Incwadzi Yesibili YaSamuweli 12:1-31
12 Ngako Jehova watfumela Nathani+ kuDavide, wafike+ watsi: “Bekunemadvodza lamabili lebekahlala edolobheni linye. Lenye beyinjingile, lenye iphuyile.
2 Lendvodza lenjingile beyinetimvu netinkhomo letinyenti kakhulu;+
3 kodvwa lelephuyile beyite lutfo ngaphandle kwelizinyane lemvu lelisikati lebeyilitsengile.+ Yalinakekela futsi yalikhulisa kanye nemadvodzana ayo. Beyilipha loko lokuncane lenako futsi ilinatsisa endzebeni yayo bese lilala esifubeni sayo. Lelizinyane beselifana nendvodzakati kuyo.
4 Ngemuva kwesikhatsi, lendvodza lenjingile yaba nesivakashi kodvwa ayizange itsatse imvu nobe inkhomo yayo kuze ihlabele lesivakashi lebesisuka khashane. Kodvwa yatsatsa imvu yalendvodza lephuyile yayihlaba yase iyiphekela lesivakashi.”+
5 Nakeva loko Davide wayitfukutselela kakhulu lendvodza futsi watsi kuNathani: “Ngifunga Jehova Nkulunkulu lophilako+ ngitsi lendvodza leyente loko kufanele ife noma kanjani!
6 Kufanele iphindze ibhadale lemvu ngalokuphindvwe kane+ ngenca yalesento sayo sekungakhombisi luvelo.”
7 Nathani wabese utsi kuDavide: “Lendvodza nguwe! Naku lokushiwo nguJehova Nkulunkulu wema-Israyeli: ‘Mine ngakugcoba waba yinkhosi yema-Israyeli+ futsi ngakusindzisa esandleni saSawula.+
8 Bengitimisele kukuniketa indlu+ yenkhosi yakho ngiphindze ngikunike bafati+ benkhosi yakho babe bakho. Ngaphindze ngakunika indlu yaka-Israyeli neyakaJuda.+ Ngetulu kwaloko bengitimisele kutsi ngikunike nalokunye lokunyenti.+
9 Uledzeleleleni livi laJehova ngekwenta lokubi emehlweni akhe? Ubulele Uriya umHethi ngenkemba.+ Ngemuva kwekumbulala ngenkemba yema-Amoni,+ watsatsa umkakhe.+
10 Inkemba ngeke isuke endlini yakho+ ngobe ungedzelele ngekutsatsa umfati wa-Uriya umHethi.’
11 Naku lokushiwo nguJehova: ‘Mine ngiletsa inhlekelele futsi itawuvela endlini yakho;+ utatibonela ngewakho, ngitawutsatsa bafati bakho ngibanike lenye indvodza*+ futsi itawulala nebafati bakho emini libalele.*+
12 Ngisho noma wena ukwente ngasense loku,+ mine ngitakwenta embikwawo onkhe ema-Israyeli, emini libalele.’”*
13 Davide wase utsi kuNathani: “Ngonile kuJehova.”+ Nathani waphendvula Davide watsi: “Jehova naye uyasicolela sono sakho.*+ Ngeke ufe.+
14 Nobe kunjalo, ngesizatfu sekutsi umedzelele kakhulu Jehova ngalesento sakho, lendvodzana lesandza kutalwa itakufa.”
15 Ngemuva kwaloko, Nathani wabuyela endlini yakhe.
Jehova wabese ubangela kutsi agule lomntfwana waDavide lamtalelwe ngumfati wa-Uriya.
16 Davide wancengela lomfana kuNkulunkulu weliciniso. Wabese uzila kudla futsi bekangena ekamelweni lakhe acitse busuku bonkhe alele phansi.+
17 Ngako emadvodza lamadzala endlu yakhe ema eceleni kwakhe futsi etama kumsukumisa kodvwa yena wala, futsi bekangadli nawo.
