Kulandzisa KwaLukha 13:1-35
-
Nangabe ningaphendvuki, nitawubhujiswa (1-5)
-
Umfanekiso wesihlahla semkhiwa lesingatseli (6-9)
-
Umfati lokhubatekile uyelashwa ngeliSabatha (10-17)
-
Umfanekiso weluhlavu lwesinaphi newesibiliso (18-21)
-
Kudzinga kutimisela kute ungene ngemnyango lomncane (22-30)
-
Herodi yindvodza ‘lenjengemphungushe’ (31-33)
-
Jesu ukhalela iJerusalema (34, 35)
13 Ngaleso sikhatsi, kunalabatsite lababikela Jesu kutsi Pilatu ubulele bantfu baseGalile lebebenta imihlatjelo.
2 Ngako Jesu watsi kubo: “Nicabanga kutsi labo bantfu bebatoni letimbi kakhulu yini kunalabanye baseGalile ngobe bona behlelwe nguloku?
3 Cha, kodvwa ngiyanitjela ngitsi: Nangabe ningaphendvuki, nonkhe nitawubhujiswa njengabo.+
4 Nicabanga kutsi labantfu labangu-18 labagcotjwa ngumbhoshongo waseSilowama wababulala, bebanelicala lelikhulu yini kunabo bonkhe bantfu labahlala eJerusalema?
5 Cha, kodvwa ngiyanitjela ngitsi: Nangabe ningaphendvuki, nonkhe nitawubhujiswa njengabo.”
6 Wabese ubatjela umfanekiso watsi: “Lenye indvodza beyihlanyele sihlahla semkhiwa ensimini yayo yemagilebisi, futsi yeta yatofuna titselo kodvwa yangatfoli lutfo.+
7 Yatsi kulona lobekasebenta kulensimu: ‘Sekuphele iminyaka lemitsatfu ngifuna titselo kulesihlahla semkhiwa, kodvwa ngingatfoli lutfo. Ngako sijube! Kusasita ngani kutsi sichubeke sikhula lamhlabatsini sibe singatseli?’
8 Lesisebenti sayiphendvula satsi: ‘Nkhosi, mane usiyekele umnyaka munye, khona ngitogubhagubha emaceleni aso, ngifake umcuba.
9 Nangabe-ke sitawutsela, loko kutawuba kuhle, kodvwa nasingatseli, sewungasijuba.’”+
10 Jesu bekafundzisa kulelinye lisinagoge ngeliSabatha.
11 Bekunemfati lobekanelidimoni lebeselimgulise* iminyaka lengu-18, futsi besekagobene, angakhoni ngisho nekuma acondze.
12 Ngesikhatsi Jesu ambona, wambita watsi kuye: “Sewukhululiwe ekuguleni kwakho.”+
13 Wabeka tandla takhe kuye, futsi ngekushesha lomfati weluleka wase udvumisa Nkulunkulu.
14 Sikhulu selisinagoge satsi nasibona loku, satfukutsela ngobe Jesu bekaphilise lomfati ngeliSabatha. Sabese sitsi kulesicumbi sebantfu: “Asitfupha emalanga leningasebenta ngawo;+ ngako-ke nibota ngalawo malanga kutophiliswa, hhayi ngeliSabatha.”+
15 Kodvwa iNkhosi yasiphendvula yatsi: “Batentisi,+ akwenteki yini kutsi nine nikhiphe tinkhabi nobe timbongolo tenu esibayeni ngeliSabatha niyotinatsisa?+
16 Ngako-ke, bekungakafaneli yini kutsi lomfati, loyindvodzakati ya-Abrahama, nalobekaboshwe nguSathane iminyaka lengu-18 akhululwe ngeliSabatha?”
