Incwadzi Yekucala YemaKhosi 7:1-51
7 Solomoni kwamtsatsa iminyaka lengu-13 kwakha indlu* yakhe,+ ize iphele.+
2 Waphindze wakha Indlu Yelihlatsi LaseLebanoni+ lengemamitha langetulu kwalangu-44* budze, emamitha langetulu kwalangu-22* bubanti, nalangetulu kwalangu-13* kuphakama; beyakhiwe etikwemalayini lamane etinsika temsedari futsi bekunetingodvo temsedari+ etikwaletinsika.
3 Yakhiwa etikwaletinsika temsedari; letingodvo temsedari tafaswa ngetinsimbi tekufasa; setitonkhe letinsika betingu-45, elayinini ngalinye betingu-15.
4 Bekunemalayini lamatsatfu emafasitelo lanemafulemu, futsi lifasitelo ngalinye belibukene nalelinye, kuwo omatsatfu lamalayini.
5 Yonkhe iminyango beyinemafulemu latikwele,* njengobe beyinjalo incenye lengembili yemafasitelo lebekabukene kulamalayini lamatsatfu.
6 Wakha neliHholwa* leTinsika lebelingemamitha langetulu kwalangu-22* budze kanye nalangetulu kwalangu-13* bubanti, futsi bekunelivulandi lelinetinsika ngembikwalo kanye nelivulandi lelincane.
7 Waphindze wakha neliHholwa* Lesihlalo Sebukhosi+ lapho bekatakwehlulela+ khona, lokuliHholwa leKwehlulela, futsi balifaka umsedari kusukela esiyilweni kuya emakabheni.
8 Indlu* lebekatawuhlala kuyo, lebeyikulelinye libala,+ beyingemuva kweliHholwa futsi beyakhiwe ngelizinga lelisetulu kufanana naleti letinye. Waphindze wakha indlu lebeyifana naleliHholwa, wayakhela indvodzakati yaFaro, leyo Solomoni lebekayitsetse kutsi ibe ngumkakhe.+
9 Konkhe loku bekwakhiwe ngematje+ elikhetselo lalungiswe kahle ngetikali tawo letifanele, bekajutjwe ngemasaha ematje ngekhatsi nangephandle, kusukela esisekelweni sayo kuyofika eluphahleni, nangephandle kuze kuyofika ebaleni lelikhulu.+
10 Lesisekelo sakhiwa ngematje lamakhulu kakhulu newelikhetselo; lamanye awo bekangemamitha langetulu kwalamane* budze, kantsi lamanye bekangaba ngemamitha langetulu kwalamatsatfu* budze.
11 Ngetulu kwawo, bekunematje elikhetselo lebekajutjwe kusetjentiswa sikali sawo lesifanele futsi kwasetjentiswa nemsedari.
12 Libala lelikhulu belitungeletwe ngemalayini lamatsatfu ematje lajutjwe kahle kanye nelilayini letingodvo temsedari, lifana nelibala lelingekhatsi+ lendlu yaJehova kanye nelivulandi layo.+
13 INkhosi Solomoni yatfumela kutsi kulandvwe Hiramu+ eThire.
14 Bekayindvodzana yemfelokati wesive sakaNaftali, futsi babe wakhe bekawaseThire asebenta ngelitfusi;+ Hiramu bekanelikhono nelwati lolubanti,+ futsi anesikhatsi lesidze asebenta ngalo lonkhe luhlobo lwetintfo telitfusi. Ngako weta eNkhosini Solomoni wayentela wonkhe umsebenti wayo.
15 Wenta tinsika letimbili telitfusi;+ ngayinye beyingemamitha langaba ngu-8* budze, bukhulu bensika ngayinye bebungangentsambo yekukala lengemamitha langaba sihlanu.*+
16 Waphindze wakhela tingcongwane letimbili telitfusi etikwaletinsika. Lenye ingcongwane beyingetulu kwemamitha lamabili* budze, nalelenye ingetulu kwemamitha lamabili* budze.
