2 Tikhronike 29:1-36
29 Hezekiya+ waba yinkhosi nakaneminyaka lengu-25 budzala futsi wabusa iminyaka lengu-29 eJerusalema. Libito lamake wakhe bekungu-Abiya, indvodzakati yaZakhariya.+
2 Wachubeka enta lokuhle emehlweni aJehova+ njengobe nakhokho wakhe Davide bekentile.+
3 Ngemnyaka wekucala wekubusa kwakhe, enyangeni yekucala, wavula iminyango yendlu yaJehova waphindze wayilungisa.+
4 Wabese ungenisa baphristi nemaLevi wabahlanganisa ebaleni lelingasemphumalanga.
5 Watsi kubo: “Ngilaleleni nine maLevi. Nyalo tingcweliseni+ niphindze ningcwelise lendlu yaJehova Nkulunkulu wabokhokho benu futsi nisuse nome ngabe yini lengcolile endzaweni lengcwele.+
6 Ngobe bobabe bebangaketsembeki futsi benta lokubi emehlweni aJehova Nkulunkulu wetfu.+ Bamshiya, bafulatsela lithende lekukhontela laJehova futsi bamlahla.+
7 Baphindze bavala tivalo tevulandi+ bacisha netibane.+ Bayekela kushisa imphepho+ nekwentela Nkulunkulu wema-Israyeli imihlatjelo yekushiswa+ endzaweni lengcwele.
8 Ngenca yaloko, intfukutselo yaJehova yavutsela emaJuda nebantfu baseJerusalema+ kangangekutsi babangela kwetfuka nekumangala futsi baba yinhlekisa* njengobe nitibonela nani ngemehlo enu.+
9 Bokhokho betfu babulawa ngenkemba,+ emadvodzana nemadvodzakati etfu kanye nebafati betfu batfunjwa ngenca yaloko.+
10 Ngako kusifiso senhlitiyo yami kwenta sivumelwane naJehova Nkulunkulu wema-Israyeli+ kuze lentfukutselo yakhe levutsako isuke lapha kitsi.
11 Madvodzana ami, lesi akusiso sikhatsi sekuphumula ngobe Jehova unikhetsile kutsi nime embikwakhe, nimsebentele+ futsi nimentele imihlatjelo yekushiswa.”+
12 Nakeva loko, emaLevi asukuma. KumaKhohati+ bekunguMahathi indvodzana ya-Amasayi naJoweli indvodzana ya-Azariya; kumaMerari+ bekunguKhishi indvodzana ya-Abdi na-Azariya indvodzana yaJehaleli; kumaGeshoni+ bekunguJowa indvodzana yaZima na-Edeni indvodzana yaJowa;
13 emadvodzaneni a-Elisafani bekunguShimri naJehuweli; emadvodzaneni a-Asafa+ bekunguZakhariya naMathaniya;
14 emadvodzaneni aHemani+ bekunguJehiyeli naShimeyi; kantsi emadvodzaneni aJeduthuni+ bekunguShemaya na-Uziyeli.
15 LamaLevi abese ahlanganisa banakabo futsi atingcwelisa aphindze eta atohlanta indlu yaJehova njengobe inkhosi beyikhiphe lowo myalo ilandzela emavi aJehova.+
16 Baphristi babese bayangena endlini yaJehova kuze bayihlambulule futsi bakhipha tonkhe tintfo letingcolile labatitfola ethempelini laJehova batiyisa ebaleni+ lendlu yaJehova. EmaLevi abese ayatitsatsa letintfo atetfwala ayotilahla eSihosheni saseKhidroni.+
17 Ngaleyo ndlela, bacala kungcwelisa lithempeli ngelilanga lekucala lenyanga yekucala, futsi ngelilanga lesi-8 laleyo nyanga befika evulandi yaJehova+ bangcwelisa lendlu yaJehova emalanga langu-8 bacedza ngelilanga lesi-16 lenyanga yekucala.
18 Ngemuva kwaloko, baya eNkhosini Hezekiya batsi: “Sesiyihlante yonkhe indlu yaJehova, li-al’thare lemnikelo wekushiswa+ nato tonkhe titja talo,+ nelitafula letinkhwa letititaki*+ kanye nato tonkhe titja talo.
19 Tonkhe titja iNkhosi Ahazi leyatibeka eceleni nayisabusa ngesikhatsi yenta tento tekungetsembeki,+ sitilungisile saphindze satingcwelisa+ futsi setisembikweli-al’thare laJehova.”
