Imisebenti Yebaphostoli 27:1-44
27 Njengobe bekuncunywe kutsi sihambe ngemkhumbi siye eTaliyane,+ Pawula naletinye tiboshwa bendluliselwa endvuneni yemasotja yelibutfo la-Agustusi, lokutsiwa nguJuliyusi.
2 Sagibela umkhumbi lobewusuka e-Adramithiyamu uya etikhumulweni temikhumbi letingaselugwini lwase-Asiya, sase siyahamba; Aristakhusi+ lobekawaseMasedoniya esuka eThesalonika bekahamba natsi.
3 Ngakusasa sefika eSidoni, futsi Juliyusi wamphatsa kahle Pawula, wamvumela nekutsi aye kubangani bakhe kuze bamnakekele.
4 Nasisuka lapho sahamba ngemkhumbi sagudla eSiphrosi, lapho umoya bewungeke usitfole khona njengobe bewuphambana natsi.
5 Sahamba elwandle ngaseSilisiya nasePhamfiliya, safike sema esikhumulweni semikhumbi saseMira leseLisiya.
6 Satsi nasesilapho, indvuna yemasotja yakhandza umkhumbi lobewusuka e-Alekzandriya uya eTaliyane, yasigibelisa kuwo.
7 Ngemuva kwekuhamba kancane emalangana, sefika kalukhuni eKhinidusi, futsi njengobe umoya bewusivimbela, sagudla ngaseKhrethe leseSalmone lapho bewungeke usitfole khona.
8 Sahamba kamatima saze sefika endzaweni lokutsiwa Sikhumulo Sekuphepha, lesedvute nelidolobha laseLaseya.
9 Besekwendlule sikhatsi lesidze, sekuyingoti nekuhamba, ngobe ngisho nekuzila kudla lobekwentiwa ngeLilanga Lekubuyisana+ besekwendlulile. Ngako Pawula waveta umbono wakhe,
10 watsi kubo: “Madvodza, ngiyabona kutsi loluhambo lutawuba yingoti futsi kutawuba nemonakalo lomkhulu, hhayi nje kulomkhumbi nemtfwalo lokuwo kuphela, kodvwa nasetimphilweni tetfu.”
11 Nanobe kunjalo, indvuna yemasotja yalalela sikhulu semkhumbi nemnikati wawo esikhundleni sekulalela loko lobekushiwo nguPawula.
12 Njengobe bekuyingoti kuhlala kulesikhumulo semikhumbi ebusika, labanyenti batsi akuchutjekwe nendlela kuze babone kutsi bangefika yini eFeniksi, lokusikhumulo semikhumbi lesiseKhrethe lesivulekela ngasenyakatfo lesemphumalanga nangaseningizimu lesemphumalanga, bese bahlala lapho ebusika.
13 Ngesikhatsi kuhhusha umoya waseningizimu besebacabanga kutsi bebatawufika lapho bebafuna kuya khona, ngako bakhuphula lihhuka,* bagudla lugu ngaseKhrethe.
14 Kodvwa ngemuva kwesikhashana kwaba nesiphepho lesikhulu lokutsiwa nguYurokhwilo.*
15 Njengobe umkhumbi bewushayeka ngemandla futsi ungasakhoni nekuchubeka uhamba ngenca yemoya, sawuyekela wahanjiswa ngumoya.
16 Sagudla ngasesihlengeni lesincane lesibitwa ngekutsi yiKhawuda lapho umoya bewungeke usitfole khona, kodvwa sacishe sehluleka kubamba sikebhe* lebesingemuva emkhunjini.
17 Ngemuva kwekusikhuphulela emkhunjini, bacala kucinisa lomkhumbi ngekuwubopha ngetintsambo, futsi njengobe bebesaba kutsi bangabhajwa esihlabatsini lesingaselugwini lweLibhiya,* bakhumula tintsambo letibamba liseyili, umoya wase uyawuhambisa.
18 Kodvwa ngesizatfu sekutsi lesiphepho besisolo siwuphephula lomkhumbi, ngakusasa baphungula umtfwalo lobewukuwo.
19 Kwatsi ngelilanga lesitsatfu balahla letinye tintsambo talomkhumbi.
20 Njengobe besekwendlule emalanga lamanyenti lilanga netinkhanyeti kungaveli, nalesiphepho solo sinemandla, saphelelwa litsemba lekutsi sisengasindza.
