Zakhariya 8:1-23
8 Jehova wemabutfo waphindze wakhuluma nami watsi:
2 “Naku lokushiwo nguJehova wemabutfo: ‘Nginenshisekelo lenkhulu ngeSiyoni,+ ngako ngitayivikela futsi ngitawube ngitfukutsele kakhulu nangiyilwela.’”
3 “Jehova utsi: ‘Ngitawubuyela eSiyoni,+ ngihlale eJerusalema.+ IJerusalema itawubitwa ngekutsi lidolobha leletsembekile,+ futsi intsaba yaJehova wemabutfo itawubitwa ngekutsi yintsaba lengcwele.’”+
4 “Jehova wemabutfo utsi: ‘Bantfu labagugile batawuphindze bahlale etimakethe taseJerusalema, nguloyo naloyo utawube aphetse ludvondvolo lwakhe njengobe neminyaka yakhe itawube seyihambile.*+
5 Kutawugcwala bantfwana labatawube batidlalela etimakethe talelidolobha.’”+
6 “Naku lokushiwo nguJehova wemabutfo: ‘Kulawo malanga, ngisho nobe bantfu labasele bangabona ngatsi letintfo angeke tenteke, kodvwa loko sekusho kutsi nami angeke ngikhone yini kutenta?’ kusho Jehova wemabutfo.”
7 “Jehova wemabutfo utsi: ‘Bantfu bami ngitabakhipha emaveni lasemphumalanga nalasenshonalanga.*+
8 Ngitabaletsa eJerusalema futsi batawuhlala khona;+ batawuba bantfu bami, mine ngitawuba nguNkulunkulu wabo+ lowetsembekile nalolungile.’”
9 “Naku lokushiwo nguJehova wemabutfo: ‘Banini nesibindzi+ nine leniwevako lamavi lakhulunywa baphrofethi,+ lokungemavi lafana nalawo lebekakhulunywe nakubekwa sisekelo sendlu yaJehova wemabutfo, ngesikhatsi kutawakhiwa lithempeli.
10 Ngobe ngaphambi kwaleso sikhatsi, bantfu bebasebenta, netilwane nato betisebenta,+ kepha bebangawutfoli umvuzo wabo. Ngenca yekutsi bekunesitsa, bekungakaphephi kuhamba ngobe mine bengente kutsi bonkhe bantfu bavukelane bodvwana.’
11 “Jehova wemabutfo utsi: ‘Kodvwa nyalo labantfu labasele angeke ngisabajezisa njengasemalangeni akadzeni.+
12 Ngobe batawuhlanyela inhlanyelo letawuletsa kuthula; sihlahla semagilebisi sitawutsela titselo taso, umhlaba ukhicite sivuno sawo,+ nemazulu ehlise ematolo awo. Ngitawenta kutsi tonkhe letintfo tibe lifa lalabantfu labasele.+
13 Njengobe tive betinicalekisa+ nine bantfu bakaJuda nani nine bantfu baka-Israyeli, kepha mine ngitanisindzisa futsi nitawuba sibusiso.+ Ningesabi!+ Banini nesibindzi.’+
14 “Jehova wemabutfo utsi: ‘“Ekucaleni bengitimisele kuniletsela inhlekelele ngenca yekutsi bokhokho benu bangitfukutselisa kakhulu, futsi bengingatisoli ngaloko,”+ kusho Jehova wemabutfo.
15 “Kepha nyalo sengitimisele kubentela lokuhle bantfu baseJerusalema nebantfu bakaJuda.+ Ngako-ke ningesabi!”’+
16 “‘Naku-ke lokufanele nikwente: Nibokhuluma liciniso kulomunye nalomunye,+ futsi nibowehlulela kahle emagedeni elidolobha kuze kwandze liciniso nekuthula.+
17 Ningacali nakhelane emacebo lamabi etinhlitiyweni+ tenu, futsi niboyekela* kufunga emanga,+ ngobe tonkhe letintfo ngiyatenyanya,’+ kusho Jehova.”
18 Jehova wemabutfo waphindze wakhuluma nami watsi:
19 “Naku lokushiwo nguJehova wemabutfo: ‘Tikhatsi tekuzila kudla leniba nato ngenyanga yesine,+ ngenyanga yesihlanu,+ ngenyanga yesi-7+ nangenyanga yesi-10,+ kutawuba tikhatsi tekuhalalisa netekujabula kubantfu bakaJuda, kutawuba yimikhosi yekujabula.+ Ngako-ke tsandzani liciniso, nitsandze nekuthula.’
20 “Jehova wemabutfo utsi: ‘Kutawufika sikhatsi lapho khona tive kanye nalabo labahlala emadolobheni lamanyenti batawuta kulendzawo;
21 futsi bantfu labahlala kulelinye lidolobha batawuya kulelinye, bafike batsi: “Sheshisani! Asambeni siyoncenga Jehova kutsi asentele umusa, futsi sikhonte Jehova wemabutfo. Natsi nje siya khona.”+
22 Tive letinemandla kanye nebantfu labanyenti batawuta eJerusalema+ batewukhonta Jehova wemabutfo, futsi bancenge Jehova kutsi abentele umusa.’
23 “Jehova wemabutfo utsi: ‘Ngalawo malanga emadvodza langu-10 lavela kuto tonkhe tilwimi netive+ ayawubambisisa umphetfo wesembatfo semJuda,* futsi atsi: “Sifuna kuhamba nani,+ ngobe sivile kutsi Nkulunkulu unani.”’”+
Imibhalo lengentansi
^ NgesiHebheru kutsi, “batawube sebanemalanga lamanyenti.”
^ Nobe “eveni lasemphumalanga naseveni lasenshonalanga.”
^ NgesiHebheru kutsi, “ningakutsandzi.”
^ NgesiHebheru kutsi, “sendvodza lengumJuda.”
