Genesisi 16:1-16
-
Hagari na-Ishmayeli (1-16)
16 Sarayi umfati wa-Abrama bekangabatfoli bantfwana,+ kodvwa bekanencekukati lengumGibhithe lebitwa ngekutsi nguHagari.+
2 Ngaleso sizatfu, Sarayi watsi ku-Abrama: “Ngite bantfwana, ngobe Jehova ungivalile kutsi ngitale. Ngicela kutsi ulale nencekukati yami, mhlawumbe nje ingangitalela bantfwana.”+ Ngako Abrama wakulalela loko lobekushiwo nguSarayi.
3 Ngesikhatsi Abrama asahleti iminyaka lengu-10 eveni laseKhenani, Sarayi wamniketa Hagari, incekukati yakhe lengumGibhithe kutsi abe ngumfati wakhe.
4 Ngako Abrama waya ecansini naHagari futsi wakhulelwa. Ngesikhatsi Hagari abona kutsi sewukhulelwe, wabese ucala kwedzelela Sarayi.
5 Sarayi watsi ku-Abrama: “Lobuhlungu lengibuvako bubangelwe nguwe. Ngimi lokunike incekukati yami,* kodvwa itsite nayibona kutsi seyikhulelwe, yacala kungedzelela. Shengatsi Jehova angehlulela kutsi ngubani loneliphutsa emkhatsini wami nawe.”
6 Ngako Abrama watsi kuSarayi: “Lencekukati yakho ingaphansi kwakho. Yenta kuyo nobe yini locabanga kutsi ikahle.” Sarayi wabese uhlupha Hagari, ngaleso sizatfu, wagcina abalekile.
7 Ngekuhamba kwesikhatsi, ingilosi yaJehova yatfola Hagari ehlane, emtfonjeni losendleleni leya eShuri.+
8 Yatsi kuye: “Hagari, ncekukati yaSarayi, uchamukaphi futsi ulibangisephi?” Hagari wayiphendvula watsi: “Ngibalekela Sarayi.”
9 Lengilosi yaJehova yatsi kuye: “Hamba ubuyele kuSarayi futsi utitfobe kuye.”
10 Lengilosi yaJehova yabese itsi: “Nkulunkulu utayandzisa kakhulu intalelwane yakho, kuze kube lukhuni ngisho nekuyibala.”+
11 Lengilosi yaJehova yachubeka yatsi: “Njengobe ukhulelwe, utawutala indvodzana. Kufanele uyibite ngekutsi ngu-Ishmayeli,* ngobe Jehova uvile ngekuhlupheka kwakho.
12 Njengembongolo yesiganga,* kute umuntfu lotawukhona kuyicondzisa. Itawumelana nabo bonkhe bantfu futsi nabo bamelane nayo. Itawuhlala edvute nabo bonkhe bomnakabo.”*
13 Ngako Hagari wadvumisa libito laJehova labekhuluma naye, watsi: “UnguNkulunkulu lobona tonkhe tintfo.”*+ Wambita kanjalo ngobe abetitjela atsi: “Kusho kutsi vele ngimbonile loyo longibonako.”
14 Kungako lomtfombo wabitwa ngekutsi yiBheri-lahayi-rohi.* (Usemkhatsini weKhadeshi neBheredi.)
15 Ngako Hagari watalela Abrama indvodzana, futsi Abrama wabita lendvodzana yakhe lebeyitelwe nguHagari ngekutsi ngu-Ishmayeli.+
16 Abrama abeneminyaka lengu-86 ngesikhatsi Hagari atala Ishmayeli.
Imibhalo lengentansi
^ NgesiHebheru kutsi, “lobeke incekukati yami esifubeni sakho.”
^ Lokusho kutsi “Nkulunkulu Uyeva.”
^ Labanye bantfu bacabanga kutsi lamavi asho lidvuba. Kungenteka achaza kungalawuleki.
^ Kungaphindze kubekwe ngekutsi, “itawuhlala ibatondza bonkhe bomnakabo.”
^ Nobe “UnguNkulunkulu longibonako.”
^ Lokusho kutsi “Umtfombo WaLoyo Lophilako Longibonako.”
