Incwadzi Yesibili YaSamuweli 8:1-18
8 Ngemuva kwesikhatsi, Davide walwa nemaFilisti+ wawehlula,+ waphindze wawaphocelela kutsi abe ngephansi kwakhe, watsatsa neMethegi-ama esandleni sawo.
2 Wancoba bakaMowabi+ waphindze wabaphocelela kutsi balale phansi futsi wabakala ngentsambo. Wabakala baba ngemalayini lamatsatfu, wabulala lamabili washiya linye.+ Sive sakaMowabi sase siba tinceku taDavide futsi besiletsa tipho kuye.+
3 Davide wancoba Hadadezeri, loyindvodzana yaRehobi, inkhosi yaseSobha+ njengobe beyiya kuyovuselela kubusa kwayo eMfuleni iYufrathe.+
4 Davide watfumba emasotja labagibeli bemahhashi langu-1 700 kanye nemasotja lahamba ngetinyawo langu-20 000 aHadadezeri. Wabese ujuba imisipha yawo onkhe lalamanye emahhashi, washiya langu-100 labedvonsa tincola.+
5 Ngesikhatsi emaSiriya aseDamaseko+ ete kutosita iNkhosi Hadadezeri yaseSobha, Davide wabulala langu-22 000 awo.+
6 Davide wabese usungula tinkambu temasotja eSiriya yaseDamaseko, bantfu baseSiriya baba tinceku takhe futsi baletsa tipho. Jehova wenta Davide wancoba yonkhe indzawo lapho bekaya khona.+
7 Ngetulu kwaloko, Davide watsatsa emahawu eligolide layindingilizi etincekwini taHadadezeri wawaletsa eJerusalema.+
8 INkhosi Davide yatsatsa litfusi lelinyenti kakhulu emadolobheni aHadadezeri, lokuyiBhetha neBerotha.
9 INkhosi Thoyi yaseHamathi+ yeva kutsi Davide uncobe lonkhe libutfo laHadadezeri.+
10 Ngako Thoyi watfumela indvodzana yakhe Joramu enkhosini Davide kuze iyomvusela iphindze imhalalisele ngobe Davide bekalwe waphindze wancoba Hadadezeri (ngobe Hadadezeri bekavame kulwa naThoyi) futsi Joramu waletsela Davide tintfo letakhiwe ngelisiliva, ngeligolide nangelitfusi.
11 INkhosi Davide yanikela letintfo kuJehova lokufaka ekhatsi lisiliva neligolide lebeyilitsetse kuto tonkhe letive lebesetingephansi kwayo:+
12 eSiriya, kaMowabi,+ kuma-Amoni, kumaFilisti+ nakuma-Amaleki.+ Yaphindze yanikela nangetintfo leyatitsatsela tona kuHadadezeri,+ indvodzana yaRehobi, inkhosi yaseSobha.
13 Davide waphindze watakhela ligama ngesikhatsi abuya kuyobulala bantfu besive saka-Edomu labangu-18 000, eSihosheni Seluswayi.+
14 Wamisa tinkambu temasotja ka-Edomu. Kulo lonkhe laka-Edomu wamisa tinkambu temasotja futsi bonkhe bantfu bakhona baba tinceku taDavide.+ Jehova wasita Davide kutsi ancobe nobe ngukuphi lapho abeya khona.+
15 Davide wachubeka nekubusa lonkhe laka-Israyeli+ futsi wenta sicinisekiso sekutsi bonkhe bantfu+ bayawugcina umtsetfo futsi baphatseke kahle.+
16 Jowabe+ indvodzana yaSeruya abephetse libutfo kantsi Jehoshafati+ indvodzana ya-Ahiludi bekangumgcini mabhuku.
17 Sadoki+ indvodzana ya-Ahitubi na-Ahimeleki indvodzana ya-Abiyatha, bebabaphristi, kantsi Seraya yena bekangumabhalane.
18 Bhenaya+ indvodzana yaJehoyada bekaphetse bogadzi benkhosi*+ kantsi emadvodzana aDavide wona aba tindvuna letinkhulu.*
Imibhalo lengentansi
^ NgesiHebheru kutsi, “emaKherethi nemaPhelethi.”
^ NgesiHebheru kutsi, “baphristi.”
