Incwadzi Yesibili YaSamuweli 9:1-13
-
Lutsandvo lolucotfo lwaDavide ngaMefiboshethi (1-13)
9 Davide wase utsi: “Ukhona yini lomunye umuntfu losele endlini yaSawula lengingamentela umusa ngenca yaJonathani?”+
2 Bekunenceku yendlu yaSawula lebeyibitwa ngekutsi nguSiba.+ Ngako bayibita yaya kuDavide, futsi inkhosi yayibuta yatsi: “UnguSiba yini wena?” Yona yatsi: “Yebo, ngiyinceku yakho.”
3 Inkhosi yachubeka yatsi: “Ukhona yini losasele endlini yaSawula lengingamentela umusa waNkulunkulu?” Siba waphendvula inkhosi watsi: “Ukhona losasele loyindvodzana yaJonathani futsi ukhubateke tinyawo totimbili.”*+
4 Inkhosi yambuta yatsi: “Uphi nyalo?” Siba watsi kuyo: “UseLo-dabari, endlini yaMakhire+ indvodzana ya-Amiyeli.”
5 Ngaso leso sikhatsi inkhosi Davide yatsi akayolandvwa eLo-dabari endlini yaMakhire loyindvodzana ya-Amiyeli.
6 Ngesikhatsi Mefiboshethi indvodzana yaJonathani, loyindvodzana yaSawula efika kuDavide, wakhotsama watsintsa ngebuso phansi. Davide watsi: “YeMefiboshethi.” Yena waphendvula watsi: “Sengikhona nkhosi.”
7 Davide watsi kuye: “Ungesabi ngobe ngitakwentela umusa+ ngenca yababe wakho Jonathani futsi ngitayibuyisela kuwe yonkhe indzawo yamkhulu wakho Sawula futsi sewutabokudla* nami etafuleni lami.”+
8 Ngenca yaloko, Mefiboshethi waguca wase utsi: “Beyiyini nje inceku yakho kutsi unganaka* inja+ lefile lenjengami?”
9 Inkhosi yatsi akubitwe Siba lobekayinceku yaSawula, yatsi kuye: “Konkhe lebekukwaSawula kanye nendlu yakhe ngikunika umtukulu wenkhosi yakho.+
10 Wena kanye nemadvodzana akho netisebenti takho nitamlimela emasimu akhe niphindze nibutse sivuno sawo kute bantfu labahlala ekhaya lemtukulu wenkhosi yakho batfole kudla. Kodvwa Mefiboshethi umtukulu wenkhosi yakho utawudla etafuleni+ lami njalo.”
Siba abenemadvodzana langu-15 netinceku letingu-20.+
11 Siba wase utsi enkhosini: “Inceku yakho itawenta konkhe inkhosi letsi ayikwente.” Ngako Mefiboshethi bekadla etafuleni laDavide njengemadvodzana enkhosi.
12 Mefiboshethi bekaphindze abe nendvodzana lencane ligama layo kunguMikha.+ Bonkhe lebebahlala endlini yaSiba baba tisebenti taMefiboshethi.
13 Mefiboshethi bekahlala eJerusalema, futsi bekadla nenkhosi+ etafuleni layo njalo. Bekakhubateke totimbili tinyawo.+
Imibhalo lengentansi
^ Nobe “usishosha.”
^ NgesiHebheru kutsi, “utawudla sinkhwa.”
^ NgesiHebheru kutsi, “ungabuka.”
