Kubase-Efesu 3:1-21
3 Ngaleso sizatfu, mine Pawula, ngisiboshwa+ saKhristu Jesu ngenca yenu nine bantfu betive.
2 Ngiyati kutsi nivile ngemsebenti lengiphatsiswe wona+ wekunisita kutsi nitfole umusa lomkhulu waNkulunkulu.
3 Nkulunkulu wangembulela imfihlo lengcwele njengobe nje nganibhalela kafishane ekucaleni.
4 Ngako-ke nanikufundza loku, nitayibona indlela lengiyicondza ngayo imfihlo lengcwele+ yaKhristu.
5 Kuletinye titukulwane lemfihlo ayizange yembulwe kubantfu ngendlela leseyembulwe ngayo ngemoya kubaphostoli bakhe labangcwele nakubaphrofethi.+
6 Lemfihlo ikutsi bantfu betive kufanele babe tindlalifa kanye natsi, babe ngemalunga emtimba+ kanye natsi, futsi bahlanganyele natsi esetsembisweni ngekuba sebunyeni naKhristu Jesu nangenca yetindzaba letimnandzi.
7 Ngako ngaba sisebenti saloku ngenca yemusa lomkhulu Nkulunkulu langikhombisa wona ngemandla akhe.+
8 Ngisho nobe ngingulomncane kwendlula lophansi kunabo bonkhe labangcwele,+ Nkulunkulu wangentela umusa lomkhulu+ kuze ngishumayele kubantfu betive ngetindzaba letimnandzi letimayelana nemcebo waKhristu longaphenyeki,
9 ngiphindze ngente bantfu babone indlela lesebenta ngayo lemfihlo lengcwele+ lebeyifihlwe kuNkulunkulu sikhatsi lesidze, lokunguye lowadala tonkhe tintfo.
10 Loku kwentelwa kutsi ngelibandla,+ babusi labasezulwini kanye nalabo labanemagunya ezulwini bati ngekuhlakanipha kwaNkulunkulu lokuvetwa ngetindlela letehlukahlukene.+
11 Loku kuvumelana nenjongo yaphakadze layenta ngaKhristu,+ lokunguJesu iNkhosi yetfu,
12 futsi ngekukholwa kwetfu kuye sitfole lenkhululeko yekukhuluma+ neyekusondzela kuNkulunkulu ngekuciniseka.
13 Ngako ngicela kutsi lokuhlupheka lengibhekana nako ngenca yenu kunganicedzi emandla, ngobe loku kusho kukhatinyuliswa kwenu.+
14 Ngenca yaloko, ngiguca ngemadvolo kuBabe,
15 leyaba khona ngaye yonkhe imindeni ezulwini nasemhlabeni.
16 Ngithantazela kutsi ngebukhulu benkhatimulo yakhe ente tingcondvo netinhlitiyo tenu ticine+ ngemandla lavetwa ngumoya wakhe,
17 nekutsi ngekukholwa kwenu, Khristu ahlale etinhlitiyweni tenu ngelutsandvo.+ Shengatsi ningacina+ futsi nisime kulesisekelo,+
18 kuze kutsi nine kanye nabo bonkhe labangcwele nikwati kubucondzisisa bubanti, budze, kuphakama, kanye nekujula,
19 nilwati nelutsandvo lwaKhristu+ lolumcoka kakhulu kunelwati, khona nitogcwaliswa ngako konkhe lokuphelele Nkulunkulu lasinika kona.
20 Ngenca yemandla akhe lasebenta kitsi,+ Nkulunkulu angakwati kwenta lokukhulu kakhulu kunato tonkhe tintfo lesiticelako nobe lesiticabangako.+
21 Ngako kufanele advunyiswe ngelibandla nangaKhristu Jesu kuto tonkhe titukulwane kuze kube phakadze naphakadze. Amen.
