Isaya 44:1-28
44 “Nyalo, lalela wena Jakobe nceku yami,Nawe wena Israyeli lengikukhetsile.+
2 Naku lokushiwo nguJehova,UMdali wakho naLoyo lowakubumba,+Lobekakusita kusukela usesiswini:*
‘Ungesabi nceku yami Jakobe,+Nawe Jeshuruni,*+ lengikukhetsile.
3 Ngobe ngiyawumtselela emanti umuntfu lowomile*+Ngibangele kutsi kugelete imifudlana endzaweni leyomile.
Ngiyawutfululela umoya wami entalelwaneni* yakho+Nebantfwana bakho ngibatfululele sibusiso sami.
4 Bayawuhluma njengetjani lobuluhlata,+Nanjengetihlahla tasesihosheni* ngasemifudlaneni yemanti.
5 Lomunye uyawutsi: “Mine ngiwaJehova.”+
Lomunye uyawutibita ngelibito laJakobe,Bese kutsi lomunye abhale esandleni sakhe atsi: “NgiwaJehova.”
Futsi uyawutibita ngelibito la-Israyeli.’
6 Naku lokushiwo nguJehova,INkhosi ya-Israyeli+ neMhlengi wakhe,+ Jehova wemabutfo utsi:
‘Mine ngiwekucala futsi ngiwekugcina.+
Kute lomunye Nkulunkulu ngaphandle kwami.+
7 Ngubani lofana nami?+
Akakhulume kuvakale, angitjele futsi anginike nebufakazi baloko!+
Ukhona yini lobekakhona kusukela ngesikhatsi lengasungula ngaso lesive kadzeni,Ngubani longasho loko lokusetaNaloko lokutawenteka?
8 Ningesabi,Ningetfuki.+
Angikanitjeli yini kusenesikhatsi ngaphindze ngamemetela?
Nine nibofakazi bami.+
Ukhona yini lomunye Nkulunkulu ngaphandle kwami?
Cha, kute lelinye Lidvwala;+ kute lengilatiko.’”
9 Bonkhe labenta tithico letibatiwe abasilutfo,Futsi tintfo labatitsandzako angeke tibasite ngalutfo.+
Njengabofakazi bato, atiboni lutfo futsi atati lutfo,+Ngako labo labatentile, batawuhlazeka.+
10 Ngubani lotakwakha nkulunkulu nome abumbe sithico sensimbi*Lesingazuzisi ngalutfo?+
11 Bonkhe labatihlanganisa naye batawuhlazeka!+
Labo lababata tithico babantfu nje.
Bonkhe abahlangane ndzawonye, beme etindzaweni tabo.
Batakwesaba baphindze batselwe ngelihlazo kanye kanye.
12 Umuntfu losebenta ngensimbi usebentisa emalahle kuze alolonge lensimbi ngelithuluzi lakhe.*
Uyayakha ngemahhamela,Asebentise nesandla sakhe lesinemandla.+
Bese uyalamba aphelelwe ngemandla;Akanatsi manti futsi uyadzinwa.
13 Umbati welula intsambo yekukala, kuze advwebe ipulani yako asebentise ishoki lebovuUsebentisa lishizolo futsi akukale ngekhampasi.
Ukwenta kube nesimo semuntfu,+Kufanane nemuntfu,Entele kutsi kutewuhlaliswa endlini.*+
14 Kunaloyo umsebenti wakhe lokukugawula imisedari.
Ukhetsa luhlobo lolutsite lwesihlahla, um-okhi,Uwuvumela kutsi ukhule ucine emkhatsini wetihlahla telihlatsi.+
Uhlanyela sihlahla* futsi sikhuliswe yimvula.
15 Sibese siba tinkhuni letisetjentiswa ngumuntfu kuze abase umlilo.
Utsatsa incenye yaso kuze otse;Ubasa umlilo abhake sinkhwa.
Uphindze akhe ngaso nkulunkulu, futsi amkhonte.
Uyasibata sibe sithico bese ukhotsama embikwaso.+
16 Ihhafu yaso uyibasa emlilweni;Ngaleyo hhafu wosa inyama latayidla esutse.
Uphindze abase ngaso umlilo wekotsa bese utsi:
“Awuva-ke! Ngaze ngafutfumala njengobe ngotsa lomlilo.”