17 Letingcongwane lebetingetulu kwensika ngayinye betinemanethi labekahlotjiswe ngetinketane;+ letinketane betingu-7 kulenye ingcongwane, tingu-7 nakulelenye.
18 Waphindze wakha emalayini lamabili emahananandza* latungeleta lamanethi lakuletingcongwane lebetisetikwetinsika; loku wakwenta kuto totimbili letingcongwane.
19 Letingcongwane lebetisetikwetinsika kulelivulandi betimise kwetimbali tesiganga futsi beticishe tibe ngemamitha lamabili budze.
20 Letingcongwane betingetulu kwaletinsika letimbili, ngetudlwana nje kwalencenye leyindingilizi leseceleni kwalamanetha; bekunemahananandza langu-200 lentiwe aba ngemalayini, atungeleta ingcongwane ngayinye.+
21 Wamisa tinsika telivulandi lelithempeli.*+ Wamisa insika yangesekudla* futsi wayibita ngekutsi yiJakhini,* wamisa neyangesencele,* yona wayibita ngekutsi yiBhowazi.*+
22 Incenye lengetulu yaletinsika beyimise kwetimbali tesiganga. Ngako wacedvwa umsebenti wetinsika.
23 Wabese wakha Lwandle* loluyindingilizi ngelitfusi lelincibilikisiwe.+ Belungetulu kwemamitha lamane* kusukela kulenye incenye kuya kulenye futsi belungemamitha langetulu kwalamabili* kuphakama. Nalukalwa lutungeletwa, loLwandle belulingana nentsambo lengemamitha langetulu kwalangu-13.*+
24 Bekunemihlobiso lefana netitselo letiyindingilizi+ ngephansi kwemlomo walo, ilutungeletile. Ebangeni ngalinye lelingaba yihhafu yemitha kutungeleta loLwandle, bekunemihlobiso lengu-10. Yayingemalayini lamabili, futsi yaphuma kanye nalolwandle nalwakhiwa.
25 Belubekwe etikwetinkunzi letingu-12,+ letintsatfu betibuke enyakatfo, letintsatfu tibuke enshonalanga, letintsatfu tibuke eningizimu kantsi letintsatfu tibuke emphumalanga; loLwandle belusetikwato, lingemuva laletinkunzi belibheke emkhatsini walo.
26 LoLwandle belucatsa ngangemphama* futsi umlomo walo bewakhiwe waba njengemlomo wendzebe, ufanana nembali yesiganga. Belungaphatsa emalitha langu-44 000* emanti.
27 Wabese wakha tincola*+ letingu-10 telitfusi. Incola ngayinye beyicishe ibe ngemamitha lamabili* budze, nalacishe abe mabili* bubanti, nangetulu kwemitha kuphakama.
28 Nayi indlela lokwakhiwa ngayo letincola: Betinemaphanela emaceleni, futsi lamaphanela bekasemkhatsini wemafulemu.
29 Emaphaneleni lasemaceleni, emkhatsini walamafulemu, bekunemifanekiso yemabhubesi,+ yetinkunzi neyemakherubhi+ futsi lemifanekiso beyikhona nakulamafulemu. Ngetulu nangaphansi kwalamabhubesi netinkunzi, bekulenga imihlobiso.
30 Incola ngayinye beyinemasondvo elitfusi lamane nemigcala yelitfusi lewahlanganisako, futsi tinsimbi letine lebetisemakoneni betisimisa letincola. Ngaphansi kwelibhavu lencola, bekunetintfo tekusimisa letinemihlobiso emaceleni, encoleni ngayinye.
31 Umlomo wayo bewungekhatsi kwalencenye lengetulu kulelibhavu, budze bawo bebucishe bube yihhafu* yemitha; futsi bewuyindingilizi. Lomlomo bewentelwe kutsi kuhlale lelibhavu futsi bewungetulu kwehhafu yemitha* budze. Kulomlomo bekunemihlobiso ledvwetjiwe. Emaphanela lasemaceleni alencola bekasikwele, angasiyo indingilizi.
