Hagayi 2:1-23
2 Ngenyanga yesi-7, ngelilanga lesi-21 lalenyanga, livi laJehova lefika kuHagayi+ umphrofethi, latsi:
2 “Ngicela ubute Zerubhabheli+ umbusi wakaJuda+ loyindvodzana yaSheyaltiyeli, naJoshuwa+ umphristi lophakeme loyindvodzana yaJehosadaki+ kanye nabo bonkhe bantfu, utsi:
3 ‘Ngubani losasele emkhatsini wenu lowabona lendlu* isenenkhatimulo yangaphambili?+ Seniyibona injani nyalo? Anicabangi nje kutsi ayisilutfo nayicatsaniswa nenkhatimulo yayo yangaphambili?’+
4 “‘Kodvwa nyalo, cina wena Zerubhabheli nawe wena mphristi lophakeme Joshuwa, loyindvodzana yaJehosadaki,’ kusho Jehova.
“‘Cinani nonkhe nine bantfu bakulelive,+ nisebente,’ kusho Jehova.
“‘Ngobe mine nginani,’+ kusho Jehova wemabutfo.
5 ‘Khumbulani loko lenganetsembisa kona ngesikhatsi niphuma eGibhithe,+ futsi nanyalo solo ngiyanicondzisa ngemandla ami.+ Ningesabi.’”+
6 “Ngobe naku Jehova wemabutfo lakushoko: ‘Ngesikhashana nje ngitawuphindze nginyakatise emazulu, umhlaba, lwandle kanye nendzawo leyomile.’+
7 “‘Ngitawunyakatisa tonkhe tive futsi tintfo letiligugu* tato tonkhe tive titawungena;+ mine ngitawugcwalisa lendlu ngenkhatimulo,’+ kusho Jehova wemabutfo.
8 “‘Lisiliva ngelami neligolide ngelami,’ kusho Jehova wemabutfo.
9 “‘Inkhatimulo yalendlu yesikhatsi lesitako itawuba yinkhulu kwendlula yesikhatsi lesendlulile,’+ kusho Jehova wemabutfo.
“‘Kulendzawo ngitawenta kube nekuthula,’+ kusho Jehova wemabutfo.”
10 Ngelilanga lesi-24 lenyanga yesi-9, ngemnyaka wesibili wekubusa kwaDariyusi, livi laJehova lefika kuHagayi+ umphrofethi, latsi:
11 “Naku lokushiwo nguJehova wemabutfo: ‘Ngicela nibute baphristi mayelana nalomtsetfo:+
12 “Nangabe umuntfu aphetse inyama lengcwele ngemphetfo wengubo yakhe, bese lengubo yakhe itsintsa sinkhwa nobe sitjulo nobe liwayini nobe emafutsa nanome nguluphi luhlobo lwekudla, kutawuba ngcwele yini?”’”
Labaphristi baphendvula batsi: “Cha!”
13 Hagayi waphindze wabuta watsi: “Nangabe umuntfu longcoliswe kutsi bekabambe sidvumbu bese utsintsa nobe ngutiphi taletintfo, titawungcola yini?”+
Labaphristi baphendvula batsi: “Titawungcola.”
14 Hagayi wase utsi: “‘Banjalo-ke labantfu, sinjalo lesive embikwami futsi injalo yonkhe nemisebenti yetandla tabo; nome ngabe yini labayiletsako ingcolile,’ kusho Jehova.
15 “‘Kodvwa nyalo, ngicela ninakisise naku kusukela lamuhla kuchubeke: Ngaphambi kwekutsi litje libekwe etikwalelinye ethempelini laJehova,+
16 bekunjani? Ngesikhatsi umuntfu lotsite eta endvundvumeni yalokutinhlavu alindzele kutfola emasaka langu-20, watfola langu-10; lomunye weta emphongolweni weliwayini alindzele kutfola emajeke langu-50 kodvwa watfola langu-20;+
17 nganijezisa nine kanye nayo yonkhe imisebenti yetandla tenu ngesifo lesicotfula konkhe lokuhlanyelwe, ngesifo lesibulala titjalo+ kanye nangesangcotfo, kodvwa kute emkhatsini wenu lowabuya kimi,’ kusho Jehova.
18 “‘Ngiyanicela, cabangisisani ngaloku, kusukela lamuhla kuchubeke, kusukela ngelilanga lesi-24 lenyanga yesi-9, kusukela ngelilanga lesabekwa ngalo sisekelo selithempeli laJehova;+ cabangisisani nanganaku:
19 Isekhona nje inhlanyelo encolobaneni?*+ Angitsi sisengakatseli sihlahla semagilebisi, semkhiwa, semahananandza* kanye nesemncumo? Kusukela lamuhla, ngitanitfumelela sibusiso.’”+
20 Livi laJehova lefika kwesibili kuHagayi ngelilanga lesi-24 laleyo nyanga,+ latsi:
21 “Tjela Zerubhabheli umbusi wakaJuda utsi: ‘Ngitawunyakatisa emazulu kanye nemhlaba.+
22 Ngitawuketula sihlalo sebukhosi semibuso, ngiphindze ngincobe nemandla emibuso yetive;+ ngitawuhlasela tincola temphi kanye nebagibeli bato, onkhe emahhashi atawufa, futsi bonkhe bagibeli bawo batawubulalana ngenkemba.’”+
23 “‘Ngalelolanga,’ kusho Jehova wemabutfo, ‘wena Zerubhabheli+ nceku yami, ndvodzana yaSheyaltiyeli,’+ kusho Jehova, ‘ngitawukwenta ube njengendandatho leligugu, ngobe ngikukhetsile,’ kusho Jehova wemabutfo.”
Imibhalo lengentansi
^ Nobe “lithempeli.”
^ Nobe “letitsandzekako.”
^ Nobe “emaphomegranathi.”
^ Nobe “emgodzini wekubeka lokutinhlavu.”