21 Nasekwendlule sikhatsi lesidze labantfu bangadli, Pawula wasukuma wema embikwabo watsi: “Madvodza, kube nangilalela sangesuki eKhrethe, bekungeke kube nalomonakalo longaka.+
22 Kodvwa-ke banini nesibindzi ngobe kute ngisho namunye kini lotawulimala, ngaphandle nje kwalomkhumbi.
23 Ngobe ebusuku ingilosi+ yaNkulunkulu lengimkhontako nalengimkhotsamelako ifike yema eceleni kwami,
24 yatsi: ‘Ungesabi Pawula. Wena kufanele ume embikwaKhesari,+ futsi Nkulunkulu utabasindzisa bonkhe laba lohamba nabo.’
25 Ngako-ke, banini nesibindzi ngobe ngiyetsemba kutsi Nkulunkulu utawenta njengobe angitjelile.
26 Nanobe kunjalo, sitawuphukelwa ngumkhumbi kulesinye sihlenge.”+
27 Besekubusuku besi-14 solo sipheshulwa ngumoya eLwandle lwase-Adriya. Ekhatsi nebusuku, tisebenti tasemkhunjini tabona shengatsi sisondzela elugwini.
28 Takala kutsi kushona kangakanani, tatfola kutsi bekungemamitha langaba ngu-36;* ngako tachubeka libangana taphindze takala tatfola kutsi bekungemamitha langaba ngu-27.*
29 Njengobe betesaba kutsi lomkhumbi ungaphahlateka emadvwaleni, letisebenti tehlisa emahhuka lamane ngemuva kwemkhumbi, futsi besetifisa kutsi kuse.
30 Ngesikhatsi tetama kubaleka emkhunjini futsi tehlisela lesikebhe elwandle, tenta shengatsi tifuna kwehlisa emahhuka alomkhumbi langembili,
31 Pawula wakhuluma nendvuna yemasotja kanye nemasotja ayo, watsi: “Nangabe lamadvodza ehla kulomkhumbi, ngeke nisindze.”+
32 Ngako lamasotja atijuba tintsambo lebetibambe lesikebhe, sase siwela elwandle.
33 Nasekutakusa, Pawula wancenga bonkhe labantfu kutsi badle, watsi: “Lamuhla selilanga lesi-14 solo nilindzile futsi ningadli lutfo.
34 Ngako ngiyanicela kutsi nidle ngobe loku kutawusita nine; futsi kute ngisho nalunye lunwele etinhloko tenu lolutawunyamalala.”
35 Nakacedza kusho loku, watsatsa sinkhwa wathantaza kuNkulunkulu embikwabo bonkhe, wasihlephula wase uyadla.
36 Bonkhe baba nesibindzi, nabo base bayadla.
37 Sesisonkhe lebesisemkhunjini besingu-276.
38 Batsi nasebadle besutsa, bajika kolo elwandle kuze baphungule umtfwalo lobewukulomkhumbi.+
39 Nasekusile, abazange balubone lugu+ kodvwa babona indzawo lebeyinesihlabatsi lapho bebatimisele kutsi bawumise khona umkhumbi.
40 Ngako batijuba tintsambo temahhuka, tawela elwandle, bakhumula netintsambo temiphini base baphakamisa liseyili kuze umoya uchube lomkhumbi uze ufike elugwini.
41 Ngesikhatsi bashayisa indvundvuma yesihlabatsi, umkhumbi wabhajwa futsi lingembili lawo labambeka wangasakhoni kuhamba, kodvwa lingemuva lawo lafahlatwa ngemagagasi laba ticucu.+
42 Emasotja atsi nakabona loku, ancuma kubulala letiboshwa kuze kube bete lebesingahlamba futsi sibaleke.
43 Kodvwa indvuna yemasotja beyitimisele kusindzisa Pawula, ngako yawavimba ekwenteni loko. Yatjela labo lebebakwati kuhlamba kutsi abatijike elwandle, bahlambe baze bayofika elugwini.
44 Lalabanye bebatawulandzela bahamba ngemapulango nangeticucu temkhumbi. Ngako bonkhe befika elugwini baphephile.+
Imibhalo lengentansi
^ Leli bekulihhuka lekubamba umkhumbi.
^ Lokusho, umoya lomkhulu lobewusuka enyakatfo lengasemphumalanga.
^ Lesi sikebhe lesincane lesisetjentiselwa kusindzisa bantfu.
^ NgesiGriki kutsi, “lesingaseSiritisi.” Fundza Tinchazelo Temagama.
^ NgesiGriki kutsi, “ema-fathom langu-20.” Fundza Sandzisanchazo B14.
^ NgesiGriki kutsi, “ema-fathom langu-15.” Fundza Sandzisanchazo B14.