32 Lamasondvo lamane abengephansi kwalamaphanela lasemaceleni futsi bekunetinsimbi emakoneni letisimisa lamasondvo alencola, betihlanganiswe nalencola futsi lisondvo ngalinye belingetulu kwehhafu* yemitha budze.
33 Emasondvo ato bekafana nemasondvo etinkalishi temahhashi. Imigcala lesimisa lamasondvo, emarimu, tipoko netinkhaba temasondvo, konkhe bekwentiwe ngelitfusi lelincibilikisiwe.
34 Bekunetinsimbi letine emakoneni encola ngayinye; insimbi ngayinye beyincibilikiswe yaba yincenye* yalencola.
35 Ngetulu kwalencola, emlonyeni walelibhavu, bekunelibhande leliyindingilizi lebelingephansana kwekota* yemitha budze futsi belinemafulema nemaphanela lentiwe ngelitfusi lelincibilikisiwe futsi lelibhande belihlangene nalencola.
36 Kulamafulema alo nakulamaphanela wadvweba emakherubhi, nemabhubesi kanye netihlahla telusundvu nobe ngabe ngukuphi lapho bekunesikhala khona, wase ufaka imihlobiso leyindingilizi kulo lonkhe lelibhande.+
37 Watakha kanjalo-ke letincola+ letingu-10; tonkhe betifanana+ ngendlela letakhiwe ngayo ngelitfusi lelincibilikisiwe, futsi betilingana tiphindze time ngekufana.
38 Wakha emabhavu langu-10 elitfusi;+ ngalinye lalingafaka emalitha langu-880* emanti. Libhavu ngalinye belingemamitha lacishe abe mabili* bukhulu. Incola ngayinye kuleti letingu-10, beyinelibhavu layo.
39 Wabese ubeka tincola letisihlanu ngesekudla salendlu kanye naletisihlanu ngesencele sayo futsi wabeka Lwandle ngesekudla salendlu nawuya eningizimu lengasemphumalanga.+
40 Hiramu+ waphindze wakha lamanye emabhavu, nemafosholo+ kanye netindishi.+
Ngako Hiramu wawucedza wonkhe umsebenti lawentela iNkhosi Solomoni endlini yaJehova:+
41 Tinsika letimbili+ kanye netingcongwane letimise kwetindishi lebetingetulu kwaletinsika letimbili; emanethi lamabili+ ekuvala letingcongwane letimbili letimise kwetindishi lebetingetulu kwaletinsika;
42 emahananandza*+ langu-400 alamanethi lamabili, emalayini lamabili alamahananandza enethini ngalinye kuze avale letingcongwane letimbili letimise kwendishi lebetingetulu kwaletinsika letimbili;
43 tincola letingu-10+ nemabhavu langu-10+ lebekakuletincola;
44 Lwandle+ kanye netinkunzi letingu-12 lebetingephansi kwalo;
45 tikotela, emafosholo, tindishi kanye nato tonkhe titja tendlu yaJehova, leto Hiramu latenta ngelitfusi lelicwebetelako atentela iNkhosi Solomoni.
46 Inkhosi yentelwa tonkhe letintfo ngemafolomu elubumba esifundzeni saseJordane emkhatsini weSukhothi neSarethani.
47 Tonkhe letintfo akazange atikale Solomoni ngobe betitinyenti kakhulu. Lelitfusi belilinyenti kakhulu kangangekutsi belingakaleki.+
48 Solomoni wenta tonkhe letintfo, watentela indlu yaJehova: li-al’thare+ leligolide; litafula leligolide+ lapho bekubekwa khona sinkhwa lesinikelwe kuNkulunkulu;
49 tintsi tetibane+ letentiwe ngeligolide lelicwengisisiwe, letisihlanu ngesekudla naletisihlanu ngesencele ngembikwelikamelo lelingekhatsi; netimbali,+ tibane netindlawu teligolide;+
50 emabhavu, tintfo tekucisha umlilo,+ tindishi, tindzebe,+ titja tekufaka emalahle,+ konkhe bekwakhiwe ngeligolide lelicwengisisiwe; kanye netintfo tekukhaceka tivalo telikamelo lelingekhatsi,+ lokuyiNgcwelengcwele, kanye netintfo tekukhaceka tivalo telithempeli,+ konkhe bekwentiwe ngeligolide.
