Incwadzi Yekucala YaSamuweli 2:1-36
2 Hana wase uyathantaza utsi:
“Inhlitiyo yami iyajabula ngaJehova;+Jehova wanginika emandla.*
Umlomo wami uvulekile ngalokumelene netitsa tami,Ngobe ngiyajabula ngensindziso levela kuwe.
2 Kute longcwele njengaJehova,Kute lomunye ngaphandle kwakho,+Futsi kute lidvwala lelifanana naNkulunkulu wetfu.+
3 Ungachubeki ukhuluma ngekutigabatisa;Akubete kutigcabha lokuphuma emlonyeni wakho,Ngobe Jehova unguNkulunkulu welwati,+Futsi ngaye tento tehlulelwa ngekulunga.
4 Butjoki bemadvodza lanemandla bephulwa bube ticucu,Kodvwa labo labagilekako baniketwa emandla.+
5 Labondleke kahle kufanele batinikele kutsi bacashwe kuze batfole sinkhwa,Kodvwa labalambile ngeke baphindze balambe.+
Loyo longatfoli bantfwana ubeleke emadvodzana langu-7,+Kodvwa loyo lobekanemadvodzana lamanyenti akasenalutfo.*
6 Jehova uyabulala aphindze alondvolote kuphila;*Ubehlisela eThuneni* aphindze abakhuphule.+
7 Jehova uyaphuyisa, aphindze anjingise;+Uyehlisana aphindze aphakamisane.+
8 Uphakamisa lophansi elutfulini;Aphakamise labaphuyile endvundvumeni yemlotsa,*+Kuze abahlalise netindvuna,Abanike sihlalo seludvumo.
Tintfo letisekela umhlaba taJehova,+Futsi live lelikhicitako ulibeka etikwato.
9 Ugadza tinyatselo talabetsembekile bakhe,+Kodvwa lababi batawuthuliswa ebumnyameni,+Ngobe umuntfu akaphumeleliswa ngemandla akhe.+
10 Jehova utabenta babe ticucu labo labalwa naye;*+Emazulu atawudvuma nakabavetela intfukutselo yakhe.+
Jehova utawehlulela kuze kuyewufika emaphetselweni emhlaba,+Utawunika inkhosi layibekile emandla+
Amnikete emandla* logcotjiwe wakhe.”+
11 Ngemuva kwaloko, Elkhana waya endlini yakhe leseRama, kodvwa lomfana waba sikhonti* saJehova+ phambi kwa-Eli umphristi.
12 Emadvodzana a-Eli abekhohlakele;+ angamhloniphi Jehova.
13 Esikhundleni sekutsi atsatse sabelo sawo emihlatjelweni lebeyiletfwa bantfu, naku labekwenta:+ Ngaso sonkhe sikhatsi nangabe umuntfu enta umnikelo futsi isabila lenyama, inceku yemphristi beyita nemfologo lenematinyo lamatsatfu,
14 iyifake endishini, nobe ebhodweni lelinetibambo letimbili, nobe ebhodweni lelinetinyawo letintsatfu nobe ebhodweni lelinesibambo sinye. Lomphristi abetitsatsela nobe yini lebeyiphakanyiswa ngulemfologo. Nguloko-ke lebebakwenta kuwo onkhe ema-Israyeli labeketa eShilo.
15 Ngisho nangaphambi kwekutsi lomuntfu lotokwenta umnikelo ashuncise emanoni,+ inceku yemphristi beyita kuye, itsi: “Nika umphristi inyama kute ayose. Angeke ayemukele inyama lebilisiwe, ufuna lengakaphekwa kuphela.”
16 Nakwenteka lomuntfu atsi: “Akucale kushunciswe lamanoni,+ ngemuva kwaloko sewungatitsatsela nome yini loyifunako,” lenceku beyibese itsi: “Cha, nginikete nyalo; nawungenti njalo ngitayitsatsa ngenkhani!”
17 Ngako sono saletinceku saba sikhulu kakhulu kuJehova,+ ngobe lamadvodza abewedzelela umnikelo waJehova.
18 Samuweli abesebenta+ embikwaJehova agcoka* sidziya selineni+ nanobe abesengumfanyana.
19 Ngetulu kwaloko, make wakhe abemtfungela lijazi lelincane lelite imikhono, futsi amphatsele njalo ngemnyaka nakete nendvodza yakhe kutowenta umnikelo waminyaka yonkhe.+
20 Eli wabusisa Elkhana nemfati wakhe, watsi: “Shengatsi Jehova angakupha umntfwana kulomkakho, lotawuvala sikhala salona lenimnikele* kuJehova.”+ Babese babuyela ekhaya.
21 Jehova wamnaka Hana kangangekutsi watetfwala+ futsi watfola lamanye emadvodzana lamatsatfu nemadvodzakati lamabili. Lomfanyana longuSamuweli wachubeka akhula embikwaJehova.+
22 Eli abesakhule kakhulu, kodvwa abevile ngako konkhe lobekwentiwa ngemadvodzana akhe+ kulo lonkhe live laka-Israyeli, nekutsi bekaya ecansini nalabasikati labebakhonta emnyango welithende lekuhlangana.+
23 Abevame kutsi kuwo: “Kungani nichubeka nenta tintfo letinjena? Loku lengikuvako ngani kubo bonkhe labantfu akusikuhle.