20 INkhosi Hezekiya yavuka lokwa ekuseni yahlanganisa tindvuna telidolobha, futsi bakhuphukela endlini yaJehova.
21 Baletsa tinkunzi letingu-7, timvu letindvuna letingu-7, emazinyane etimvu langu-7 kanye netimbuti letindvuna letingu-7, kwaba ngumnikelo wesono walombuso, umnikelo wendzawo lengcwele newesive semaJuda.+ Ngako yatjela baphristi, intalelwane ya-Aroni, kutsi banikele lomnikelo e-al’thare laJehova.
22 Babese babulala letinkunzi,+ baphristi batsatsa ingati yato bayifafata e-al’thare;+ ngemuva kwaloko babulala letimvu letindvuna bafafata ingati yato e-al’thare, babese babulala lamazinyane etimvu bafafata ingati yawo e-al’thare.
23 Baletsa letimbuti letindvuna temnikelo wesono embikwenkhosi nasembikwelibandla babese babeka tandla etikwato.
24 Baphristi babulala letimbuti babese benta umnikelo wesono ngengati yato e-al’thare kuze onkhe ema-Israyeli abuyisane naNkulunkulu, ngobe inkhosi beyitsite umnikelo wekushiswa kanye nemnikelo wesono kufanele wentelwe onkhe ema-Israyeli.
25 Ngaleso sikhatsi, lenkhosi yatjela emaLevi kutsi eme endlini yaJehova aphetse emasimbali, tinsimbi temculo letinetintsambo nemahabhu+ alandzela umyalo waDavide,+ waGadi+ umboni wemibono wenkhosi newaNathani+ umphrofethi, ngobe lomyalo bewuchamuka kuJehova ngebaphrofethi bakhe.
26 Ngako emaLevi bekeme netinsimbi temculo taDavide kantsi baphristi bebeme nemacilongo.+
27 Hezekiya wabese ukhipha umyalo wekutsi akunikelwe umhlatjelo wekushiswa e-al’thare.+ Kwatsi nakucalwa kunikelwa lomhlatjelo, ingoma yaJehova nawo onkhe emacilongo kwacala, kulandzelwa tinsimbi temculo teNkhosi Davide yaka-Israyeli.
28 Bonkhe bantfu baguca ngesikhatsi lengoma ihlatjelwa futsi kukhala emacilongo. Konkhe loku kwachubeka waze waphela lomnikelo wekushiswa.
29 Batsi nje nabacedza kwenta lomnikelo, inkhosi nabo bonkhe lebebakanye nayo, baguca phansi bakhotsama.
30 INkhosi Hezekiya kanye netindvuna babese batjela emaLevi kutsi advumise Jehova ngemavi aDavide+ newa-Asafa+ umboni wemibono. Ngako badvumisa Nkulunkulu ngenjabulo lenkhulu futsi baguca phansi bakhotsama.
31 Hezekiya wabese utsi: “Nyalo njengobe senehlukaniselwe Jehova, wotani nitoletsa imihlatjelo neminikelo yekubonga endlini yaJehova.” Ngako labantfu bacala kuletsa imihlatjelo neminikelo yekubonga futsi wonkhe umuntfu lobekanenhlitiyo levumako, waletsa iminikelo yekushiswa.+
32 Iminikelo yekushiswa leyaletfwa ngulabantfu bekutinkhomo letingu-70, timvu letindvuna letingu-100, kanye nemazinyane etimvu lamadvuna langu-200. Konkhe bakuletsa kuJehova kwaba yiminikelo yekushiswa.+
33 Iminikelo lengcwele yaba tinkhomo letingu-600 netimvu letingu-3 000.
34 Bebabancane ngelinani baphristi lebebahlindza yonkhe leminikelo yekushiswa, ngako banakabo emaLevi babasita+ waze waphela lomsebenti kwaze kwaba ngulapho nebaphristi sebatingcwelisile,+ ngobe emaLevi bekacikelela kutsi ayatingcwelisa kwendlula baphristi.
35 Bekuneminikelo yekushiswa leminyenti,+ kanye nemanoni emihlatjelo yekuthula+ neminikelo yalokunatfwako lehambisana naleminikelo yekushiswa.+ Ngaleyo ndlela, lomsebenti wendlu yaJehova wavuselelwa.
36 Ngako Hezekiya nabo bonkhe bantfu bajabula ngaloko Nkulunkulu weliciniso bekakusungulele labantfu,+ ngobe konkhe loku bekwenteke ngekushesha lokukhulu.