51 Ngako iNkhosi Solomoni yawucedza wonkhe umsebenti endlini yaJehova lebekufanele iwente. Solomoni wabese ungenisa letintfo lebetingcweliswe+ ngubabe wakhe Davide, wafaka nelisiliva, ligolide naletinye tintfo lapho bekuhlala khona umcebo endlini yaJehova.+
Imibhalo lengentansi
^ Nobe “sigodlo.”
^ NgesiHebheru kutsi, “langemakhyubhitha langu-100.” Fundza Sandzisanchazo B14.
^ NgesiHebheru kutsi, “emakhyubhitha langu-50.” Fundza Sandzisanchazo B14.
^ NgesiHebheru kutsi, “emakhyubhitha langu-30.” Fundza Sandzisanchazo B14.
^ Nobe “beyinetinhlangotsi letine.”
^ Nobe “Livulandi.”
^ NgesiHebheru kutsi, “lebelingemakhyubhitha langu-50.” Fundza Sandzisanchazo B14.
^ NgesiHebheru kutsi, “emakhyubhitha langu-30.” Fundza Sandzisanchazo B14.
^ Nobe “Livulandi.”
^ Nobe “Sigodlo.”
^ NgesiHebheru kutsi, “bekangemakhyubhitha langu-10.” Fundza Sandzisanchazo B14.
^ NgesiHebheru kutsi, “emakhyubhitha langu-8.” Fundza Sandzisanchazo B14.
^ NgesiHebheru kutsi, “beyingemakhyubhitha langu-18.” Fundza Sandzisanchazo B14.
^ NgesiHebheru kutsi, “lengemakhyubhitha langu-12.” Fundza Sandzisanchazo B14.
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ Nobe “emaphomegranathi.”
^ Lana kushiwo iNgcwele.
^ Nobe “lengaseningizimu.”
^ Lokusho kutsi “Shengatsi Yena [Jehova] Angayimisa Icine.”
^ Nobe “lengasenyakatfo.”
^ Kungenteka kusho kutsi “Ngemandla.”
^ NgesiHebheru kutsi, “lanemakhyubhitha langu-30.” Fundza Sandzisanchazo B14.
^ NgesiHebheru kutsi, “belungemakhyubhitha lasihlanu.” Fundza Sandzisanchazo B14.
^ NgesiHebheru kutsi, “kwemakhyubhitha langu-10.” Fundza Sandzisanchazo B14.
^ Nobe “indzawo yekugcina emanti.”
^ Lokungaba ngemasentimitha langaba ngu-7.4 (2.9 inches). Fundza Sandzisanchazo B14.
^ NgesiHebheru kutsi, “ema-bath langu-2 000.” Fundza Sandzisanchazo B14.
^ Nobe “tincola temanti.”
^ NgesiHebheru kutsi, “emakhyubhitha lamane.” Fundza Sandzisanchazo B14.
^ NgesiHebheru kutsi, “emakhyubhitha lamane.” Fundza Sandzisanchazo B14.
^ NgesiHebheru kutsi, “likhyubhitha.” Fundza Sandzisanchazo B14.
^ NgesiHebheru kutsi, “likhyubhitha nehhafu.” Fundza Sandzisanchazo B14.
^ NgesiHebheru kutsi, “likhyubhitha nehhafu.” Fundza Sandzisanchazo B14.
^ Nobe “beyihlangene nencola.”
^ NgesiHebheru kutsi, “ihhafu yelikhyubhitha.” Fundza Sandzisanchazo B14.
^ NgesiHebheru kutsi, “ema-bath langu-40.” Fundza Sandzisanchazo B14.
^ NgesiHebheru kutsi, “belingemakhyubhitha lamane.” Fundza Sandzisanchazo B14.
^ Nobe “emaphomegranathi.”