17 Watsi nakasho loko, bonkhe labo lebebamphikisa baba nemahloni, kodvwa lesicumbi sebantfu sajabula ngato tonkhe tintfo letimangalisako lebekatentile.+
18 Wachubeka watsi: “UMbuso waNkulunkulu ufana nani? Yini lengingawufanisa nayo?
19 Ufana nenhlanyelo yesinaphi, leyatsatfwa ngumuntfu wayihlanyela ensimini yakhe, futsi yakhula yaba sihlahla, netinyoni teta tahlala emagaleni aso.”+
20 Waphindze watsi: “UMbuso waNkulunkulu ngingawufanisa nani?
21 Ufana nesibiliso umfati lasitsatsa wasihlanganisa nafulaha lomnyenti,* yaze yabila yonkhe inhlama.”+
22 Wahamba wadzabula emadolobha nemadolobhana, afundzisa futsi achubeka neluhambo lwakhe loluya eJerusalema.
23 Lenye indvodza yatsi kuye: “Nkhosi, bambalwa yini labatawusindziswa?” Jesu waphendvula watsi:
24 “Timiseleni kuze ningene ngemnyango lomncane,+ ngobe ngiyanitjela ngitsi: Banyenti labatawufuna kungena kodvwa ngeke bakhone.
25 Lapho umnikati welikhaya sekasukumile wakhiya nemnyango, nitawukuma ngephandle ninconcotse nitsi: ‘Nkhosi, sivulele.’+ Kodvwa yena utaniphendvula atsi: ‘Anginati kutsi nivelaphi.’
26 Nine nitawutsi: ‘Besidla siphindze sinatse embikwakho, futsi wena bewufundzisa emigwacweni yetfu lemikhulu.’+
27 Kodvwa yena utawutsi kini: ‘Anginati kutsi nivelaphi. Sukani kimi, nonkhe nine lenenta lokubi!’
28 Kulapho nitawufikelwa khona kukhala nekugedletela kwematinyo, nanibona Abrahama, Isaka, Jakobe kanye nabo bonkhe baphrofethi eMbusweni waNkulunkulu. Kodvwa nine nitawube nilahlelwe ngephandle.+
29 Ngetulu kwaloko, bantfu batawuta basuka emphumalanga, enshonalanga, enyakatfo kanye naseningizimu, bahlale etafuleni eMbusweni waNkulunkulu.
30 Kukhona lababekugcina labatawuba bekucala, nalababekucala labatawuba bekugcina.”+
31 Ngaso leso sikhatsi, labanye baFarisi beta kuye batsi: “Hamba lapha, ngobe Herodi ufuna kukubulala.”
32 Watsi kubo: “Hambani niyotjela lendvodza lenebucili njengemphungushe, nitsi: ‘Lamuhla nakusasa ngitawukhipha emadimoni futsi ngelaphe bantfu, kutsi ngelilanga lesitsatfu ngicedze.’
33 Kodvwa-ke kufanele ngichubeke neluhambo lwami lamuhla, nakusasa kanye nangelilanga lelilandzelako, ngobe angeke kwenteke kutsi umphrofethi abulawelwe ngephandle kweJerusalema.+
34 Jerusalema, Jerusalema, wena lobulala baphrofethi nalobagcoba ngematje labo labatfunyelwe kuwe+—kukanyenti ngifuna kubagcogcela ndzawonye bantfwana bakho, kuhle kwesikhukhukati sigcogcela emantjwele aso ngaphansi kwetimphiko taso, kodvwa nine anizange nivume!+
35 Bukani-ke, indlu yenu seyishiywe nani.+ Ngako ngitsi kini: Ngeke nisangibona kuze kube ngulapho nitsi: ‘Ubusisiwe loyo lota ngelibito laJehova!’”*+
Imibhalo lengentansi
^ Nobe “lebelimente wakhubateka.”
^ NgesiGriki kutsi, “nemaseya lamatsatfu,” lokungaba ngemakhilogremu langu-10 afulaha. Liseya belilingana nemalitha langu-7.33.
^ Fundza Sandzisanchazo A5.
