Incwadzi Yekucala YeTikhronike 16:1-43
16 Ngako balingenisa leLibhokisi laNkulunkulu weliciniso, balibeka ngekhatsi kulelithende Davide lebekalakhele lona+ futsi benta iminikelo yekushiswa, nemihlatjelo yekuthula embikwaNkulunkulu weliciniso.+
2 Ngesikhatsi Davide acedza kwenta leminikelo yekushiswa+ kanye nemihlatjelo yekuthula,+ wabusisa labantfu egameni laJehova.
3 Ngetulu kwaloko wanika onkhe ema-Israyeli, indvodza ngayinye nemfati ngamunye, sinkhwa lesiyindingilizi, sinkhwa lesentiwe ngetitselo telusundvu kanye nesinkhwa semagilebisi lomisiwe.
4 Wabese ubeka lamanye emaLevi kutsi asebente embikweLibhokisi laJehova,+ ahloniphe,* abonge aphindze advumise Jehova Nkulunkulu wema-Israyeli.
5 Asafa+ bekayinhloko futsi lolandzela yena bekunguZakhariya; boJeyiyeli, Shemiramothi, Jehiyeli, Mathithiya, Eliyabe, Bhenaya, Obedi-edomu naJeyiyeli+ bebadlala tinsimbi temculo letinetintsambo kanye nemahabhu;+ Asafa bekadlala emasimbali,+
6 kantsi boBhenaya naJahaziyeli baphristi bebashaya emacilongo njalo embikwelibhokisi lesivumelwane saNkulunkulu weliciniso.
7 Ngalelolanga kwaba kwekucala kutsi Davide acambe ingoma yekubonga Jehova futsi watjela Asafa+ nabomnakabo kutsi bayihlabele. Beyitsi:
8 “Bongani Jehova,+ bitani libito lakhe,Yentani imisebenti yakhe yatiwe kubantfu!+