24 Kahleni madvodzana ami, lombiko lengiwuvako losakateke kubo bonkhe bantfu baJehova mubi.
25 Nangabe umuntfu ona lomunye, ukhona longamcolisela kuJehova;* kodvwa nangabe umuntfu ona Jehova,+ ngubani longamthantazela?” Emadvodzana a-Eli awazange amlalele babe wawo, futsi Jehova abetimisele kuwabulala.+
26 Ngaleso sikhatsi, lomfana longuSamuweli wachubeka akhula ngesicu semtimba futsi wachubeka atsandvwa nguJehova nebantfu.+
27 Umuntfu lobekatfunywe nguNkulunkulu waya ku-Eli, watsi kuye: “Naku lokushiwo nguJehova: ‘Angizange yini ngitibonakalise ngendlela lecacile endlini yababe wakho ngesikhatsi batigcili eGibhithe endlini yaFaro?+
28 Ngamkhetsa kuto tonkhe tive taka-Israyeli+ kuze abe ngumphristi wami futsi ente imihlatjelo e-al’thare lami,+ ashise imphepho* aphindze agcoke sidziya embikwami. Nganika indlu yakhokho wakho yonkhe iminikelo yema-Israyeli* leyentiwa ngemlilo.+
29 Niyedzelelelani* imihlatjelo yami neminikelo yami lenginiyale ngayo endzaweni lengihlala kuyo?+ Kungani uchubeka uhlonipha emadvodzana akho kakhulu kunami ngekutsi nitikhuluphalise ngemacatsa lancono awo wonkhe umnikelo lowentiwa bantfu bami ema-Israyeli?+
30 “‘Kungako livi laJehova Nkulunkulu wema-Israyeli litsi: “Kuliciniso kutsi ngasho kutsi indlu yakho nendlu yakhokho wakho itawuhlale ihamba embikwami.”+ Kodvwa nyalo Jehova utsi: “Akusale kuba khashane nami, ngobe ngiyabahlonipha labangihloniphako,+ kodvwa labo labangedzelelako batawedzelelwa.”
31 Emalanga ayeta lapho ngiyawuncamula khona emandla* akho nemandla endlu yababe wakho, kuze angabi khona umuntfu endlini yakho lotawukhula aze abe mdzala kakhulu.+
32 Wena utawubona sitsa endzaweni lengihlala kuyo nangetulu kwato tonkhe tintfo letinhle letentelwa ema-Israyeli,+ futsi angeke aphindze abe khona umuntfu logugile endlini yakho.
33 Umuntfu wasendlini yakho lengingeke ngimyekelise kukhonta e-al’thare lami utawubangela emehlo akho kutsi angasaboni futsi akuvise buhlungu lobukhulu, kodvwa linyenti lebantfu bendlu yakho litawufa ngenkemba.+
34 Loko lokutakwenteka emadvodzaneni akho lamabili, boHofni naFinehasi, kutawuba luphawu kuwe: Bobabili batakufa ngelilanga linye.+
35 Ngitawubese ngitikhetsela umphristi lowetsembekile.+ Utakwenta ngekuvumelana naloko lokufiswa yinhlitiyo yami futsi ngitawumakhela indlu letawuhlala njalo, ahambe embikwalogcotjiwe wami ngaso sonkhe sikhatsi.
36 Nobe ngubani lotawusala endlini yakho utakuta futsi akhotsame embikwakhe kuze atfole imali nesinkhwa, atsi: “Ngicela unginike sikhundla sebuphristi kuze ngidle lucetu lwesinkhwa.”’”+
Imibhalo lengentansi
^ NgesiHebheru kutsi, “Luphondvo lwami luphakanyiswa nguJehova.” Fundza Tinchazelo Temagama.
^ NgesiHebheru kutsi, “sewubunile.”
^ Nobe “aphilise.”
^ Nobe “eShiyoli,” lokusho lithuna lebantfu. Fundza Tinchazelo Temagama.
^ Kungaphindze kubekwe ngekutsi, “emgodzini wetibi.”
^ Kungaphindze kubekwe ngekutsi, “Labo labamelana naJehova batawesaba.”
^ NgesiHebheru kutsi, “Aphakamise luphondvo lwalogcotjiwe.” Fundza Tinchazelo Temagama.
^ Nobe “wasebentela.”
^ NgesiHebheru kutsi, “abopha.”
^ NgesiHebheru kutsi, “lenimboleke.”
^ Kungaphindze kubekwe ngekutsi, “Nkulunkulu utammelela.”
^ NgesiHebheru kutsi, “emadvodzana a-Israyeli.”
^ Kungaphindze kubekwe ngekutsi, “kuze ente intfutfu yemihlatjelo ishunce iye etulu.”
^ NgesiHebheru kutsi, “Niyikhahlelelani.”
^ NgesiHebheru kutsi, “umkhono.”
