LiPhasika laJesu lekugcina belitawuba ngulelibalulekile. Ngesizatfu sekutsi bekatawufa masinyane, wahlela kudla liPhasika nebaphostoli bakhe futsi wacalisa umkhosi lomusha lobewutawugujwa minyaka yonkhe, lobitwa ngekutsi Sidlo SeNkhosi Sakusihlwa. Watfuma boPhetro naJohane kutsi bayolungisa likamelo. (Luk 22:7-13; buka sitfombe lesisekucaleni.) Loku kusikhumbuta ngesidzingo sekulungiselela Sikhumbuto lesitawuba khona ngaMarch 27. Ngako emabandla kungenteka sekavele awentile emalungiselelo esikhulumi, tifanekiselo kanye nalokunye. Nobe kunjalo, yini ngamunye wetfu lokufanele ayente kuze alungele Sikhumbuto?

Lungiselela inhlitiyo yakho. Fundza futsi uzindle ngemavesi eliBhayibheli lalungiselelwe kutsi afundvwe ngemalanga lasondzelene nelilanga leSikhumbuto. Luhlelo lwekufundza lungatfolakala kubhukwana lotsi Kuhlolisisa ImiBhalo Malanga Onkhe. Sandzisanchazo B12 eHumushweni Lemhlaba Lomusha LemiBhalo Lengcwele lelibuketiwe sineluhla lolunemininingwane leyengetiwe. (Buka Nencwajana Yekubhalela Emihlanganweni ya-April 2020.) Imindeni ingatfola imininingwane lengacoca ngayo ekukhonteni kwemndeni lemayelana nekubaluleka kwenhlawulo ngekutsi ihlole i-Watch Tower Publications Index nobe Lithulusi Lekucwaninga LaBoFakazi BaJehova.

Mema labanye kutsi babe khona. Hlanganyela ngalokugcwele emkhankasweni wekusakata timemo. Cabanga ngalabo longabamema, labafaka ekhatsi bantfu loke wacoca nabo, bantfu loke wabachubela Sifundvo seliBhayibheli, lobetayele kanye netihlobo. Labadzala kufanele bente siciniseko sekumema labapholile. Khumbula kutsi nangabe umuntfu lotsite angahlali endzaweni yangakini, ungatfola sikhatsi kanye nendzawo lasitawubanjelwa khona Sikhumbuto endzaweni lahlala kuyo ngekutsi ungene ku-jw.org bese uchafata “MAYELANA NATSI” bese ngemuva kwaloko uchafata lakutsi khona “Sikhumbuto.”

Yini lenye lesingayenta kute silungele Sikhumbuto?