Incwadzi Yesibili YaSamuweli 6:1-23
6 Davide waphindze wahlanganisa emasotja elikhetselo ka-Israyeli lobekungemadvodza langu-30 000.
2 Ngemuva kwaloko Davide kanye nawo onkhe emadvodza labekanye nawo baya eBhala-juda kuze bayolandza Libhokisi laNkulunkulu weliciniso,+ lebelisetjentiswa bantfu kuze babite libito laJehova wemabutfo,+ lohlala esihlalweni sebukhosi ngetulu* kwemakherubhi.+
3 Base balayisha leLibhokisi laNkulunkulu weliciniso encoleni lensha,+ besuka nalo endlini ya-Abinadabi+ lebeyisegcumeni futsi lencola beyiholwa bo-Uza na-Ahiyo emadvodzana a-Abinadabi.
4 Ngako balitfutsa Libhokisi laNkulunkulu weliciniso kusukela endlini ya-Abinadabi lebeyisegcumeni, futsi Ahiyo bekahamba embikwalo.
5 Davide kanye nayo yonkhe indlu yaka-Israyeli bebajabulile embikwaJehova futsi bebadlala tonkhe tintfo tekudlala umculo letakhiwe ngelugodvo lwemjunipha, emahabhu, naletinye tinsimbi temculo letinetintsambo,+ emathamborini,+ tikhelekehle kanye nemasimbali.*+
6 Batsi nabefika ebaleni lekubhulela laseNakhoni, Uza welulela sandla sakhe kuleLibhokisi laNkulunkulu weliciniso futsi walibamba+ ngobe tinkhomo tacishe taliwisa.
7 Ngenca yaloko, intfukutselo yaJehova yamvutsela Uza futsi Nkulunkulu weliciniso wamshaya phansi+ khona lapho ngenca yekungawuhloniphi umtsetfo wakhe.+ Wafela khona lapho eceleni kweLibhokisi laNkulunkulu weliciniso.
8 Kodvwa Davide watfukutsela ngenca yekutsi intfukutselo yaJehova beyivutsele Uza; futsi leyo ndzawo ibitwa ngekutsi yiPheresi-uza* kuze kube ngulamuhla.
9 Ngako Davide wamesaba kakhulu Jehova+ ngalelolanga futsi watsi: “Libhokisi laJehova lingeta kanjani kimi?”+
10 Davide bekangakatimiseli kuletsa leLibhokisi laJehova lapho bekahlala khona eDolobheni laDavide.+ Kunaloko watsi alimikiswe endlini ya-Obedi-edomu+ umGathi.
11 Libhokisi laJehova lahlala endlini ya-Obedi-edomu umGathi tinyanga letintsatfu, futsi Jehova wachubeka abusisa Obedi-edomu nemndeni wakhe.+
12 Kwase kutfunyelwa umbiko enkhosini Davide, lotsi: “Jehova uyibusisile indlu ya-Obedi-edomu nako konkhe kwakhe, ngenca yeLibhokisi laNkulunkulu weliciniso.” Ngako Davide wahamba wayolilandza leLibhokisi walitsatsa endlini ya-Obedi-edomu waliyisa eDolobheni laDavide ajabulile.+
13 Ngemuva kwekutsi labo lebebatfwele+ leLibhokisi laJehova sebahambe tinyatselo letisitfupha, Davide wenta umhlatjelo ngenkunzi nangesilwane lesikhuluphele.
14 Davide abedansa embikwaJehova ngawo onkhe emandla akhe; kuso sonkhe leso sikhatsi bekagcoke* sidziya selineni.+
15 Davide kanye nayo yonkhe indlu yaka-Israyeli beta neLibhokisi+ laJehova bamemeta ngenjabulo+ futsi bashaya luphondvo.+
16 Ngesikhatsi Libhokisi laJehova lingena eDolobheni laDavide, Mikhali+ indvodzakati yaSawula, bekabuka ngelifasitelo wase ubona inkhosi Davide igcumagcuma futsi idansa embikwaJehova; ngako wacala kuyedzelela enhlitiyweni yakhe.+
17 Base bayalingenisa leLibhokisi laJehova futsi balibeka endzaweni yalo ngekhatsi ethendeni Davide labekalimisele lona.+ Ngemuva kwaloko, Davide wanikela ngeminikelo yekushiswa+ nangemihlatjelo yekuthula+ embikwaJehova.+
18 Watsi Davide nakacedza kwenta leminikelo yekushiswa nemihlatjelo yekuthula, wabusisa labantfu egameni laJehova wemabutfo.
19 Ngetulu kwaloko, Davide waniketa sonkhe lesicuku sebantfu baka-Israyeli; umfati ngamunye nendvodza ngayinye wayiniketa sinkhwa lesiyindingilizi, sinkhwa lesentiwe ngetitselo telusundvu, kanye nesinkhwa semagilebisi lomisiwe futsi bonkhe labantfu bahamba, nguloyo naloyo wabuyela kakhe.
20 Watsi Davide nakabuya atobusisa indlu yakhe, Mikhali+ indvodzakati yaSawula waphuma wayomhlangabeta watsi: “Yaze yatihlaza-ke inkhosi yaka-Israyeli lamuhla ngalesikhatsi icimbile embikwemantfombatana latigcili tetinceku tayo, yalingisa indvodza lelibele nayikhombisa bulima bayo!”+
21 Davide waphendvula Mikhali watsi: “Injabulo yami bengiyikhombisa embikwaJehova lowakhetsa mine esikhundleni sababe wakho nawo wonkhe umndeni wakini futsi lowakhetsa mine kutsi ngibe ngumholi webantfu baJehova ema-Israyeli.+ Ngako ngitawukhombisa injabulo yami embikwaJehova,
22 futsi ngitatitfoba kakhulu kunaloku, ngibe phansi ngisho nasemehlweni ami kodvwa ngitawudvunyiswa ngulamantfombatana latigcili lokhuluma ngawo.”
23 Ngako Mikhali+ indvodzakati yaSawula akazange abe nebantfwana waze wafa.
Imibhalo lengentansi
^ Kungaphindze kubekwe ngekutsi, “emkhatsini.”
^ Lena yinsimbi yemculo lemise kwendingilizi, lokutsi natishaywa titimbili tikhiphe umsindvo loncencetsako.
^ Lokusho kutsi “Kwephula Umtsetfo Kwa-Uza.”
^ NgesiHebheru kutsi, “abevunule.”
