Incwadzi Yekucala YemaKhosi 4:1-34
4 INkhosi Solomoni yabusa kulo lonkhe live laka-Israyeli.+
2 Tindvuna* tayo bekungunati: Azariya indvodzana yaSadoki+ bekangumphristi;
3 Bo-Elihorefi na-Ahiya emadvodzana aShisha bebabomabhalane;+ Jehoshafati+ indvodzana ya-Ahiludi bekangumgcini mabhuku;
4 Bhenaya+ indvodzana yaJehoyada bekayindvuna yelibutfo lemphi; boSadoki na-Abiyatha+ bebabaphristi;
5 Azariya indvodzana yaNathani+ bekaphetse tindvuna; Zabudi indvodzana yaNathani bekangumphristi nemngani wenkhosi;+
6 Ahishari bekaphetse sigodlo; futsi Adoniramu+ indvodzana ya-Abda bekaphetse labo lebekufanele basebentele inkhosi.+
7 Solomoni bekanetindvuna letingu-12 lebetiphetse ka-Israyeli lebetiletsa kudla enkhosini nakubantfu labebahlala nayo. Ngayinye yato bekulindzeleke kutsi yente lomsebenti inyanga yinye emnyakeni.+
8 Nankha emagama ato: Indvodzana yaHure beyiphetse sifundza lesinetintsaba saka-Efrayimu;
9 indvodzana yaDekeri beyiphetse eMakhasi, eShalbimu,+ eBhethi-shemeshi nase-Eloni-bhethi-hanani;
10 indvodzana yaHesedi beyiphetse e-Arubothi (beyiphetse naseSokho nakuyo yonkhe indzawo yaseHeferi);
11 indvodzana ya-Abinadabi beyiphetse tintsaba taseDori (Thafathi, indvodzakati yaSolomoni, waba ngumfati wayo);
12 Bhana indvodzana ya-Ahiludi bekaphetse eThanaki, eMegido+ nakulo lonkhe laseBhethi-sheyani+ leseceleni kweSarethani ngentansi kweJezreyeli, kusukela eBhethi-sheyani kuya e-Abela-mehola nasesigodzini saseJokmeyamu;+
13 indvodzana yaGeberi beyiphetse eRamothi-gileyadi+ (beyiphetse netindzawo letinemathende letiseGileyadi+ taJayire+ indvodzana yaManase; beyiphetse nesifundza sase-Agobhu+ lesiseBhashani.+ Bekungemadolobha langu-60 lamakhulu labiyelwe ngelubondza netinsika telitfusi);
14 Ahinadabi indvodzana ya-Ido, bekaphetse eMahanayimu;+
15 Ahimasi bekaphetse kaNaftali (watsatsa Bhasemathi, lenye indvodzakati yaSolomoni, waba ngumfati wakhe);
16 Bhana indvodzana yaHushayi, bekaphetse ka-Asheri naseBheyalothi;
17 Jehoshafati indvodzana yaPharuwa bekaphetse ka-Isakhari;
18 Shimeyi+ indvodzana ya-Ela bekaphetse kaBhenjamini;+
19 Geberi indvodzana ya-Uri bekaphetse kaGileyadi,+ endzaweni yaSihoni+ inkhosi yema-Amori kanye nendzawo ya-Ogi+ inkhosi yaseBhashani. Bekuphindze kube nayinye indvuna lebeyiphetse tonkhe letindvuna lebetikhona eveni.
20 EmaJuda nema-Israyeli bekamanyenti kakhulu ngangesihlabatsi saselwandle;+ bekadla, anatsa aphindze ajabula.+
21 Solomoni wabusa kuyo yonkhe imibuso, kusukela eMfuleni*+ kuze kuyofika eveni lemaFilisti nasemnceleni waseGibhithe. Lemibuso beyiletsa tipho* kuSolomoni futsi imsebentela onkhe emalanga ekuphila kwakhe.+
22 Kudla kwaSolomoni kwelilanga ngalinye bekutikali letingema-cor* langu-30 tafulaha locolisakele naletingu-60 tafulaha,
23 netinkhomo letingu-10 letikhuluphale, letingu-20 letidliswa emadlelweni, netimvu letingu-100, netinyamatane, netinswephe, nemancala, kanye netinyoni letikhuluphele.
24 Bekalawula yonkhe intfo leyenteka ngalana kweMfula,*+ kusukela eThifsa kuya eGaza,+ alawula nawo onkhe emakhosi langalana kweMfula; futsi bekanekuthula nato tonkhe tifundza lebetibomakhelwane.+
25 EmaJuda nema-Israyeli bekaphephile, nguloyo naloyo atihlalele ngephansi kwesihlahla sakhe semakhiwa nangephansi kwesihlahla sakhe semagilebisi kusukela kaDani kuya eBherisheba, onkhe emalanga aSolomoni.
26 Solomoni abenetindlwana* temahhashi letingu-4 000* ladvonsa tinkalishi nalamanye emahhashi langu-12 000.*+
27 Letindvuna betiniketa iNkhosi Solomoni kudla kanye nabo bonkhe labebadla etafuleni layo. Ngayinye yato bekufanele yente njalo inyanga yonkhe futsi icinisekise kutsi kute lokushodako.+
28 Betiletsa nebhali kanye netjani bemahhashi nobe ngabe ngukuphi lapho bekudzingeka khona kute kudle emahhashi etincola kanye nalalamanye emahhashi. Ngayinye yato bekufanele iletse lebekulindzelekile kuyo.
29 Nkulunkulu wanika Solomoni kuhlakanipha, nekucondza lokukhulu kanye nenhlitiyo lenekucondza lokubanti njengesihlabatsi saselugwini lwelwandle.+
30 Kuhlakanipha kwaSolomoni bekwendlula konkhe kuhlakanipha kwebantfu baseMphumalanga nako konkhe kuhlakanipha kwaseGibhithe.+
31 Bekahlakaniphe kwendlula wonkhe umuntfu, ahlakaniphe kwendlula Ethani+ umZera naHemani,+ naKhalkoli+ naDada emadvodzana aMaholi; wadvuma kuto tonkhe tive lebetibomakhelwane.+
32 Wacamba* taga letingu-3 000+ futsi tingoma+ takhe betingu-1 005.
33 Bekakhuluma ngetihlahla, kusukela kumsedari waseLebanoni kuya kumhisophu*+ lomila elubondzeni; bekakhuluma ngetilwane,+ ngetinyoni*+ nangetilwane letihumako*+ kanye nangetinhlanti.
34 Bantfu lebebasuka kuto tonkhe tive beta batokuva lokuhlakanipha kwaSolomoni. Kweta nemakhosi lebekasuka emhlabeni wonkhe lebekevile ngekuhlakanipha kwakhe.+
Imibhalo lengentansi
^ Nobe “Tikhulu.”
^ Nobe “tetfulo.”
^ Lokusho, iYufrathe.
^ Li-cor belilingana nemalitha langu-220. Fundza Sandzisanchazo B14.
^ Lokusho, enshonalanga yeYufrathe.
^ Nobe “titebeli.”
^ Lesibalo sitfolakala emibhalweni yakadzeni nasemibhalweni lefana nalona. Leminye imibhalo yakadzeni itsi betingu-40 000.
^ Nobe “bagibeli bemahhashi.”
^ Nobe “Washo.”
^ Fundza Tinchazelo Temagama.
^ Nobe “tilwane letindizako.”
^ Kungenteka tifaka ekhatsi letihamba ngesisu netilokatane.
