Leya KuFilemoni 1:1-25
1 Mine Pawula, siboshwa+ ngenca yaKhristu Jesu, ngikanye naThimothi+ umzalwane wetfu, ngibhalela Filemoni lotsandzekako nalosisebenti lesikanye natsi,
2 ngibhalela nadzadzewetfu Aphiya, na-Akhiphusi+ lolisotja lelikanye natsi, kanye nelibandla lelisendlini yakho:+
3 Shengatsi ningemukela umusa lomkhulu kanye nekuthula lokuvela kuNkulunkulu longuBabe wetfu, naseNkhosini Jesu Khristu.
4 Ngihlale ngimbonga Nkulunkulu wami nangikubeka emithantazweni,+
5 njengobe ngihlale ngiva ngekukholwa lonako nangendlela loyitsandza ngayo iNkhosi Jesu kanye nabo bonkhe labangcwele.
6 Ngithantazela kutsi kukholwa kwakho kanye nekwemakholwa lonawo kungakwenta utibone tonkhe tibusiso lesititfola ngaKhristu.
7 Ngajabula futsi ngadvudvuteka kakhulu nangiva ngelutsandvo lonalo, ngobe tinhlitiyo* talabangcwele takhutsateka ngenca yakho mzalwane.
8 Ngaleso sizatfu, nanome nginenkhululeko lenkhulu yekukhuluma nawe egameni laKhristu, futsi ngikutjele kutsi wente lokufanele,
9 kepha ngitawumane ngikuncenge ngelutsandvo, njengobe mine Pawula ngiyindvodza lekhulile, nalesiboshwa ngenca yaKhristu Jesu.
10 Ngiyakuncenga mayelana nemntfwana wami Onesimuse, lengaba ngubabe wakhe ngesikhatsi ngisejele.*+
11 Ekucaleni bekangasilo lusito kuwe, kodvwa nyalo sewulusito kuwe nakimi.
12 Sengimbuyisela kuwe, njengobe ngimtsandza kakhulu.
13 Bengingatsandza kumgcina anami kuze achubeke angisita esikhundleni sakho njengobe ngiboshelwe tindzaba letimnandzi.+
14 Kodvwa kute lengitakwenta ngingakavunyelwa nguwe, kuze lokuhle lokwentako ungakwenti ngekucindzetelwa kepha ukwente ngekutitsandzela.+
15 Mhlawumbe kungako bekakushiye sikhashana,* kuze atobuya abe nawe siphelane,
16 angasabi sigcili+ nje kuphela, kodvwa abe ngetulu kwesigcili, abe ngumzalwane lotsandzekako.+ Njengobe angulotsandzeka kangaka kimi, wena-ke utamtsandza kakhulu njengobe usihlobo sakhe enyameni naseNkhosini.
17 Nangabe-ke ungitsatsa njengemngani wakho,* naye memukele ngemusa ngendlela lobewungenta ngayo kimi.
18 Ngetulu kwaloko, nangabe akonile nobe kukhona lakukweleta kona, kwetfwese mine.
19 Mine Pawula ngibhala ngesandla sami, ngitsi: Ngitakubhadala—ngingasayiphatsi-ke yekutsi nawe ungikweleta kuphila kwakho.
20 Mzalwane wami, ngicela nalu lusito kuwe eNkhosini; khutsata inhlitiyo* yami kuKhristu.
21 Njengobe ngiciniseka kutsi utawulalela, ngikubhalela ngati kutsi utawenta lokungetulu kwaloko lengikushoko.
22 Naku lokunye, ngicela ungilungisele nendzawo yekuhlala, ngobe ngetsemba kutsi ngemithantazo yenu ngitawubuyela kini.*+
23 Ephafrasi+ losiboshwa lesikanye nami kuKhristu Jesu uyakuvusela,
24 naMakho, na-Aristakhusi,+ naDemasi,+ kanye naLukha,+ labatisebenti letikanye nami.
25 Shengatsi umusa lomkhulu weNkhosi Jesu Khristu ungaba nani njengoba nikhombisa umoya lomuhle.
Imibhalo lengentansi
^ Nobe “lutsandvo.”
^ NgesiGriki kutsi, “ngiboshiwe.”
^ NgesiGriki kutsi, “li-awa.”
^ NgesiGriki kutsi, “njengalohlanganyela kanye nawe.”
^ Nobe “lutsandvo.”
^ Nobe “ngitawukhululwa kuze ngite kini.”
