Kulandzisa KwaLukha 15:1-32
15 Bonkhe batselisi kanye netoni beta kuJesu batomlalela.+
2 BaFarisi netati temtsetfo bebasolo banhhinhhitela batsi: “Lomuntfu wemukela toni aphindze adle nato.”
3 Ngako Jesu wabatjela umfanekiso watsi:
4 “Ase sitsi lapha kini kukhona lonetimvu letingu-100, bese kulahleka yinye, angeke yini atishiye emadlelweni leti letingu-99 ahambe ayofuna lena lelahlekile aze ayitfole?+
5 Nakayitfola, uyayetjatsa futsi ajabule.
6 Utsi nakefika ekhaya, abite bangani bakhe nabomakhelwane, atsi kubo: ‘Jabulani kanye nami, ngobe ngiyitfolile imvu yami lebeyilahlekile.’+
7 Ngalokufanako, ngitsi kini: Kutawuba nenjabulo lenkhulu ezulwini lapho soni sinye siphendvuka,+ kunaleyo lebakhona ngebantfu labalungile labangu-99 labangadzingi kuphendvuka.
8 “Nobe-ke ukhona yini umfati lonetinhlavu telisiliva* letingu-10, lokutsi nakalahlekelwa luhlavu* lunye, angakhanyisi sibane futsi atsanyele indlu yakhe alufunisise aze alutfole?
9 Nakalutfola, ubita bangani bakhe nabomakhelwane, atsi: ‘Jabulani kanye nami, ngobe ngilutfolile loluhlavu lwelisiliva* lobelulahlekile.’
10 Ngalokufanako, ngitsi kini: Tingilosi taNkulunkulu tiyajabula nakunesoni sinye lesiphendvukako.”+
11 Wabese utsi: “Indvodza letsite beyinemadvodzana lamabili.
12 Indvodzana lencane yatsi kubabe wayo: ‘Babe, nginike lifa lami.’ Ngako lobabe wawabela lifa lawo.
13 Kungakapheli ngisho nemalanga lamangakhi, lendvodzana lencane yatsatsa konkhe lokukwayo, yahamba yaya eveni lelikhashane, lapho yefika yalidlabhatisa khona ngekuphila imphilo yekonakala.*
14 Latsi naseliphelile lelifa, kwaba nendlala lenkhulu kulelo live, lendvodzana yase iyahlupheka.
15 Yahamba yayocela umsebenti kulomunye umuntfu wakulelo live, futsi wayinika umsebenti wekwelusa tingulube.+
16 Lendvodzana beyilamba, ifise ngisho nekudla imidvumba lebeyidliwa nguletingulube, ngobe bekute umuntfu lobekayipha kudla.
17 “Ngesikhatsi isanguluka, yatsi: ‘Tonkhe tisebenti tababe tidla tesutse, kodvwa mine ngibulawa yindlala!
18 Ngitawuhamba ngiye kubabe ngifike ngitsi: “Babe, ngonile kuNkulunkulu ezulwini nakuwe.
19 Akusangifaneli ngisho nekubitwa ngekutsi ngiyindvodzana yakho. Mane ungente lomunye wetisebenti takho.”’
20 Ngako yesuka yahamba yaya kubabe wayo. Babe wayo wayibona isesekhashane, wayihawukela, wagijima wefika wayigaca* futsi wayanga.
21 Yatsi kuye: ‘Babe, ngonile kuNkulunkulu ezulwini nakuwe.+ Akusangifaneli ngisho nekubitwa ngekutsi ngiyindvodzana yakho.’
22 Kodvwa babe wayo watsi etisebentini takhe: ‘Phangisani niletse ingubo lendze futsi lenhle kakhulu, nimgcokise yona, nifake indandatho emunweni wakhe, nimgcokise netincabule.
23 Tsatsani nelitfole lelikhuluphele, nilihlabe, kute sitewudla sijabule,
24 ngobe lendvodzana yami beyifile kodvwa seyiyaphila;+ beyilahlekile kodvwa seyitfolakele.’ Ngako base bayatijabulisa.
25 “Indvodzana yakhe lendzala beyisemasimini, ngesikhatsi ita ekhaya yeva umsindvo, kudlalwa umculo futsi kudanswa.
26 Yabita lesinye setisebenti yasibuta kutsi kwentekani.
27 Satsi kuyo: ‘Umnakenu ubuyile, futsi babe wakho umhlabele litfole lelikhuluphele, ngobe ubuye aphila.’*
28 Ngako yatfukutsela kakhulu yangafuni ngisho nekungena. Babe wayo weta wayincenga.
29 Yatsi kuye: ‘Mine ngikusebentele iminyaka leminyenti futsi angikase ngiyephule imiyalo yakho, kodvwa awukake sewungiphe ngisho nelizinyane lembuti kute ngitijabulise nebangani bami.
30 Kodvwa ngekushesha nje nayibuya lendvodzana yakho ledlabhatise* tintfo takho ikanye netingwadla, uyihlabele litfole lelikhuluphele.’
31 Babe wayo watsi kuyo: ‘Ndvodzana, wena bewusolo unami, futsi konkhe lokukwami ngekwakho.
32 Kepha bekufanele kutsi sibe nemcimbi futsi sijabule, ngobe umnakenu bekafile kodvwa sewuyaphila, futsi bekalahlekile kodvwa sewutfolakele.’”
Imibhalo lengentansi
^ NgesiGriki kutsi, “lonemadrakma.” Fundza Sandzisanchazo B14.
^ NgesiGriki kutsi, “lidrakma.” Fundza Sandzisanchazo B14.
^ NgesiGriki kutsi, “lelidrakma.” Fundza Sandzisanchazo B14.
^ Nobe “lebudlabha.”
^ NgesiGriki kutsi, “watijika entsanyeni yayo.”
^ Nobe “aphephile.”
^ NgesiGriki kutsi, “ledle tonkhe.”
