Zakhariya 14:1-21
-
Kukhonta kweliciniso kutawuncoba ngalokuphelele (1-21)
14 “Kunelilanga lelitako, lokulilanga laJehova, futsi ngaleso sikhatsi tintfo letitsetfwe kini* titawehlukaniswa embikwenu.
2 Tonkhe tive letimelene neJerusalema ngitatibutsisa ndzawonye kuze tiyokulwa. Lelidolobha litawuncotjwa, tindlu takhona titawutsatfwa futsi bafati bakhona batawudlwengulwa. Ihhafu yebantfu labahlala kulelidolobha itawutfunjwa, kodvwa labo labatawube basele angeke basuswe kulo.
3 “Jehova utawuphuma ayokulwa naletive+ njenganakalwa ngelilanga lemphi.+
4 Ngalelolanga utakuma ngetinyawo takhe eNtsabeni Yemincumo,+ lebukene neJerusalema ngasemphumalanga. INtsaba Yemincumo itawehlukana ekhatsi kusukela emphumalanga kuya enshonalanga,* bese kwakheka sihosha lesikhulu kakhulu. Incenye yalentsaba itawukhweshela enyakatfo, lelenye yona ikhweshele eningizimu.
5 Nitawubalekela kulesihosha lesisemkhatsini wetintsaba tami, ngobe lesihosha sitawufika ngisho nase-Aseli. Kutawudzingeka nibaleke njengobe nabaleka ngesikhatsi kutamatama umhlaba emalangeni a-Uziya inkhosi yakaJuda.+ Jehova Nkulunkulu utawuta atowehlulela, futsi bonkhe labangcwele batawube banaye.+
6 “Ngalelolanga kuyawuba bete kukhanya+ lokukhanya bha! Tintfo tiyawuma tinganyakati.*
7 Lelolanga liyawuba ngulelikhetsekile, futsi liyawatiwa ngekutsi lilanga laJehova.+ Angeke lihlukaniswe libe yimini nebusuku; ngisho nalapho kufika sikhatsi sekutsi kuhwalale, kuyawube solo kukhanya.
8 Ngalelolanga emanti ekuphila+ ayawugeleta aphuma eJerusalema,+ ihhafu yawo igeletele elwandle lolungasemphumalanga,*+ bese lelenye ihhafu igeletela elwandle lolungasenshonalanga.*+ Loku kuyawukwenteka ehlobo nasebusika.
9 Jehova uyawuba yiNkhosi emhlabeni wonkhe.+ Ngalelolanga, bonkhe bantfu bayawukhonta Jehova kuphela+ futsi badvumise libito lakhe yedvwa.+
10 “Lonkhe live liyawufana ne-Arabha,+ kusukela eGeba+ kuya eRimona+ leseningizimu yeJerusalema. IJerusalema iyawuphakanyiswa endzaweni yayo futsi bantfu bayawuhlala kuyo,+ kusukela eGedeni lakaBhenjamini+ kuya endzaweni yeliGede Lekucala, kuze kuyofika naseGedeni Lelisekoneni, bahlale kusukela eMbhoshongweni waHananeli+ kuye ematjeni enkhosi ekuhlutela liwayini.*
11 Bantfu bayawuhlala eJerusalema; futsi lelidolobha angeke liphindze libhujiswe,+ nebantfu bakhona bayawuhlala ngekuthula.+
12 “Nati-ke tifo Jehova latawutiletsela bonkhe bantfu labalwa neJerusalema:+ Umtimba wabo utawubola beme ngetinyawo tabo, emehlo abo atawubolela etingojeni tabo, nelulwimi lwabo lutawubolela emilonyeni yabo.
13 “Ngalelolanga, Jehova utawenta kutsi bonkhe besabe kakhulu; nguloyo naloyo utawudvumela umngani wakhe futsi batawuhlaselana bodvwana.+
14 Bantfu bakaJuda nabo batawuba nesandla kulemphi leseJerusalema; batawubutsa umcebo wato tonkhe tive letibatungeletile, lokuligolide nelisiliva lelinyenti, kanye netimphahla letinyenti.+
15 “Letifo titawuhlasela nemahhashi, iminyuzi, emakamela, timbongolo kanye nayo yonkhe imfuyo lesetinkambu tetitsa.
16 “Bonkhe labatawusindza kuto tonkhe letive letitawuta tihlasele iJerusalema batawukhuphukela khona umnyaka nemnyaka+ kuze bayokhonta* iNkhosi lenguJehova wemabutfo,+ bagubhe neMkhosi Wemadlangala.*+
17 Kodvwa nangabe ukhona kuletive longeke akhuphukele eJerusalema kuze ayokhonta iNkhosi lenguJehova wemabutfo, leso sive angeke siyitfole imvula.+
18 Nangabe bantfu baseGibhithe bangeke bakhuphukele kulelidolobha futsi bangene kulo, angeke bayitfole imvula. Esikhundleni saloko, Jehova utawenta kutsi bahlaselwe nguletifo letitawuhlasela tive letingayi kuyogubha uMkhosi Wemadlangala.
19 Lesi kutawuba sijeziso lesitawehlela iGibhithe nato tonkhe tive letingayi kuyogubha uMkhosi Wemadlangala.
20 “Ngalelolanga emagama latsi: ‘Bungcwele ngebaJehova’+ atawubhalwa etinsimbini letilenga emahhashini. Emabhodo ekupheka*+ lasendlini yaJehova atawuba ngcwele njengetindishi+ letisembikweli-al’thare.
21 Onkhe emabhodo ekupheka* laseJerusalema nalawo lakaJuda atawuba ngcwele futsi atawuba aJehova wemabutfo, bonkhe labo labenta umhlatjelo batawusebentisa lamanye awo kuze babilise lemihlatjelo. Ngalelolanga angeke aphindze abe khona umKhenani* endlini yaJehova wemabutfo.”+
Imibhalo lengentansi
^ Lokusho, lidolobha lokukhulunywa ngalo kuvesi 2.
^ NgesiHebheru kutsi, “elwandle.”
^ Nobe “titokoma,” kube ngatsi tigogwe lichwa.
^ Lokusho, Lwandle iMedithera.
^ Lokusho, Lwandle Lolufile.
^ Nobe “emigconyeni yekukhongetela liwayini.”
^ Nobe “Wetindzawo Tekuhlala Tesikhashana.”
^ Nobe “bayokhotsamela.”
^ Nobe “emabhodo lamakhulu.”
^ Nobe “emabhodo lamakhulu.”
^ Kungaphindze kubekwe ngekutsi, “umtsengisi.”
