Hezekeli 24:1-27
24 Livi laJehova laphindze lefika kimi ngemnyaka wesi-9, ngenyanga yesi-10, ngelilanga lesi-10 laleyo nyanga, latsi:
2 “Ndvodzana yemuntfu, libhale phansi lelilanga* leli, lelilanga lona leli. Ngalelilanga leli inkhosi yaseBhabhulona yacala kuhlasela iJerusalema.+
3 Shano saga* mayelana nalabantfu labavukelako, utsi ngabo:
“‘INkhosi Lephakeme Jehova itsi:
“Beka libhodo lekupheka* etiko; libeke emlilweni bese utsela emanti.+
4 Faka emacatsa enyama kulelibhodo,+ onkhe abe ngemacatsa lamahle,Faka umlente nemkhono; uligcwalise ngematsambo lancono kakhulu.
5 Tsatsa imvu lekhuluphele emhlambini+ bese ufaka tinkhuni ngephansi kwalelibhodo tilitungelete.
Bilisa lamacatsa, upheke nalamatsambo lakulo.”’
6 “Ngako-ke iNkhosi Lephakeme Jehova itsi:
‘Maye kulelidolobha lelicitsa ingati,+ lokulibhodo lelitfombile, kutfomba kwalo lokungakasuswa!
Litfulule, ukhokhe licatsa ngalinye ngalinye,+ ungawashayeli inkatho.
7 Ngobe ingati lecitfwe ngulelidolobha isekhatsi kulo;+ lelidolobha liyitfululele edvwaleni lelingenalutfo.
Alikayitfululeli phansi emhlabatsini kuze liyimbonye ngemhlabatsi.+
8 Kuze ngivuse lulaka lwami khona ngitotiphindziselela,Ngibeke ingati yalo edvwaleni lelimanyatelako nalelingenalutfoKuze lengati ibe sebaleni.’+
9 “Ngako-ke, iNkhosi Lephakeme Jehova itsi:
‘Maye kulelidolobha lelicitsa ingati!+
Ngitawubeka tinkhuni tibe yinyandza.
10 Butsisa ndzawonye tinkhuni bese ubasa umlilo,Ubilise lenyama ivutfwe kahle bese ucitsa lomsobho, uyekele lamatsambo ashe aze abe mnyama.
11 Beka lelibhodo lelingenalutfo emalahleni lize lishiseKuze lelitfusi lelakhiwe ngalo libe bovu ngenca yekushisa.
Kungcola kwalo kutawuncibilikela ngekhatsi kulo+ futsi kutfomba kwalo kutawuphela.
12 Kuyadzinana futsi kuyakhatsalisana,Ngobe kutfomba lokukhulu angeke kusuke.+
Lijikijele emlilweni nekutfomba kwalo!’
13 “‘Kungcola kwakho bekubangelwa kutiphatsa kwakho lokubi.+ Ngetama kukugeza kodvwa bewungahlobi ekungcoleni kwakho. Angeke uhlobe ize ibohle intfukutselo lenginayo ngawe.+
14 Mine Jehova lucobo lwami ngikhulumile. Kutakwenteka nakanjani. Ngitawutsatsa sinyatselo ngaphandle kwekutibamba, ngaphandle kweluvelo, futsi angeke ngitisole.+ Batakwehlulela kuye ngaloko lokwentile nangetindlela takho,’ kusho iNkhosi Lephakeme Jehova.”
15 Livi laJehova laphindze lefika kimi latsi:
16 “Ndvodzana yemuntfu, ngekucwabita kweliso ngitawusisusa kuwe sithandwa sakho.+ Akukafaneli ulile;* akukafaneli uve buhlungu nome ukhale tinyembeti.
17 Khalela ngekhatsi futsi ungawagcini emasiko ekuzilela labafile.+ Bopha umshuculo wakho+ ufake netincabule takho.+ Ungasivali silevu sakho+ futsi ungasidli sinkhwa lotasiletselwa ngulabanye.”*+
18 Ngakhuluma nalabantfu ekuseni, futsi kusihlwa umfati wami washona. Ngako ekuseni ngenta njengobe bengitjeliwe.
19 Labantfu bebatsi kimi: “Utasitjela yini kutsi singena ngani tsine kuletintfo lotentako?”
20 Ngabaphendvula ngatsi: “Livi laJehova lifikile kimi latsi:
21 ‘Tjela bantfu baka-Israyeli utsi: “Naku lokushiwo yiNkhosi Lephakeme Jehova: ‘Sekusele kancane kutsi ngiyingcolise indzawo yami lengcwele,+ lenitigcabha ngayo nalenijabulako ngayo futsi leniyitsandza kakhulu.* Emadvodzana enu nemadvodzakati enu lenawashiya atawubulawa ngenkemba.+
22 Ngemuva kwaloko, kutawumele nente njengobe ngentile. Akukafaneli nivale tilevu tenu, ningasidli nesinkhwa lenisiletselwe ngulabanye.+
23 Nitawufaka imishuculo yenu etinhloko netincabule tenu etinyaweni. Angeke nilile nome nikhale. Esikhundleni saloko niyawukondza, nidzinwe ngenca yemaphutsa enu+ futsi nitawubukana nilile.
24 Hezekeli sewube luphawu lwenu.+ Nitakwenta njengobe entile. Nakwenteka loko, nitawukwati kutsi mine ngiyiNkhosi Lephakeme Jehova.’”’”
25 “Mayelana nawe ndvodzana yemuntfu, ngelilanga lengiyosusa ngalo indzawo yabo levikelekile, leyintfo lenhle lebabangela injabulo, intfo letsandzekako kubo, nalabayitsandza* kakhulu, kanye nemadvodzana abo nemadvodzakati abo,+
26 utawutfola umbiko kumuntfu lophunyulile.+
27 Ngalelolanga, uyawuvula umlomo wakho ukhulume nalona lophunyulile futsi angeke usabindza.+ Wena uyawuba luphawu kubo futsi batawukwati kutsi mine nginguJehova.”
Imibhalo lengentansi
^ NgesiHebheru kutsi, “ligama lalelilanga.”
^ Nobe “inkondlo.”
^ Nobe “libhodo lekupheka lelinemlomo lomkhulu.”
^ Nobe “utishaye esifubeni.”
^ NgesiHebheru kutsi, “sinkhwa sebantfu.”
^ Nobe “lefiswa ngumphefumulo wenu.”
^ Nobe “lefiswa ngumphefumulo wabo.”