9 Mhlabeleleni, hlabelani nimdvumise,+Cabangisisani* ngato tonkhe tintfo letimangalisako latentile.+
10 Tigcabheni ngelibito lakhe lelingcwele.+
Tinhlitiyo talabo labafuna Jehova atijabule.+
11 Funani Jehova+ futsi nimcele kutsi aninike emandla.
Mfuneni ngaso sonkhe sikhatsi.+
12 Khumbulani imisebenti yakhe lemangalisako layentile,+Nikhumbule netimangaliso latenta kanye netehlulelo latikhiphile,
13 Nine ntalelwane* ya-Israyeli inceku yakhe,+Nine madvodzana aJakobe, leningulabakhetsiwe bakhe.+
14 Yena unguJehova Nkulunkulu wetfu.+
Tehlulelo takhe tisemhlabeni wonkhe.+
15 Nibohlale nisikhumbula sivumelwane lasenta,Setsembiso lasenta* etitukulwaneni letiyinkhulungwane,+
16 Lokusivumelwane lasenta na-Abrahama,+Kanye nesifungo lasenta ku-Isaka,+
17 Leso lasisungula saba ngumtsetfo kuJakobe+Saphindze saba sivumelwane lesihlala njalo ku-Israyeli,
18 Watsi, ‘Ngitakunika live laseKhenani+Libe lifa lakho.’+
19 Loku kwenteka ngesikhatsi nisembalwa,Benimbalwa kakhulu, futsi benitihambi kulelive.+
20 Bebahambahamba besuka kulesinye sive baya kulesinye,Besuka kulomunye umbuso baya kulabanye bantfu.+
21 Akazange avumele muntfu kutsi abacindzetele,+Kodvwa abejezisa emakhosi ngenca yabo,+
22 Watsi: ‘Ningabatsintsi labagcotjiwe bami,Futsi ningenti lutfo lolubi kubaphrofethi bami.’+
23 Hlabelelani Jehova nonkhe nine lenisemhlabeni!
Memetelani insindziso yakhe lilanga nelilanga!+
24 Memetelani inkhatimulo yakhe etiveni,Memetelani imisebenti yakhe lemangalisako kubo bonkhe bantfu.
25 Ngobe Jehova mkhulu futsi kumfanela mbamba kudvunyiswa.
Nguye lokufanele esatjwe kwendlula bonkhe labanye bonkulunkulu.+
26 Bonkhe bonkulunkulu betive babonkulunkulu labangenamsebenti,+Kodvwa Jehova nguye lowadala emazulu.+
27 Kuhlonipheka nenkhatimulo kumtungeletile;+Emandla nenjabulo kusendzaweni lahlala kuyo.+
28 Nikani Jehova ludvumo nine mindeni yebantfu,Nikani Jehova ludvumo ngenca yenkhatimulo yakhe nemandla akhe.+
29 Nikani Jehova ludvumo lolufanele libito lakhe;+Letsani sipho futsi nite embikwakhe.+
Khotsamani* embikwaJehova nigcoke tembatfo letingcwele.*+
30 Chachatelani embikwakhe, mhlaba wonkhe!
Umhlaba ume wacina, angeke utanyatanyiswe.+
31 Shengatsi emazulu angatfokota, nemhlaba ujabule;+Memetelani etiveni nitsi: ‘Jehova sewuyiNkhosi!’+
32 Shengatsi lwandle nako konkhe lokukulo kungamdvumisa;Shengatsi emasimu angatfokota kanye nako konkhe lokukuwo.
33 Ngesikhatsi lesifanako, tihlahla temahlatsi atimemete ngenjabulo embikwaJehova,Ngobe uyeta* utokwehlulela umhlaba.
34 Bongani Jehova ngobe muhle;+Lutsandvo lwakhe lolucotfo luhlala kuze kube phakadze.+
35 Niphindze nitsi: ‘Sisindzise, awu Nkulunkulu wensindziso yetfu,+Sihlanganise futsi usisindzise etiveni,Kuze sibonge libito lakho lelingcwele+Futsi sitfokote nasikudvumisa.+
36 Shengatsi Jehova Nkulunkulu wema-Israyeli angadvunyiswaKuze kube phakadze.’”*
Bonkhe labantfu babese batsi: “Amen!”* futsi badvumisa Jehova.
37 Ngemuva kwaloko Davide washiya Asafa+ kanye nabomnakabo khona lapho embikwelibhokisi lesivumelwane saJehova kuze bachubeke basebenta embikwaleLibhokisi+ kuye ngenchubo yamalanga onkhe.+
38 Bo-Obedi-edomu nabomnakabo labangu-68 na-Obedi-edomu loyindvodzana yaJeduthuni kanye naHosa bebabogadzi;
39 boSadoki+ umphristi nebaphristi labekanye nabo bebasembikwelithende laJehova lekukhontela endzaweni lephakeme eGibeyoni+
40 kuze bente iminikelo yekushiswa kuJehova njalo e-al’thare lemnikelo wekushiswa, ekuseni nantsambama, baphindze bente konkhe lokubhalwe eMtsetfweni waJehova lawunika ema-Israyeli.+
41 BebanaHemani naJeduthuni+ kanye nalalamanye emadvodza lebekakhetsiwe labebitwe ngemabito awo kuze babonge Jehova,+ ngobe “lutsandvo lwakhe lolucotfo luhlala kuze kube phakadze”;+
42 futsi bebakanye naHemani+ naJeduthuni lebekufanele bashaye emacilongo, emasimbali netinsimbi temculo lebetisetjentiselwa kudvumisa* Nkulunkulu weliciniso; emadvodzana aJeduthuni+ bekasesangweni.
43 Bonkhe labantfu babese bayahamba baya emakhaya abo futsi Davide wahamba wayobusisa umndeni wakhe.
Imibhalo lengentansi
^ NgesiHebheru kutsi, “akhumbule.”
^ Kungaphindze kubekwe ngekutsi, “Khulumani.”
^ Nobe “situkulwane.” NgesiHebheru kutsi, “inhlanyelo.”
^ NgesiHebheru kutsi, “Livi latsi alentiwe.”
^ Kungaphindze kubekwe ngekutsi, “ngenca yebuhle bebungcwele bakhe.”
^ Nobe “Khontani.”
^ Nobe “ufikile.”
^ Nobe “Kusukela phakadze kuze kube phakadze.”
^ Nobe “Akube njalo!”
^ Nobe “tinsimbi talengoma ya-.”
