Hezekeli 45:1-25
45 “‘Nawehlukanisa lelive kuze libe lifa,+ kufanele unikele kuJehova ngesicephu salo sibe yindzawo lengcwele.+ Budze baso kufanele bube ngemakhilomitha langaba ngu-12 nesigamu* kantsi bubanti baso kufanele bube ngemakhilomitha langaba sihlanu.*+ Sonkhe leso sicephu* sitawuba yindzawo lengcwele.
2 Ekhatsi kulesicephu kutawehlukaniswa indzawo lesikwele letawuba yindzawo lengcwele, itawuba ngemamitha langaba ngu-250* budze nebubanti,+ futsi itawuba nemadlelo langemamitha langaba ngu-25* luhlangotsi ngalunye.+
3 Ngekhatsi kulendzawo lotayikala, kufanele uphindze ukale budze lobungemakhilomitha langaba ngu-12 nesigamu nebubanti lobungemakhilomitha langaba sihlanu, futsi ngekhatsi kwayo kutawuba nelithempeli, lokuyintfo lengcwelengcwele.
4 Itawuba sicephu lesingcwele sendzawo yebaphristi,+ lokutisebenti tasethempelini letisebentela Jehova.+ Itawuba yindzawo yetindlu tabo kanye nendzawo lengcwele yelithempeli.
5 “‘EmaLevi latisebenti tasethempelini, atawuba nendzawo lengemakhilomitha langaba ngu-12 nesigamu budze nalangaba sihlanu bubanti,+ futsi atawuba nemakamelo ekudlela langu-20*+ latawuba lifa lawo.
6 “‘Indzawo yelidolobha kufanele ibe ngemakhilomitha langaba ngu-12 nesigamu budze (lelingana nemnikelo longcwele) nemakhilomitha langaba mabili nesigamu* bubanti.+ Itawuba yaso sonkhe sive saka-Israyeli.
7 “‘Umholi utawuba nendzawo kuto totimbili tinhlangotsi tendzawo lengumnikelo longcwele nasendzaweni leyabelwe kutsi ibe yelidolobha. Kufanele ibe seceleni kwendzawo lengumnikelo longcwele nendzawo yelidolobha. Itawuba seluhlangotsini lolusenshonalanga nalolusemphumalanga. Budze bayo lobungasemnceleni losenshonalanga kuyofika emnceleni losemphumalanga kutawulingana nencenye leyabelwe sive sinye saka-Israyeli.+
8 Lendzawo itawuba lifa lakhe ka-Israyeli. Baholi bami angeke baphindze baphatse kabi bantfu bami+ futsi batawuniketa bantfu baka-Israyeli lelive, kuye ngetive tabo.’+
9 “Naku lokushiwo yiNkhosi Lephakeme Jehova: ‘Senente kakhulu nine baholi baka-Israyeli!’
“‘Sale nibuyekela lobudlova benu nekucindzetela labanye, futsi nente lokuhle nalokulungile.+ Yekelani kutsatsa tintfo tebantfu bami,’+ kusho iNkhosi Lephakeme Jehova.
10 ‘Kufanele nisebentise tikali letingito, sikali lesingiso seli-efa* neseli-bath.*+
11 Kufanele kube nesikali lesibekiwe seli-efa neseli-bath. Sikali seli-bath kufanele setfwale kwelishumi kwelihomeri,* nesikali seli-efa kufanele setfwale kwelishumi kwelihomeri. Lihomeri kufanele kube ngilo sikali lesibekiwe sekukala.
12 Lishekeli*+ kufanele libe ngemagera* langu-20. Emashekeli langu-20 kanye nemashekeli langu-25 nalangu-15 atakwakha limane* linye.’
13 “‘Nangu umnikelo lokufanele uwunikele: Kunye kulokusitfupha kweli-efa kulihomeri linye lemabele kanye nakunye kulokusitfupha kweli-efa kulihomeri linye lebhali.
14 Linani lemafutsa lokufanele linikelwe kufanele lilingane neli-bath. Li-bath lilingana nekwelishumi kweli-cor,* futsi ema-bath langu-10 alihomeri ngobe ema-bath langu-10 alingana nelihomeri.
