Hezekeli 25:1-17
25 Livi laJehova laphindze lefika kimi latsi:
2 “Ndvodzana yemuntfu, bhekisa buso bakho ngakuma-Amoni,+ bese uyaphrofetha ngalokumelene nawo.+
3 Naku lokufanele ukusho ngema-Amoni: ‘Lalelani nali livi leNkhosi Lephakeme Jehova. Naku lokushiwo yiNkhosi Lephakeme Jehova: “Ngenca yekutsi natsi: ‘Awuva-ke!’ ngesikhatsi kungcoliswa indzawo yami lengcwele, ngesikhatsi live laka-Israyeli licotfuliwe, nangesikhatsi bantfu bakaJuda batfunjwa,
4 ngako-ke ngitaninikela kubantfu baseMphumalanga. Batawakha tinkambu letibiyelwe ngelubondza emkhatsini wenu futsi bamise emathende abo emkhatsini wenu. Batawudla titselo tenu, banatse nelubisi lwenu.
5 Ngitakwenta iRabha+ ibe lidlelo lemakamela, ngente live laka-Amoni libe yindzawo yekuphumula yemihlambi; futsi nitakwati kutsi mine nginguJehova.”’”
6 “Naku lokushiwo yiNkhosi Lephakeme Jehova: ‘Ngesizatfu sekutsi nishaye tandla,+ nagidza futsi najabula* niphukuta live laka-Israyeli ngenca yalokulehlele,+
7 mine-ke ngitakwelula sandla sami simelane nani kuze ngininikele etiveni titsatse tintfo tenu. Ngitanisusa emkhatsini webantfu futsi nginibhubhise etiveni.+ Ngitanicotfula, futsi nitawukwati kutsi mine nginguJehova.’
8 “Naku lokushiwo yiNkhosi Lephakeme Jehova: ‘Ngenca yekutsi bakaMowabi+ nebaseSeyiri+ batsite: “Sive sakaJuda sifana naletinye tive,”
9 ngako-ke ngitawenta emadolobha lasemnceleni welive lakaMowabi asale ebaleni, lokuyiBhethi-jeshimothi, iBhali-meyoni neKhiriyathayimu,+ lokungemadolobha langumhlobiso welive lakhona.
10 Ngitawunikela live lakaMowabi kanye nema-Amoni kubantfu baseMphumalanga,+ kuze ema-Amoni angaphindzi akhunjulwe emkhatsini wetive.+
11 Ngitawukhipha sehlulelo kubantfu bakaMowabi,+ futsi bayawukwati kutsi mine nginguJehova.’
12 “Naku lokushiwo yiNkhosi Lephakeme Jehova: ‘Sive saka-Edomu sitiphindziselele esiveni sakaJuda futsi sitibangele licala lelikhulu ngekutsi sitiphindziselele kuso;+
13 ngako-ke naku lokushiwo yiNkhosi Lephakeme Jehova: “Ngitawuphindze ngelule sandla sami simelane na-Edomu, ngibulale bantfu nemfuyo, ngiphindze ngimente asale ete lutfo.+ Bantfu bakhona batawubulawa ngenkemba kusukela eThemani kuze kuyofika eDedani.+
14 ‘Ngitatiphindziselela ku-Edomu ngisebentisa sandla sebantfu bami ema-Israyeli.+ Atawuletsa intfukutselo yami nelulaka lwami ku-Edomu kuze ayati imphindziselo yami,’+ kusho iNkhosi Lephakeme Jehova.”’
15 “Naku lokushiwo yiNkhosi Lephakeme Jehova: ‘Ngenca yenzondo yawo lengapheli, emaFilisti bekafuna kuletsa imphindziselo nembhubhiso ngelunya.+
16 Ngako-ke naku lokushiwo yiNkhosi Lephakeme Jehova: “Ngelula sandla sami kuze simelane nemaFilisti+ futsi ngitawucotfula emaKherethi,+ ngibulale nalabasele labahlala elugwini lwelwandle.+
17 Ngitawukhipha imphindziselo lenkhulu nesijeziso lesihambisana nentfukutselo, futsi batawukwati kutsi mine nginguJehova nasengitiphindziselela kubo.”’”
Imibhalo lengentansi
^ Nobe “imiphefumulo yenu yajabula.”
