayath, Münsterländische Volkszeitung newspaper Germany
BoFakazi BaJehova bakholelwa kutsi kuphila ngetimiso teliBhayibheli kungabasita bantfu ngisho nalamuhla. (Isaya 48:17, 18) Kungako-ke siphila ngetimiso teliBhayibheli. Nasi sibonelo: LiBhayibheli liyasecwayisa ngemikhuba lengcolisa tingcondvo tetfu nemitimba yetfu, kungako BoFakazi bangabhemi futsi bangatisebentisi tidzakamiva letiyingoti. (2 Khorinte 7:1) Siyayigwema imikhuba lelahlwa liBhayibheli njengekudzakwa, kweba kanye nekutiphatsa kabi ngekwelicansi.—1 Khorinte 6:9-11.
a LiBhayibheli libita Jesu ngekutsi ‘uyiNdvodzana yaNkulunkulu lekuphela kwayo’ ngobe yena wadalwa nguJehova matfupha.—Johane 3:18; Kholose 1:13-15.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
BoFakazi BaJehova Bayakholelwa Yini Kutsi Inkholo Yabo Yeliciniso?
Jesu watsi tinyenti yini tindlela letiholela ekusindzisweni?
TIMFUNDZISO TELIBHAYIBHELI LETIBALULEKILE
Nkulunkulu Unalo Yini Libito?
Nkulunkulu uneticu letinyenti letifaka ekhatsi lesitsi Somandla, uMdali nalesitsi Nkhosi. Kodvwa libito laNkulunkulu lisetjentiswe tikhatsi letingaba ngu-7 000 eBhayibhelini.
