2 Tikhronike 17:1-19
17 Indvodzana ya-Asa, Jehoshafati,+ yaba yinkhosi ngemuva kwakhe futsi yacinisa bukhosi bayo ka-Israyeli.
2 Jehoshafati wamisa emabutfo emphi kuwo onkhe emadolobha akaJuda labiyelwe waphindze wakha tinkambu temasotja eveni lakaJuda nasemadolobheni aka-Efrayimu labekatfunjwe ngubabe wakhe Asa.+
3 Jehova waba naJehoshafati ngobe wahamba etinyatselweni takhokho wakhe Davide+ futsi akazange agucukele ekukhonteni boBhali.
4 Wafuna Nkulunkulu wababe wakhe,+ wagcina* imiyalo yakhe futsi akazange ente imikhuba yema-Israyeli.+
5 Jehova wacinisa lombuso esandleni saJehoshafati;+ onkhe emaJuda bekamnika tipho futsi bekanjinge kakhulu aphindze advume kakhulu.+
6 Waba nesibindzi sekugcina umtsetfo waJehova, waze wasusa ngisho netindzawo letiphakeme kaJuda+ kanye netinsika letingcwele.*+
7 Ngemnyaka wesitsatfu wekubusa kwakhe, Jehoshafati watfumela kutsi kulandvwe tindvuna takhe boBheni-hayili, Obadiya, Zakhariya, Nethaneli kanye naMikhaya kutsi batofundzisa emadolobheni akaJuda.
8 Betikanye nemaLevi boShemaya, Nethaniya, Zebadiya, Asaheli, Shemiramothi, Jehonathani, Adoniya, Thobiya kanye naThobi-adoniya futsi lamaLevi abekanye nebaphristi bo-Elishama naJehoramu.+
9 Bacala kufundzisa kaJuda, bahamba nencwadzi yeMtsetfo waJehova+ futsi bawahamba onkhe emadolobha akaJuda bafundzisa bantfu.
10 Jehova wabangela kutsi yonkhe imibuso yemave labomakhelwane bakaJuda ifikelwe kwesaba futsi lemibuso ayizange ilwe naJehoshafati.
11 EmaFilisti apha Jehoshafati tipho nemali.* Ema-Arabu amnika timvu letindvuna letingu-7 700 netimbuti letindvuna letingu-7 700 emihlambini yawo.
12 Jehoshafati wadlondlobala+ futsi wachubeka nekwakha takhiwo leticinile+ nemadolobha ekugcina kudla naletinye tintfo+ kaJuda.
13 Wenta imisebenti lemikhulu emadolobheni akaJuda futsi bekanemasotja latingwazi eJerusalema.
14 Ahlelwa ngemindeni yakubo: KaJuda, indvuna yetinkhulungwane bekungu-Adna futsi bekanemasotja latingwazi langu-300 000.+
15 Adna bekaphetse indvuna Jehohanani futsi yona beyiphetse emasotja langemachawe langu-280 000.
16 Adna bekaphindze aphetse Amasiya, indvodzana yaZikhri, lowavolontiya kwenta umsebenti waJehova futsi Amasiya bekanemasotja latingwazi langu-200 000.
17 Esiveni sakaBhenjamini+ indvuna yetinkhulungwane bekungu-Eliyada, lisotja leliyingwazi, futsi bekanemasotja langu-200 000 labehlome ngebutjoki nemahawu.+
18 Eliyada bekaphetse Jehozabadi futsi Jehozabadi bekanemadvodza langu-180 000 labehlomele imphi.
19 Laba bebasebentela inkhosi, ngetulu kwalabo inkhosi leyababeka emadolobheni labiyelwe kulo lonkhe lakaJuda.+
Imibhalo lengentansi
^ NgesiHebheru kutsi, “wahamba.”
^ Fundza Tinchazelo Temagama.
^ Nobe “tetfulo.”
