Hezekeli 10:1-22
10 Njengobe bengisabukile, ngabona lokutsite lokunjengelitje lesafire kungetulu kwemkhatsi, ngenhla kwetinhloko temakherubhi futsi bekufana nesihlalo sebukhosi.+
2 Nkulunkulu wabese utjela lendvodza lebeyigcoke timphahla telineni+ watsi: “Ngena emkhatsini walamasondvo,+ ngephansi kwalamakherubhi ugcwalise tandla takho ngemalahle lavutsako+ lasemkhatsini walamakherubhi, uwajikijele kulelidolobha.”+ Ngako yangena njengobe bengibukele.
3 Lamakherubhi bekeme ngesekudla selithempeli nayingena lendvodza, futsi kwagcwala lifu kulo lonkhe libala lelingekhatsi.
4 Inkhatimulo yaJehova+ yesuka kulamakherubhi yaya emnyango welithempeli. Kancane kancane lelithempeli lagcwala lifu+ futsi lelibala lagcwala kukhanya lokukhulu kwenkhatimulo yaJehova.
5 Umsindvo wetimphiko talamakherubhi bewuvakala nasebaleni lelingephandle, futsi bewuvakala shengatsi livi laNkulunkulu Somandla nakakhuluma.+
6 Wabese utjela lendvodza lebeyigcoke timphahla telineni watsi: “Tsatsa umlilo emkhatsini walamasondvo, emkhatsini walamakherubhi.” Ngako yangena, yema eceleni kwelisondvo.
7 Linye lalamakherubhi lase lelulela sandla salo kulomlilo lobewusemkhatsini wawo.+ Latsatsa lomunye walomlilo lawubeka etandleni talendvodza lebeyigcoke timphahla telineni+ futsi yona yawutsatsa yaphumela ngephandle.
8 Lamakherubhi abenetintfo letinjengetandla temuntfu ngephansi kwetimphiko tawo.+
9 Ngisebukile, ngabona emasondvo lamane eceleni kwalamakherubhi, lisondvo ngalinye beliseceleni kwelikherubhi ngalinye, futsi lamasondvo bekabonakala acwebetela njengelitje lekhrisolithe.+
10 Omane abebukeka ngendlela lefanako, abebonakala shengatsi kunelisondvo ekhatsi kulelinye.
11 Nawahamba, abekhona kuya kuto totine tinhlangotsi angagucuki, ngobe abeya lapho kubheka khona inhloko ngaphandle kwekugucuka.
12 Imitimba yalamakherubhi, imihlane yawo, tandla tawo kanye netimphiko tawo bekunemehlo yonkhe indzawo. Omane bewanemasondvo eceleni futsi lamasondvo bewagcwele emehlo yonkhe indzawo.+
13 Ngalokuphatselene nalamasondvo, ngeva livi lebelitsi kuwo: “Masondvo hambani!”
14 Ngalinye* belinebuso lobune. Buso bekucala bebubelikherubhi, besibili bubemuntfu, besitsatfu bubelibhubesi futsi besine bubelusweti.+
15 Lamakherubhi bekahle aphakama, bekanguletidalwa letiphilako* lebengitibone emfuleni iKhebari,+
16 abetsi nakahamba, lamasondvo ahambisane nawo; futsi abetsi nakaphakamisa timphiko tawo kuze abe ngetulu kwemhlabatsi, lamasondvo abengagucuki nobe asuke eceleni kwawo.+
17 Nawema lamakherubhi, nalamasondvo bekema; nawaphakama, nalamasondvo bekaphakama kanye nawo, ngobe umoya lebewusebenta kuletidalwa letiphilako* bewukhona nakulamasondvo.
18 Inkhatimulo yaJehova+ yabese iyesuka emnyango welithempeli yayokuma ngetulu kwalamakherubhi.+
19 Njengobe ngichubeka ngibukile, lamakherubhi aphakamisa timphiko tawo, aphakama emhlabatsini. Lamasondvo bekaseceleni kwawo nawaphakama. Lamakherubhi afike ema egedeni lelisemphumalanga lendlu yaJehova, futsi inkhatimulo yaNkulunkulu wema-Israyeli beyingetulu kwawo.+
20 Leti bekunguletidalwa* letiphilako lebengitibone ngaphansi kwesihlalo sebukhosi saNkulunkulu wema-Israyeli, emfuleni iKhebari.+ Ngako ngabese ngiyabona kutsi tingemakherubhi.
21 Totine betinebuso lobune, tinetimphiko letine futsi ngephansi kwetimphiko tato bekunalokufana netandla temuntfu.+
22 Buso bato bebufana nebuso lengabubona ngasemfuleni iKhebari.+ Nguleso naleso besihamba sicondze ngco embili.+
Imibhalo lengentansi
^ Lokusho, likherubhi ngalinye.
^ NgesiHebheru kutsi, “bekangulesidalwa lesiphilako.”
^ NgesiHebheru kutsi, “umoya wesidalwa lesiphilako.”
^ NgesiHebheru kutsi, “Lesi ngulesidalwa lesiphilako.”