17 Kodvwa ubata nkulunkulu ngencenye yaso lesele, ente sithico lesibatiwe.
Uyasikhotsamela futsi asikhonte.
Uthantaza kuso atsi:
“Ngisindzise ngobe ungunkulunkulu wami.”+
18 Abati lutfo, abacondzi lutfo,+Ngobe emehlo abo avaleke ngci futsi ababoni,Netinhlitiyo tabo aticondzisisi.
19 Kute locabanga ngako enhlitiyweni yakheKute nalonelwati nobe kucondza, lotsi:
“Ihhafu yaso ngibase ngayo umlilo,Ngemalahle aso ngibhake sinkhwa ngosa nenyama kuze ngidle.
Kufanele yini kutsi ngisebentise incenye yaso lesele kuze ngakhe intfo leyenyanyekako?+
Kufanele yini ngikhonte sigodvo* lesigawulwe esihlahleni?”
20 Udla umlotsa.
Inhlitiyo yakhe lembi imphambukisile.
Akakhoni kutisindzisa* futsi akasho atsi:
“Ngiphetse intfo lengenamsebenti esandleni sami sangesekudla.”
21 “Khumbula letintfo wena Jakobe, nawe wena Israyeli,Ngobe uyinceku yami.
Ngakubumba futsi uyinceku yami.+
Awu Israyeli, angeke ngikukhohlwe.+
22 Ngiyakwesula tiphambeko takho kube shengatsi ngitesula ngelifu+Netono takho ngiyawutesula kube shengatsi ngitesula ngelifu lelikhulu.
Buya kimi, ngobe ngitakutsenga kabusha.+
23 Memetani ngenjabulo nine mazulu,Ngobe Jehova utsetse sinyatselo!
Memetani ngemsindvo wekuncoba, nine lenisemajukujukwini emhlaba!
Memetani ngenjabulo nine tintsaba,+Nani mahlatsi kanye nato tonkhe tihlahla!
Ngobe Jehova umhlengile Jakobe,Futsi ukhombisa buhle bakhe ku-Israyeli.”+
24 Naku lokushiwo nguJehova, uMhlengi wakho,+Lowakubumba kusukela usesiswini, utsi:
“Mine nginguJehova lodale tonkhe tintfo.
Ngimi matfupha lowelula emazulu,+Futsi ngimi lowendlala umhlaba.+
Ngubani lobekanami?
25 Ngibangela kutsi tingaphumeleli tintfo letishiwo baphrofethi bemanga,*Futsi ngimi lowenta bantfu lababiketela ngelikusasa kutsi bente njengetilima;+Loyo lodida tihlakaniphiEnte lwati lwato lube bulima;+
26 Loyo lowenta livi lenceku yakhe liphumeleleAphindze atigcwalise ngalokuphelele tintfo letaphrofethwa titfunywa takhe;+Loyo lotsi ngeJerusalema: ‘Kuyawuhlalwa kuyo,’+Atsi ngemadolobha akaJuda: ‘Ayawukwakhiwa kabusha,+Futsi ngiyawuvusetela tindzala tayo’;+
27 Loyo lotsi emantini lamanyenti: ‘Bohla,Ngitawomisa yonkhe imifula yakho’;+
28 Loyo lotsi ngaKhuresi:+ ‘Ungumelusi wami,Futsi utayenta yonkhe intsandvo yami’;+Loyo lotsi ngeJerusalema, ‘Iyawukwakhiwa kabusha,’Atsi ngelithempeli, ‘Sisekelo salo siyawubekwa.’”+
Imibhalo lengentansi
^ Nobe “kusukela watalwa.”
^ Lokusho kutsi “Lolungile,” leli ligama leliveta sigaba lesihloniphekile sa-Israyeli.
^ Nobe “indzawo lete emanti.”
^ NgesiHebheru kutsi, “inhlanyelo.”
^ Tatiwa ngekutsi ngema-poplar aseYufrathe.
^ Nobe “sithico lesincibilikisiwe.”
^ Nobe “bhusha.”
^ Nobe “endlini yetithico.”
^ NgesiNgisi kutsi, “laurel.” Lesi sihlahla lesihlala siluhlata futsi emacemba aso kuphekwa ngawo.
^ Nobe “sigodvo lesomile.”
^ Nobe “kusindzisa umphefumulo wakhe.”
^ Nobe “bantfu labakhuluma lokulite.”
