Umngani uchazwa njengemuntfu “lonamatsela kulomunye ngelutsandvo nangenhlonipho.” Nasi sibonelo, Jonathani naDavide baba bangani labakhulu ngemuva kwekutsi Davide abulele Goliyathi. (1Sa 18:1) Ngamunye wabo waveta buntfu lobamenta watsandzeka kulolomunye. Ngako, bungani lobucinile busekelwe ekumatini kahle lona lomunye umuntfu. Ngalokuvamile kwati umuntfu kutsatsa sikhatsi kanye nemetamo. Nanobe kunjalo, kulula ngebantfu kutsi babe bangani kutekuchumana. Kulula ngebantfu kutsi batifihle kutsi babobani kuletinhlelo tekuchumana ngobe bayakhona kuhlela tintfo labangatisho netintfo labangafuni labanye bantfu batibone. Ngako, kukahle kucabangisisa kutsi kungaba luhlobo luni lwebantfu lesingalwenta bangani betfu etinhlelweni tekuchumana. Ungesabi kungatemukeli ticelo tebantfu longabati labafuna kuba bangani bakho, ngoba nje wesaba kubavisa buhlungu. Ngenca yebungoti lobungaba khona, labanye bakhetse kungatisebentisi sanhlobo tinhlelo tekuchumana. Nobe kunjalo, nangabe ukhetsa kutisebentisa tinhlelo tekuchumana, yini lokufanele ucabange ngayo?

BUKELANI I-VIDEO LETSI HLAKANIPHA NAWUSEBENTISA TEKUCHUMANA, BESE NIPHENDVULA LEMIBUTO LELANDZELAKO:

• Yini lokufanele ucabange ngayo ngaphambi kwekutsi ufake titfombe nobe ubhale lokutsite?

• Kungani kufanele ubakhetse ngekucophelela bangani bakho etinhlelweni tekuchumana?

• Kungani kufanele utibekele sikhatsi lotasicitsa etinhlelweni tekuchumana?—Efe 5:15, 16