Hezekeli 12:1-28
12 Livi laJehova laphindze lefika kimi latsi:
2 “Ndvodzana yemuntfu, uhlala emkhatsini webantfu labavukelako. Banemehlo ekubona kodvwa ababoni, banetindlebe tekuva kodvwa abeva+ ngobe babantfu labavukelako.+
3 Wena ndvodzana yemuntfu, tilungiselele sikhwama sekuya ekutfunjweni. Kufanele uhambe uye ekutfunjweni emini bakubukile. Ubohamba uye ekutfunjweni usuka lapho uhlala khona uye kulenye indzawo bakubukile. Mhlawumbe batakunaka loko ngisho nobe babantfu labavukelako.
4 Ubokhiphela ngephandle umtfwalo wakho lopakishelwe kuya ekutfunjweni emini bakubukile. Ngemuva kwaloko, kufanele uhambe njengemuntfu loya ekutfunjweni, uhambe kusihlwa bakubukile.+
5 “Ubobhobosa imbobo elubondzeni bakubukile, utsatse timphahla takho uphume ngalembobo.+
6 Basekubukile, ubobeka timphahla takho ecebeni uhambe nato ebumnyameni. Ubombonya buso bakho kuze ungaboni phansi ngobe ngenta kutsi ube luphawu kubantfu baka-Israyeli.”+
7 Ngenta njengobe ngitjeliwe. Emini ngakhipha umtfwalo wami lobewunjengemtfwalo wekuya ekutfunjweni, futsi naselishonile ngabhobosa imbobo elubondzeni ngesandla. Nasekumnyama, ngatsatsa timphahla tami ngatibeka ecebeni babukile.
8 Livi laJehova laphindze lefika kimi ekuseni latsi:
9 “Ndvodzana yemuntfu, bantfu baka-Israyeli, lokubantfu labavukelako, abakakubuti yini batsi: ‘Wentani?’
10 Ubotsi: ‘Naku lokushiwo yiNkhosi Lephakeme Jehova: “Lesimemetelo siya kumholi+ loseJerusalema nakubo bonkhe bantfu baka-Israyeli labakulelidolobha.”’
11 “Ubotsi: ‘Ngiluphawu kini.+ Njengobe nje ngentile, nguloko-ke lokutawenteka kubo. Batawuhamba baye ekutfunjweni, batfunjwe.+
12 Lomholi losemkhatsini wabo utawetfwala timphahla takhe ecebeni ahambe kumnyama. Utawubhobosa imbobo elubondzeni futsi atsatse timphahla takhe aphume ngalembobo.+ Utawuvala buso bakhe kuze angaboni phansi.’
13 Ngitakwehlisela linethi lami lekutsiya kuye, futsi litambamba.+ Ngitawubese ngimyisa eBhabhulona, eveni lemaKhaledi, kodvwa angeke alibone; utawufike afele lapho.+
14 Bonkhe labamsingatsile, lokungulabo labamsitako kanye nemasotja akhe ngitabahlakatela kuto tonkhe tindzawo;+ futsi ngitawuhoshula inkemba kuze ngibagijimise.+
15 Batawukwati kutsi mine nginguJehova nasengibahlakatela etiveni, futsi ngibahlakatela emaveni lehlukahlukene.
16 Kodvwa ngitawuvikela labambalwa kutsi bangabulawa yinkemba, nendlala kanye nesifo lesibulalako, kuze bakhone kukhuluma ngayo yonkhe imikhuba yabo leyenyanyekako etiveni labatawuya kuto; bayawukwati kutsi mine nginguJehova.”
17 Livi laJehova laphindze lefika kimi latsi:
18 “Ndvodzana yemuntfu, kufanele udle sinkhwa sakho uchachateliswa kwesaba, unatse nemanti akho wetfukile futsi ukhatsatekile.+
19 Ubotsi kulabantfu bakulelive: ‘Naku lokushiwo yiNkhosi Lephakeme Jehova kubantfu baseJerusalema labaseveni laka-Israyeli: “Bayawudla sinkhwa sabo ngekukhatsateka, banatse emanti abo ngekwesaba,+ ngobe lelive liyawusala lingenalutfo ngenca yebudlova babo bonkhe labantfu labahlala kulo.+
20 Lamadolobha lanebantfu ayawubhidlitwa, nalelive liyawuba yintfo lengenamsebenti;+ futsi niyawukwati kutsi mine nginguJehova.”’”+
21 Livi laJehova laphindze lefika kimi latsi:
22 “Ndvodzana yemuntfu, ka-Israyeli ninesaga lesitsi: ‘Kuhamba emalanga kepha yonkhe imibono ayifezeki.’+
23 Ngako-ke ubotsi kubo: ‘Naku lokushiwo yiNkhosi Lephakeme Jehova: “Ngitawubangela kutsi lesaga siphele futsi ngeke baphindze basisebentise ka-Israyeli.”’ Kodvwa batjele utsi: ‘Emalanga asasondzele+ lapho yonkhe imibono iyawufezeka.’
24 Ngobe ka-Israyeli angeke kuphindze kube nemphrofethi lonemanga nobe lophengula ngekutsenga emehlo ebantfu.*+
25 ‘“Ngobe mine Jehova ngitawukhuluma. Konkhe lengikukhulumile kutawufezeka ngekushesha.+ Awu nine bantfu labavukelako, ngemalanga enu+ ngitawusho livi futsi ngilifeze,” kusho iNkhosi Lephakeme Jehova.’”
26 Livi laJehova laphindze lefika kimi latsi:
27 “Ndvodzana yemuntfu, bantfu* baka-Israyeli batsi: ‘Lombono lawubonako wesikhatsi lesidze lesitako kusukela nyalo, futsi uphrofetha ngetintfo letitakwenteka kadzeni.’+
28 Ngako-ke, batjele utsi: ‘Naku lokushiwo yiNkhosi Lephakeme Jehova: “‘Kute livi lami lelitawephuta; konkhe lengikushoko kutakwenteka,’ kusho iNkhosi Lephakeme Jehova.”’”