18 Ngelilanga lesi-7 lomntfwana wafa kodvwa tinceku taDavide betesaba kumtjela. Betitsi: “Ngesikhatsi lomntfwana asengakafi, sikhulumile naye futsi bekangasilaleli. Singamtjela kanjani kutsi lomntfwana sewufile? Kungenteka ente intfo leyetfusa kakhulu.”
19 Ngesikhatsi Davide abona tinceku takhe tihlebelana, kwamkhanyela kutsi lomntfwana sewufile. Wabuta letinceku watsi: “Sewufile yini?” Tona tamphendvula tatsi: “Yebo, sewufile.”
20 Ngako Davide wasukuma, wageza, wagcobisa emafutsa,+ washintja timphahla, waya endlini+ yaJehova wafike wakhotsama. Ngemuva kwesikhatsi waya endlini* yakhe wafike wacela kudla bamletsela futsi wadla.
21 Tinceku takhe tambuta tatsi: “Wenteleni ngalendlela? Ngesikhatsi lomntfwana asaphila uzile kudla wachubeka ukhala kodvwa utsite nakafa wasukuma wadla.”
22 Davide waphendvula watsi: “Ngesikhatsi lomntfwana asaphila, bengizile kudla+ futsi ngichubeka ngikhala ngobe bengititjela ngitsi, ‘Kwati bani nje, mhlawumbe Jehova angangentela umusa futsi avumele lomntfwana achubeke aphila?’+
23 Nyalo njengobe asafile, kungani kufanele ngizile kudla? Ngingamvusa yini?+ Ngingakwati kuya kuye+ kodvwa yena ngeke akwati kuta kimi.”+
24 Ngemuva kwaloko Davide wadvudvuta umkakhe Bhatisheba.+ Waya kuye, walala naye. Ngekuhamba kwesikhatsi wamtalela indvodzana leyabitwa ngekutsi nguSolomoni.*+ Jehova bekayitsandza lendvodzana,+
25 futsi watfumela Nathani+ umphrofethi kutsi ayetse atsi nguJedidiya,* ngenca yaJehova.
26 Jowabe wachubeka alwa neRabha+ yema-Amoni,+ futsi walitfumba lelidolobha lebukhosi.*+
27 Ngako Jowabe watfumela titfunywa kuDavide watsi: “Ngilwile neRabha+ futsi sengilitsetse lelidolobha lemanti.*
28 Hlanganisa onkhe lalamanye emasotja nimise emathende kulelidolobha bese uyalitsatsa. Nawungenti njalo, mine ngitalitsatsa bese kudvunyiswa mine.”*
29 Ngako Davide wahlanganisa onkhe emasotja futsi waya eRabha wayolwa nayo wayitsatsa.
30 Ngemuva kwaloko watsatsa umchele waMalkhamu enhloko yakhe. Sisindvo sawo besingangelithalenta* leligolide futsi wawunematje laligugu. Lomchele wafakwa enhloko yaDavide. Waphindze watitsatsela netintfo+ letinyenti kakhulu kulelidolobha.+
31 Wakhipha bonkhe bantfu lebebakulelidolobha futsi wayobasebentisa kutsi bayosaha ematje, basebente ngemathulusi ensimbi lacijile nangemazembe ensimbi, bebaphindze babhake titini. Loko wakwenta kuwo onkhe emadolobha ema-Amoni. Ekugcineni Davide nemasotja akhe onkhe babuyela eJerusalema.
Imibhalo lengentansi
^ Nobe “umuntfu wakini.”
^ NgesiHebheru kutsi, “emehlweni alelilanga.”
^ NgesiHebheru kutsi, “embikwelilanga.”
^ Nobe “uyasendlulisa sono sakho.”
^ Nobe “esigodlweni.”
^ Lisuselwe egameni lesiHebheru lelisho kutsi “Kuthula.”
^ Lokusho kutsi “Lotsandvwa nguJehova.”
^ Nobe “lidolobha lalombuso.”
^ Kungenteka kubhekisela emitfonjeni yemanti alelidolobha.
^ NgesiHebheru kutsi, “futsi litawubitwa ngeligama lami.”
^ Lithalenta belilingana nemakhilogremu langu-34.2. Fundza Sandzisanchazo B14.
