Isaya 42:1-25
42 Nayi inceku yami+ lengiyisekelako!
Inceku yami lengiyikhetsile,*+ inceku yami lengiyemukele!+
Ngifake umoya wami kuyo;+Itawehlulela tive ngekulunga.+
2 Angeke imemete nobe iphakamise livi layo,Futsi angeke yente livi layo livakale esitaladini.+
3 Kute umhlanga lofohlokile letawephula,Kute intsambo yesibane lelotitako letayicisha.+
Itawetsembeka futsi yehlulele ngekulunga.+
4 Angeke iphelelwe ngemandla nobe idzinwe kuze kube ngulapho iletsa kulunga emhlabeni;+Tichingi solo timele umtsetfo* wayo.
5 Naku lokushiwo nguNkulunkulu weliciniso Jehova,UMdali wemazulu, loMkhulu, lowelula emazulu,+Loyo lowendlala umhlaba nemkhicito wawo,+Loyo lobanika umoya bantfu labahlala kuwo+Abanikete umoya labo labahamba etikwawo,+ utsi:
6 “Mine Jehova ngikubite ngekulunga;Ngibambe sandla sakho.
Ngitakuvikela futsi utawuba sivumelwane emkhatsini wami nalabantfu+Nekukhanya kwetive,+
7 Kuze wena uvule emehlo alabangaboni,+Ukhulule siboshwa lesisejele lelisemgodziniKanye nalabo labahleti ebumnyameni labangaphandle kwelijele.+
8 Mine nginguJehova. Lelo libito lami;Kute lengitamniketa inkhatimulo yami,*Futsi ludvumo lwami angeke ngilunikete tithico letibatiwe.+
9 Bukani, tintfo takucala tifikile tendlula;Nyalo ngimemetela tintfo letinsha.
Nginitjela ngato tisengakenteki.”+
10 Hlabelelani Jehova ingoma lensha,+Hlabelelani ludvumo lwakhe emikhawulweni yemhlaba,+Nine lenehlela elwandle nako konkhe lokugcwele kulo,Nine tichingi kanye nebantfu labahlala kuto.+
11 Lihlane kanye nemadolobha alo akumemete,+Ayimemete indzawo lapho kuhlala khona sive semaKhedari.+
Loko lokuhlala edvwaleni akumemete ngenjabulo;Akumemete kuseticongweni tetintsaba.
12 Akukhatimulise JehovaKumemetele neludvumo lwakhe etichingini.+
13 Jehova utawuphuma njengendvodza lenemandla.+
Utawuvusa inshisekelo yakhe njengelisotja lelilichawe.+
Utawumemeta, yebo, utawukhipha umsindvo wasemphini;Utativeta anemandla kunetitsa takhe.+
14 “Sengithule sikhatsi lesidze.
Bengisolo ngithulile futsi ngitibambile.
Njengemfati lobelekako,Ngitawucuma, ngihefutele, ngiphindze ngidvonse umoya kakhulu; konkhe ngitawukwenta ngasikhatsi sinye.
15 Ngitawubhidlita tintsaba nemagcumaNgomise konkhe lokumile kuto.
Ngitawugucula imifula ibe tichingiNgiphindze ngomise titiba letigcwele umhlanga.+
16 Ngitawuhola labangaboni emehlweni ngendlela labangayati+Ngibabangele kutsi bahambe etindleleni labangakatejwayeli.+
Ngitawushintja bumnyama lobusembikwabo bube kukhanya+Ngiphindze ngishintje indzawo lemaginjoginjo ngiyente ibe yindzawo lebekile.+
Nguloku lengitabentela kona futsi angeke ngibalahle.”
17 Titsa titawujikiswa futsi titawuhlaziswa kakhulu,Leto letetsembele etithicweni letibatiwe,Leto letitsi etithicweni tensimbi:* “Nibonkulunkulu betfu.”+
18 Lalelani nine leningeva etindlebeni;Bukani nibone nine labangaboni emehlweni.+
19 Ngubani longaboni emehlweni ngaphandle kwenceku yami,Ngubani longeva etindlebeni njengesitfunywa lengisitfumako?
Ngubani longaboni emehlweni njengaloyo lotfole umvuzo,Nalongaboni emehlweni njengesitfunywa saJehova?+
20 Ubona tintfo letinyenti kodvwa awuhlali ulindzile.
Uvule tindlebe takho, kodvwa awulaleli.+
21 Ngenca yekulunga kwakhe,Jehova kumjabulisile kwenta umtsetfo* ube mkhulu nekuwukhatimulisa.
22 Laba bantfu labatsatselwe tintfo tabo baphindze bebelwa;+Bonkhe bavaleleke emigodzini futsi babhace emajele.+
Batsatselwe tintfo tabo futsi kute nalongabasindzisa,+Bebelwe netintfo tabo futsi kute umuntfu lobekangatsi: “Tibuyiseleni emuva!”
23 Ngubani lamkhatsini wenu lotawukuva loko?
Ngubani lotawunaka aphindze alalele esikhatsini lesiseta?
24 Ngubani lonikele Jakobe kubantfu labangemasela,Lonikele Israyeli kubantfu labatsatsa tintfo talabanye?
Akusuye yini Jehova, Loyo lesimonile?
Balile kuhamba etindleleni takhe,Nemtsetfo* wakhe abakawugcini.+
25 Ngako abesolo atfululela intfukutselo yakhe kuye,Atfululela lulaka lwakhe nentfukutselo yakhe yemphi.+
Yacotfula konkhe lobekudvutane naye, kodvwa akazange anake.+
Yamvutsela kodvwa abesolo angakufaki enhlitiyweni.+
Imibhalo lengentansi
^ Nobe “umphefumulo wami loyikhetsile.”
^ Nobe “sicondziso.”
^ Nobe “Angiyihlanganyeli namuntfu inkhatimulo yami.”
^ Nobe “tithico letincibilikisiwe.”
^ Nobe “sicondziso.”
^ Nobe “Sicondziso.”