15 Emhlambini wemfuyo yaka-Israyeli, kufanele kunikelwe ngemvu yinye kuletingu-200. Loko kutawuba kwemnikelo walokutinhlavu,+ umnikelo wekushiswa+ kanye nemihlatjelo yekuthula+ kuze kuhlawulelwe labantfu,’+ kusho iNkhosi Lephakeme Jehova.
16 “‘Bonkhe bantfu bakulelive batawunikela lomnikelo+ kumholi waka-Israyeli.
17 Kodvwa lomholi kufanele aletse lokutawuba yiminikelo yekushiswa,+ ngumnikelo walokutinhlavu+ nalokutawuba ngumnikelo walokunatfwako ngesikhatsi semikhosi,+ lokuyimikhosi yekwetfwasa kwenyanga, nemaSabatha,+ nayo yonkhe imikhosi lebekiwe yebantfu baka-Israyeli.+ Kufanele aletse nalokutawuba ngumnikelo wesono, ngumnikelo walokutinhlavu, ngumnikelo wekushiswa kanye nemihlatjelo yekuthula, kuze kuhlawulelwe bantfu baka-Israyeli.’
18 “INkhosi Lephakeme Jehova itsi: ‘Ngenyanga yekucala, ngelilanga lekucala laleyo nyanga kufanele utsatse inkunzana lephile kahle emhlambini, bese uhlanta lendzawo lengcwele esonweni.+
19 Umphristi kufanele atsatse lenye yengati yalomnikelo wesono ayinindze etinsikeni tesivalo selithempeli,+ emakoneni omane entfo letungeletako yekusimisa yeli-al’thare kanye nasensikeni yeligede lelibala lelingekhatsi.
20 Nguloko lokufanele ukwente ngelilanga lesi-7 laleyo nyanga, ukwentele nobe ngubani lowona ngeliphutsa nobe ngenca yekungati;+ futsi kufanele uhlante lelithempeli esonweni.+
21 “‘Ngenyanga yekucala, ngelilanga lesi-14 laleyo nyanga, kufanele ugubhe umkhosi weliPhasika.+ Kufanele kudliwe sinkhwa lesite imvubelo emalanga langu-7.+
22 Ngalelolanga, umholi utawunikela ngenkunzana ibe ngumnikelo wakhe wesono newabo bonkhe bantfu labakulelive.+
23 Kulamalanga langu-7 alomkhosi utawuletsa tinkunzana letiphile kahle letingu-7 netimvu letindvuna letiphile kahle letingu-7, lilanga ngalinye kuze kube ngumnikelo wekushiswa kuJehova,+ futsi utawuletsa imbuti lendvuna lilanga ngalinye ibe ngumnikelo wesono.
24 Kufanele aphindze anikele ngeli-efa lelihambisana nenkunzana kanye neli-efa lelihambisana nemvu lendvuna libe ngumnikelo walokutinhlavu, kuhlanganise nelihini* lemafutsa lelitawuhambisana neli-efa linye.
25 “‘Kufanele ente lokufanako ngenyanga yesi-7, ngelilanga lesi-15 laleyo nyanga, kuze kuphele emalanga langu-7 alomkhosi,+ kufanele aletse lokutawuba ngumnikelo wesono, ngumnikelo wekushiswa nemnikelo walokutinhlavu kanye nemafutsa.’”
Imibhalo lengentansi
^ Nobe “Yonkhe imincele yaso.”
^ NgesiHebheru kutsi, “emakhyubhitha langu-10 000.” Fundza Sandzisanchazo B14.
^ NgesiHebheru kutsi, “emakhyubhitha langu-25 000.” Loku kusho emakhyubhitha lamadze. Fundza Sandzisanchazo B14.
^ NgesiHebheru kutsi, “emakhyubhitha langu-500.” Fundza Sandzisanchazo B14.
^ NgesiHebheru kutsi, “emakhyubhitha langu-50.” Fundza Sandzisanchazo B14.
^ Nobe “emakamelo langu-20.”
^ NgesiHebheru kutsi, “emakhyubhitha langu-5 000.” Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo B14.
^ Nobe “limina.” Fundza Sandzisanchazo B14.
^ Fundza Sandzisanchazo B14.
^ Fundza Sandzisanchazo B14.
